23/10/2023
#أشهر صور #الغش
التجاري في بيع وشراء الخيل العربي.
بإذن الله كل يوم هكتب صورة من الصور دي
وطبعا كل صورة ممكن تكون عن قصد او غير قصد
ولم اقصد بذالك حالة معينه او اي شخص.
اول صورة وهي انك تلاقي حصان معروض للبيع
ويتقال عربي أصيل ومعاه ورق
والحصان شكله حلو جدا ومميز
المهم انت كمشتري تسأل معاه ورق يقولك ايوه وكله تمام
طيب سعره كام يقولك مثلا كذا فانت تبقى متسربع علشان تلحق تخلص فيه
تروح تشوفه ويعجبك وتشوف الورق وكله تمام.
اشتريت الحصان ومشيت على البيت وكله تمام
يوم والتاني الحصان ممتاز ومزعلكش في حاجه
قلت تنقل ملكيته بقى.
اخدت المبايعة والشهاده ورحت على محطة الزهراء
سلامه عليكوا وعليكوا السلام
اامر
عايز انقل ملكية الحصان ده
اتفضل
ياخد منك المبايعه وبعد شويه يقولك تمام المبايعة مظبوطه
فانت تتنهد كدا وتتبسط
مصاريف النقل حاجه بسيطه
وتم نقل الحصان على اسمك الف مبروك.
خلاص رجعت وكل يوم تركب الحصان ومبسوط جدا.
بعد فتره ما قابلك حد عنده فرس عربي أصيل وسألك الحصان ده عربي أصيل
قلتله بكل ثقه ايوه طبعا ومعاه الشهاده ومسجل باسمي كمان
هيقولك طيب ممكن اطلق منه.
تحت امرك طبعا
بعد 11 شهر يتولدله مهر او مهره ياخد اخطار الطلوقه ال فيه اسم حصانك الجميل ويروح يبلغ انه اتولدله مهر او مهره ويدفع المصاريف ويتاخد العينه من المهر او المهره وياخد ميكروشيب في الرقبه
وبعد خمس ست شهور تاني غير ال 11 شهر بتوع العشار تطلع العينه خطأ في اسم الأب
يسأل ازاي
يردوا عليه الاب غلط
يسالك على اسم الحصان تبعتله الشهاده نفسها يقولهم اهو اسم الحصان اهو
بردوا غلط
من هنا تبدأ تقلق والموضوع بدأ يتكشف
تجيب ميكرو شيب علشان تقرأ الرقم
تلاقي مفيش ميكروشيب اصلا.
طيب ايه الموضوع
الحصان ال حضرتك اشتريته على الورق مش موجود اصلا اما مات او ده ورق مسروق او اي حاجه
والحصان ال عند حضرتك للأسف حصان بلدي.
بإذن الله اخر منشور هبين فيه الطريقه السليمه والأمان في الشراء
ملحوظه الفرس ال في الصورة دي بلدي وكانت فرستي
ومش كل حصان مرسوم يبقى عربي ولا كل حصان متبهدل يبقى بلدي
يارب يكون حد استفاد
نقلا عن :
