17/02/2023
المغص ف الخيول
جزيل الشكر ل Mohamed Abdo ع تشجيعي ع عمل الموضوع و شغل السوشيال ميديا اللي بيعمله🔥
مشاكل البطن ف الخيل كتيره و معقدة لأن تركيب البطن للخيول معقد و يخلي الخيل معرض بشده لمشكلة المغص، المغص ليه صوره معروفه عند اصحاب الخيل”الحصان قطع اكل، الحصان نام ع الارض و بيتقلب بشكل عنيف، الحصان بيضرب الارض بيرجله الامامية، الحصان مكتئب….الخ من علامات المغص المعروفه”
المغص اسبابه كتير جدا لكن ع سبيل المثال لا الحصر تغيير الاكل المفاجئ حتي و ان كان نفس الاكل لكن نوع شركة تانية، الديدان، الاسنان، قلة شرب المياه، قلة حركة الحصان”رياضه قليلة”، نسبة الاعشاب و الالياف قليلة، قرحة المعدة، التواءات القولون و الامعاء
المغص بيحصل ف كل الاعمار من عمر يوم لعمر ٢٠ سنه فالأفراس و الفحول و خصوصا الافراس ف الفترة الاخيره من الحمل”اخر ٣ شهور”
هتكلم عن اشهر تلت انواع مغص بيحصل ف مصر
رقم ١ Pelvic flexure impation
و ده تجمع الاكل ف مكان اسمه pelvic flexure ف القولون الطالع، و المغص ده بيحصل كتير عشان تغيير الاكل و عدم الاهتمام بالاسنان و عدم شرب الماء كفايه، لحسن الحظ ان المغص ده ممكن علاجه طبيا اذا اتلحق بسرعه بالمحاليل و البوسكوبان و الفلونيكسين و احيانا يحتاج غسيل معدة و زيت برافين حوالي ٣٠٠-٤٠٠ مل و عادة يستجيب للعلاج خلال ساعتين تلاته.
تمنع المغص ده ازاي؟
لازم تلتزم بنفس نوع و روتين الاكل اللي ممشي عليه الحصان و متغيرش اي حاجه الا بالتدريج و افتكر دايما ( Horses Don’t like surprises ) يعني الخيل لا تحب المفاجأت، مهم جدا برضو انك تتاكد ان الحصان بيشرب ميه كويس و تشيك عليه يوميا، تتاكد برضو ان الحصان بيزبل كويس و الزباله مش ناشفه و فيها نسبة مياه
رقم ٢ مغص الدوود
بيحصل دايما ف الخيل عمر السنة خصوصا لو قاطع دوا الدود فتره و عطيته مره واحدة، بيموت عدد كبير من الدود و بيسد الامعاء (المصران) بتاع الخيل لانه بيكون لسه قطرها ضيق نسبيا. المشكلة دي بتكون كبيره و مش سهل حلها ممكن تتحل عن طريق خرطوم المعده اذا ف كمية دود ميته ف المعدة او بيتم التدخل جراحيا عن طريق فتح بطن الحصان و نفتح الامعاء المصابه و نطلع الدود الميت.
تتجنب المشكلة دي انك تدي دوا الدود بانتظام ف بداية من سن ٤ شهور و ف الاول مش لازم تدي ادوية دود قوية لكن تدي دوا اقل قوه مثلا يكون فيه مادة فعاله واحدة عشان ميموتش عدد كبير من الدود و يسد الامعاء
رقم ٣ قرحة المعدة
و دي بتحصل كتير ف الخيل الرياضيه لانها بتكون تحت ضغط تدريب و اوامر و توقيت …الخ زي السباقات او قفز الحواجز او الشو…الخ او اي شئ بيعمل ضغط قوي ع الخيل. اعراض المشكلة بتكون مختلفه حسب حدتها، ممكن تلاقي الحصان ادائه قل بشكل بسيط، الاكل بتاعه اقل بشكل بسيط او اعراض مغص قوية انه ينام ع الارض . التشخيص بيكون بالمنظار و هي كاميرا بتكون متحمله ع كابل يدخل لحد المعده. العلاج بيكون نسبة حبوب اقل و كذلك دوا لقرحة المعدة (اوميبرازول) و اذا كان ف اعراض مغص بيتم علاجها
