泥土日誌 Soil Logbook

05/09/2021

換個鞋底，新鞋一樣，又可以著多一兩年。
#根記補鞋

04/07/2021

收成

唔覺唔覺做堆肥都已經做咗一年有多。其實一早可以收成，但因為懶得搞，所以一直由佢儲起冇理佢。

一般嚟講，熱堆肥只需一個月左右已經完成分解；而冷堆肥就需要半年到一年左右嘅時間。

熱堆肥分解速度比較快，冷堆肥就比較唔洗花心機打理。所以用邊種堆肥方式其實都好視示個人需求同埋生活方式。

例如我自己，一開始做堆肥嘅時候就梗係最有心機，控制好廚餘嘅氮碳比例、溫度、水份，做熱堆肥係一個好好嘅學習過程；到後來生活比較忙，廚餘量唔夠支撐起個熱堆肥，轉做冷堆肥就變咗一個更適合我情況嘅廚餘處理方式。

一年嚟，呢到大概收成咗三份一，留返一啲方便日後繼續加廚餘做堆肥。

#泥土日誌
#堆肥

01/07/2021

冷堆肥

近半年工作比較忙，唔多喺屋企煮飯。慢慢只有每朝嘅咖啡渣同埋果皮會攞去做堆肥。廚餘份量唔夠、碳氮比例冇控制，其實就係一個冷堆肥。

冷堆肥其實都能夠分解廚餘，分別只係分解過程比較慢。有幾慢？上面個菠蘿頭大概三個月就變咗咁嘅樣。

關於冷堆肥同埋其他廚餘再造嘅種類，可以睇返呢個ig/ fb page嘅第二個post。

#泥土日誌
#堆肥
#冷堆肥

20/12/2020

做堆肥耐唔耐都會有啲意想不到嘅事情發生。冇理個堆肥一排，結果生咗棵薑出嚟。
#泥土日誌
#堆肥

15/11/2020

做堆肥日子耐咗，難免會越嚟越懶(或者好聽啲嘅講法就係要尋求更有效率嘅做法)。於是試吓唔打碎啲廚餘，直接攞去堆會發生啲咩事。

打碎先做堆肥當然分解得最快最好，但原來就咁掉落去堆埋亦都冇乜大問題。其實啲果皮之類分解得好快，兩星期左右已經唔見咗。但係蛋殼之類就分解得好慢，成個幾兩個月都仲會見到佢喺到。

所以乜嘢可以就咁掉落去埋，乜嘢最好打碎先埋，都要憑經驗決定喇～

#泥土日誌
#堆肥

01/11/2020

各種可能性

有環保團體首次試驗以昆蟲處理離島產生的家居廚餘，今年9月起在南丫島收集8個家庭每月約30公斤廚餘，供24小時不斷進食、連糞便也視為「美食」的黑水虻幼蟲食用，以達至減廢，長遠冀擴展至其他離島及新界鄉村。有關注環保的退休教授認為，首次有社區試驗以蟲治廚餘是好開始。
詳情：link.mingpao.com/65694.htm

#明報 #明報即時新聞 #虻 #黑水虻 #廚餘 #環保 #生態
===========================
【讚好「明報即時新聞」專頁】
●請於FB將專頁「追蹤設定」（News Feed）設定為「最愛」（Favourites） 或「搶先看」（See First）
●請下載「明報」App，緊貼最新消息：
iPhone：http://apple.co/1foEZKS
Android：http://bit.ly/1foESyU

10/10/2020

個橙唔見咗呀！

擺咗個橙喺雪櫃深深處唔記得咗。變壞咗唔食得，唯有攞個橙嚟做吓實驗。

原個橙堆咗入個堆肥到，一個星期後check吓，除咗縮咗少少水，基本上冇乜異樣。

又點會估到一個月後，就突然成個橙影都冇埋？！真係成個橙唔見咗，一喺痕跡搵唔返。

#泥士日誌
#堆肥

07/10/2020

回收卡板變貓砂

#六斗木貓砂

02/10/2020

兩個月後

個竹牙刷多咗少少白色毛毛喺表面。雖然分解得好慢，但總算見到有啲嘢發生緊😄

#泥土日誌
#堆肥

23/08/2020

上次試完一塊西瓜皮大概四日唔見晒啲白肉，十日左右就完全分解晒。今次我地又試吓竹筷子同竹牙刷會發生乜嘢事。

其實一般家居/小型堆肥，都唔會建議使用木材或者竹之類材料，原因係分解時間太長。就算用，好多時都會先將啲木材打碎。不過本住求真既精神，我哋即管試吓一年半載啲竹會分解成點啦！😆

#泥土日誌 #竹 #堆肥

19/08/2020

先放咗四日，啲西瓜白肉已經唔見晒！

一個西瓜入面，其實有92%係水份，所以分解得特別快都正常。用西瓜嚟做埋肥嘅時候，要小心留意會唔會為埋肥帶嚟太多水份啊！

#泥土日誌 #埋肥

16/08/2020

我哋嚟做個小實驗，睇吓原塊嘅西瓜皮要用幾長時間嚟分解。（當然，打完卡之後就要將啲西瓜皮埋返入啲堆肥裏面啦）

#泥土日誌 #堆肥 #西瓜

03/08/2020

唔講唔知，香港都有本地米

#泥土日誌
#塱原 #生態米

02/08/2020

上回講到，因為之前加咗啲米落去，所以個堆肥變得太黏身。

而且，因為大部份堆肥都擺咗好幾個月，相信已經完成分解（全部變晒黑色），但就變得密度更高同冇咁疏水透氣。

種種原因加埋，個堆肥嘅狀態變得冇以前咁好，新加嘅廚餘分解時有好輕微酸味，同埋亦多咗啲蚊蟲。

最後解決嘅辦法係加咗啲椰泥落去(圖中淺啡色嗰啲。椰泥本身係好常用嘅土壤改良劑，可以改善疏水問題。同時，椰泥喺堆肥之中亦屬於high carbon content，可以幫助平衡carbon:nitrogen ratio。

加咗啲椰泥幾日之後，個堆肥啲氣色又變得清新返，啲蚊蟲亦走得七七八八。

#泥土日誌
#堆肥 #椰泥 #土壤改良劑

25/07/2020

最近出咗啲小狀況，就係啲堆肥變得有啲似黏土。思考一下，應該係因為之前攞咗啲米來做堆肥。

雖然宜家變咗黏土咁都冇乜大問題，但係似乎唔係太疏水同透氣，遲啲試吓加啲椰泥落去，睇吓可唔可以解決到嘅問題。

#泥土日誌 #堆肥

30/06/2020

呢排荔枝當造。

廿蚊五磅真係平得誇張，咁平難免有比較多枯枝同樹葉要你自己慢慢搣。荔枝皮同樹葉可以打碎用黎做堆肥。至於枯枝同埋荔枝核，雖然理論上都可以分解，但係需時以月甚至年計，所以唔多適合小型堆肥。當然，如果你有機器可以將啲枯枝打碎，或者係喺室外比較大嘅堆肥到用，咁就冇問題！

#泥土日誌 #堆肥 #荔枝

21/06/2020

植物 微生物 泥土 養份

Nutrient cycling is the process by which beneficial microorganisms harvest nutrients from soil organic matter and also from the ‘parent material’.

21/06/2020

做堆肥都順利左一段時間，最近終於遇到啲小問題，就係滋生咗啲蚊滋仔！上網search咗一下解決辦法，最後發覺有啲work有啲唔work，如下:

1. 用烏蠅貼，減少成蟲數量
臨急臨忙屋企冇烏蠅貼，試吓用強力膠紙代替，結果發現唔夠力黐住蚊滋，唔work。

2. 薄荷葉驅蟲
咁啱屋企有棵薄荷葉，就搣啲葉掉落去試吓得唔得，結果完全無效。

3. 將堆肥加熱
滋生蚊滋仔，其實可能係因為個堆肥都已經分解得七七八八，溫度降低咗好多。咁啱多得屋企隻貓唔少，喺包米附近屙尿，唯有洗一洗啲米，攞埋啲米去得做堆肥。結果個堆肥快速升溫， 蚊患嘅問題都解決咗。上網睇，有人唔太建議用米嚟做堆肥，原因係米比較容易吸引老鼠曱甴。我個堆肥容器比較密封，將啲米埋喺比較深處又冇乜嘢問題出現，大家想試嘅話，可以考慮吓呢個問題。

4. 咖啡粉？
網上又有個偏方話當咖啡因濃度高，對人來講可能冇乜問題，但對蚊蟲來講可能已經致命，所以可以攞咖啡粉嚟驅蟲。反正屋企有包冇人飲嘅咖啡粉就攞嚟試吓啦。最後的確杜絕咗蚊蟲，但都唔知道係咖啡粉定將啲堆肥升溫嘅功勞。總之，宜家個問題解決咗，將來先再研究啦！

#泥土日誌 #堆肥

12/06/2020

到咗食西瓜嘅季節。

見最近做堆肥幾順利，試吓唔打碎就咁切條做堆肥會點。結果一個星期就已經分解到唔認得了。

#泥土日誌 #堆肥

03/06/2020

開咗呢個page之後遇得最多嘅問題大概係「可唔可以喺屋企入面做堆肥？」。

呢個問題其實一言難盡，網上搵到嘅建議亦唔一定完全適用於香港嘅情況。不過可以分享一吓開始堆肥之前有啲乜嘢需要考慮。

室內？室外？
運作正常嘅堆肥會帶有泥土嘅氣色，雖然絕非難聞嘅氣味，但如果放喺家居入面都可能對日常生活有啲干擾。我個堆肥放咗喺天台後樓梯算係半開放嘅空間，覺得完全ok，如果係户外空間就當然更加冇問題啦！

蟲患？
除咗氣味，大家最擔心嘅就係堆肥究竟會唔會惹蛇蟲鼠蟻。堆肥最高溫度其實可以去到成6、70度，平時堆肥嘅高溫係會趕走蚊蟲。但係喺堆肥開始同結束時，溫度都會降返去室溫，如果堆肥濕度控制不當，係會有機會有蚊患。不過呢個問題係可以解決嘅。另外，要只要小心處理廚餘，將新鮮嘅廚餘盡量打碎同埋埋得比較深，再將容器做得比較密封，係可以避免蟲患，暫時做咗堆肥兩個月，都完全冇出現過老鼠甲甴嘅問題。不過堆肥容器唔應該完全唔透氣，因為如果缺氧廚餘就會腐爛發臭！

幾大空間？
堆肥其實唔可以做得太細，因為太細嘅話會散熱得好快，不利分解過程，冇咗高溫亦較容易有蟲患。而且太細嘅話亦都容納唔晒日常飲食嘅廚餘分量。我個堆肥空器大概一立方米，似乎處理到幾個月嘅廚餘量，亦足夠保持到正常堆肥溫度。暫時覺得呢個大細幾適合2-4人家庭嘅日常廚餘量。不過遲啲再多啲經驗之後，我都想嘗試將個堆肥做細啲，希望搵到一個適合更多香港家居環境嘅堆肥方案。

堆肥嘅做法其實可以有好多變化，例如因為外國堆肥可以放喺户外，又比較唔洗擔心蟲患問題，好多人會就咁用鐵線網圍起廚餘，就已經係一個堆肥。所以以上只係分享一個對我嚟講work嘅堆肥方法比大家參考，大家落手做嘅時候記得因應自己嘅環境作出調節！

#泥土日誌 #堆肥

02/06/2020

做堆肥各種意想唔到嘅情況。

估唔到火龍果嘅果皮有咁多水份。如果堆肥透唔到氣，就會變咗厭氧分解，腐壞發臭。所以遇到咁嘅情況，記得同其他嘢撈勻，確保個堆肥透氣喇！

#泥土日誌 #堆肥

14/05/2020

蝦殼可以做堆肥嗎？

原來唔只可以，仲要係好東西！原因係蝦殼含有甲殼素，除咗係fungi製造cell wall嘅所需物質，有研究仲發現分解甲殼素嘅細菌可以幫助農作物對抗疾病！

但用蝦殼堆肥比較容易發臭，而且分解時間可以長達一年。所以事前最好先盡量清走所有蝦肉，用熱水煲吓啲蝦殼清走導致變臭嘅油脂，再盡量將蝦殼烘乾打碎，咁就可以減低發臭嘅機會同加速分解過程。

今次試嘅分量好少，所以我係咁易用滾水淥吓再盡量打到最碎，最後乜事都冇，安全！

#泥土日誌 #堆肥

07/05/2020

比起用剷，親手翻土其實會觀察到多好多嘢。

例如你會發現堆肥嘅四周因為容易散熱，所以溫度明顯會比中心低；之前發覺水松分解得好慢，都係因為翻土嘅時候一路都覺得有啲一粒粒；又試過摸到一舊特別暖嘅嘢，原來係果肉之類營養豐富嘅物質。

掌握呢啲細節，慢慢會知道個堆肥應該要做幾大、落乜嘢廚餘好、要加幾多水等等，咁個堆肥就可以越做越好。

#泥土日誌 #堆肥

05/05/2020

今晚嘅Chef’s menu係
橙皮洋蔥蛋殼伴咖啡渣
#泥土日誌 #堆肥

04/05/2020

之前講到啲堆肥一路溫度唔夠高，睇吓關唔關酸鹼度事。

左邊嗰條係堆肥嘅pH值（約pH6)，右邊嗰條係清水嘅control (pH7)。正常做堆肥頭幾星期會偏酸，之後隨時間慢慢變返中性，一般pH值介乎6-8之間。

似乎酸鹼度幾正常，唯有繼續搵吓其他可能原因。pH paper邊到買到？Search吓「儀器行」，大概$90有一百條試紙。

#泥土日誌 #堆肥

02/05/2020

做堆肥有一半係資料搜集，有一半係實驗。
上次燒燶咗塊水松墊，上網睇應該可以用嚟做堆肥，但實際做嘅時候發覺分解速度好慢。宜家唯有每次翻土，都順便搣碎少少啲水松啦！

#泥土日誌 #堆肥

29/04/2020

廁紙筒可以做堆肥嗎？
本來諗住冇問題嘅，但打碎啲紙嘅時間發現有啲膠水漬，同埋微量顏色紙碎（彩色染料容易含重金屬）。所以睇用途啦，一般種植其實咁微量冇乜問題，但想如果一絲不苟啲，都係用返天然廚餘做材料啦！

#泥土日誌 #堆肥

27/04/2020

最近遇到啲小阻滯，就係個堆肥唔夠熱！

之前個堆肥一直喺30-40度之間（已經唔算熱，堆肥可以上到成70度），但最近只徘徊喺20-30度左右。

可能嘅原因好多，C:N Ratio控制得唔好？太乾？早兩日加啲啲檸檬落去pH太低？新落嘅廚餘太少？純粹最近天氣凍咗？定係做堆肥本身就係會慢慢降溫？

暫時仲要觀察吓，希望慢慢會搵出原因。

#泥土日誌 #堆肥

25/04/2020

宜家每日食完一餐都多咗個環節，就係睇吓啲嘢可唔可以攞嚟做堆肥。

粟米芯雖然理論上可以做堆肥，但分解過程太慢，其實唔多適合家居環境嘅堆肥使用。粟米鬚同粟米葉就冇問題喇，同平時一樣，用攪拌機打碎佢先做堆肥，個分解過程就更加快啦！

#堆肥日誌 #堆肥

23/04/2020

無患子 soapberry
「無患子與荔枝跟龍眼同屬無患子科。因厚肉質狀的果皮含有皂素，只要用水搓揉便會產生泡沫，是古代的主要清潔劑之一，一直在亞洲各地區用到20世紀初，才因價格和生產問題乏人問津，現代人幾乎已完全不知道其除污功能」

由細到大都係用洗衣液洗衫，總會有種先入為主覺得洗衣液先洗得乾淨，天然嘢應該係唔多work所以先被淘汰。結果用完之後驚訝原來又幾乾淨！一包六粒，洗到大概六次，圍返洗一次衫成本一兩蚊。係冇合成嘢咁平，但善待地球唔係幾好咩？

打完呢段字，宜家要攞啲用完既無患子去做堆肥喇。
#堆肥日誌 #堆肥 #無患子

21/04/2020

覺得幾滿意嘅暫存廚餘方法。

將每餐嘅廚餘擺喺攪拌機個兜到放入雪櫃，裝滿一兜先攞去用。500ml嘅size好容易擺入雪櫃，又剛好應付大概一日既廚餘份量。打碎咗先做堆肥，分解過程又快啲，少啲機會有蚊蟲、異味等問題。

#堆肥日誌 #堆肥

20/04/2020

今日啲堆肥上面生咗啲白色毛毛出嚟。

Google一下，呢啲毛毛唔係真菌(fungus)而係細菌(bacteria)，屬於放線菌目(actinomycetes)，對堆肥嚟講大概係有益嘅嘢。

中學啲biology已經忙記得七七八八，有興趣的話wiki search 放線菌門。

#堆肥日誌 #堆肥

19/04/2020

意外燒燶咗塊水松墊。
隻貓表示check過冇問題，可以攞去做堆肥，屬於高碳（C）含量嘅browns。

#堆肥日誌 #堆肥

18/04/2020

指甲可以做堆肥嗎？答案係可以呀！

指甲屬於氮（N）含量高嘅”Greens”。不過當然，擦咗指甲油同gel甲就唔得喇。

#堆肥日誌 #堆肥

18/04/2020

見之前淨係加咖啡渣咁順利，決定將啲橙皮、洋蔥、菜頭菜尾用blender打碎加埋入去。

堆肥經常會講Green/Brown ratio:
Greens係指蔬果之類高氮(N)含量嘅物質。咖啡渣雖然係啡色，但都屬於greens。
Browns就枯枝、紙皮之類高碳(C)含量嘅物質。蛋殼同之前落嘅椰泥都係屬於browns。

堆肥入面如果greens太多就會發臭，如果browns太多就會分解得好慢同產生唔到足夠嘅熱力（即係變咗cold compost喇）。做hot compost，大概兩份browns，一份greens就差不多。

#泥土日誌 #堆肥

18/04/2020

神奇嘅事情馬上就要發生了。以為會冇乜嘢，點知第二日溫度就馬上升咗上26.6度，過咗幾日就keep住三十幾度喇。

黃色label啲溫度代表乜？係蚯蚓嘅合適工作同存活溫度。但做蚯蚓堆肥首先要有蚯蚓... 繼續玩住傳統堆肥先。

#堆肥日誌 #蚯蚓 #堆肥

18/04/2020

知道要買邊種蚯蚓，但喺香港邊到有得買呢？答案係我都搵唔到呀....搵過爬蟲、釣魚、雀仔舖，唔好話赤子愛勝蚓，連蚯蚓都見唔到...

另外，外國唔送香港，淘寶又冇乜信心。宜家試緊同漁護署申請植物病蟲害進口授權書，從正規途徑入口，但我估都冇咁快搞得掂。

嬲嬲地倒晒啲咖啡渣落啲椰泥到，玩住普通堆肥先。

#泥土日誌 #蚯蚓 #堆肥

18/04/2020

下一步就喺搵蚯蚓。搵啱嘅蚯蚓好緊要，因為適合堆肥嘅蚯蚓逃逸性低，唔會走到一屋都係；對環境適應能力更強；處理廚餘能力亦較高。

咁邊隻蚯蚓最適合呀？上網睇咗一輪，結論係最好係赤子愛勝蚓，近親安卓愛勝蚓都okay，佢地俗稱歐洲紅蚯蚓（red riggler），而「太平洋二號」就係幾種蚯蚓撈埋一齊，當中可能包括安卓愛勝蚓。睇到一頭煙？去pansci.asia 搵 「太平洋二號」，佢地寫得最清楚。

#泥土日誌 #蚯蚓 #堆肥

18/04/2020

喺屋企做堆肥呢個諗頭已經諗咗幾年，雪櫃亦儲咗一年份嘅咖啡渣，搬咗去屋村之後再做多幾個月嘅research就終於可以開波喇！

搵咗咁耐，發覺呢個Urban Worm Bag應該係市面上做得最好嘅蚯蚓堆肥系統。唔單止件實物造功靚，最緊要係所有教學配套、網頁等真係做得好足。睇完之後真係覺得「我好想做堆肥呀！！！」。

開波第一樣野係用椰泥(Coco Coir)做bedding。左邊嗰舊椰磚加完水，嗰樣就會變成右邊咁。Bedding水份控制好緊要，太多水會透唔到氣，太少水又生存唔到。本書話大概一手揸得出一滴水就係適當嘅濕度。

#泥土日誌 #堆肥

18/04/2020

［圖文不符］開始之前都要做吓資料搜集，發覺廚餘再造都有幾多種類：

廚餘機：其實只係將廚餘加熱攪碎，節省空間同等啲廚餘唔好發臭，但就冇分解過啲廚餘，而且消耗電力。

熱堆肥：只要有適當嘅碳(C)同氮(N)物質比例，充足嘅空氣同適量嘅水，空氣中嘅微生物就會自然進行好氧(aerobic)分解，過程會產熱高達70 °C，可以殺死有害微生物、蟲卵同雜草籽。正常堆肥帶有泥土氣色不唔會臭，但當C、N、水、空氣比例控制不當，微生物以厭氧（anaerobic) 方式進行分解，就會產生腐壞嘅氣味。熱堆肥分解速度高，一般幾個月就完成分解。

冷堆肥：其實同熱堆肥大同小異，只不過係碳比例高，更加唔洗打理，基本上將廚餘埋起就搞掂。但分解過程慢，需時長達一兩年，而且冇咗高溫趕走害蟲，因此只適合户外環境。

Bokashi堆肥：日語發酵嘅意思，透過添加EM菌嚟進行厭氣（anerobic)發酵，唔會產生臭味，香味比較似醃物嘅醋香，適合室內環境進行。但係bokashi堆肥必需定期添加EM菌，而且最終製成品並唔係完全分解，所以呢種方法對減少固體廢物係有幫助，但用嚟做堆肥作種植用途就存在爭議。

蚯蚓推肥（Vermicomposting)：類似傳統堆肥，需要控制C、N、水、空氣比例，但分解過程主要靠蚯蚓進行。好處包括製成品最為適合種植，所需空間更少，適合室内進行。資料搜集嗰陣發現香港有人研究緊喺家居進行蚯蚓堆肥，而且做得幾成功，大家有興趣可以search下Worm Bin Man。缺點方面，畢竟蚯蚓都係小生命，唔可以太疏忽照顧，唔係會全軍覆沒。另外，都需要照顧蟲蟲嘅飲食習慣，例如，蚯蚓唔適合食橙皮同洋蔥。不過都唔洗太擔心，蚯蚓本身幾粗生，去旅行唔理佢一兩星期都唔會餓死。

既然蚯蚓堆肥適合室內進行，製成品又特別肥沃，香港又有成功案例，決定試下蚯蚓堆肥！

#圖文不符