08/05/2023
اغلب اللي بيربوا كلاب بيحتاروا ف موضوع الاكل…اسئلة زي احطله اكل اد ايه ف اليوم؟ ياكل كام وجبة؟ هو ينفع الكلب ياكل كذا؟ بتشغل بال اغلب المربيين وف الاخر بنحاول ناخد معلومة من حد تاني مربي كلب بس سابقنا بخطوات بسيطة 😊
يمكن اللي بيأكل دراي فود معندوش مشكلة لانه بيقدم للكلب الكمية اللي مكتوبة على العبوة انما اللي بيأكل ني او مطبوخ بيحتار
اللي مهتم بالموضوع ده يتابع الصفحة ف الفترة اللي جاية واحنا هنحاول نجاوب على اغلب الاسئلة 🦮
خلينا نتفق ان كمية اكل الجراوي بتختلف عن الكلاب الكبيرة من نفس الفصيلة،
كمية اكل الكلاب صغيرة الحجم بتختلف عن الكلاب متوسطة الحجم والكبيرة…
✅ بس القاعدة الاسهل والاصح هو تقسيم الكلاب بمستوى النشاط اللي بيعمله الكلب يومياً
يعني نقسم الموضوع ل ٤ انواع…
1️⃣ نوع نشيط جدا وده اللي بيجري كل يوم مع صاحبه ساعة وبيلعب وقت طويل وحركته كتيرة
2️⃣ نوع متوسط الحركة وده بيتحرك باجمالي من نص ساعة لساعة مقسمة على نصين مشي او رياضة وده بيكون كفاية ان طاقته تخرج
3️⃣ نوع شبه مش بيتحرك يعني يادوب بياكل ويتحرك بسيط واغلب الوقت بيكون هادي مش بيلعب وطاقته مش عالية
4️⃣ الجراوي بتاكل ٥-٦٪ من وزن الكلب الكبير من نفس الفصيلة
عشان بقى نحسب كمية اكل الكلب هنعمل معادلة بسيطة جدا وهي اننا هنشوف وزن الكلب ده المفروض يكون كام وهو كبير وفقاً لفصيلته ونحسب ٣٪ من وزنه للنوع ال 1️⃣ و ٢.٥٪ للنوع ال 2️⃣ و٢٪ للنوع ال 3️⃣
مثال:
⭕️ كلب جولدن ريتريفر المفروض ياكل اد ايه ف اليوم
✳️ الكلب الجولدن ريتريفر الكبير لو ولد ف وزنه بيكون حوالي ٣٤ كيلو ولو بنت بيكون حوالي ٣٢ كيلو
وبالارقام اللي فوق دي يبقى:
🐾 الجرو ف كل الاحوال ٥-٦٪ يعني حوالي كيلو و٧٠٠ جرام اكل (شامل التريتس) ف اليوم
🐾 كلب نشيط اوي هيكون ضمن النوع الاول وهياكل حوالي ١ كيلو ف اليوم
🐾 كلب متوسط النشاط هياكل حوالي ٨٥٠ جرام اكل يومياً
🐾 كلب قليل النشاط/هادي اوي هياكل حوالي ٦٨٠ جرام يومياً
◀️ اما بخصوص الكلاب البلدي ف اغلب الكلاب البلدي متقسمة يا كلب حوالي ٣٠ك يا كلب حوالي ٢٠ك وهنعمل معاهم نفس الحسبة
