Purr-fect Pets, online (2024)

12/11/2022

تعرف ان الفراعنه كانوا بيقتلوا أي حد يسبب الموت لقطه سواء عمد أو عن طريق الخطأ!
وأنشأوا أول مقبرة للحيوانات الأليفة دول حتى كانوا بيحنطوا القطط ويلبسوها تيجان من الحديد والخرز

10/11/2022

🔵يعني ايه تطعيمات؟
التطعيمات هي عبارة عن مادة حيوية أو كيميائية بديها للأليف عشان تساعد جسمه يكون مناعة من أمراض بتهدد صحته،
و من أمراض تانية ممكن تهدد صحتي معاه لأنها ممكن تكون معدية أو بتتنقل منه ليا في حالات العض والخربشة زي السعار
فبالتالي نقدر نقول أن تطعيمات الأليف ضرورة ليست رفاهية🤝

🔵اي التطعيمات الل هحتاج اديها لو بربي كلب او قطه فالبيت؟
لأن صديقك الأليف جزء من الأسرة فواجب عليك تهتم بصحته وبمجرد ما تاخد قرار تربي كلب او قطه لازم تاخده للطبيب البيطري يفحصه وعلى حسب حالته وعمره بيحط خطه أو جدول للتطعيمات والل غالباً بتغطي تلات أجزاء:-
( أمراض ڤيروسية-ديدان وحشرات-سعار)

🔵و لو بتربي حيوان أليف ولسه مطعمتوش فالجدول الل تحت هيساعدك تعرف اي التطعيمات الل لازم ياخدها عند الطبيب البيطري بناءً على عمره.

02/11/2022

مع دخول الشتاء بتزيد حالات احتباس البول في القطط للأسف🐱 رغم ان طرق الوقاية من الحالة دي بسيطه جداً لكن كتير مننا بيغفل عنها:"
فكالعاده تعالوا فالكم نقطه الجايين نعرف المشكلة وأسبابها و طرق الوقاية منها:-

🔵احتباس البول في القطط بيحصل نتيجة تكون حصاوي وانسداد مجرى البول...لكن دا ممكن يحصل نتيجة اي بردو؟

⬅️القط مش بيشرب كتير.
⬅️الدراي فود الل بستخدمه فيه كمية ملح كتير ومع الوقت بيترسب ويعمل حصى في المجرى البولي وبالتالي انسداده واحتباس البول.

🔵من الأسباب نقدر نعرف طرق الوقاية وهم كالآتي:-

⬅️احرص ان أليفك بيشرب الماية بشكل دوري وبالكمية الل تناسبه
(50مل ماء/1كجم)
يعني لو القط وزنه خمسه كيلو لازم يومياً يشرب عالأقل ربع لتر ماية.
⬅️اختار الدراي فود بعناية و يفضل تستشير الطبيب البيطري اي أفضل نوع ملائم لاحتياجات أليفك وفنفس الوقت تقدر توفره بدون إرهاق مادي عليك.
⬅️احرص يكون فيه متابعة دورية مع الطبيب البيطري وكشف بالسونار على المثانه عالأقل مرتين لتلات مرات في السنه.

30/10/2022

مشكلة تساقط الشعر مش مقتصرة عالبني آدمين بس وبيعانوا منها
كمان صديقك الأليف هيواجه المشكلة دي كتير للأسف🐱🐶
طب تعالى نعرف الأسباب وطرق الحماية سوا فالكام نقطه الجايين دول🤝

🔵تساقط الشعر فالأليف ممكن يكون لأسباب طبيعية مفيش قلق خالص منها زي:-
⬅️(القلش) ودا معناه ان الشعر بيقع بصورة طبيعية فموسم معين من السنه عشان يغير الشعر بتاعه

⬅️تغير الهرمونات ففترات طلب الزواج

🔵طيب والأسباب الل مش طبيعية ولازم يكون ليها تدخل وعلاج زي ايه؟
⬅️(الفطريات والجرب والحشرات)
ودا لأنهم بيحفروا فالجلد ويسببوا حكه وقشرة وأعراض كتيرة بتنتهي بتساقط الشعر

⬅️(الديدان)
ودا نتيجة انها بتنافس الحيوان في امتصاص العناصر الغذائية ومن ضمنها عناصر مهمة للحفاظ على فروة الجلد

⬅️(التغذية)
زي ما الديدان بتوقع الشعر نتيجه انها بتاخد غذاء أليفك كمان لو الوجبات الل بتتقدمله مش متوازنه ومفيهاش ڤيتامينات والعناصر المطلوبة هتدي نفس النتيجه مع الشعر

🔵خلاص عرفنا المشكلة وأسبابها لكن معرفناش ازاي نتجنب الوقوع فيها بردو؟
هنختصرهم تلات خطوات وقائية:-
⬅️حافظ على جرعات الديدان والحشرات لأليفك بالمتابعة مع الطبيب البيطري
⬅️احرص يكون في تنوع فالعناصر الموجوده فالوجبة الغذائية للأليف
⬅️حافظ على نضافة فروة الجلد دايماً وخلوها من أي عثرات ممكن تسبب مشاكل بعد كدا

21/10/2022

I wish nothing but success for all of you,keep it going👏👏👏

21/10/2022

شكراً جداً لوجودك معانا يدكتور مياده انهارده كنا سعداء بوجودك و حقيقي استفدنا كتير💜💜💜

18/10/2022

للأسف ناس كتير متعرفش ان كتير من الأدوية البشري سام بالنسبة للحيوانات الأليفة🐱🚫
خاصة المسكنات وخوافض الحرارة ومضادات الالتهاب💊

⬅️طيب اي اشهر الأدوية البشرية الممنوعة بالنسبة للpet animals؟
*بانادول، أدول، باراسيتامول، بروفين
*ڤولتارين، ديكلوڤين، كتافلام
*اسبرين، ريڤو

⬅️رغم ان معظم الأدوية دي آمنه جداً عالإنسان خاصةً البارسيتامول
لكن تأثيرها مش كويس عالحيوانات الأليفة وممكن تسبب فشل كلوي أو تسمم كبدي غير حالات الأنيميا وأمراض الجهاز الهضمي

⬅️كمان الrectal e***a البشرية ممنوعة تماماً وسامة
بالنسبة للحيوانات الأليفه وبتسبب اختلال في الحركة وتصلب في العضلات وضعف عام وممكن تنتهي بالموت🚫

🤝فرجاءً ممنوع ندي أي دوا إلا باستشارة الطبيب البيطري المشرف على حالة صديقك الأليف

14/10/2022

أهم من الشغل تظبيط الشغل🤝
أكيد أول حاجه هنبدأ بيها تدريب الpets هو ازاي تاخد خطوتك الأولى فيه أصلاً واي المصادر الل تعتمد عليها في بداياتك🤷🏻‍♀️

عشان كدا معانا د.مياده أيمن💜
⬅️خريجة طب بيطري جامعة قناة السويس 2020
⬅️من ضمن فريق عمل عيادةPet Clinic في العريش

هتكلمنا عن بداياتها وازاي بقا عندها حصيلة علمية كافية عشان تقدر تقف في عيادة
وكمان هتكلمنا عن خطوات الphysical examination وازاي بنفحص الحيوان from ear to a**s

⬅️معادنا بإذن الله يوم الجمعه الجاية الساعه 8مساءً
⬅️لو حابين تحضروا السيشن كل المطلوب منكوا تبعتوا صورة الكارنيه على رسايل البيدچ وهنضيفكوا على جروب السيشنات

08/10/2022

Pet training-3♥️
احنا اتكلمنا عن مشكلتين بتواجه كل الأونرز فالبوستات القديمه وكانوا (تدريب الليتر بوكس-مشكلة العض)
انهارده كلامنا هيكون عن مشكلة قريبة للعض و مفيش أونر مبيعانيش منها (خربشة الأثاث)🥲

ببساطه كدا أليفك بيخربش أثاث بيتك مش عنداً فيك لا دي طبيعة عندهم وغريزة بردو زي ما اتفقنا انهم كائنات صياده🐱🐶

طيب والحل؟!
الحل ببساطه بردو اننا نلاقي بديل نعود أليفنا عليه يخربشه فيسيب الأثاث في حاله وتبقا كل الأطراف كسبانه🤝

⬅️أول حل انك تكلف شوية وتشتري عامود خربشة تعود قطتك عليه
هتحطه اول يوم قريب من الأثاث الل قطك بيخربشه على طول وتبعده عن الأثاث ده يوم بيوم
عشان تلفت انتباه أليفك للعامود ممكن تستعين بلعبه تعلقها عليه

⬅️طيب مفيش بديل للعامود والتكاليف دي كلها؟!
أنا لو مكنتش عارفه البديل ده صدقني مكنتش هنزل البوست أصلا😂

⬅️البديل اننا نجيب سجاده قديمه ونلفها ونسيبها واقفه فركن ونعتبرها عامود الخربشة بتاع القط ونعوده عليها يوم بيوم
(هتلاقوا صور فالكومنتس)

⬅️آخر خطوة ثابته فكل التدريبات وهي فكرة المكافأه انك لما تلاحظ أليفك بطل عاده سيئة زي خربشة الاثاث دي تظهرله انك مبسوط فتديله تريت وتصقفله مثلاً👏♥️

06/10/2022

فُخور بيطري بيزيدوا فخر😂♥️
د.مصطفى عبد السميع خريج بيطري جنوب الوادي
⬅️استكمل دراساته العليا ف(اليابان،هيروشيما)
⬅️حصل على الدكتوراة من سويسرا
⬅️رسالة الدكتوراه الخاصة بيه مرشحة كأفضل رسالة دكتوراه فالجامعة السويسرية السنه دي2022
⬅️حصل على جائزة العلماء الشباب من الجامعة الأمريكية للمايكروبيولوچي وجائزة مؤتمر باريس للأمراض المعدية

اركنلي كل ده وركز فالجاي♥️♥️♥️
الفترة دي الحكومة السويسرية بتقوم بتمويل مشروعه البحثي الل من أهدافه تقليل الاعتماد على المضادات الحيوية وايجاد بدائل👏
يعني ممكن فالمستقبل نلاقي ان مشكلة مقاومة المضادات الحيوية دي بقت من الماضي👏👏👏

06/10/2022

مكملين معاكوا ف سلسلة الpet training♥️

انهارده هنتكلم عن مشكلة العض عند الكلاب والقطط 🐶🐱

⬅️قبل ما نبدأ خلينا متفقين ان الكلاب والقطط كائنات صيادة يعني غريزتها العض أصلا
⬅️تاني حاجه ان فعمر التسنين تحديداً الطفل الرضيع نفسه بيعض فطبيعي بردو الكلاب والقطط فالعمر ده هتقرفك حبتين من مشكلة العض لكن كل مشكلة ليها حل والحل في التدرييييب🤝

طيب هندربهم ازاي بقا🤷🏻‍♀️

⬅️هتوفرلهم ألعاب عض زي الألعاب المطاطية أو السيليكون عشان تشبع غريزة الصيد عندهم
⬅️لو أليفك خربشك او عضك هتعلي صوتك وتبعد ايدك عنه فنفس الوقت وتتجاهله مدة قليله دقيقة دقيقتين كدا يعني
⬅️بعدين هترجع تلعب معاه وتديله اللعبة بتاعته عشان تفهمه ان ايدك مش للعض اللعبة هي الل للعض😂
⬅️لو أليفك بقا بيتصرف كويس حاول تظهرله انك مبسوط منه بنفس الأصوات الطفولية والتريت بتاع بوست الليتر بوكس بردو👏
⬅️الحيوانات الأليفه كائنات حساسة جداً اوعا تعاقبهم احنا العقاب عندنا معاهم تجاهل لمدة دقيقه واحده متخيلين!
فكونوا حريصين كل حاجه معاهم تكون بهداوة وحنية لأن دي لغتهم♥️

04/10/2022

كنت حابه نبتدي سلسلة تدريب الأليف سوا الفترة الجاية
فأهم حاجه فالتدريب هنبدأ بيها انهارده بإذن الله وهو تدرب أليفك ازاي عالليتر بوكس🐱🐶؟

نتفق على كذا حاجه الأول🤝
⬅️الليتر بوكس تكون جدرانه قصيرة لو الأليف لسه صغير عشان يقدر يدخل ويطلع بسهولة وكل ما حجمه زاد بنزود حجم البوكس

⬅️يفضل حواف الليتر بوكس متكونش واخده زاوية حاده لا الافضل انها تكون curved عشان ده هيسهل عملية تنضيفها وهتقلل فرص تراكم البكتيريا والطفيليات فالأماكن الصعب الوصول ليها زي الsharp edges

⬅️كل يوم بننضف الfeces من الليتر بوكس بالجاروف وكل اسبوع بنغير الرملة كامله وننضف ونعقم البوكس

بالنسبة للتدريب بقا🐱🐶
⬅️لو الام موجوده هي هتبتدي تعلم اطفالها عالليتر بوكس زي مانت علمتها قبل كده عادي خالص

⬅️طيب ولو مش موجوده انت الل هتبتدي تعلمهم بقا عن طريق انك هتاخد القط مثلا لمكان الليتر بوكس وتسيبه ياخد عليه لو حاول يطلع رجعه وخليه يفرك ارجله الأمامية فالرمل عشان يتعود عليها
(هتكرر العملية دي اول ما يصحى وبعد كل وجبة)

⬅️لو القط عمل defecation برا البوكس هتاخد الفضلات دي تحطها فالليتر بوكس بجلافز وتنضف المكان الاول وترجع تجيب القط لمكان الليتر بوكس والفضلات فيه عشان يبتدي يشمها فالمكان ده فيعرف ان ده المكان الصح للdefecation

⬅️لو القط طلع ممتاز وعملها فالليتر بوكس هتبتدي تظهرله انه كدا عمل حاجه صح عن طريق انك تديله تريت او تصقفله وتعمل الاصوات العبيطه بتاعة الاطفال الل كلنا بنحبها دي تشجعه وشاطر يكوكو وكل ما يوازيها بقا من كلمات تشجيعية عشان البطل عمل المستحيل😂😂😂

بس كدا احنا خلصنا اول موضوع من سلسلة الpet training♥️🤝

02/10/2022

اتكلمنا عن الممنوع وعرفناه خلاص طيب اقدم اي لأليفي بقا واي الأكل المسموح ليه🐶🐱

🤝نتفق على كذا نقطه الأول:-
🟫التغذية هتكون بنظام وجبات كل وجبة بسيبها قدام صديقي الأليف نص ساعه لساعه واشيلها.
🟫عدد الوجبات بيقل كل ما عمر الأليف زاد
*6شهور-3وجبات *سنه-وجبتين *أكبر من سنه-وجبة واحده
(طبعاً الكلام ده في الكلاب لكن القطط طفسه شوية طفسة شويتين فبنزود رتم الوجبات عن كدا بمعدل من واحد لاتنين مثلا).
🟫بنبتدي نقدم وجبات بسيطه للأليف مع الرضاعه من عمر 25 يوم.

نيجي للمسموح بقا♥️
✅لحوم مسلوقة
✅شوربة خضار او خضار مسلوق وكل ده من غير توابل
✅عيش،مكرونه،رز
✅الجبنه القريش
✅الفاكهة المسموحه ولكن بنسب ضئيلة جدا بردو زي التفاح والموز والبطيخ
✅الdry food
✅الكبدة والسمك والبيض مسموحين ولكن اقصى حاجه مرة واحده بس فالاسبوع ميزيدوش عن كدا

01/10/2022

مبسوطه جداً ان الجروب عجبكوا بجد♥️🤝
دعواتكوا بإذن الله الجاي احسن واحسن وهنكبر بيكوا

01/10/2022

10حاجات ممنوعة تماماً للحيوانات الأليفة وأغلبنا بيغلط ويديهالهم كوجبة غذائية✋

1-العنب والزبيب🍇
🟫العنب والزبيب من المأكولات السامة بالنسبة للحيوانات الأليفة وتناولها ولو بنسبة بسيطه بيسبب فشل كلوي سريع بالأخص في الكلاب.
🟫عامةً بننصح بتجنب السكريات في الحيوانات الأليفة.

2-التوابل(خاصةً الثوم والبصل)🧄
🟫استهلاك التوابل بيسبب مشاكل كتير فالحيوانات الأليفة زي الجفاف وارتفاع ضغط الدم غير آلام البطن.
🟫الثوم والبصل بقا ممنوعين تماماً وشدلي تحتهم عشروميت خط لأن تناولهم بيسبب haemolytic anemia.

3-الدهون بنسبه كبيرة🥫
🟫زي ما استهلاكنا الزايد للدهون مصيبة نفس الحوار فالحيوانات الأليفة وبيسبب GIT disturbances زي الvomiting,diarrhea.
🟫عشان كده بننصح دايماً ان التونه المعلبة لازم تتصفا من الزيت وتتغسل بالماية قبل تقديمها لصديقك الأليف.

4-اللحوم النية🥩
🟫خلينا متفقين ان أي حاجه نية متعرضتش للطهي او heat treatment بتكون غرقانه بكتيريا وطفيليات من كل حدبٍ وصوبْ ودا مش بيشكل خطر على أليفك بس ده بيشكل خطر عليك انت كمان
لأن في طفيليات كتيرة جداً بتتنقل من الحيوان للإنسان زي ما قلنا في بوست الtoxoplasmosis.

5-العظام🍖
🟫رغم ان العضم مصدر هايل للكالسيوم لكن استهلاكه بيسبب جروح فالمسار الهضمي وممكن يعمل obstructions ومشاكل انت في غنى عنها لأن في بدايل كتير للكالسيوم غير العضم زي(البسلة،السبانخ،الزبادي اللايت،free lactose milk)

6-الكافيين(قهوة،شاي)☕
🟫معظم الأونرز معندهمش مانع الكلب أو القطه بتاعتهم تخمس في كوباية الشاي معاهم بس دا غلط جداً
الشاي والقهوة فيهم كافيين والكافيين سام بالنسبة للحيوانات الأليفة لأنه بيرفع ضغط الدم وبيعمل مشاكل في الجهاز الهضمي.

7-اللاكتوز(منتجات الألبان)🥛
🟫الإنزيم الل بيهضم اللاكتوز هو الlactase وده مش موجود بنسبة كفاية في الحيوانات الأليفة عشان كدا بنعتبرهم lactose intolerat فمينفعش نديهم أي منتجات ألبان فيها لاكتوز.

8-الشيكولاتة🍫
🟫الشيكولاته من المنتجات الل بتسبب تسمم في الحيوانات الأليفة بسبب احتوائها على الtheobromine أولاً والكافيين ثانياً.

9-المكسرات🥜
🟫المكسرات ممنوعة لأن فيها نسبة كبيرة من الfats صعب جداً بالنسبة للحيوانات الأليفة تهضمها.

10-المشروم🍄
🟫بيسبب تسمم للحيوانات الأليفة وأعراضها صعبة بتوصل لنوبات صرع.

30/09/2022

"أهلا بِكُم فِي طِبّ الْكَائِنَات الصامتة
الَّتِي جَعَلَ اللَّهُ مِنْ سَقَاهَا فِي جَنَّاتِه وَمَن أَذَاهَا فِي سعيره ، فَمَا ظَنُّكم بِجَزَاء مِن يداويها♥️"

لكل طالب بيطري محتاج مكان واحد فيه كل مصادر الpets الل ممكن تسد معاه فعلاً واتخنق من النظري🥲
جمعنالكوا كل حاجه في جروب واحد عن تجربة هتساعدك تاخد أول step وهنفضل معاكوا خطوة بخطوة لو فيه جديد بردو لأن عزيزي القارئ انا زيي زيك وبتعلم معاك🤝

🟫كل المطلوب تملا الفورم الل فالبوست أو تبعتلنا على رسايل البيدچ صورة الكارنيه وصورة البطاقه ومش مهم تبين الصورة احنا عارفين الل فيها وهنبقا ستر وغطا على بعض😂
المهم الاسم الل فالبطاقه بس يبان عشان نتأكد ان الكارنيه بتاعك فعلاً ومش مسروق ومتنساش تعمل شير و تمنشن لصديقك البيطري عشان تستفيدوا سوا.

https://docs.google.com/forms/d/1_y6uBteAjlLBvFzQk6ftc6KmlSLMus5_E9AxCNmtxLo/edit

29/09/2022

أي بنت بتربي قطط أكيد سمعت الجملة دي كتير
(انت بتربي البتاع دا ليه هيجبلك عقم ومش هتعرفي تكوني أم)
طيب هو الكلام دا بجد فعلاً ولا أي هبل فالجبل🤷🏻‍♀️؟
هو هيطلع أي هبل فالجبل بس تابع للآخر عشان تعرف ترد بعد كدا عالأسطورة دي🐱
🟫المشكلة كلها فطفيل اسمه التوكسوبلازما لو اتصابت بيه سيدة حامل هيحصل إجهاض وغالباً تشوهات للجنين
🟫بس هو الطفيل ده هيوصلي ازاي؟
هيوصلك بطريقة من الاتنين:-
أول حاجه: أكل لحوم نية تحتوي على الطفيل ده أو خضراوات وفواكه ملوثة بفضلات قطط مصابه
والتاني: لمس فضلات قطه مصابة ومتغسلش ايدك بعدها وتاكل بالايد دي عادي
🟫اي علاقة القطط بقااا؟
القطط زيها زيك عباره عن عائل بيتصاب بيها نتيجه انه ياكل بردو لحوم نية أو مصنعة زي اللانشون وفيها الطفيل ده فيتنقله.
وبعد ما يتنقله هينزل فالfeces بس وقتها هيكون غير معدي لأنها(unsporulated oocyst)لغاية ما يعدي عليها يوم كامل تبقا معدية لأنها اتحولت ل(sporulated oocyst).
هيوصلك انت بقا لما تلمس الفضلات دي وتاكل بايدك الل لمست بيها الفضلات من غير ما تغسلها.
(الإجراءات الوقائية)
✅ممنوع تأكل أليفك أي لحوم نية
✅التخلص من فضلات القطط بشكل صحي وارتداء gloves
✅بعد التعامل مع فضلات صديقك الأليف إجباري تنضف ايدك كويس جداً
✅حافظ على تطعيمات الديدان لأليفك وتابع مع الطبيب البيطري الخاص بيه
🟫بالتالي الحلقة بدايتها من عندي أنا كمربي أمنع وصول التوكسوبلازما دي للقط باجراء واحد بسيط عالأقل انك متديلوش أي حاجه نية أو طعام ملوث،
والمفروض انك طبيعي من نفسك تغسل ايدك كويس بعد التعامل مع أي حاجه زي فضلات القطط فبصراحة القطط مظلومة فالحوار دا يجماعه😂

28/09/2022

كتير مننا بيقابل قطط رضيعة فالطريق ومن غير أم مش بيكون عارف يتصرف معاها ازاي أو يرعاها ازاي🤷🏻
عشان نبسط الموضوع خالص هنقسمه ل3 أساسيات:-
(سكن ،لبن ،رعاية)

1-السكن📦
🟫أبسط حاجه كرتونه مفتوحة ونحط فيها بطانية كمصدر للتدفئة,
في حالة الجو البارد ممكن نستخدم أزايز ماية دافية ونغطيها بفوطة ونحطها جوا الكرتونه كمصدر إضافي للتدفئة.

2-اللبن🍼
ممنوع استخدام أي مصدر لبن فيه لاكتوز لأن معدة الحيوانات الأليفه مش بتقدر تهضمه وبيعمل مشاكل هضم زي الإسهال
طيب والحل ايه؟
🟫من أي صيدلية بشرية هنجيب علبة bebelac free lactoseللأطفال ونستخدمها للقطط عادي جداً باستخدام سرنجة.

3-الرعاية♥️
🟫مرتين يومياً بنمسح منطقة العين بقطنة مبلولة ماية دافية
🟫القط بيكون نايم على بطنه وراسه بنرفعها45°وقت الرضاعة باستخدام السرنجه
🟫بعد كل وجبة بعشر دقايق بنمسح منطقة الإخراج بقطنة مبلولة ماية دافية وبنعمل مساچ خفيف للبطن

بس كدا أتمنى تكونوا استفدتوا ولو في أي موضوع تاني حابين نتكلم عنه المرات الجاية شاركونا فالكومنتس♥️

Purr-fect Pets

12/11/2022

10/11/2022

02/11/2022

30/10/2022

21/10/2022

21/10/2022

18/10/2022

14/10/2022

08/10/2022

06/10/2022

06/10/2022

04/10/2022

02/10/2022

01/10/2022

01/10/2022

30/09/2022

29/09/2022

28/09/2022

Address

Website

Alerts

Shortcuts

Share