Hind the Vet

19/07/2023

مساء الخير 🥰 ..
السودانيين المتواجدين في مصر و محتارين ما عارفين يصلو ياتو دكتور بيطري 🙏🏽
انا حالياً متواجده في عيادة Royal Veterinary Clinic
في القاهرة الجديدة .. مدينة الرحاب .. السوق الشرقي
مواعيد عمل العيادة من الساعه ١٢ ظهر و حتى ٩ مساء 🥰🙏🏽
كمان ك Hind the Vet مواصلين في شغل الاستشارات بصوره اعتيادية عبر تطبيق الواتس اب فقط
091 319 9055

25/06/2023

مساااء مسااء 💛🌼
نعتذر للإنقطاع و شكراً لكل السألوا عني 🙌🏽
الحمدلله انا كويسه بس قبل فتره طلعتا من امدرمان لانو الوضع بقى ما امان 😔 ربنا يصلح الحال و يلطف بينا و نعود للديار 🥰❤️ اتمنى انكم كلكم تكونوا كويسين و حيواناتكم كويسه و في امن و امان 🥰
بعتذر كمان لكل الما قدرتا ارد ليهم في الفترة الفاتت بس نسبه لظروف عدم الاستقرار المتابعه كانت صعبه شوية 😔
ما علينا نركز في الجايي ...
حالياً انا بحاول بقدر الامكان الحق ارد على الاستشارات القديمة و مافي ما يمنع اننا نستقبل اسئلتكم و استفساراتكم 🙌🏽🥰 و فيما يخص ناس الولايات .. يا ريت كل زول يفيدني هو محتاج لدكتور في ياتو ولاية و انا ح احاول بقدر الامكان اتواصل مع الزملاء البثق فيهم عشان يقوموا باللازم 🙌🏽🥰
ابقوا طيبين ❤️

17/05/2023

حتتوفر كمية من الاقفاص( للقطط 🐈) و الدراي فود (قطط و كلاب) في امدرمان 🥰🙌🏽
ساعين نوفر توصيل للمناطق القريبه من امدرمان القديمة 🙏🏽
للطلب الرجاء التواصل عبر الواتس
و ربنا يصلح الحال و يحفظ البلاد و العباد

Exotic/ Small / wildlife Veterinarian
Medicine, surgery, Online Consulting
Here .. every life matters

17/05/2023

نهاركم سعيد يا شباب 🙏🏽
نسبه للزحمه و انو الضغط على كتير الفتره دي .. بعتذر ما قدرتا اكتب البوست بتاع التفاصيل بتاعت التطعيمات ..
عموما كدا حالياً في ولاية الخرطوم .. التطعيمات و استخراج الكروت و الشهادات الصحية متوفر في عيادة رافل في منطقه شرق النيل 🙌🏽
* رابط الصفحه حقتهم مرفق تحت 🥰🙏🏽 ..
للأسف انا قطعتا تطعيمات و كروت .. و حالياً شغالين في محاولات انو نوفر التطعيمات و الكروت و الشهادات الصحية في امدرمان 🙏🏽
للأسف الكميات المتوفره عموماً محدوده جداً

https://www.facebook.com/profile.php?id=100063909587601&mibextid=ZbWKwL

online veterinary clinic
عيادة بيطرية اونلاين

15/05/2023

السلام عليكم ..
بتمنى انو ربنا يصلح الحال و يلطف بالبلاد و العباد
مبدئياً كدا ..
فيما يخص تفاصيل اجراءات السفر خارج حدود السودان الان ..
اهم ورقه هي كرت التطعيم 🙌🏽 و نسبه لجهل البعض ب ماهيه كرت التطعيم و اهميته ح اوضح ليهم الان هو شنو ..
● هو ورقه ، كرت او دفتر بتثبت ملكيتك للحيوان و بتثبت انو الحيوان ماخد كل التطعيمات المطلوبه.
● الكرت او الدفتر دا بيكون فيهو اسم المالك و عنوانه و اسم الحيوان و تاريخ ميلاده و وصفه و نوعه و اسماء التطعيمات الاتأخدت مرفق معاها الاستيكرات البتتأخد من فتيل التطعيم بالاضافه ل توقيع و ختم الدكتور او العياده.
**( يعني الكرت بدون الاستيكر بتاع التطعيم يعتبر ما عندو اي قيمه)
و نسبة لجهل كمية كبيره جدا من المربيين بالتفاصيل دي .. بنلاقي انهم بيطالبو بعض الدكاتره ب كرت تطعيم ساي و البعض بيطالبنا بالتزوير للأسف و الحاجه دي بقت مزعجه جداً لي و للزملاء 🙏🏽
انا ك دكتوره و مربيه برضو متفهمه تماماً القلق البيكون عندكم عشان عايزين تسوقو اولادكم (حيواناتكم)، بس الموضوع بتاع استخراج كرت بدون تطعيم او تفاصيل او تصوير كرت حيوان تاني دا شيء ما مفيد و غير اخلاقي و يعتبر جريمه امنيه ممكن تساعد في انتشار امراض في الدوله المستضيفه و قد تكون اصلا الامراض دي ما عندهم .
اخيراً .. انا بحب اشكر كل زول بيسأل عن تفاصيل سفر الحيوانات خارج او داخل السودان 🙌🏽❤️ و شكرا لأنكم حسبتو حساب العشره و ما رميتوهم وراكم.. ح احاول جاهده انو خلال الساعات القادمه انزل تفاصيل عن التطعيمات و عن الاماكن الممكن تستخرجو منها كروت في ظل الظروف الحالية و ح احاول ارفق الاسعار كمان🙏🏽
د. هند غازي

28/04/2023

منشور مؤقت ..
يا جماعه محتاجين كديسه بترضع (ك ام بديلة) في محيط امدرمان القديمة .. تحديداً ودنوباوي و حي العمده و لو ابعد مافي مشكله
ل كيتن عمره اقل من شهر
العندو يتواصل معاي
و ربنا يصلح الحال و يلطف بالبلاد و العباد ان شاء الله
🙏🏽

28/04/2023

بعتذر جداً عن الانقطاع بس زي ما كلنا عارفين ..
نحنا كلنا من جوا ما كويسين 💔
نسبة للحاصل في خرطومنا حبيبتنا و في امدر امانا و في بحري سر هوانا 🥺💔
و البخلينا ما كويسين اكتر كمية الحيوانات اللي اصحابها رموها و سافرو خلوها .. و البيقطع القلب اكتر اللى طلعوا من البيوت و خلوا الحيوانات في اقفاص او مربوطه 💔💔
بالله عليكم يا جماعه اضعف الايمان فك الحيوان في الشارع و هو حيعرف يتصرف .. بس ما تخليهو مربوط .. حتى لو معاهو اكل و شراب ما تخليهو مربوط💔😔
و ما انصحك تخلي حيوانك مع زول على اساس انك حترجع و تلاقيهو لانو الزول ذات نفسه ما ضامن انو بكره حيكون عايش و لا لا
#لاللحرب

28/04/2023

مساء الخير عليكم 🥰
ربنا يلطف بالبلاد و العباد ان شاء الله
نحنا ك عيادة شغالين من بداية اندلاع الحرب و رغم الظروف الحاصله في محاولة مننا لاننا نحافظ على الارواح دي بقدر الامكان 🙏🏽
يا ريت تتواصل معانا اول قبل تتحرك علينا عشان سلامتكم بتهمنا 🥰 و تورينا تفاصيل الحاله عشان لو ما محتاجه انك تصلنا ما تقطع مشوار ساي 🙏🏽
كمان شغالين استشارات اونلاين
للتواصل
0913199055
واتساب و مكالمات

#لاللحرب

05/04/2023

ريتا الحلوة 🥺❤️
ما شاء الله تبارك الرحمن .. احدى الناجيات من البارفو اللعين 😑
الليله خلصت تطعيماتها ❤️❤️
بس للاسف ريتا بتخاف مني 🥺🥺
دايماً الحيوان لمن يكون في عمر صغير و يمرض كتير و يمشي للدكاترة ممكن يبقى بيخاف منهم و ممكن يكون عدائي معاهم 🥺😔
بس كل مشكله و ليها حل طبعاً 😉
و في محاولات لاننا نرجع الثقه من جديد .. الليله ادينا ريتا شوية تريتز و ستها كمان اشترت ليها لعبة 😁😂
عسى و لعل تبقى بتحب تجينا 😂❤️

مرفق صور ريتا الحلوه مع لعبتها 😁❤️
* ملحوظه العلاج من البارفو تم على يد دكتورة تانية 😁

01/04/2023

Shmshoma 🐱❤️
او بالاصح ماما شمشومة 😍❤️
ماما شمشومة طلعت حامت في الحله و جات راجعه بتترنح بصوره ما طبيعية و فجأه فقدت البصر 🥺💔
الحمدلله ستها انتبهت ليها من اول ما جات هي و بتترنح و اتواصلت معانا طوالي و على طول نصحناها ب انو العيال ما يرضعوا من امهم و وصيناها تعمل كم حاجه و بعدهم انها لازم تصلنا و الحمدلله وصلتنا في زمن مناسب و فحصنا شمشومة و قمنا باللازم 😍❤️
و في خلال نص ساعه شمشومه بدت ترجع طبيعية و في اليوم التاني رجعت تشوف من تاني 😍❤️
و الماما و عيالها ما شاء الله طيبين جداً 🥰❤️
مرفق فيديوهات لشمشومه بعد وصلتنا و قمنا باللازم و بقت كويسة 😁 و فيديوهات قبل حتلاقوها في التعليقات 😁
تعديل ..
يخوانا قولو ما شاء الله بالله 😌❤️

30/03/2023

مساء مساااء 💛🌼
يخوانا انا بحب قصص الحيوانات جداً، و بحب الحُب البشوفو في عيون اصحابهم لمن بيكونوا بيونسوني بيهم 🥺❤️
بحب جداً لمن حيوان يكون طول ما جاني العيادة و اهلو يرسلو لي فيديو ليهو و يقولو ليهو قول للدكتوره Hiiiiii 🥺❤️
بحب فيديوهاتكم العفوية البترسلوها لي انتو و منفعلين مع حيواناتكم في لحظات اللعب و الحُب 🥰❤️
حُبهم و جمالهم قادرين جداً على تخفيف صعوبة مجال الطب البيطري و صعوبة مزاولته في السودان.
مرفق فيديو قديم انا و شغاله 😂❤️و الاستاذ بتفرج فيني انا و بجهز في الحاجات عشان افحص ليهو 😂😂❤️❤️
ف شنو الحُب في ذاته مبرر كافي جداً و الموضوع كلو حُب في حُب 🥰❤️

29/03/2023

رمضان كريم 🌙🥰
تصوموا و تفطروا على خير ان شاء الله 💛🌼
تهنئه متأخره جداً .. و العيد قرب عديل كدا 😂
لكن ان تأتي متأخراً خير من ان لا تأتي 😌❤️
و طبعاً طبعاً .. حلويات رمضان ممنوعة لكل الحيوانات و كذلك الآبري و الشاي و القهوة ، حتى لو حيوانك بيحبهم ..😁

#رمضان٢٠٢٣

21/03/2023

مساء مساء 🤍🌼
الام هي الام مهما اختلفت الفصيلة (امم امثالكم) ❤️
عيد ام سعيد على امهات البشر و على امهات الحيوانات برضو ❤️❤️
و الف رحمه و نور تنزل عليهن كلهن احياء كن او اموات 🥰❤️
Happy Mothers day 🥰❤️

10/01/2023

Helloz 🙌🥰
The case of the week 😁
البسبوس الصغنن دا كان بياكل في شوربه و فيها لحم و بعض العظام الكبيره 🥺 ف واحد من العظام كان حجمه اقل و علق ليهو في حلقه .. الحمدلله العظم ما قفل الحلق بالكامل 🙏🏽
تم تخدير الحيوان و استخراج العظم بنجاح ❤️😍✅️
و الحمدلله نحن بقينا كويسين و بناكل كويس و نلعب كمان 🐈❤️

09/01/2023

مساء الخير عليكم
نحن في عيادة Hind the Vet ..
مستعدين لتلبيه جميع طلبات المناسبات 😂❤️
* استشارات
* فحص اكلينيكي
* تحليل دم شامل
* موجات صوتية
* اشعة سينية (X-ray)
* عمليات جراحية ( عدا عمليات التعقيم )
كما يوجد ..
* تطعيمات
*جميع انواع الادوية و العلاجات
* مستلزمات حيوانات اليفة
و قريبا عندنا حاجات احلى و متطوره اكتر 😁🙌
Every life matters ❤️🙏🏽
بشتغل بالحجز يا شباب ..
حيوانات اليفه ( قطط و كلاب) + جميع انواع الحيوانات البرية
موقعنا امدرمان .. ودنوباوي
للحجز و الاستفسار
واتساب و مكالمات
0913199055

Exotic/ Small / wildlife Veterinarian
Medicine, surgery, Online Consulting
Here .. every life matters

06/01/2023

جمعتكم مباركة 🏵🧡

زي ما ذكرنا قبل كدا متابعة وزن القط من الاشياء المهمه جداً و اللى لازم تتم بصورة دورية 🙏🏽🧡
لو قطك عندو مشاكل في الوزن، زياده او نقصان تقدر تتواصل معانا و حنقوم باللازم من فحوصات شامله + وضع برامج غذائية و تمارين حركية 🐱🧡

03/01/2023

مساء الخير 🥰❤️
حابه اشكر Tamrah.SD على الهدية اللطيفة دي 🥰🙏🏽
بلحهم لطيف و لذيذ جداً 😋❤️
جربوهو بس ما تدو منه حيواناتكم الاليفة 😁😂 لانو البلح مغلف بالشوكولاته و زي ما عارفين الشوكولاته سامه جداً للقطط و الكلاب 🥺🐱🐕‍🦺

https://www.facebook.com/profile.php?id=100075959948046&mibextid=ZbWKwL

01/01/2023

نتمناها تكون سنه سعيدة على البشر و الحيوانات❤️🐱🐕‍🦺
و نتمنى انو يكون عام خير و وفره و رخاء علينا و عليكم و على السودان ❤️🥰

28/12/2022

مساء مسااااء 😸😽🐱
في كل مره حتطلع فيها مع القط / البسبوس حقك من البيت احرص انك تحقق ليهو اقصى درجه من الراحه و الأمان ك محاولة للتقليل من التوتر و الإجهاد الهم اصلاً بتعرضوا ليهو في حالات النقل و تغيير البيئة 🐈🐈‍⬛❤️
مرفق صورة ل كيوتي 😻 لانو طلع من الكرتونه الجايبنو بيها و قرر انو احسن شنطة الاونر بتاعتو 😂😂

05/12/2022

Free Rabies Vaccination in Omdurman-Khartoum-Sudan.
As a Clinic. We volunteered at the Ministry of animal resource rabies campaign, the campaign duration was 11 days. In it, they provided free rabies vaccination, and they did a lot of activities to increase the awareness of society 🐶🐱.
Here are some photos and Videos.
Thanks to Dr. Arwa, Dr. Sulafa Dr. Nada and Dr. Naser .
💛🌼

22/11/2022

اعلنت وزارة الثروة الحيوانية، ولاية الخرطوم عن بداية حمله التطعيم ضد مرض السعر ، التطعيم مجاني و مرفق معه شهادة التطعيم.
يسرنا ان نعلن ل سكان محلية امدرمان، تحديداً ود نوباوي وما جاورها عن توفر التطعيم المجاني في عيادة Hind the Vet
الكمية محدودة ، للحجز و الاستفسار 0913199055

18/09/2022

Hiiiiiiiii 😻
Sugar ❤️
من اكتر القطط الكانت مريحه في موضوع اخد الوزن 🥺❤️
عموماً ..وزن الحيوان من الحاجات المهمه جداً ..
و اللي لازم تتابعها بصوره مستمره لأنو اي تغير فيها سوا نقصان شديد او زياده شديد ممكن يدل على سوء صحه الحيوان و يدخلنا في مشاكل نحن في غنى عنها 🤗
كمان الوزن مهم شديد لانو اي جرعه بتاعت دواء بيتم تحديدها على حسب وزن الحيوان مهما كان نوعو 🐈🐕🐒🐇🦜🐢🐍 ..
للأسف Sugar الفي الصوره دي ثباتها في الميزان كدا كان حاصل لأنها خايفه جدا و بتعاني من ازمه نفسية 🥺💔

في البوست الجايي ح احكي ليكم قصتها 🥺💔

13/09/2022

Little Joy 🐱❤️
جوي الصغنن عندو فيل 😹❤️
جوي جانا و جاب لعبته معاهو عشان تصبرو اثناء الكشف 😹❤️
جوي قبل فتره كان عندو التهاب في الأذن و الحمدلله اتعافى منه و بعدها جانا بعدوى فطرية و للأسف العدوى انتقلت للمالكين 🥲 الحمدلله هم اتعالجوا و الان بصحه و عافيه بس جوي كان علاجه صعب في وجود الشعر .. ف اضطرينا نحلق ليهو حلاقه علاجيه عشان اماكن انتشار الاصابه ما كانت واضحه 🥲
حننشر فيديو حلاقه جوي قريب 😌
للامانه جوى هو اول قط يجيني بلعبته المفضله 😹❤️

10/09/2022

Hellooooooz 😁
كتير من حالات تساقط الشعر البتجي بيكون سببها غير مرضى و انما عادات خاطئه من المالك 🤷🏾‍♀️
ابسطها انو بيحمم حيوانه الاليف بمستحضرات هي في الاصل مصنعه للاستهلاك البشري 🥺
ممكن الحيوان ما يتحسس منها بصوره واضحه بالنسبه ليك .. بس تظهر ليك مشكله تساقط الشعر دي و انت تفتكرها مرض على طول 🤷🏾‍♀️
عشان كدا الاسلم انك تستخدم ( شامبوهات و عطور مصنعه خصيصا للحيوانات الاليفه)
مرفق فيديو ل واحد من احلى الشامبوهات القابلتني 😍❤️

07/09/2022

مساااء مساااء ..
معاكم ..
Rocky the Lucky puppy 🐶
الطف pupppppppppy في الوجود ما شاء الله تبارك الرحمن🔥❤️
روكي في اتم صحه و عافيه و لله الحمد و سجل لينا زياره عشان كان عندو جرعه تطعيم 💉
التطعيمات في الكلاب يفضل نبداها من عمر 45 يوم ..
و هي مهمه جدا لصحه كلبك ❤️ و لصحتك انت كمان 🥰
كل الصور بما فيها الفيديو اتأخدو بعد جرعه التطعيم مباشره ❤️

05/09/2022

شبااابز 🥰 ..
معليش لي فتره ما بنشر و مختفيه جدا ..
و دا نسبه لاني مشغوله جدا في محاولات جاده ل اني احسن في طرق تشخيص و علاج امراض الحيوانات الاليفه في السودان ❤️❤️
و لا يمكن ان تصل ل علاج سليم بدون تشخيص سليم 😁
عشان كدا بنحاول نستعين بادخال وسائل تشخيصيه كان صعب جدا انها تتلقي في الفتره الفاتت 😁
فخليكم قريبين عشان تعرفو الجديد ..
خصوصي ناس امدرمان 💃💃

05/09/2022

توموي 🐱😽
جا ب مشكله في الفم فوق الناب و في العين اليمين 🥲 ( كان ما بياكل خالص بالجهه اليمين و كذلك العين اليمين كانت بتنزل بدل الدموع سوائل لونها ابيض) 💔
توموي قبل يصلني اخد علاج لفتره و ما ظهر اي تحسن في الحاله.. بعدها الاونر جابتو لي و قبل كل شي طالبت ب انو نقلع الناب .. بعد الكشف اتأكدنا من وجود خراج و الحمدلله كذلك تبين انو ما كان مؤثر على بقيه الاسنان و الناب سليم ..
حمايه ل توموي من البهدله و الاسترس بتاع فقدان الناب اقنعتا الاونر بالافضل و هو انو توموي ياخد فرصه و يخضع ل علاج بصوره احترافيه و لفتره و اذا ما اتحسن نمشي ل خيار الفتح و القلع😁 ..
الحمدلله خلال اقل من اسبوعين توموي رجع ياكل بنفس الاتجاه الكان فيهو الخراج و عينو رجعت عاديه خالص 😌❤️
و الان امورو زابطه و حياته طيبه و لله الحمد 😁🥰

04/09/2022

Helloz 🐱
Long time no see 😁

17/04/2022

الامومه ❤❤

07/04/2022

نهاركم سعيد 🌼
اي نعم انتوا صايمين 💛 .. بس خليكم متذكرين انو حيواناتكم ما صايمين 🙈
صوره بعنوان دخل العظم 😭🌞

04/04/2022

مساء الخير 🌼
الصوره تمثل وضع بعض الافراد حاليا 😂😂😂🙈🙈🙈
يا شباااب البطن ما حتخزن ل بكره ف براحه عليها بالله 🙆🙊
* ملحوظه .. لو في حد محتاج بزز للحيوانات فمتوفره عندنا 💛💛

02/04/2022

Hellllllllloz 💛🌼
رمضان كريم 🌙💛
تصوموا و تفطروا على خير ان شاء الله 💛 🌼
بالنسبه لمواعيد العمل في رمضان حنكون شغالين .. على ورديتين 😎
ساعات العمل النهاريه من 11 لحدي 4 مساء و المساء من الساعه 8 لحدي 10 مساء ان شاء الله 🥰❤️
فيما يخص الحالات الطارئه .. ف مستعدين جدا نستقبلها ..
كل العليك تتصل و تحجز ✌
للحجز و الاستفسار 0913199055

30/09/2021

مساء الخير عليكم 💃💃💃💃
معليش اتأخرنا شويه
عملنا الفرز العشوائي قبل شويه 💃💃 ..
للامانه الفرز اتعمل ب كل الاسامي بتاعت الناس العلقت بغض عن الالتزام بالشروط من عدمه لاني حسيت البرنامج جاط شويه
و صاحبه التعليق دا هي الفازت
مبروك ليها ❤
يا ريت تتواصل معاي خاص
بالنسبه للبقيه 😀✌ مافي زول خسران .. 😉 حاعزكم برضو

28/09/2021

بوست المسابقه وصل 💃💃💃💃
عشان تكونوا عارفين يعني الثيم بتاع السنه دي :
Raibes: Facts Not Fear
و لأنو الفكره من اليوم دا اصلا هي التوعية بمرض السعر و اهميه التطعيم ، ختينا شروط المسابقه على هذا الاساس 💁🏽‍♀️
بس حنبدأ بالجائزه ..
1- تطعيم ضد مرض السعر مجان لحيوانك الاليف بغض النظر عن نوعه
2- حنختار واحد من اصدقاء الفائز الحيمنشنهم و حيفوز ب تخفيض 50% في سعر تطعيم مرض السعر
3- لو الحيوان الفائز طلع مطعم فحنعزه بمنتج من اختيار المالك بنفس قيمه التطعيم . و بكدا حيكون عندنا اكتر من فائز 🙆 لانو التطعيم مارق مارق ✌
لو التفاعل بقا شديد و خلعني احتمال اعمل تخفيض " بنسبه و لفتره تحددان لاحقا" ل تطعيم السعر 😁

المهم نجي للشروط :
1- علق في البوست دا بصوره لحيوانك الاليف مع ذكر اي معلومه انتا بتعرفها عن السعر و منشن لاتنين من اصحابك العندهم حيوان اليف و خليهم يعملو نفس الشي ك رد في التعليق حقك ✌🏼
2- تعمل لايك للصفحه و كذلك اصحابك البتمنشنهم و شير للبوست دا عشان غيرك يستفيد
و بس 🤷🏽‍♀️
المسابقه حتخلص بكره العصر الساعه 6 مساء و الفرز حيكون عشوائي 😁

28/09/2021

صبااااح الخير 💃 ..
اليوم 28 سبتمبر هو اليوم العالمي لمرض السعر " داء الكلب"
و ك مساهمه مننا في التخلص من داء السعار ..
حنعلن عن مسابقه في الساعات القادمه و حنختار فائز و حنطعم ليهو حيوانه الاليف مجان ..
و يمكن يكون في اكتر من فائز 👏💃
خليكم قريبين 😉👏

09/09/2021

الخميس الونيس 💃💃
شباااابز .. متذكرين لمن قلتا ليكم في ناس حتتمنى لو كانت حيوانات 😂😁💃
يلاا عملنا ليكم متجر اونلاين 😉👏 لكل مستلزمات الحيوانات الاليفه ❤ ب اسم Petscare.sd
فيهو كل شي ممكن تحتاجه للعنايه بالحيوان ❤❤ شامبوهات ب انواع مختلفه، عطور (يعني deodorizing pet spray) ، مجففات شعر (استشوار) ، امشاط ، ظفارات ، اطواق ، العاب، اكل ، اطباق ، رمل ، شنط، لتر بوكسس. اي شي ممكن حيوانك يحتاجه
و بنوفرها ك بكجز تنفع ك هدايا كمان 💃💃 و بخدمات توصيل كمان 💃💃
المهم المتجر حيكون في الانستغرام و التيك توك 😁
التحت ديل اللينك بتاع الانستغرام و الكود و اللينك بتاعين التيكتوك .



https://instagram.com/petscare.sd?utm_medium=copy_link

https://vm.tiktok.com/ZSJwTSRwY/

07/09/2021

صباااح الخير 😍🔥
نطلع شويه من جو الحيوانات الاليفه 🙆❤
الغزال الصغنن دا عمره كان سبعه يوم 😍🔥
الحمدلله كان مجرد فحص روتيني عشان نطمئن عليهو هو و امه ❤
في الفيديو التاني الصغنن كان بيرضع ❤❤
every life matters

02/09/2021

مساء الكيااااته و الجمال 😻🔥
هل مستعدين لعروض الجمال و الدلع ؟!
حماااأااااااس الف 🔥🔥🔥🔥

01/09/2021

Hiiiiiiz ❤
ناس امدرمان
متوفر لدينا تطعيم السعر و مضادات ديدان " حبوب" و مضادات طفيليات خارجيه "قطرات ظهر" قطط و كلاب 😽🐶
الكميه محدوده
للحجز و الاستفسار 0913199055

01/09/2021

Morningz 💃
بالنسبه للقطط و الكلاب 😽🐶
الشاى و القهوه لا 🙅
الشوكولاته لا 🙅
نسبه لاحتوائهم على ماده الكافيين و اللي ممكن تعمل تسمم قد يؤدي لموت الحيوان 💔