ملجأ الحيوانات الضالة سطيف - refuge d'animaux errants Sé

15/09/2022

من فضلكم شكون يقدر يشد القط هذا مدة 3 اسابيع فترة العلاج فقط و من بعد نجيبوه للملجأ ؟ بلا ما يرجع للشارع

14/09/2022

حديقة الموت
قطة معاقة من الارجل الامامية تم رميها في حديقة المحطة ببرج بوعريريج. القطط تموت يوميا لتم. الانسانة لي صورت هذا الفيديو قاتلي ليوم دفنت 8 قطط . القطة معروضة للتبني لي يحب يتبنا يتواصل مع الرابط في الأسفل قبل ما تموت تاني.
https://www.facebook.com/profile.php?id=100073945030480

13/09/2022

منشور تحت عنوان : ما تلعبهاش مارڨ!😡😡😡

عندها ايامات اخت بعثتلنا في الصفحة ميساج تبكي. علاجال زوج قطوط واحد اسود وحدة مزرقطة. قاتلنا اديوهم قبل ما ياكلوهم الكلاب. غدوة من ذاك صورتلي واحد منهم ميت. قتلها نجي لسطيف و نديه عليك المزرقطة لي بقات و نطلعها للروفيج. ليوم ما جاتنيش الصباح باه ندي القطة. قتلها معليش. خلي نتلاقاو عشية و ندي القطة معايا للدار مؤقتا و نهار نولي لسطيف ندي القطة للروفيج. كي جاتني جاتني بقطة تيقري. قتلها هذي كبيرة و خاطية المزرقطة. قاتلي يخي قتلك على 3 قطوط. واحد مات و المزرقطة ما لقيتهاش و بقات هذي برك . انا دخلني الشك و لكن حشمت نبالطها. كي رجعت للدار نلقا نفس الطفلة حاطة قطط للتبني في جويلية و وحدة منهم التيقري هذي. سما جابتلي قطتها على اساس قطة شارع. ضرك قتلها يا تجي تديها غدوة يا نرميها. هذي وحدة من الناس لي يجو يتحايلو يقلك راني لقيت قط شارع و يجي يبكي و يحاول شدوه . هذي احد الاسباب لي تخلينا ما نشدوش قطط لي يبعثولنا عليهم على اساس قطط شارع. اصحاب الملجأ رايحين يلايمو القطط من برى لي راهم صح برى و لي راهم يتعذبو صح . لي عينو يبعث قط تاعو من الدار يسلك عليه المبلغ المشروط. لي يحوس يبعث قط شارع يتبرع بديار ولا اكل ولا يروح يساهم و يسلك جزء من دين اابيطري لي راه على مولات الملجأ. اي قط يدخل يكون بالمقابل. حتا قطط الشارع. كل واحد يتحمل مسؤولية القط لي يبعثو.

تبعو التعليقات. بلي قاتلي زوج قطط. و ليوم جاتني بقطة آخر

12/09/2022

👈👈 كمل اقرأ المنشور للنهاية.

الاغلبية يقولو بلي التعقيم جاهم غالي . رانا طلقنا في الصفحة بلي كل من يسجل انخراطه في جمعية أصدقاء البيئة و الحيوان لولاية سطيف يكون عندو خصم تاع 30% فيما يخص تكاليف البيطري و بيما فيهم عملية التعقيم. و ممكن جدا يكون كاين خصم اكبر اكبر و البياطرة يديرولكم سعر يكون في متناول الجميع باذن الله.

👈 تواصلو مع صفحة جمعية اصدقاء البيئة و الحيوان لولاية سطيف من فضلكم.

راهم يلحقونا رسائل تقريبا بشكل يومي من ناس يطلبو منا نشدو قططهم. و الله و الله و الله غير حابين نشدوهم و مذابينا القطط ما يروحش للشارع. راني حاسة بظروف كل واحد فيكم. مي الله غااالللببب. محال الروفيج يدخل الفين قط . التاويل مكاش. الاكل ناقص. الامراض تتنقل من هذا لهذا. اليد العاملة كاين غير وحدة قايمة بيهم. و لهذا راني ديما نركزلكم على التعقيم. عقم ما تحصلش . عقم ما تتحتمش ترمي قط زاد في الدار للشارع. يا خويا دير في بالك كي ترمي قط زاد في الدار للشارع راح يسوفري و يموت. ماشي كيما قط زاد في الشارع و علماتو يماه الصيادة من صغرو كيما قط زاد في الدار السرير ما يقدر يسوطي منو.

👈 فيما يخص الحكمة اذا حلال ولا حرام . حوس في قوقل ولا يوتوب و اسمع لفتوى تاع ناس قاريين و واصلين ماشي للقيل و قال تاع عجايز ما يعرفوش مامبا القبلة تاع الصلاة وين.

12/09/2022

جماعة العاصمة. ناس الخير. اخت تواصلت معانا علاجال هذا الكلب. لي يقدر يديرلو توصيل ما يبخلش. قضية ساعتين ولا 3 فقط. تنقذ الكلب. تدي الاجر. و تكمل نهارك .

11/09/2022

نشكر جميع من نوى يتكفل بالقط هذا و تحير عليه. حبيت نعلمكم بلي تم التبني من طرف انسانة تسكن في سطيف بعد. الحمد لله.

10/09/2022

نشكر السيد ESS GTI الذي تواصل معانا و قام بالتبرع بمبلغ مالي و تم استلامه من طرف رئيسة جمعية أصدقاء البيئة و الحيوان لولاية سطيف حيث 10000 دينار خصص للأكل . الحمد لله ربي سخر ناس لهذي المخلوقات باه يبقاوش للجوع. و انا نقلكم يا جماعة الخير لي يلقى حيوان ضرير يرفدو و ما يخافش على الرزق ..ربي رايح رايح يبعثلك رزق الحيوان هذا بطريقة او اخرى . و ربي رايح يديرلك طريق معاه و ما تقولش كون نهزو نحصل معاه. انتهلا فيه و ما تخافش . ربي ما يخليكش ❤️❤️

بلا ما نحطو صور الاكل هذي المرة . السيد راح لصاحبة الملجأ و شاف القطط بعينيه و شاف الاكل لي راهي تشري فيه .

السيدة التي تبرعت بمبلغ 5000 عندها ايامات و قلنا نحطو صور الاكل مع الاسف صاحبة الملجأ ما لقاتش لي يصورلها و لكن السيدة هذي لي تبرعت راحت للملجأ بنفسها برفقة رئيسة الجمعية و شافت القطط بنفسها و راهي مدايرة الثقة في اعضاء الملجأ.

10/09/2022

تعديل:

فيما يخص الفاتورات الخاصة بعلاج قطط الملجأ و الكلب التي لم تستطع صاحبة الملجأ تسديدها و التي قيمتها تقريبا خمس ملاين سنتيم. قائمة المتبرعين رايحة تكون في هذا المنشور. كل من يتبرع نديروه ظمن القائمة. و اذا واحد ما ذكرناش اسمو يفكرنا. شكرا

Chaïma gueffaf : 1000 da
Meriem hadjab: 1000 da
Farfour kouki : 2000 ( ادعو لها بالشفاء و الرزق خاوتي)
Fo Fa: 2000 da
Moh amed : 5000 da
Anonyme: 9000 da .

10/09/2022

تعديل : تم التبني الحمد لله

هذا القط لقاتو اخت برى في كاجة في باركينغ في حي تبينت قاعد فوق الوسخ تاعو و الذبان داير بيه. قاتلنا عندو 10 ايام و هو لتم. هي حسبت راهم منتهليين فيه و لكن لقات الوضع تاعو كارثي. ما داوهش مامبا للبيطري حتان داتو هي. مع الاسف صاحبة الملجأ قالت ما تقدرش تستقبلو لانو لازملو عناية خاصة و بسبب العدد الكبير تاع القطط ما تقدرش تقوم بيه كيما يلزم.
السيدة لي لقاتو تاني ما تقدرش تشدو لانها مريضة بالربو. محتومة ترجعو برى وين كان. لي يقدر يتبناه يتواصل معانا نمدولو رقم السيدة باه دلكم على مكان التواجد تاعو.

09/09/2022

📢📢ناس الخير. تعيشو. قطط الملجأ بحاجة الى أكل. الله يرضى عليكم مكاش واش ياكلو غدوة 😢. ما تخلوهمش يبقاو بلا أكل. خلاص كلش. هذي هي القائمة تاع الاكل لي ياكلو على مدار الأسبوع :
- مقارونة.
- كاركاس جاج.
- كرشة جاج.
- لونشون.
- باتي تاع جاج ( الكاشير ممنوع للقطط).
- روز.
- بيض ( للقطط الصغيرة)
- كروكات كيكي ولا top ( للقطط الكبيرة و الصغيرة ) .
- طون طبيعي لي مافيهش الملح .
- خضرة ( زروتية. جريوات. بطاطا).
- خبز يابس .
- معلبات اكل قطط ( ماشي canistar برسكو تسببلهم تسمم و التهابات في الامعاء).
- فرماج ( للقطط الصغيرة).
- لحم مفروم خاص بالقطط .كيلو يدير ب 150 دينار و هذا هو رقم السيد لي راه يبيع فيه في العلمة 0773312674 ( الصورة في الأسفل).

📌 لي يقدر يتبرع ما يبخلش من فضلكم. لي في العلمة يخلو الاكل عند صاحبة الملجأ و لي في سطيف يخلوه عند رئيسة جمعية اصدقاء البيئة و الحيوان. تواصلو معانا عبر بريد الصفحة باه نمدولكم الارقام . او خلوهم عند البيطري عادل فرطاس. و اي تبرع ديروه خبرونا عليه عبر بريد الصفحة ضروري لكي نقوم بنشره.
👈 تنويه: صفحة ملجأ الحيوانات الضالة سطيف هي الصفحة الوحيدة لي عندها علاقة بجمع التبرعات الخاصة بالملجأ. الصفحات الاخرى لي تقوم بجمع التبرعات ليس لها علاقة بالملجأ. و اي تبرع لم يترك علنا في الصفحة يعني راه ما لحقش لصاحبة الملجأ.

08/09/2022

يسر جمعية أصدقاء البيئة و الحيوان لولاية سطيف أن تعلن عن تعاقدها مع بياطرة في العلمة و سطيف من أجل توفير خدمة رفيعة بأسعار أقل لأصحاب الحيوانات الأليفة
🔴فحص وعلاج
🔴تلقيحات شهرية و سنوية
🔴 الاحتفاظ و العناية بالحيوانات في حالات السفر
🔴عمليات جراحية بكل أنواعها
كل هذا و أكثر سيكون بخصم 30% من السعر المتداول حيث ستقوم الجمعية بتغطية هاته النسبة
للأعضاء المنخرطين معنا فقط وذلك بالتنسيق مع بياطرة من:
👈العلمة: الدكتورة سراي و الدكتور موحالي من عيادة
Cabinet vétérinaire Iline-vet
👈 سطيف: الدكتور داهل حمزة. بحي تبينت.
Vétérinaire Sétif

ترقبوا أيضا إعلانا خاص بالتعاقد مع محل بيع مستلزمات الحيوانات من أجل الإستفادة من خصم آخر من أجل تدليل حيواناتكم الأليفة.

مع تمنياتنا أن تظل حيواناتكم بصحة وعافية دائما

08/09/2022

❤️❤️❤️

تتواصل سلسلة الأخبار السارة لمنخرطينا الأعزاء
نعلن عن تعاقدنا مع الأخ بلال صاحب محل
Le Monde des Animaux Setif
لاقتناء مستلزمات حيواناتكم من محله بسعر الجملة شرط تقديم بطاقة الانخراط الخاصة بجمعيتنا عند التقدم إليهم.
نشكر الأخ بلال الذي كان دائما سباقا إلى الخير و الرفق بالحيوان. نشجعكم للذهاب إليه فستجدون أحسن استقبال بإذن الله.
المحل متواجد فوق مسجد الرحمة مقابل les tours

06/09/2022

للتوضيح فقط. الحاضر يعلم الغايب.

05/09/2022

تبرعات اليوم :
اخت تواصلت مع رئيسة جمعية أصدقاء البيئة و الحيوان لولاية سطيف و قامت بالتبرع بمبلغ قدره 5000 دينار من أجل اكل القطط. السيدة فضلت ان لا يذكر اسمها. و كا العادة . كي يتشرا الاكل نحطولكم صور باه كامل يشوفو فواش راح المبلغ . ربي يجازيك مدام. و ربي يصونك .

05/09/2022

ناس العلمة . شكون يقدر يدلنا على مطعم يخلي صبة مليحة و نظيفة ماش معمرة كواغط و عظام زيتون و قشور البصلة. نحتاجوه لقطط الملجأ. الاكل ما ولاش يكفيهم.

03/09/2022

فيما يخص الفاتورات الخاصة بعلاج قطط الملجأ و الكلب التي لم تستطع صاحبة الملجأ تسديدها و التي قيمتها تقريبا خمس ملاين سنتيم. قائمة المتبرعين رايحة تكون في هذا المنشور. كل من يتبرع نديروه ظمن القائمة. و اذا واحد ما ذكرناش اسمو يفكرنا. شكرا

Chaïma gueffaf : 1000 da
Meriem hadjab: 1000 da
Farfour kouki : 2000 ( ادعو لها بالشفاء و الرزق خاوتي)
Fo Fa: 2000 da

03/09/2022

السلام عليكم. لي يعرف وين يتباع هذا المعقم في سطيف يقلنا من فضلكم. صديقة الصفحة اقترحت هذي الماركة من اجل تعقيم الملجأ. و لي يقدر يوفرلنا الرشاش يتواصل معانا. شكرا .

02/09/2022

😔 لا حول ولا قوة الا بالله . نعم . هذي فاتورة علاج قطط الملجأ و تراكمت فوق بعضاها منذ عدة شهور. مع الفاتورة تاع كلب شارع كانت صاحبة الملجأ قايمة بيه تاني. هي كانت حشمانة تطلب مساعدة و لكن الله المستعان. ضرك تحتمت . و الله ما لقيت واش نقول و كيفاه نوجه رسالتي للناس المحسنين باه يعاونو المخلوقة هذي باه تسدد فواتير تاعها. لي يقدر يعاون لشتا ب 500 دينار ولا اي مبلغ بسيط ما يبخلش . راه كلش في الفاتورة. ارقام هاتف. اسم العيادة. و حتا البياطرة لي لتم ما قصروش الحق يقال. منين كنت تقصدهم من اجل حالات ضرورية يفتحو الكابيني علاجالها حتى في اليل . لي يقدر يسلك شوية برك ربي يحفظكم يعاونها. العيادة متواجدة في العلمة.
الانسانة هذي في اليل تحط راسها فوق المخدة باه ترقد تبات تخمم كيفاه تسلك دينها و تنوض صباح تصبح تخمم كيفاه توكل القطط و منين جيب اكل.

لي يقدر يعاون عبر سيسيبي هذا هو الحساب الشخصي تاعها و اي فارسومو ديروه صورولنا روسي و خبرونا بلي هذا المبلغ راه لتسديد فواتير البيطري خصيصا
:
N ccp 0006005348 clé 69 / razika melizi

لي ما يقدرش يعاون ماديا يعاون بالبارطاج . شكرا

01/09/2022

مصاريف اخرى من اجل اكل القطط . لي راهم يقولو لاه تشدو القطط بالدراهم. لانو الاكل غالي . عشرين كيلو كروكات كيكي السعر تاعها 18000 دينار ( مليون و ثمنمية) تشدلهم 5 ايام . و لكن ليوم جابت Top باه ياكلوها لكبار و الصغار . يكسرو بيها الجوع في النهار برك باه ما يبقاوش بدون اكل . اليوم صاحبة الملجأ كردات من عند اخ مالفة تتعامل معاه (من بعد نحطولكم عنوان المتجر تاعه) معلبات و كروكات . نص رايحة تخلصو هي بمالها و نص يخلصو انسان آخر مالف يتبرع بالكروكات . هذي الماكلة لي في الصور ستقامت تقريبا 20000 دينار. تخلاص في مدة 5 ايام .

01/09/2022

الأخت التي تبرعت البارح بمبلغ . جزء منه (4000 دينار ) كان قد خصص للأكل. اليوم صاحبة الملجأ شرات بيهم الاكل حسب التالي :
2000 دينار كركاس و كرشة تاع جاج.
1600 دينار معلبات لونشون .
400 دينار حق الطاكسي.

01/09/2022

تعديل : الحمد لله . تواصل معانا اخ و داها. ربي يسهلو أمورو. كيما سهلها عليها اليوم .

جماعة الخير. صاحبة الملجأ ما لقاتش لي يوصلها من سطيف للعلمة. هبطت لسطيف تكردي كروكات تاع عشرين كيلو و ما عندهاش حتى حق النقل. شكون يقدر يرفدها من سطيف و يديها للعلمة من فضلكم ؟ لي يقدر يديها يتواصل معانا نمدولو رقمها.

31/08/2022

الحمد لله. الأخت madame S ( لم ترد ان ننشر اسمها) تواصلت مع رئيسة جمعية أصدقاء البيئة و الحيوان لولاية سطيف و قامت اليوم بالتبرع باغطية و افرشة للقطط و تبرعت بمبلغ مالي قدره 14000 دينار .
✅ 4000 دينار ستخصص للاكل ( وسيكون مبلغ شهري ثابت ) و غدا باذن الله تلقاو صور هنا. ( نشاله ربي يسهلها على صاحبة الملجأ و تلقا شكون يصورلها. لانو تلفون مسڨم ما لحقتش ديرو).
✅ المبلغ الباقي 10000 دينار سيخصص لانجاز اقفاص لعزل القطط ( المريضة و الجديدة ). شكرا ختي لانك لبيتي النداء . ربي يسترك دنيا و اخرة.

31/08/2022

هذا رد المنشور هذا :
الاولى راه كاين اكثر من ميتين قط في الملجأ . قطط شارع . ما جبناهمش من كروشنا . الثانية راه كاين زوج منشورات في صفحة ملجأ الحيوانات الضالة سطيف يقول بلي مولات الروفيج وحدها باه تقوم على ازيد من ميتين قط ما لحقتش . السيدة شحال من خطرة طيح فراش من التعب . قلنالكم واش رايكم ديرو لمة كل شهر باه نديرو خدام في الروفيج يعاون صاحبة الملجأ باه نقدرو نجيبو قطط شارع إضافة. حنا تاني يغيضونا القطط لي راهم برى يتعذبو . بصح يد وحدة ما تسفقش . طلبنا تبرعات ديار ما لبيتوش الطلب. طلبنا تبرعات نبات برك ما لبيتوش الطلب. طلبنا شكون لي يدير الشباك واحد ما رد. و هذو الصوالح لازمهم دراهم. لا ؟ أيا ولا الروفيج يجيب في قطوط الناس مقابل ما يسلكو مدام محبي القطط ما حبوش يعاونو باه ااروفيج يندارلو تاويل و يطور و يتعدل. الفاكسان طلبنا مساعدات و حد الساعة مكاش لي قال انا لي نتكفل بمصاريف اللقاحات. كيفاه الروفيج يدخل قطط جدد في وسط قطط مرضة؟ باه يزيدو يمرضو تاني ؟ طلبنا مساعدات باه تشرولنا كاجات حديد من لكبار باه نعزلو لمراض وحدهم واحد ما قال يعاون. طلبنا متطوعين يشدو القطط المريضة مؤقتا و يتم استرجعاهم واحد ما ضرب على صدرو و قال اني هنا . طلبنا باه تعاونو يندار شباك في الروفيج باه نفصلو الصغار على لكبار واحد ما قال انا نتكفل بيه. برسكو الصغار عندهم نظام غذائي مختلف على تاع لكبار . للزمهم اكل تاعهم وحدهم. كي ياكلو مع لكبار باتي يضرهم يديرلهم تسمم. و مدام حنا نعرفو هذا الشئ كامل. ااروفيج ما يستقبلش قطط مجموعات مجموعات و التاويل مكاش و المعاونة مكاش . ما ندخلوش عشرين قط على ضربة باه يمرضو ولا يتم اهمالهم. الملجأ عبارة عن مكان مكري. فرضا و لمينا خمسة الاف قط شارع و غدوة كي يخلاص الكراء و ما نلقاوش مكان لي يرفد هذو الخمس الاف قط كي نديرو؟ نحشرهم في دار وحدة ؟ ولا نعاودو نرجعوهم للشارع ؟ ولا تتبناوهم انتم؟ ولا نقدرو صح نتكلو عليكم تساهمو في الكراء باه القطط ما يروحوش للشارع؟ الضامن ربي برك. في حقكم تلومو الروفيج بصح اللوم يرجع ليكم ككل تاني لي راك قادر تعاون و لكن ماكش حاب تعاون . و باه نزيدكم حاجة الاعضاء تاع الملجا هوما حاليا صاحبة الملجأ لي عندها دين تاع ازيد من 170 مليون بسبب القطط و هي مجرد عاملة شهارة ماشي ملياردارة. و انا لي راني في ولاية اخرى و مانيش خدامة و مكاش كيفاه حتا نعاون ماديا و عندي حاليا 34 قط في الدار جهدي نقوم بيهم . و كانت حنان تاني و ماهيش خدامة و مكاش كيفاه تعاون ماديا و اعلنت انسحابها في الصفحة تاعها من جميع التبرعات . و مؤخرا رئيسة الجمعية لي كانو التبرعات يتلمو عندها هي تروح للبارك تشوف وشمن تعديلات تقدر ديرهم بالمبلغ لي تبرعو بيه "مقابل ما بعثولنا قطط" .

29/08/2022

نشكر الصديقة و الاخت loulou Katy التي تبرعت صباح اليوم بمبلغ قدره 5000 دينار.
قيمة 8 معلبات باتي : 1000 دينار .
كركاس دجاج : 2000 دينار .
كرشة دجاج : 2500 دينار .
500 دينار: داها مول الطاكسي .
خاوتي ، ممكن طلب. كل من يشوف هذا المنشور ادعيو لإبن السيدة التي تبرعت الشفاء العاجل . يا ربي اشفيه . يا ربي اشفيه. يا ربي اشفيه. ادعيولو دعوة من القلب . و الله تستاهل.

29/08/2022

📢 نداء عاجل لمحبي القطط و البياطرة ايضا: عدد كبير من قطط الملجأ مريضة و خاصة الصغيرة منها 💔 . لازم متطوعين يشدو المرضة مؤقتا حتان يبراو و يتم استرجاعهم . صاحبة الملجأ وحدها ما قدرتش و ما لحقتش الله غالب . يكملو هكا بدون علاج في وقتو تزيد تتدهور صحتهم اكثر و اكثر و يموتو .

✅ لي يقدر يتبرع باللقاحات ( les vaccins ) يتواصل معانا ولا مع صفحة جمعية أصدقاء البيئة و الحيوان لولاية سطيف بحظور بياطرة تابعين للجمعية .
✅ لي يقدر يتبرع بكاجات من لكبار لعزل القطط ( المريضة. الجديدة . و المرضعات) يتواصل معانا عبر بريد الصفحة . مكاش تاويل بواش نشرو الله المستعان. و كل تبرع ديروه اعلمونا بيه و راكم تلقاوه هنا منشور في الصفحة .
✅ لي يقدر يعاون في الشباك باه نعزلو الصغار على لكبار بسبب النظام الغذائي المختلف و حتى المناعة تاع الصغار و الكبار ماشي كيف كيف. من فضلكم عاونونا نحميوهم .

هذا الامر راه من أجل فائدة القط في حد ذاتو. ماشي لينا . و الله غير يقسمو القلب تشوفهم هكاك شادين زاوية و فاشلين يتألمو في صمت و يستناو في الموت. " القطط "راهي بحاجة الى مساعدات .
جماعة الخير ، كل واحد فيكم يبارطاجي و يطاڨي البياطرة لي يعرفهم في المنشور الله يرضى عليكم. لي عندو صلة مباشرة مع المخابر التي تصنع اللقاحات ولا مع البائعين بالجملة يخلينا رقم هاتف ولا عنوان باه تتواصل معاهم الجمعية .

28/08/2022

28/08/2022

السلام عليكم
الجمعية تفتح باب التبرعات لفائدة ملجأ الحيوانات الضالة سطيف - refuge d'animaux errants Sétif للمساعدة في إطعام القطط هناك.
نحتاج كميات كبيرة من لونشون بلاط "دجاج" غير حار Bellat لتغطية احتياجات قطط الملجأ من الوجبات المتوازنة.
كل من يستطيع توفير ولو وحدة واحدة فلا يبخل بها على قطط الملجأ. و جزاكم الله خيرا.

27/08/2022

عندها 10 ايام هكاك اخت ( اسم حساب الفايسبوك " كلام صريح واقعي" ) قامت بالتبرع بمبلغ 35000دينار و ذللك كان مقابل 7 قطط. 10000 دينار خصصت لأكل القطط . و المبلغ الباقي خصص لأجراء تعديلات في البارك . رئيسة جمعية أصدقاء البيئة و الحيوان لولاية سطيف يعطيها الصحة قامت باحضار فريق لانشاء غرفة إضافية من اجل القطط المريضة التي يجب فصلها عن القطط الاخرى السليمة.

25/08/2022

جماعة الخير شكون يقدر يشد القط هذا و يطلعو للعلمة لوحدة و هي تديه للروفيج ؟

25/08/2022

سلام عليكم. قطط الملجأ المريضة بحاجة الى رعاية. نحتاجو متطوعين يشدو القطط المريضة حتان يرتاحو و نعاودو نسترجعوهم. كاين قطط لازمهم ياخذو العلاج تاعهم مرتين في اليوم . راهم كاين المرضة بزاف و مولات الروفيج ما لحقتش وحدها. رانا في جماعة و كل واحد راه حاط عرام قطط في دارو. أنا شخصيا باقيلي 32 قط في الدار و المشاكل واصلين فوق راسي مع الاهل تاعي. لي يقدر يطوع يتواصل معانا عبر بريد الصفحة. الناس لي بعثولنا و حابين يعرفو العنوان قلتو باه تطوعو و تعاونو . برهنولنا بلي النية تاعكم المعاونة.

24/08/2022

😭😭😭يعجز اللسان عن التعبير . تواصلت معانا السيدة Akil Warda من اجل تبرعات قامت بيها اليوم. و راح خونا أمين عضو من جمعية اصدقاء البيئة و الحيوان سطيف من العلمة ليها لسطيف باه يجيب الشي لي تبرعت بيه. ربي يجازيك خويا و نتي يا ختي و الله كيما فرحتينا ربي يفرحك و يفرح العائلة تاعك. و الله ما لقينا كيفاه نشكروكم. في ميزان حساناتكم. الدنيا فانية و ما يدوم غير العمل الصالح. كل انسان راه يتبرع يدير في بالو راه قام باطعام 300 قط. صدقة على 300 قط عاناو الكثير في الشارع . ربي يحفظكم خاوتي. 😢 . كي يشبعو مساكن الدنيا و ما فيها .

24/08/2022

محبي القطط. مدام الروفيج ما يقدرش يزيد يستقبل قطط منازل اخرى في الوقت الحالي من فضلكم لي عندو قطط صغيرة يحطها للتبني. و الامهات عقموهم يرحم والديكم. راه كل يوم يلحقونا رسائل من نوع " شدو علينا 5 قطط ولا نرموهم" . الحل الافضل هو التعقيم. لي يحوس يفهم اذا حلال ولا حرام يبحث في الامر جيدا قبل إصدار احكام. ما تبعوش قيل و قال بلا ما تبحثو . الاكل راه ناقص و عبد واحد تروح توكل القطط. راهي تعبت و تهلكت. الامور راهي خرجت عن السيطرة بسبب العدد الكبير. مكاش واش يزيد الروفيج يرفد. مام اذا كاين ليستاع مي الله غالب . انسانة وحدة دور عليهم. عيات. ارحمو من في الارض يرحمكم في السماء. كي نرحمو القطط و نجيبوهم للروفيج و هي مسكينة شكون يرحمها؟!!! بزاف عليها مسكينة . راهي ظل عند البياطرة . تقريبا بشكل يومي. كي يمرضو عشرين على ضربة هذو لازمهم عناية . لا؟ هي وحدها ما قدرتش . تعبت. لي يحب يشد القطط المريضة مؤقتا يعلمنا. لي يشوف روحو قادر يروح يوصلها للروفيج يوميا يعلمنا تاني. راهي كل يوم تروح اكثر من 150 الف في الطاكسي . برسكو الملجأ راه في منطقة نائية و مكاش نقل يدي لتم . لي يقدر يدير شهرية لكاش زوالي و يبعثو يخدم في الروفيج و يعاون المخلوقة يعلمنا . و قد ماتكون المعاونة قد ما الروفيج يقدر يستقبل قطط متضررة اخرى . بزاف يبعثولنا و يقولو راه عندي عشر قطوط و تعبت معاهم. كيفاه نت عشرة يتعبوك و هي ثلاثمئة ما يتعبوهاش؟ نرجو منكم تكونو منطقيين و تشوفو في صاحبة الملجأ بنظرة رحمة . راني نزيد نعاودلكم راهي تعبت جسديا و نفسيا . و باه نبقاو غير نزيدو في عدد القطط و من بعد يتم اهمالهم حرام علينا تاني . لي يحب يعاون يبعثلنا. لي يقلنا عندي قطط شدوهم علينا ماناش رايحين نزيدو نردو عليهم .و الله عيينا من نفس الهدرة. اعذرونا.

23/08/2022

ربي حنين كريم. الرزق على ربي . اليوم صاحبة الملجأ صبحت تخمم واش توكل القطط. رزق القطط بعثو ربي بفضل ناس كرماء . ناس تواصلو مع صفحة حماية الحيوان سطيف باه يبلغوها على التبرعات التي تركت عند البيطري عادل فرطاس. تم استلام التبرعات من قبل صاحبة الملجأ هذا المساء. شكرا لكم ❤️❤️.
و نشكرو الاخت soumia loutari تبرعت البارح بمبلغ 3000 دينار و تم استلامه من طرف رئيسة جمعية اصدقاء البيئة و الحيوان سطيف . المتبرعة طلبت انو مبلغ 2000 نشرو بيه كركاس جاج و 1000 للدواء. ليومين هذو نشرو بيهم واش طلبتي ختي. و رانا نحطولكك صور هنا

22/08/2022

السيد zakaria Blla تواصل معانا باه يخبرنا بلي بعث التبرعات مع انسانة مجهولة راحت شرات من عندو الاكل تاني للملجأ.
بي يحفظ كل انسان تبرع ليوم. يرحم والديكم و ربي يستركم . تم استلامها و ارسالها الى صاحبة الملجأ. القطط عندهم واش يتعشاو اليوم الحمد لله. و عندهم دواهم باه . يكملو العلاج. تلقاوها عند ربي خاوتي. شكرا ❤️❤️

22/08/2022

ناس العلمة. ناس الخير. لي عندو خبز كمية كبيرة ما يحتاجهاش. و لي يقدر يتبرع بالاكل لقطط الملجأ يتواصل مع الرقم التالي: 0552795313
هو يجي يرفد عليكم واش كتب ربي و يوصلو للملجأ. و كل شخص يتبرع اعلمونا عبر بريد الصفحة بواش تبرعتو باه نحطو كلش علنا . جزاكم الله خيرا.
فرحو القطط مساكن. يحوسو غير يعمرو كروشهم و يحكمو قرنية و يرقدو .

21/08/2022

هذي فيديو قصيرة باه الناس تهز فكرة على عدد القطط تاع الملجأ . و لي راهم في الفيديو ماهمش حاضرين كامل. وحايد اخرين كانو يدورو لتم في البارك. و صاحبة الملجأ عندها 60 قط مريض في الدار. و 40 اخرين في دار اخرى عند ناس يقومو بيهم. و 20 صغار عند حنان صاحبة صفحة حماية الحيوان سطيف. هذو منين جاو ؟ هذو قطط شارع تاع انقاذ. كل قط و حكايتو. و هكاك الناس يهدرو و يقولو بلي الملجأ راه يشد في التبرعات و ماش يشد في القطط. التبرعات تاع الاكل راهي مكاش. او بالاحرى قليلة بزاف .ربي يجازي زوج عباد لي راهم يتبرعو بشكل مستمر مي هكاك و ما يكفيش. واحد من هذو الزوج اليوم اليوم الحمد لله تبرع بصاشي كروكات تاع 20 كيلو لي تشدلهم 5 ايام كوجبة إضافية فقط يكسرو بيها الجوع في النهار.. و ديرو في بالكم بلي انسانة وحدة اسمها رزيقة تروح توكل هذو كامل و لازم تتوله لشكون لي كلا و شكون ما كلاش.و تتوله لشكون لي مريض و شكون لي لباس . سما كي نقولولكم الملجأ راه ما يقدرش يستقبل اي قط تبعثولنا عليه نرجو منكم التفهم ايها المحسنين. الروفيج راه بحاجة الى دعم ماشي الى قطط إضافية من فضلكم . لي يلقا قط يحاول يلقالو عائلة تتبناه. تسوفريو شوية مي في النهاية تلقاو متبني. و لي يقلي لاه ما جيبوش متطوعين نقولولكم مذابينا تعاونو نديرو شهرية لكاش زوالي يجي يعاون صاحبة الملجأ .من جهة تدو الاخر على الزوالي هذا من جهة تدو الاجر على القطط. لي يقدر يعاون يتواصل معانا عبر بريد الصفحة.

21/08/2022

من فضلكم ما تنساوهمش

20/08/2022

https://www.facebook.com/101784049152995/posts/147027044628695/

20/08/2022

الحمد لله انسانة طيبة قامت بالتبرع بالدواء حسب القائمة التالية :