In Safe hands shelter

20/06/2023

الحلوين 😻😻

17/06/2023

16/06/2023

دول حالتين قطط
واحده قطه شارع والتانيه قطه بيت متسربه ..الاتنين عملوا حوادث
قطه الشارع اديها اتبترت واديها التاتيه مع رجل اتعوروا جامد ..
قطه البيت فكها اتكسر ..
الاتنين اخدناهم وعملنالهم اللازم واديناهم الاهتمام والرعايه بشكل خاص لانهم حالات صعبه ..
قطه الشارع كان عندها اراده وعايزه تعيش
قطه البيت نفسيتها زفت وكارهه الدنيا ومش عايزه تتعالج.ايه ياعم هاني انت دماغك لسعت ولا ايه ..هو ايه ده اللي عايزه تعيش ومش عايزه جبت الكلام ده منين ..
والله دي حقيقه ..في حيوانات بتتمسك بالحياه وتستجيب للعلاج وحيوانات بترفض الحياه وخصوصا اللي كانوا عايشين في بيوت واتسربوا ..بتبقي عندهم حاله زهول وخوف ومابتستجيبش لاي علاج ..ممكن ناس تعترض علي كلامي خصوصا الاطباء والمتخصصين وهايعتبروه كلام غير علمي ..بس بعد تجربتي مع عشرات الحالات ويمكن مئات كمان اتاكدت من اللي بقوله ..
دول الحالتين ..قطه الشارع عاشت وبقت تمام وقطه البيت للاسف ماتت النهارده بعد ماتعبنا معاها جدا علاج ومحاليل واهتمام بس هي رفضت للاسف وكانت عايزه تموت

25/05/2023

في سنة 1995 ، تم إطلاق" 14 ذئبــــــا" في منتزه يلوستون الامريكي الوطني ، مساحته ضخمة حوالي 4000 ميل مربع ، لم يشك العلماء بتغيير النظام البيئي للحديقة بالكامل بشكل جذري .
لم يكن هناك ذئاب في الحديقة لمدة 70 سنه ، فساد الغزلان هناك طول ذلك الوقت ، على مدار سنين من التكاثر غير المنضبط تم إلحاق أضرار جسيمة بالحياه النباتية ،
طبعا الذئاب الــ14 لم تأكل كل الغزلان ، لكن أجبرهتم على اختيار أماكن للرعي بعناية وتجنب بعض أجزاء الحديقة ، بدأت النباتات في النمو والحياة . لمدة 6 سنين ، زاد عدد الأشجار خمس مرات ، ظهر القنادس التي تحتاج الأشجار لبناء السدود علي المجاري المائيه والانهار . ظهر الفطر والبط والأسماك في المناطق النائية ، قللت الذئاب من حيوان ابن آوى ، فأدى لزيادة في عدد الأرانب البرية والفئران ، و بدورها اجتذبت الصقور والنسور والثعالب والدببة إلى الحديقة ،
لكن الأكثر إثارة للدهشة أن الذئاب غيرت مجرى الأنهار . قنواتهم تم تقويمها واستقرت ، انخفض التآكل الساحلي حصل كل هذا لأن تأثير الذئاب على الغزلان أدى إلى النمو الهائل للأشجار والعشب على ضفاف الأنهار ، مما أدى إلى تقويتها تغيرت جغرافية المتنزه نفسه ، بفضل الذئاب الأربعة عشر.
لا شيء خلق عبثا.

22/05/2023

الحالات كتيره جدا ومبنقدرش نسبها ابدا لمصيرها💔 ...ياريت اصحاب القلوب الرحيمه تساعدنا على الحمل الكبير ده علشان نقدر نكمل الى بدأناه

21/05/2023

شير وافضخوا المجرمين دول

19/05/2023

في اسابيع كده مايعلم بيها الا ربنا
من اوله لاخره حالات صعبه
من كلب عنده ديستمبر مرمي في الشارع
لجرو عامل حادثه وعينه طلعت بره
وكلب عالدايري مخبوط من عربيتين وجاله شلل
كلب الجندول اللي عنده جرب
لكلب مخبوط ومتعور في ضهره ورجله مكسوره
لكلب الحامعه اللي اتخبط وعينه راحت
وكلب المستقبل المشلول اللي صاحبه رماه
وكأن الاسبوع حالف مايخلص الا لما ينكد علينا
كلب كان من فتره عامل حادثه وجاله كسر في الحوض واخدناه وعالجناه ورجعناه مكانه من حوالي تلت او اربع شهور ..النهارده عربيه خبطته وجاله كسر في العامود الفقري وقطع في النخاع الشوكي يعني شلل للاسف ...
تمن حالات كلهم اصعب من بعض في اسبوع
دي الحالات الصعبه بس علي فكره وفي غيرها حالات كتير بس اسهل منها
للاسف مافيش مساعدات او دعم مادي لينا لتغطيه حتي نصف مصاريف الحالات دي .
للاسف اغلبها اللي شافوها وبلغونا ولا ساعدوا بعشره جنيه ..وكأننا المفروض نقدر ظروف الناس الصعبه بس احنا عادي ظروفنا فل ولوز العنب ..قلبنا مش ممكن يطاوعنا نشوف حالات كده ونسيبها لاننا متاكدين تماما ان محدش في البلد هايتحرك ويتصرف غيرنا وكله اونطه في اونطه
دي صور لكل الحالات

16/05/2023

الحمد لله كلب الجندول اخد البرشامه بتاعت الجرب بمساعده الكاتشر Eslam Aly لان الكلب جبان جدا وحاولنا نديهاله في الاكل كان بيجري ..قدر اسلام بمهاره عاليه ماشاء الله يخدره علي بعد حوالي سبعه متر لانه حرفيا مابيسمحش بمسافه اقل من كده ومسكناه واديناهاله زي ماهاتشوفوا في الفيديو

03/05/2023

كلنا بنشوف القطط الصغيره في المحلات وبنتضايق جدا من الاهمال فيها وبتبقي متبهدله وجعانه وعيانه ..وبنهاجم اصحاب المحلات اللي هم طبعا مسئولين عنها بشكل كامل ..
لكن ..ماسألناش نفسنا القطط دي مصدرها ايه ؟ وجتلهم منين ؟
هل اصحاب المحلات بيحوزوا القطط وتخلف ويبيعوا عيالها ؟ ماظنش طبعا ان ده بيحصل
اقولكم انا بقه المصدر ايه
ناس كتير بتربي قطط وتفضل تجوزها وتخلف وبمجرد مايتموا ٤٥ يوم ياخدوهم يبيعوهم للمحلات بمقابل دراي ورمله او اي مشتريات وبكده يبقوا خلصوا منهم ووفروا جزء كبير من مصاريفهم ..وطبعا النتيجه ان اغلب القطط دي بتتعب من الاهمال والقذاره اللي بيعيشوا فيها ..وطبعا الناس دي لو قلتلهم تعقيم يقولوا لا حرام ..علي اساس ان بيع القطط حلال ..وعلي اساس ان اللي بيحصل للقطط في المحلات حلال ..
ياريت الناس اللي بتعمل كده تتقي الله وتراجع نفسها وتكلف خاطرها وتعدي تشوف القطط بتاعتها بعد شويه منظرها عامل ازاي يمكن تصعب عليهم ومايعملوهاش تاني ..
للاسف ناس كتير بتربي قطط وكلاب وماعندهومش ذره رحمه ولا انسانيه

13/04/2023

من اجمل الحاجات اللي ممكن تفرحنا لما بيكون عندنا كلب بيتعالج وحالته خطيره ويخف ونرجعه منطقته تاني ..
النهارده مشوارنا مع معزه (بضم الميم) انتهي ورجعناها لمكانها واهلها وناسها ..كانت من اصعب الحالات اللي اخدت مجهود مننا كلنا ..ناس كتير شاركت في الحاله سواء بفلوس او بمجهود ..طبعا شكر خاص للاخ والصديق دكتور محمد سمير عياده K9 ودكتوره رضوي الشاطره المجتهده جدا لانهم تعبوا قوي معاها واهتموا بيها جدا ..كانت بتروح بشكل شبه يومي للغيار عالجرح وده كان موضوع صعب ومجهد بشكل كبير ..
الصور للجرح من اول يوم لحد النهارده وهي في الطريق لمكانها بفضل الله
فيديو الرجوع في اول كومنت
Mohamed S Selim

05/04/2023

شوفت ڤيديو مُنتشر لقط طالع على كتف إمام المسجد اثناء صلاة التراويح وسابه زى مهو على كتفه منطروش ولا هزه علشان يقع من على كتفه لا سابه لحد منزل لواحده . ❤️

- وأنا بشوف الڤيديو أفتكرت واحد من أحد علماء المسلمين إسمه الشيخ " أحمد الرافعي " فـ يوم كان نايم ف المسجد فجت قُطه نامت علي كُم جلبيته .. فـ الأذان أذن للصلاه والقُطه نايمه .. وهو خايف يزعجها ويقومها من نومها فعمل تصرف عجيب .. قطع كُم جلبيته اللي نايمه عليه القُطه وقام أتوضي وصلي !! .. ورجع لقي القُطه قامت .. فمسك الكُم اللي قطعه .. وخيطه تاني في جلبيته وقال " رجعت عبائتي كما كانت " !! ..

وبمناسبة الڤيديو برضو .. الأمام "بن عثيمين" .. كان ديمًا يقف قدام باب بيته قُطه تستناه وهو خارج علشان يديها أكل .. وفـ يوم مكنش في أكل في بيت الأمام بن عثمين .. فعلشان ميجرحش إحساس القُطه بانه يقطع عادته وميأكلهاش .. لٓف وخرج من الباب الخلفي للبيت بتاعه واستخبي منها . .

- سيدنا أبو هُريره إتسمي أبو هُريره لأنه كان بيحب القُطط جداً وكان عنده ' قُطه ' وديمًا بتكون في كُم اللبس بتاعه .. علشان كدا سموه أبو هُريره .. يعني كأنها بنته وهو أبوها من حُبه للقط ..اللى بيحب القطط وبيعيش طول عُمره بيحبهم وبيخدمهم مش تافه ولا عبيٕـ.ط دى رحمه والرحمه مش ضعف ولا عيب دى هى أهم حاجه ف الإنسان بتميزه وكفايه إنها من صفات الرحمن

"إنهم من الطوافين عليكم والطوافات"


🤍

03/04/2023

02/04/2023

انتوا عارفين يعني ايه حالتين بس لقطه وكلبه عايزين يوميا ٣٧٠ جنيه علاج وتخدير وغيارات جروح🥹
ده غير باقي الحالات والاكل واي لوازم تانيه
ولا ينفع نسيبهم يتعذبوا ويموتوا في الشارع ولا احنا نقدر عالحمل الكبير ده ...معضله كبيره بسببها عماله ديوننا تتراكم ..

31/03/2023

اسباب ضياع القطط كتير ..ياريت الناس تاخد بالها بقه علشان ماترجعش تزعل ..
١- الناس اللي ساكنين في دور ارضي غالبا القطط بتضيع
٢- مانسيبش قطط في بلكونات لو دور واطي بتنط ولو لور عالي بتقع وتتكسر
٣- حد في البيت مابيحبش القطط فبتضيع بالقصد ..لازم علشان تتبني قطه كل البيت يكون موافق
٤- نعقم القطط
٥- مانخرجش بالقطط سيبوها في البيت مش هاتزعل علي فكره
٦- مانديش القطط لحد مانعرفوش علشان تتجوز
٧- مانسيبش القطط عند حد علشان مسافرين سيبوها في البيت وحطوا اكل وميه كتير وحد يبقي يعدي كل تلت ايام
٨-نعقم القطط
٩-قبل ماتتبني قطه او كلب افهم الموضوع كويس واعرف عنه كل حاجه قبل ماتاخد القرار علشان لو مش قدها بلاش
١٠- نعقم القطط ..نعقم القطط ..نعقم القطط

24/03/2023

مش هتخسرو اى حاجه لما تحطلهم اكل حتى لو فضلات اكلكو والله هيكلو وهيرضو باى حاجه احنا فى ايام مفترجه متنسهمش ..بيكونو ميتين من الجوع والعطش والله 🥲😔

16/03/2023

الحمد لله رجوع بندق للشارع وسط اهله بعد العلاح

08/03/2023

حكايه كلب جيرمين من عشرات الحالات اللى بتواجهنا يوميا بعد ان يتم التخلى عنهم ....بدعمكم هنقدر نكمل الى بدأنا فيه.

02/03/2023

كليه الطب البيطري جامعه قناة السويس ..
عرفنا ان هناك كلاب يتم جلبها للكليه بواسطه تروسيكلات ودفع مبلغ مالي في كل كلب ..وتسائلنا عما يحدث معهم لاننا سمعنا اشياء يصعب تصديقها
قمنا بتحديد موعد مع السيده عميده الكليه وبالفعل قمنا بالمقابله وبحضور لفيف من اساتذه الكليه ورؤساء الاقسام ..
علمنا منهم بالطبع ان هذه الكلاب لمساعده الطلاب والباحثين في امور علميه ...علي سبيل المثال وليس الحصر وعلي لسان الموجودين في المقابله ..
نقوم احيانا بعمل كسور في عظام الكلاب (تحت تاثير المخدر طبعا ) وذلك لعمل دراسات تخص تركيب الشرائح والمسامير العظميه ونقوم بعد فتره بفك هذه الشرائح او المسامير (طبعا حاولوا يقنعونا باهميه ده لدراسه مدي تاثير مش عارف ايه علي ايه ) واحنا طبعا غير متخصصين ومش من حقنا نقاوح
وان الشرايح مش بتتشال علشان تستخدم تاني طبعا !!
طب وبعد كده يا دكتور ؟
بيتم اعدام الكلب اعدام رحيم
الكلام ده علي مسئوليتي واتقال امامي
طب ما علينا من اللي فات
احنا يا دكاتره كل اسبوع تقريبا عندنا حالات كسور ماليه الشوارع بنلاقيها نتيجه الحوادث ..ممكن نتواصل مع بعض وبدل ماتجيبوا كلاب سليمه تكسروها هانجييلكم كلاب مكسوره ..وهنا الكل يستفيد
انتوا تعملوا ابحاثكم
والكلب يتعالج
واحنا وفرنا فلوس العلاح بره
ونعيش في ثبات ونبات العيشه تبقه فل
بس
تاخدوا الكلب يتعالج ونستلمه تاني
تمام اتفقنا
بعد اقل من اسبوع بدأنا بحاله كلب مكسور ارسلت الاشعه للدكتور اللي تم اختياره للتواصل معايا بهذا الشأن ..
وبعدها بفتره قصيره ارسلت اشاعه اخري لحاله تانيه ..
المفاجأه انه عدي عالموضوع ده شهرين من اول تواصل يعد المقابله وارسال الاشاعات وحتي الان لم يتم الرد وماكان يحدث مازال مستمر ..
كلاب بتيجي من بره سليمه علشان تتكسر وتموت
الخلاصه
بعد ماقابلنا قبل كده مسئولين في مديريه الطب البيطري
وقابلنا مسئولين في كليه الطب البيطري عرفنا حاجه واحده ..ان مافيش فايده
تعديل ..
استكمالا لنفس الموضوع ولكن مع الجهه الاخري المسماه بمديريه الطب البيطري ..صحينا الصبح علي ناس بتكلمنا الحقونا سموا الكلاب في الحته عندنا وفي خمسه ماتوا واتنين لسه وفي جراوي لسه مولوده ماتت امهم ..
جرينا لحقنا الاول اللي ماماتوش واخدنا الجراوي طبعا لانهم اصبحوا بدون ام ..
ايه بقه الموضوع ..الكلبه الام كانت تقريبا بتهاجم الناس اللي تقرب من الحته اللي فيها عيالها لان ليها عيال اتاخدوا قبل كده ...تمام ...احنا برضه مايخلصناش ان الناس تتأذي ...متفقين مع الساده في الطب البيطري في مثل هذه الحالات يبلغونا واحنا هانتصرف ..
المهم ..بعد اللي حصل كلمنا دكتور حامد الاقنص نقيب البيطريين ..ليه كده يا دكتور ..اصل الكلبه عضت محاميه داخله المخكمه ونائب الوزير كلمني ...
طب يا دكتور ماكلمتوناش ليه واحنا نتصرف وايه السرعه دي ..يعني يبلغوكم الصبح بعدها بساعه تسموهم !!!
انتوا عايزين نائب الوزير يكلمني وانا ارجعلكم !!! روحوا كلموه هو (لحد دلوقتي مانعرفش نائب وزير ايه ؟ الصحه ولا العدل ولا الزراعه ولا الاسكان والتعمير حتي )
وماتت الكلبه اللي عليها الشكوي ومعاها اربعه تاني بالمره ..
ملحوظه
الناس في الحته والعيال الصغيره زعلانين جدا جدا وهم اللي كلمونا علشان نلحق اللي ماماتوش ووقفوا معانا وكل كلب ليه اسم عندهم وحاجه زي الفل
الخلاصه برضه
مافيش فايده في الناس دي
تعديل تاني شكلنا مش هانخلص
السيد الدكتور بيدعي انه ارسل دكتوره لتحري البلاغ ومعرفه هل الكلبه مصابه بالسعار ولا لأ وان بتوع الرفق بالحيوان هاجموها بالمطاوي 😂😂😂
ماهو حاجه من اتنين ..اما الدكاتره بتوعك بيشتغلوك ويكذبوا عليك
او ان حضرتك اللي بتحاول تقول اي كلام وخلاص
هو يافندم لو حد فينا موجود كنتوا عرفتوا تعملوا كده !!
ولما احنا بلطجيه كده ازاي عرفتوا تسموا الكلاب واحنا واقفينلكم بالمطاوي علي حد قولك
من فضلك يا دكتور بلاش نقول اي ادعاءات كاذبه وكل كلمه احنا كاتبينها مافيهاش اي تلفيق ولا ادعاء
احنا حاولنا كتير نتعاون معاكم لكن للاسف انتم بتقطعوا كل الخيوط ...

01/03/2023

كليه الطب البيطري جامعه قناة السويس ..
عرفنا ان هناك كلاب يتم جلبها للكليه بواسطه تروسيكلات ودفع مبلغ مالي في كل كلب ..وتسائلنا عما يحدث معهم لاننا سمعنا اشياء يصعب تصديقها
قمنا بتحديد موعد مع السيده عميده الكليه وبالفعل قمنا بالمقابله وبحضور لفيف من اساتذه الكليه ورؤساء الاقسام ..
علمنا منهم بالطبع ان هذه الكلاب لمساعده الطلاب والباحثين في امور علميه ...علي سبيل المثال وليس الحصر وعلي لسان الموجودين في المقابله ..
نقوم احيانا بعمل كسور في عظام الكلاب (تحت تاثير المخدر طبعا ) وذلك لعمل دراسات تخص تركيب الشرائح والمسامير العظميه ونقوم بعد فتره بفك هذه الشرائح او المسامير (طبعا حاولوا يقنعونا باهميه ده لدراسه مدي تاثير مش عارف ايه علي ايه ) واحنا طبعا غير متخصصين ومش من حقنا نقاوح
وان الشرايح مش بتتشال علشان تستخدم تاني طبعا !!
طب وبعد كده يا دكتور ؟
بيتم اعدام الكلب اعدام رحيم
الكلام ده علي مسئوليتي واتقال امامي
طب ما علينا من اللي فات
احنا يا دكاتره كل اسبوع تقريبا عندنا حالات كسور ماليه الشوارع بنلاقيها نتيجه الحوادث ..ممكن نتواصل مع بعض وبدل ماتجيبوا كلاب سليمه تكسروها هانجييلكم كلاب مكسوره ..وهنا الكل يستفيد
انتوا تعملوا ابحاثكم
والكلب يتعالج
واحنا وفرنا فلوس العلاح بره
ونعيش في ثبات ونبات العيشه تبقه فل
بس
تاخدوا الكلب يتعالج ونستلمه تاني
تمام اتفقنا
بعد اقل من اسبوع بدأنا بحاله كلب مكسور ارسلت الاشعه للدكتور اللي تم اختياره للتواصل معايا بهذا الشأن ..
وبعدها بفتره قصيره ارسلت اشاعه اخري لحاله تانيه ..
المفاجأه انه عدي عالموضوع ده شهرين من اول تواصل يعد المقابله وارسال الاشاعات وحتي الان لم يتم الرد وماكان يحدث مازال مستمر ..
كلاب بتيجي من بره سليمه علشان تتكسر وتموت
الخلاصه
بعد ماقابلنا قبل كده مسئولين في مديريه الطب البيطري
وقابلنا مسئولين في كليه الطب البيطري عرفنا حاجه واحده ..ان مافيش فايده

23/02/2023

كفايه علينا القطط المتسربه وماليه الشوارع ..ياريت بقه الناس تحافظ علي القطط بتاعتها لان الايام دي موضوع القطط الضايعه زاد قوي ..
كمان كميه القطط اللي اصحابها عارضينها للتبني كتير قوي ..وطبعا كلنا عارفين الاغلبيه من القطط دي مصيرها الشارع ..بتجيبوا القطه تلعبوا بيها شويه وبعدين عايزين تخلصوا منها وتختلقوا اي اسباب كلنا حافظينها ..
اللي مش قد مسئوليه تربيه حيوان كان بلاش من الاول ..

14/02/2023

النهارده حصل موقف لازم يتحكي علشان ناس كتير تتعلم ..
رايح العياده بقطط تعبانه دخلت لقيت المنظر ده ..بنت لقت كلب عربيه خبطته وجريت طبعا كالعاده ..من غير ماتفكر ولا تصور ولا تنزل عالجروبات ولا تقول اصلي مش هاعرف اتعامل ولا مش فاضيه ولا اي حاجه شالته وجريت بيه عالعياده تلحقه الاول ...واقفه محتاسه بعد ماتخلص هاتعمل فيه ايه ..ولا هاتعرف تديله علاج ولا تغير علي جرح ولا تعلق محاليل ولا اي حاجه ...في اللحظه دي دخلت والدكتور اول ماشافني قالي جيت في الوقت المناسب ..وطبعا الباقي معروف ..
اللي حصل هنا انها مافكرتش في اللي بعد العياده ولا فكرت في حاجه غير انها تلحقه وبعدين ربنا يحلها ..وعلشان هي كانت نيتها خير الموضوع اتحل بترتيب ربنا ...
للاسف ناس كتير ومنهم شباب ورجاله ممكن في موقف زي ده يفضل يحسب كذا حاجه الاول ..طب هاشيله ازاي يمكن يعضني ؟ طب هادفع ايه في العياده ؟ طب بعد العياده هاوديه فين ؟ والنتيجه اصور وانزل بوست وعلي ماحد يلحقه يكون غالبا الحاله اتدهورت ..
اعملوا الخير والصح وسيبوها علي الله
الحقوا الحاله الاول وبعدين يحلها الف حلال
شكرا للبنت الجدعه اللي اتصرفت بشكل فعلا ناس كتير ممكن مايعملوش اللي عملته

10/02/2023

بينقذ ضحايا الزلازل وبيحرس الاغنام والماشيه والبيوت والاراضي وبيكشف مهربين المخدرات والمتفجرات ده غير الوفاء والعرفان بالجميل والتضحيه ...ونيجي نقول عليه نجس وبيطرد الملايكه

07/02/2023

01/02/2023

https://youtube.com/watch?v=gMqUfNz1Ui0&feature=shares
شير للقناه

31/01/2023

28/01/2023

تاني نقول ..من احقر واقذر التصرفات ان حد يرميلنا حاجه قدام الشقه بدون اذن او اتفاق بيننا ..
النهارده بقه اللي رمت الجرو قدام الشقه الصبح الساعه تسعه قالت انها راحت وسابته هناك ..الجرو كان عنده مشكله والله اعلم خف ولا لأ لاننا اكيد مش هانصدق الا لما نشوف بعنينا ..عندي لحضرتك كام سؤال كده لاني عارف انها معانا وهاتشوف البوست ..
*حضرتك اتفقتي معانا علي انك تجبيه واحنا هاناخده ؟
*طب حضرتك مثلا احنا وافقنا واديناكي معاد تجبيه فيه ؟
*طب هو ينفع اسيب جرو مفكوك في مكان ومتوقعين اننا نروح بعد ساعتين او تلاته نلاقيه قاعد في مكانه ؟
*حضرتك دلوقتي ضميرك مرتاح وحاسه انك عملتي اللي عليكي لما سبتيه والجرو مشي وضاع في حته غريبه فيها عزوة كلاب استحاله يسمحوا ليه بالوجود وسطهم ؟
* الجرو ده بيتكلف حوالي ٢٠٠ جنيه في الشهر هل حضرتك هاتتكفلي بيه ولا رمتيهولنا كده وخلاص ؟
*طب هل حضرتك مثلا بتساعدي المكان ومتعشمه فينا ولا زيك زي ناس كتير بتمثل بس الرحمه وعايزينا نشيل عنهم وهم ولا بيطلعوا مليم للمكان ؟
*لما انت شايفه ان الشارع ارحم من الشقه جبتيه قدام الشقه وبقالك اسبوع بتكلمي دينا وتتحايلي عليها تاخده ليه ؟
كفايه اسئله كده وانا حاولت اتمالك نفسي ويبقي اسلوبي هادي بدون تجاوز رغم حقاره الموقف ..اللي بصراحه لما عرفت مين اللي عملت كده ماستغربتش لان دي حاجه مش غريبه علي اشكالكم الزباله وكل ماتتزنقوا في اي حوار تخبطوا في المكان وتحاولوا تشوهوا صورتنا ..

27/01/2023

نزلت امبارح بوست بحالات الاسبوع واتعشمنا النهارده نرتاح شويه علي اساس الجمعه اجازه وكده ..لكن للاسف كان يوم من اصعب الايام
*كلب رجليه مقطوعه في نفيشه تم انقاذه
*كلب مشلول وكسر عامود فقري تم انقاذه
*كلب ملفوف سلك علي رجله تم مسكه وفكه وتحت الملاحظه للاطمئنان علي الاورده
بس عندنا مشكله وهي ان الكلبين المبتور رجله والمكسور عاموده الفقري لااااااازم يتم نقلهم وبسرعه للقاهره بكره ..
احنا غصب عننا لازم نعرض عليكم الحالات وتشاركونا فيها ..والضغط الفتره دي كبير وحالات الانقاذ كتير قوي والمصاريف كتير جدا ...النقل عايز الف جنيه
Dina Mhmad
Abd Elrahman Adel

27/01/2023

الحمد لله تم انقاذ كلب نفيشه اليوم

26/01/2023

لاول مره هانزل اخر الاسبوع كل حالات الانقاذ اللي اتعاملنا معاها بكل الاشكال ..وده علشان بس الكل يفهم اننا لو كنا مركزين مع مين قالت ومين زعلانه ماكناش ابدا قدرنا نعمل ده وكنا ضيعنا وقتنا في مهاترات مع عالم فاضيه مافيش وراهم غير الكلام
١- قط اسود فكه مكسور وعينه رايحه ومتعور واتعمله عمليه
٢-قطه اتعرضت لحادثه وعمليه بتر
٣-قطه النهارده اللي عملت حادثه وفكها مكسور
٤-قط واقع من خامس دور وصاحبته رمته قدام العياده
٥-انقاذ قط من الشارع في التهابات في بقه وسنانه وعمل عمليه سريعه
٦- الكلبه اللي هجم عليها كلاب وبهدلوها
٧- جرو عنده حالة صرع
٨- جرو صغير تايه وطلع عماره في الخامسه
٩-جرو الاذاعه والتليفزيون اللي الكلاب كانت بتهاجمه
١٠- قطه صغيره عامله حادثه واديها متعوره
الصور فيها كل الحالات تقريبا
وفي حالات كده بسيطه لم اذكرها ده طبعا غير الحالات الموجوده قبل كده وبتتعالج
وتيجي بعد ده كله ناس يقولوا اننا بيهمنا الشكليات ومش مهم عندنا الحاله نفسها ...اه والله ده اتقال

24/01/2023

فيديو مهم جدا

18/01/2023

الحمد لله انقاذ كلبين في نفس اليوم مربوط حبل علي رقبتهم وهم صغيرين وكبروا والخبل بياكل في لحمهم .
شكرا احسن كاتشر في مصر اسلام علي علي شطارتك ومجهودك

10/01/2023

بوست عنصري شويه معلش بس بصراحه الموضوع ده زاد عن حده .
موضوع مساكن ونوادي الهيئه والعنف ضد الحيوانات ..وقبلهم منطقه الخامسه والسابعه وارض الجمعيات وبرضه جرائم عنف بشعه باشكال كتير
مع انخفاض معدل العنف جدا بالمقارنه بيهم في مناطق زي عرايشيه مصر والمحطه الجديده والافرنج وكمان الشهدا
والشيخ زايد
اتاكدنا بشكل كامل وبدون شك ان هناك عداوه بين الساده ابناء محافظه الشرقيه والساده ابناء الصعيد وبين الحيوانات (طبعا فيهم اكيد ناس مش كده بس دي الاغلبيه ) وده علي جميع المستوايات يعني عامل وموظف ومهندس ودكتور ومدير ...مابتفرقش مستوي التعليم او الثقافه ..للاسف فعلا حالات تحريض عالقتل ..خطف جراوي وكيتين من امهاتهم ورميهم بعيد ..حالات ضرب مباشر وكلنا فاكرين الحرو اللي اتضرب بعصايه هوكي واتشل في مساكن مجمع الزهراء ..حالات تسريب ..سم كلاب وقطط ..خناقات مع الناس المحترمه اللي بتعطف عالحيوانات وتأكلهم ..
الناس دي بوظوا كل حاجه في البلد ..ضيعوا جمالها ورونقها وطبيعتها الرايقه ..محدش فيهم بيحب البلد ولا بيتكلم عنها كويس ..نقلوا الفوضي والعشوائيه اللي جايين منها لهنا ..واظن اكبر دليل علي كلامي لو رجعنا لاسماعيليه الثمانينات والتسعينات نلاقي كان الوضع مختلف تماما ..
ماكانش كل ده موجود
لازم الناس دي تتواجه بشده وحزم ..اي موقف عنف ضد حيوان زي اللي شفناه النهارده مع الكلبه وجراويها من سكان منطقه الطرق والكباري ..لازم الناس ماتتعاملش معاه بسلبيه ويقفوا ليهم ويمنعوهم ..دول مهما عملوا هايفضلوا مش ولاد البلد ..مهما عملوا هايفضلوا بطبعهم اللي جايين بيه ..
باعتزر طبعا للناس المحترمه اللي اكيد الكلام مش ليهم ..بس بجد احنا زهقنا من العالم المقرفه دي ..

09/01/2023

عايز اوضح حاجه للجميع ..
كميه رسائل يوميه عالصفحه من ناس عندها قطط وعايزين يستغنوا عنها ويجيبوهالنا ...وده طبعا معناه ان الناس فاهمه غلط ..احنا مأوي انقاذ ..مش مكان الناس لما تزهق من القطط بتاعتها عايزين يجيبوهالنا ..وطبعا كل الرسائل مصحوبه بجمله هاتكفل بمصاريفها واتبرع للمكان ..
السؤال هنا ..لو احنا استجبنا لطلباتكم ودخلنا كل يوم قطتين او تلاته علشان صحابهم مكسلين يهتموا بيهم ..هل ممكن المكان يستوعب والامكانيات بتاعتنا تخلينا قادرين ت
نأكلهم ونعالجهم ؟؟ الرد لأ طبعا ماهو اللي بيطلب الطلب ده مش واخد باله ان في غيره كتير بيطلبوا نفس الطلب ..والرد في كل الحالات واحد ..ده مكان انقاذ ...
ياريت الناس ماتزعلش ..اللي مش مستوعب حجم المسئوليه والضغط اللي احنا فيه يتفضل يشرفنا ويشوف بنفسه ..

06/01/2023

امبارح واول امبارح شفنا كلنا حالتين الكلبه الجيرمان والكلب اللي فوق السطح عباره عن هيكل عظمي من قلة الاكل ..طبعا بعد انقاذ الكلبين بفضل الله احب اوضح حقيقه الامرين ..
الكلبه الجيرمان يملكها ولد بيتاجر في الكلاب كان مديها لواحد يجوزها طبعا اكيد باتفاق زي اللي بيحصل في الحالات دي ..الكلبه وقعت معرفش ازاي من الدور الرابع ....باختصار لما صاحبها شاف البوستات جري عليها اخدها ..قالنا وديتها لدكتوره في شارع رضا (اول مره اسمع عن عياده في شارع رضا ) قالت كسر عامود فقري والاجنه عايشه ..
رفضنا اصلا التشخيص وبعتناله عربيه علشان يعرضها علي دكتور هاني المصري وفعلا قال انه كسر في العامود الفقري والاجنه طبعا ميته ولازم عمليه فورا ..طبعا هنا الولد لقي الموضوع عمليه وفلوس وقرر يتخلص منها ولما لقينا كده طلبنا منه يخليها عنده وهانتصرف بسرعه والحمد لله جبنا موافقه لسفر الكلبه وعلاجها وتاني يوم جت عربيه لنقل الكلبه وحتي الولد اللي محددين معاه معاد فضلنا نكلمه اكتر من عشر مرات وكان نايم ولا علي باله ولا مهتم ..المهم صحي ورد علينا واخدناها منه واتسلمت للعياده في القاهره لعمل اللازم باذن الله ..
بالنسبه للكلب التاني طبعا الكلام اللي عالبوست بتاعه مختصر جدا ..والحقيقه بقه اني لما رحت لقيت الاخت اللي منزله البوست معاها ولدين صغيرين طلعوا معايا السطح وفتحوا باب اوضه عالسطح مقفوله بقفل والمفتاح معاهم (طبعا كلنا شفنا الاوضه في الصوره واد ايه هي قذره ) وطبعا ضلمه مافيهاش نور خالص ...والروايه اصل صاحبه جابه لابنه يلعب بيه وسابه ومشي واحنا بنعمل اللي ربنا يقدرنا عليه معاه ...اه والله ..يعني هو وصل للحاله دي قدام عنيهم وشايفينه وقافلين عليه الباب والمفتاح معاهم ..عماره فيها ست شقق وواضح انه بيت عيله وقرايب والكلب مرمي فوق في مزبله من غير اكل لحد ماوصل للحاله دي وفي الاخر ننزل بوست نقول حد ياخده ..لا حول ولا قوة الا بالله ...ولله الامر من قبل ومن بعد ..الواحد مش لاقي اي وصف للي بقه بيشوفه من الناس ..
فيديو الكلب بعد الانقاذ في اول كومنت
Dina Mhmad
Mohamed Bembo
Hajer Houssem Eddine
Hesham Hemdan
Abd Elrahman Adel

01/01/2023

ساعدوا المكان
اكتر من مائه قطه انقاذ بيحتاجوا اكل وعلاج يوميا

01/01/2023

كنا زمان لما نسمع ان في امريكا او اوربا ان الدفاع المدني او الشرطه اتحركوا لانقاذ قطه او كلب محبوسين او في ازمه ايا كانت هي ايه كنا بنستغرب ونقول شعوب متحضره وشوفوا ازاي بيهتموا بحالات زي دي ..
احقاقا للحق بقالنا كتير بقينا نسمع ونشوف استجابه قوات الدفاع المدني لاي حاله طارئه لقطه فوق نخله او في بلكونه شقه صحابها مش موجودين او غيرها من حالات صعب علي اي حد بدون امكانيات انه يتصرف
النهارده حاله قطه صغيره جوه محول كهرباء بالطريق السريع كان لابد من وجود افراد طوارئ الكهرباء لفصل الكهرباء عن المحول لانقاذ القطه ..وبالفعل في اقل من عشر دقايق لقينا عربيه طوارئ ثاني جت وقامت باللازم وتم انقاذ القطه ..
شكرا لاي جهه تتعامل بجديه وانسانيه في مثل هذه الحالات ...
عاش رجاله الكهرباء ورجاله الدفاع المدني وبنوجهلهم جميعا الشكر والتحيه
وطبعا شكر خاص للاخوة الافاضل اللي شافوا الحاله وماسابوهاش الا لما طلعت وكلمونا وكلموا الطوارئ وكانوا ايجابيين جدا ومش مجرد صوروا وبلغوا ومشيوا

11/11/2022

معلومات عن الكلب البلدي المظلوم اللي ممكن تكون اول مرة تعرفها.

-الكلب البلدي هو عبارة عن هجين ميكس من 6 سلالات من الكلاب اللي عاشت في مصر القديمة واللي كانت مقدسة عند الفراعنة ودة بيفسر اختلاف اشكال الكلاب البلدي وألوانهم وأحجامهم والسلالات دي هي:
1- كلب الهاوند الفرعوني
2- كلب الباسنجي
3- كلب إيبيزا هاوند
4- كلب جري هاوند
5- كلب سلوقي
6- كلب ويبيت

-الكلب البلدي ذكي جداً علي عكس ما ناس كتير معتقدة وده لأنه كلب بيعتمد علي نفسه وبيعيش في ظروف صعبة جدا في الشارع.

-الكلب البلدي بيتمتع بمناعة قوية جداً وقدرة علي التكيف احسن من اي كلب تاني في العالم.

-الكلب البلدي بيستجيب للتدريب عن تجربة شخصية زي اي كلب جيرمن او هاسكي او غيرهم.

-الكلب البلدي لو اتدرب حراسة بيكون واحد من اشرس الكلاب في العالم.

-الكلب البلدي بينتمي لمكانه جداً وبيرجع مكانه مهما حصل علاقته بمكانه تشبه الحمام المرسال اللي بيرجع لبيته مهما كان بعيد.

-الكلب البلدي وفي ومخلص بطريقة غير عادية لصاحبه بدليل الكلب البلدي اللي بيكون مع راعي اغنام مثلاً بيمشي مسافات كبيرة جداً من غير ما يمل مع صاحبه الراعي.

-الكلب البلدي قوي جداً بالمقارنة بحجم جسمه.

-في كلاب تقدر تستخدمها للصيد زي الهاوند والدوبر مان وفي كلاب بتستخدمها في الحراسة زي الجيرمن والروت وايلر والبيتبول، بس الكلب البلدي هو الوحيد في العالم اللي تقدر تستخدمه للرعي وللحراسة وللصيد وياخد تقييم 10\10 في التلات مهام.

كل بلد فيها كلب بلدي يعني مثلاً الجيرمن موجود في كل مكان في المانيا والهاسكي موجود بكثرة في كندا وسيبيريا.

احنا اللي شعب بيحب المظاهر والفشخرة!
حبوا الكلب البلدي ياجماعة وبدل ماتشتروا كلب بفلوس كتير اتبنوا كلب بلدي ⁦❤️⁩

اتبني كلب بلدي