06/10/2023
#ခွေးလေးတွေကို_အသားအစိမ်းကျွေးတာကောင်းလား?
ဒီနေ့တော့ ခွေးလေးတွေကို အသားအစိမ်းကျွေးတာနဲ့ပတ်သတ်ပြီး နည်းနည်းလောက် မျှဝေပေးချင်ပါတယ်။
အသားအစိမ်းလို့ဆိုရာမှာ မကြော်/ချက်ရသေးတဲ့ ကြက်/ဘဲလည်ပင်းပိုင်း၊ ကြက်/ဘဲဥ၊ ကြက်/ဘဲအသည်း၊ ဝက်/အမဲအသည်း... စတာတွေနဲ့ ကြက်၊ ဘဲ၊ ဝက်၊ အမဲတွေရဲ့ အသားချည်းသက်သက် အစိမ်းတွေလည်း ပါဝင်ပါတယ်။
တစ်ချို့ကျတော့လည်း အသားရောင်းတဲ့ဆိုင်တွေကနေ အပိုအလျှံအဖြစ်ထွက်လာတဲ့ အသားအတိုအစလေးတွေကို ခွေးစာအဖြစ်ဝယ်ပြီး အစိမ်းကျွေးကြပါတယ်။
ခွေးလေးတွေကို အဲဒီလိုမျိုး အသားအစိမ်းတွေကျွေးတာက တကယ်ကောင်းမွန်တဲ့အကြံဉာဏ် ဟုတ်ရဲ့လား?... ဆိုတာကို လေ့လာကြည့်ကြရအောင်။
ခွေးတွေဟာ ဇီဝဆိုင်ရာနဲ့ ဗီဇဖြစ်တည်မှုအရ သူတို့ရဲ့ဘိုးဘေးတွေဖြစ်တဲ့ ဝံပုလွေတွေနဲ့ ဆင်တူကြတယ်လို့ ယုံကြည်သူတွေကနေတဆင့် အသားအစိမ်းကျွေးတဲ့ဓလေ့ ပေါ်ပေါက်လာတာပါ။
ဝံပုလွေတွေဟာ အသားတွေကို အစိမ်းစားလို့ ကျန်းမာပြီးကောင်းမွန်တဲ့ အရေပြားနဲ့ လှပတဲ့အမွေး(သားမွေး)တွေရှိကြတယ်၊ ရုပ်ပိုင်းဆိုင်ရာအရ ပိုမိုကျန်းမာ၊ သန်စွမ်းကြတဲ့အတွက်...
ခွေးတွေကိုလည်း အသားစိမ်းကျွေးရင် ဝံပုလွေတွေလိုပဲ ရုပ်ပိုင်းဆိုင်ရာ ပိုမိုကျန်းမာ၊ သန်စွမ်းပြီး ပိုမိုကောင်းမွန်တဲ့အရေပြားနဲ့ လှပတဲ့အမွေး(သားမွေး)တွေကို ပိုင်ဆိုင်နိုင်တယ်လို့ ယုံကြည်ကြပါတယ်။
ဒါပေမယ့် တစ်ချို့လူတွေရဲ့ အခိုင်အမာယုံကြည်မှုတွေကို အထောက်အပံ့ဖြစ်စေမယ့် တိကျတဲ့သက်သေတွေတော့ အခုချိန်ထိမရှိသေးပါဘူး။
တကယ့်လက်တွေ့နဲ့ သူတို့တွေရဲ့ယုံကြည်ထားမှုဟာ လုံးဝကို ဆန့်ကျင်ဘက်ဖြစ်နေပါတယ်။ လွန်ခဲ့တဲ့နှစ်ပေါင်းတစ်ထောင်ကျော်အချိန်... ခွေးတွေကို လူသားတွေရဲ့အိမ်မွေးတိရစ္ဆာန်အဖြစ် မွေးမြူလာခဲ့တဲ့အချိန်ကတည်းက၊ ၎င်းတို့ရဲ့ မျိုးရိုးဗီဇဆိုင်ရာ လိုက်လျောညီထွေရှိမှုဟာ ဗီဇပြောင်းလဲလာခဲ့ပြီးဖြစ်ပါတယ်။
လက်ရှိအချိန်ကာလမှာ ခွေးတွေကို အသားအစိမ်းကျွေးခြင်းဟာ လုံးဝသင့်တော်လျော်ကန်ခြင်း မရှိတော့ပါဘူး။
တကယ်တမ်း အသားအစိမ်းကျွေးခြင်းကနေ ကောင်းကျိုးအနည်းငယ် ရကောင်းရနိုင်ပေမယ့်၊ ဆိုးရွားတဲ့ရလဒ်အများအပြားရရှိနိုင်တာကိုတော့ သုတေသနပြုလေ့လာချက်တွေကနေ အသေအချာသက်သေပြထားပြီးပါပြီ။
အသားအစိမ်းကျွေးခြင်းကနေ အန္တရာယ်ရှိမှုအများအပြားရှိတဲ့အနက် ဆိုးဆိုးရွားရွားတစ်ခုကတော့... အသားစိမ်းထဲမှာပါတဲ့ ရောဂါပိုးမွှားတွေကြောင့် ခွေးတွေရဲ့ခန္ဓာကိုယ်တွင်း ခုခံအားကျဆင်းပြီး အစာအဆိပ်သင့်ခြင်းနဲ့ E.coli(အီးကိုလီ) အစရှိတဲ့ ရောဂါပိုးဝင်ရောက်မှုတွေ ဖြစ်စေနိုင်ပါတယ်။
၎င်းတို့ဟာ အိမ်မွေးတိရစ္ဆာန်တွေမှာသာမက ကျွန်တော်တို့လူသားတွေအတွက်ပါ အန္တရာယ်ဖြစ်စေနိုင်တဲ့ ရောဂါပိုးမွှားတွေဖြစ်ပါတယ်။
ဒါကြောင့် ကျွန်တော့်အမြင်အရ အသားအစိမ်းကျွေးခြင်းကို လုံးဝအားမပေးလိုခြင်းဖြစ်ပါတယ်။
ဒီစာလေးကိုဖတ်ပြီး အသားအစိမ်းကျွေးနေတဲ့ ခွေးပိုင်ရှင်တွေနဲ့ အသားအစိမ်းကျွေးဖို့စီစဥ်နေတဲ့ ခွေးပိုင်ရှင်တွေအတွက် သတိပြုစရာတစ်စုံတခု အကူအညီရရှိလိမ့်မယ်လို့ မျှော်လင့်မိပါတယ်ခင်ဗျာ..
