صفحة تهدف إلى نشر التوعية البيطرية لتربية الحيوانات الأليفة، والتوعية بخصوص اللحوم والدواجن والأسماك، تحت إشراف أطباء بيطريين
(27)
15/10/2023
دي صورة حديثة لبول قط كان بيعاني من احتباس البول
وطبعا واضحة قد إيه الالتهابات والدم الموجود في البول بسبب الأملاح + الحصوات + احتباس البول فترة طويلة في المثانة
ومعدل حالات الاحتباس زاد الفترة دي
عشان درجة الحرارة بدأت تقل والقطط بقت تشرب مية أقل
كتبنا بوست قبل كدا عن احتباس البول لأن له أسباب أخرى كتير هنحط الرابط في التعليقات لمراجعته وتجنب هذه الحالة
وشربوا قططكم مية كفاية على مدار اليوم
ولو بياكلوا دراي فود يا ريت يكون نوع كويس قليل الأملاح 👌
دمتم وأليفكم بخير 🥰
Animalist
05/03/2023
🚫❌⚠️⚠️⚠️⚠️⚠️ الدراي فود ⚠️⚠️⚠️⚠️⚠️❌🚫
نظرا للظروف الاقتصادية اللي بنمر بيها للأسف كتير من تجار الدراي فود للحيوانات الاليفة قاموا بغشه 😑🙁
وكتير من القطط بقت تيجي لنا العيادة بأعراض
قرحة المعدة،
نزلات معوية شديدة
ووصلت لدرجة فشل كلوي
بسبب زيادة كمية الأملاح والإضافات غير الصحية اللي بقت تضاف للدراي عشان تظبط الريحة والطعم
فنخلي بالنا ونشتري من أماكن ثقة بنثق فيهم وفي ضميرهم
ما تسمحش للبائع يغشك ويبيع لك الدراي المصري على إنه مستورد
حركة الاستيراد واقفة بسبب عدم ثبات سعر الدولار
واللي بيتم استيراده بيبقى سعره غالي جدا
مافيش دراي مستورد هيبقى سعر الكيلو أقل من ١٠٠ جنيه
ماركات زي الجوزيرا والميرا الألمانية سعر الكيلو منها يصل ويعدي ٢٠٠ جنيه .. ده لو لاقيتهم أصلا لأنهم ناقصين جدا زي ما قلنا بسبب وقف الاستيراد بسبب تغيير سعر الدولار كل شوية
مش كل المصري وحش .. فيه أنواع مصرية جودتها كويسة برضو بس طبيعي سعرها يغلى شوية برضو
المهم اللي يهمنا كأطباء بيطرين هو صحة حيوانك الأليف
لو تقدر تعوده على أكل البيت الفترة دي هيكون أحسن ليه ولصحته بكتيييير ❤️
وطبعا لو لاحظت أي أعراض غريبة على أليفك بعد ما غيرت له نوع الدراي فود أو متعود على أكل الدراي علطول
أعراض زي:
القيء
الإسهال
احتباس البول
فقدان الشهية
أتوجه لأقرب عيادة ليك عشان لو فيه حاجة بسبب الدراي نعالجها علطول
دمتم وحيواناتكم الأليفة بخير ❤️❤️❤️
Animalist
02/12/2022
إعادة نشر للأهمية الشديدة
👇👇👇👇
نشاط الفيروسات غير طبيعي نهائي الفترة دي 😭💔
خلوا بالكم من بارفو القطط
☠️بارڤو القطط☠️
وبيسموه طاعون القطط، مرض خطير ومنتشر الأيام دي جدًا
ناس كتير سمعت عنه وكالعادة هتعرف كل حاجة عنه إن شاء الله بعد البوست ده 😉
أولًا: هو إيه المرض ده؟
- مرض ڤيروسي ناتج عن ڤيروس اسمه (feline panleukopenia) بانليكوبينيا (لو الاسم معقد سيبك منه مش مهم😄)
- بيجي للقطط، وبيزيد أكتر في الأعمار الصغيرة (الأقل من سنة)
ثانيًا: بيعمل إيه الڤيروس ده؟
الفيروس ده خبيث أوي كدا في نفسه، بيروح يتكاثر في الخلايا بتاعت الجهاز الهضمي كله والجهاز المناعي 😔
وده اللي بيخلي المرض شدته أقوى على القطط عن الكلاب لأنه رايح يضرب الجهاز المناعي اللي أصلًا المفروض يواجه المرض😕!
ثالثًا: الأعراض:-
أكيد خمنتها لما عرفت الڤيروس بيهاجم إيه في الجسم، وهنلخصها كالآتي:
١- ترجيع
٢- إسهال، في بعض الحالات بيبقى إسهال مُدَمَّم (فيه دم أو لونه محمر أو بني محمر)، لو لقيت العرض ده مع قط سنه صغير ومش متطعم فاتأكد بنسبة كبيرة أوي أوي أوي إنه الڤيروس للأسف💔
٣- قطع أكل
٤- سخونية
٥- طبعًا مع كل ده هتلاقي القط مهمد ومش بيلعب
* طبعًا الأعراض دي بتتشابه مع النزلات المعوية وده اللي بيخلي الناس تتأخر في علاجه، وزي أي مرض ڤيروسي كل ما عالجناه بدري كل ما كان أفضل والاستجابة للعلاج أسرع👌
رابعًا: العلاج:-
طيب خلاص يا دكتور قلقنا بما فيه الكفاية 😬، نعمل إيه بقى عشان نعالج المرض ده لو -لا قدر الله- صاب قططنا؟
١- أول ما ألاحظ أعراض زي الترجيع والإسهال أستشير الطبيب فورًا على الأدوية وأمشي عليها، وما أحاولش أدي للقط علاج من نفسي (زي ما قلنا قبل كدة فيه أدوية بشرية سامة للقطط)
٢- لو مافيش استجابة للأدوية، والترجيع/الإسهال مستمر، أو القط قطع أكل لمدة يومين أو أكثر؟
لازم نروح لدكتور عشان يتعلق له محاليل فورًا عشان -لا قدر الله- القط مايموتش من الجفاف💔
* مش هنضحك عليك هو بصراحة مرض خطير ونسبة الشفاء فيه حسب بعض الإحصاءات ٥٠٪ 😔😔 وإحصاءات بتقول أقل كمان من ٢٠٪
بس بالاهتمام بالدواء والمحاليل في أوقاتها المحددة بتزود نسبة الاستجابة للعلاج إن شاء الله😊👌
خامسًا: الوقاية:-
بعض الإجراءات اللي ممكن تحمي قططنا منه:
١- أول وأهم نقطة -وهنفضل نعيد ونزيد فيها- التطعيمات الفيروسية مهمة جدًا وهي خط الدفاع الأول ضد الأمراض الخطيرة دي إذا كان التطعيم الثلاثي أو الرباعي للقطط
٢- قططنا ما تختلطش بقطط الشارع بالذات لو سنها صغير ومش متطعمة
٣- لو عندنا أكتر من قط وواحد ظهر عليه الأعراض لازم نعزله عن الباقيين ونطهر المكان بمية وكلور زي ما قلنا ف بوست الكاليسي👌 (هتلاقي اللينك بتاعه في التعليقات)
٤- مانتعاملش مع قطط شارع أو قطط ظاهر عليها المرض ثم نتعامل مع قططنا قبل ما نغسل إيدينا كويس بالمية والصابون💧🧼🚿
* لو لسة عندك أي سؤال شاغل بالك ومالقيتش إجابته في البوست ما تترددش تسأل في التعليقات وهنجاوبك عليه😊
* ولو أول مرة تعرف المعلومات دي يا ريت توعي غيرك بيها، حمايةً لقططنا
* تقدر تقولنا في التعليقات إيه الأمراض/طرق العناية اللي تحب نتكلم عنها في البوستات الجاية
وربنا يحفظكم وحيواناتكم جميعًا❤️
Animalist
18/11/2022
تعالوا انهاردة نكلمكم عن أشهر سلالات الكلاب في مصر 😍🦮🐕🐩🐕🦺
تنوع الكلاب كبير جدا
وفيه تقسيمات كتير لتسهيل تصنيفها زي:
تقسيمها حسب الحجم (أحجام صغيرة، متوسطة، .. إلخ)
تقسيمها حسب استخدامها ( حراسة، صيد، ... إلخ)
وهكذا
بس أشهر تصنيف ليها هو التصنيف على حسب الحجم
فبتتقسم لأربع فئات:
Small breeds (وزنها أقل من ١٠ كيلو) سلالات صغيرة الحجم
Medium breeds (وزنها من ١٠- ٢٠كيلو) سلالات متوسطة الحجم
Large breeds (وزنها من ٢٠- ٤٠ كيلو) سلالات كبيرة الحجم
Giant breeds (وزنها فوق ٤٠ كيلو) سلالات عملاقة
هنكلمكم النهاردة عن أشهر السلالات الكبيرة المنتشرة في مصر
تحت كل صورة وصف مبسط للكلب
قولوا لنا في التعليقات لو هتربي نوع من اللي عرفناكم عليهم النهاردة هتربي إيه؟ 🥰
ولو بالفعل مربي قول لنا نوع كلبك إيه؟ 🥰❤️
Animalist
08/11/2022
غبنا عنكم فترة طويلة
سامحونا 🙏
كنا في انشغال شديد جدا
وفيه نظام جديد واقتراحات جديدة للصفحة بإذن الله تنال إعجابكم. ❤️
المهم ماحبناش نرجع بأيدينا فاضية
الجو متقلب
والخريف هو الوقت المناسب للتعب بسبب تغير الجو 😄
فعايزين نقول لكم شوية تنبيهات لحماية أليفكم😊
أولا
لو لسه أليفك مش متطعم التطعيمات الڤيروسية
حاول تديهاله في أسرع وقت
الفيروسات نشطة جدا الفترة دي
ومافيش يوم يعدي علينا في شغلنا إلا وما لا يقل عن ٥ حالات عدوات ڤيروسية أو اشتباه عدوى ڤيروسية على الأقل.
يا ريت جدا اطعمه قبل دخول الشتاء خاصة عشان نشاط الڤيروسات وانتشار العدوى بيزيد أكتر.
ثانيا
الاستحمام طبعا في جو زي ده يكون في وسط النهار بمية دافية وننشف أليفنا كويس بعدها باسشوار (مجفف الشعر)
ثالثا
لو هتجوز أليفك أتأكد إن الأليف اللي هيتجوزه متطعم عشان مينقلش له عدوى.
رابعا
نخلي بالنا من الحالات اللي بتخلي الأليف في حالة stress عشان في حالات الضغط والstress المناعة بتقل وبالتالي بتكون فرصة حدوث عدوى ڤيروسية أكبر
وحالات ال sterss هي:
الحمل
الرضاعة
نقل الأليف من بيت لبيت أو مكان لمكان
حالات المرض
المناعة في الحالات دي بتكون ضعيفة بالتالي ماينفعش نزود عليه الضغط النفسي والعصبي فماينفعش نحميه أو ننقله أو نطلعه برا البيت في الحالات دي.
بس ده بوست على السريع حبينا نصالحكم بيه عن غيبتنا الطويلة ^_^
دمتم وحيواناتكم الأليفة بخير ❤️
كذا حد طلب مننا نتكلم عن الموضوع ده، ورغم إننا معندناش قسم سيكولوجي في الكلية والله العظيم 😂💔
ولكن هنحاول نقول لكم من خبرتنا إيه النقط اللي نخلي بالنا منها من أجل الصحة النفسية لحيواناتنا الأليفة 😻
١- لازم يكون للأليف صاحب، حد يلعب معاه شوية في اليوم، حد دايما أو أغلب الوقت هو اللي بيحطله الأكل ويهتم بيه، لكن ما يبقاش كل أفراد البيت مشغولين عنه، كدا مش هيبقى منتمي لحد وهيبقى عدواني وملوش صاحب. 😿
٢-ممنوع الضرب نهائي. ❌
لما يعمل حاجة غلط بتدربه شوية بشوية عشان مايعملش الغلط ده تاني، بتخاصمه شوية -كام دقيقة مش يومين تلاتة 😂-، بتحرمه من حاجة بيحبها في وقت الغلط بس وبالعكس لما يعمل حاجة صح نكافئه في وقتها وساعتها علطول عشان يربط في دماغه إن دي حاجة صح أعملها، ممكن تزعق بس لكن لو ضربته هو مش هيفهم أنت بتضربه ليه وهيبقى عدواني وشرس لو أتعود على المعاملة دي منك بس.
٣-لو عندك حيوان أليف بالغ ماتجيبيش عليه حيوان تاني في نفس البيت، خاصة القطط، لأنه هيعتبره منافس له في مكانه، وهيقعدوا يتخانقوا مع بعض، لو لازم تجيب فلازم تفصل أماكن الأكل والشرب والحمام على قد ما تقدر لحد ما يتأقلموا ويرسموا حدود الأماكن بينهم وبين بعض، الحيوانات عندهم سلوك وهو تحديد مسافة حواليهم ومابيسمحوش لأي حيوان غريب يخترقها لأنها تعتبر ال territory بتاعته مبدأ مساوي لل person space عندنا 😄 بس احنا مجرد ربع متر حوالين أجسامنا مابنسمحش لحد غريب يقرب مننا زيادة عن اللزوم، هم عندهم حيز أكبر بتوصل لعشرات الأمتار مابيسمحوش لحيوان غريب يقربه.
طبعا المنافسة بتبقى أشرس لو عندك ذكر وجبت قط ذكر تاني أو لو عندك ولد وبنت وجبت ولد برضو لأنه يعتبر إنه بينافسه في المكان والأنثى.😄
٤-الكلاب خاصة ال large breeds بتحب الخروج والتمشية، القطط لأ بتحب البيت وبتخاف جدا جدا لو خرجت برا البيت.
فيه ناس سألونا إذا القعدة في البيت علطول وعدم الخروج للقطط بيجيب لها اكتئاب؟
لأ، بالعكس القطط بيتوتية جداً.
٥- في موسم طلب الجواز مش بيجي لهم اكتئاب بالمعنى الحرفي، ولكن هم بيبقوا مركزيين وكل همهم هو تلبية احتياجهم والاستجابة لنداء الطبيعة 😄
عشان كدا أكلهم بيقل شوية، وسلوكهم بيتغير زي ما قلنا في بوست أعراض موسم التزاوج، وزي ما قلنا قبل كدا برضو أما تجوزهم أو _الرأي الطبي والصحي_ تعقمهم، لكن ما تسيبهمش للهرمونات مبهدلاهم كدا.
🔴 وأخيراً:
لازم كلنا نعرف إن شخصياتهم مختلفة زينا، فيه اللي بيحب اللعب والشقاوة كتير، فيه اللي هادي وما بيحبش الفرهدة 😄 فيه الاجتماعي اللي بيلعب مع كل الناس، وفيه اللي لو شاف ناس غريبة بيستخبى وما بيظهرش غير لما يمشوا، فيه الجبان أوي، فيه العدواني والبلطجي😄، فيه اللي من كتر خوفه بيقعد ساكت معانا كدكاترة وفيه اللي من كتر خوفه بيبهدلنا 😄💔
بس في الآخر احنا بنحبهم كلهم باختلاف شخوصهم وعلى قلبنا زي العسل ☺️❤️
كلمونا عن حيوانكم الأليف 🎙
دمتم جميعا بخير ❤️
05/08/2022
تعالوا نكلمكم انهاردة عن أشهر مرض ڤيروسي بيصيب الكلاب
⚠️⚠️ البارفو ⚠️⚠️
Parvovirus
بيصيب الكلاب صغيرة السن
(الجراوي ولحد عمر سنة)
🔴طبعا الأعراض دي مع جرو صغير + مش متطعم = بتخلينا نتأكد بنسبة ٩٩٪ إنه بارفو
طب والواحد فالمية ده نأكده ازاي؟ 😄
عن طريق اختبار سريع موجود في العيادات والمستشفيات البيطرية
ونشوف النتيجة لو إيجابي كدا أتأكدنا ١٠٠٪ إنه بارفو 😔
🔴طيب نعمل إيه يا دكتور لو ظهرت الأعراض دي على الجرو بتاعي أو كلبي اللي متطعمتوش؟؟!
»» تجري بيه على أقرب عيادة أو مستشفى بيطرية عشان البارفو مافيهوش هزار.
🟡 - لازم يعلق محاليل فورا وياخد الأدوية بتاعته اللي بيحددها ويحدد جرعتها الدكتور على حسب حالة ووزن الكلب. 🟡
وهنعيد الكلام تاني»» لازم محاليل
عشان أي أدوية هياخدها عن طريق الفم هيرجعها تاني ومش هيحصل أي تحسن.
عامل الوقت مهم، كل ما بدأت العلاج بدري وفي بداية ظهور الأعراض بتبقى نسبة الشفاء أكبر.
🔴 الفيروس ده نسبة الوفاة فيه كبيرة وعالية خاصة في فصيلة الكلاب ال Rot wieller (مناعتهم سيئة جدا)
بس زي ما فيه كلاب كتير بتموت بسببه فيه كتير برضو بيتعافوا ويعيشوا ويكملوا حياتهم 🥰
أهم حاجة الإهتمام والرعاية واعطاء الأدوية والمحاليل في مواعيدها اللي حددهالك الدكتور 👌
🔴 الوقاية:
إزاي أحمي كلبي من المرض القاتل ده ؟😔
١- التطعيم التطعيم التطعيم
الكلاب بالذات ماينفعش أتأخر عليهم في تطعيماتهم الفيروسية ( واحنا كتبنا بوست عن تطعيمات الكلاب قبل كدا هنحطه في أول كومنت)
٢- ممنوع أحمي الجرو بتاعي نهااااائي قبل ما ياخد تطعيماته أو في الفترة بين جرعات التطعيم.
لو حميته مناعته هتضعف وهيجيله بارفو، ادينا حذرنا 👌
٣- لو عندي جرو صغير ما أخليهوش يختلط بكلاب كبيرة برا البيت أو بكلاب الشارع.
٤- لو كان عندي كلب مات بسبب البارفو أطهر المكان كويس جدا بمية وكلور قبل ما أجيب جرو جديد (الفيروس ممكن يفضل موجود في المكان لمدة سنة)
٥- لو عندي أكتر من جرو وواحد ظهر عليه الأعراض لازم أعزله عن الباقين ونطهر المكان كويس زي ما قلنا وأراقب باقي الجراوي أي واحد تظهر عليه الأعراض تاني ألحقه علطول لأن طالما واحد اتصاب كلهم هيتصابوا، فنحاول نقلل الأخطار عشان ميموتوش.
٦- لو عندي أكتر من جرو برضو لازم نطعمهم كلهم مع بعض ماينفعش أطعم واحد وأسيب الباقي.
بس كدا 🥰
دمتم بخير أنتم وحيواناتكم الأليفة ❤️
قولوا لما في التعليقات لو كلبك جاله بارفو قبل كدا ولا لأ؟
و أخد وقت للتعافي قد إيه ؟ 😊
ولو تعرف حد مربي كلب شارك معاه البوست عشان يعرف أكتر عن أكتر مرض بيصيب الكلاب. 😊
11/07/2022
فيه بوست نفسي اكتبه من ٢٠١٩ بخصوص عيد الأضحى والدبح والهوجة اللي بتحصل دي كل سنة واللي عمرنا ما سمعنا عنها أيام مبارك 😂😂
ممكن البوست يبان تنظيري شوية وكتير مش بيحبوا الأسلوب ده وانا منهم والله بس هحاول يبقى منطقي وعقلاني بإذن الله
أول نقطة إن وياللمفاجأة مش المسلمين بس اللي بياكلوا لحوم الحيوانات 🤷♀والأهم إن الدبح مش اختراع إسلامي
هي أقدم طريقة أو الطريقة الوحيدة كمان اللي توصل لها الإنسان عشان يعرف ياكل لحوم الحيوانات دي إنه يصطاد ويموته (أكيد) عشان يعرف يأكله ويتغذى وتستمر الحياة.
لما أخدنا في محاضرة طرق الذبح في سنة خامسة (طب بيطري لمن لم يعرف تخصصي) كانت المحاضرة متقسمة جزئين طرق دبح ذات مرجعية دينية وطرق دبح بغير مرجعية دينية.
ومن طرق الدبح الدينية أخدنا طبعا الطريقة الإسلامية والطريقة اليهودية والطريقة السيخية (ديانة من ديانات الهند)
انبهرت شخصيا بطريقة الذبح اليهودي واللي تشبه جدا جدا _هي هي تقريبا_ الطريقة الإسلامية
ونفس الشروط من إن السكين يبقى حاد مش تلم ورجل الدين بيمشي ظفره على نصل السكين عشان يتأكد من حدته وأن الحيوان يكون هاديء ومطمئن مش معنف ولا مضروب ولا خايف
تقدروا تشوفوا الفيديو ده 👇👇
(طبعا اللي بيتأذى من مناظر الدم والذبح مايفتحش الفيديوهات)
المضحك شوية في الأمر إن الطرق اللي بغير مرجعية دينية كانت بين قوسين اسمها الطرق الإنسانية (humane methods) 😅
ايه بقا الإنساني أكتر؟
الصعق الكهربي
الصدمة على الدماغ لفقد الوعي
الضرب بالنار
والفكرة إن ضروري يحصل ادماء للحيوان لأن حبس الدم جواه بيزود فرص النمو البكتيري وفساد اللحوم أسرع
فبعد الصعق أو الضرب بالنار لازم يفتحوا عند الأوداج شرايين الرقبة عشان الحيوان ينزف فأنت كدا ماشاء الله بتألم الحيوان مرتين أو بتموته وبعدين بتمثل بجثته وتاكله💔😞
عشان تبقى humane أكتر 🤷♀💔
بس اوكيه كل مجتمع عاجبه دماغه.
الفكرة كلها اللي عايزة أوصلها إن ميصحش وقلة أدب في نظري إن نيجي ننكد على مجموعة من الناس لهم عقيدة معينة في أوقات احتفالهم، زي بالظبط اللي يجوا وقت أعياد المسيحين ينشروا آيات (لقد كفروا الذين قالوا إن الله هو المسيح بن مريم) اللي هو يا سلام لسه مكتشف الآية دلوقتي ولا إيه؟! طب بتنشرها دلوقتي ليه ؟! طب ما كل واحد عارف معتقدات دينه ومؤمن بيها ومصدقها وخلاص خلصنا، لأ إزاي لازم ننكد عليهم، نفس اللي بيعملوه فئات معينة من النباتيين أو غير المكترثين بالطقوس والشعائر الدينية مع المسلمين وقت عيد الأضحى 🤷♀.
وأنا شخصيا بحترم النباتيين جدا وطبعا متقبلة موقفهم إذا كانوا نباتيين لأغراض صحية أو طبيعة جسمهم أو لشعورهم بالمسؤولية تجاه الكوكب والضغط اللي بيحصل عليه عشان إنتاج اللحوم ومنتجات الحيوانات.
سيرش بسيط على جوجل تعرف مثلا فروع ماكدونالدز وكنتاكي بسسس بيستهلكوا كام طن من اللحوم والدواجن سنويا في بلد واحدة مش في كل فروعه حتى.
شوف نصيب الفرد من الألبان ومنتجاتها في بلد زي هولندا وسويسرا والدول الأوروبية عامة.
شوف إحصاءات نصيب الفرد من اللحوم في الدول الغنية.
فاحنا ف عالم استهلاكي مجنون والكوكب بيروح في داهية فعلا بس أظن فعل مش أخلاقي برضو أقعد أقطم في ناس بيمارسوا شعيرة الدبح دي مرة في السنة مش كل شريعتهم دبح مثلا
وفي دول فقيرة أصلا (للأسف معظم الدول الإسلامية فقيرة) نصيب الفرد منها للحوم قليل أصلا ولا يقارن بدول تانية.
وفيه ناس منهم بيستوا العيد ده من السنة للسنة عشان ده الوقت الوحيد اللي بياكلوا فيه لحمة💔😞.
السخرية من الشعائر الدينية أيا كان الدين قلة أدب وقلة عقل.
السخرية من موقف ناس اختاروا نمط حياة مختلف زي النباتية قلة أدب وقلة عقل برضو.
فيه نقطة تاني بتضايق بعض الناس حتى المهتمين بإظهار الشعائر، إن شكل الدم بيبقى وحش أوي في الشوارع وفيه ناس مش بتستحمل منظر الدبح، ده ببساطة عشان إحنا في دولة فقيرة🤷♀ غير كدا الصح والشرعي أصلا إن يكون فيه أماكن مخصصة وما أبهدلش الشوارع والطرقات العامة وأذي الناس.
مجزر البساتين اللي عندنا هنا في مصر لما رحته زيارة تبع الكلية المفروض إنه مجزر آلي 😂 هو مجزر آلي بس بندبح على الأرض عادي 😂😂💔 فاللي هو الحاجات المزعجة دي بسبب سوء وضعنا الاقتصادي مش سوء الشريعة حاشا لله (احنا كحيانين يا محمااااه)😂😂💔
أظن كدا غطيت كل النقط اللي كنت عايزة أتكلم فيها يهمني أسمع ارائكم
وأخيرا عشان البوست طول أوي أنا عارفة هقول جملة دكتور أحمد خيري العمري العبقرية: "هذه الشعيرة - النحر- تسفك دماء الحيوانات _ ليس حبا في الدماء_ بل لتعيد توزيع لحومها..لكي تحقق (الشبع) في هذا العالم المليء فقرا وجوعا وظلما وتناقضا، العالم الذي يموت فيه البعض من أمراض السمنة ، وآخرون يموتون جوعا" من كتاب طوفان محمد.
كل سنة وأنتم طيبين❤️
منقول من د. آية درويش
21/06/2022
حشرة الأذن 🐱
وليه اسم تاني زي جرب الأذن أو عث الأذن
عبارة عن حشرة صغيرة جدا مش بتتشاف غير بالميكروسكوب بتصيب أذن الحيوانات
(هنحط صورة ليها في أول كومنت)
🔴 طب هعرف منين إنها أصابت حيواني الأليف لو مصاب؟
هلاقي فيه طبقة سوداء عاملة زي الشمع في ودانه
الشمع الطبيعي لونه اصفر أو بني فاتح
مجرد ما أشوف لون أسود يبقى كدا عنده الحشرة دي
وطبعا تاني علامة مميزة ليها الهرش الكتير في الأذن 👌
🟡 الموضوع بسيط وحله إن الطبيب ينضف الأذن ويوصفلك استعمال قطرة الأذن المضادة للحشرات وتمشي عليها هتروح 🟡
⚠️ ولكن إهماله له عواقب وخيمة جدا ⚠️
الحشرة بتفضل تتكاثر في القناة السمعية وتعمل التهابات شديدة في الأذن وممكن توصل لصديد وهلاقي وقتها فيه إفرازات ريحتها كريهة جدا من الأذن
لو أهملناه أكتر الصديد هيوصل للمخ ويعمل التهابات في أغشية المخ وممكن يؤدي للوفاة 😞
مشكلة بسيطة جدا ممكن الإهمال يوصلها للوفاة 💔
مش مستاهلة
قوم بص في أذن أليفك واعمل check وطمنا عليه 😊
وماتقلقوش مش معدية لينا خالص 😊
دمتم وحيواناتكم الأليفة بخير ❤️
Animalist
14/06/2022
مياو صغنن خايف على أكله ☺️😍
10/06/2022
احنا حذرنا قبل كدا وهنحذر تاني وتالت ورابع
لو أليفك فيه حشرات _والصيف هو موسم نشاطها_ توديه لأقرب عيادة بيطرية وتاخد الدواء المناسب لنوعها وسنها ووزنها
❌منسألش أي حد وخلاص عشان كل حيوان له ظروفه ووضعه زي ما قلنا الجرعة بتتحسب بالوزن.
❌والأليف لو female تفرق إذا كانت حامل أو لأ وبترضع ولا لأ.
❌منسألش أي حد مش متخصص
عشان مش أول مرة نسمع إن حد جاب دواء للبراغيت لقطته من الصيدلية البشري واتسممت بيه. 😞💔
أرجووووووكم
أرجوكم
أكتر وقت بتيجي لنا العيادات حالات تسمم من المبيدات الحشرية هو الصيف
فحرام عليكم تضروا أليفكم وأنتم كان غرضكم تساعدوه
اسألوا أهل التخصص
الدنيا معدمتش الدكاترة البيطريين
ربنا يحفظكم جميعا وحيواناتكم الأليفة بخير❤️
27/05/2022
علامات البلوغ وطلب الزواج في القطط 🐈🐈⬛️💕
وقت البلوغ في القطط:
الذكور: من أول عمر ٨ - ١٠ شهور
الإناث: بتبلغ قبل الولاد من عمر ٦شهور -سنة
(الأحسن نجوزهم عند عمر سنة) 👌
علامات طلب الجواز:
🔴 الذكور:
١-الرش
ودي أكتر وأشهر علامة واللي معظم الناس بتشتكي منها 😄💔 عمل بول على الحائط والأركان.
٢- تغير سلوكي.
أما عدوانية زيادة وميحبش حد يقرب منه، أو يبقى ودود زيادة. 😄
٣- التمسح في أرجلنا وأرجل الترابيزات والأثاث.
٤- كثرة المواء.
٥- النزوع للهرب عند فتح الباب.
٦- القيام بحركات التزواج مع الألعاب (الدباديب) أو المفروشات (المخدات والبطانيات).
🔴 الإناث:
١-المواء المستمر 🤕 وخاصة عند الأبواب والشبابيك.
٢-التمرمغ على الأرض والتشقلب 😄
٣-نزوع للهرب عند فتح الباب.
٤-رفع الجزء الخلفي من الجسم وإزاحة الذيل جانبا.
٥-التمسح في الأشخاص والأثاث والحوائط.
🟡 الولاد بتطلب جواز علطول من وقت البلوغ
🟡 البنات بتطلب شوية وتريح شوية
وطبعا لو حصل تزاوج وحمل بتتوقف في طلب الزواج وترجع تطلب تزاوج بعد فطام الkittens.
🟡 والأحسن للبنات نجوزهم مش أكتر من مرتين في السنة عشان جسمهم مايستهلكش ويتعبوا.
🟡 الولاد عادي يتجوزوا علطول بالعكس لو ماتجوزوش لفترة طويلة فيه خطر تكون حصوات وتعرض لمشاكل صحية.
🟡 ولو مش هقدر أوفر له الجواز علطول الأحسن طبيا أعقمه ونحن نكرر إن هذا الأحسن من الناحية الطبية والصحية، الناحية الشرعية من حلال وحرام يرجع فيها لأهل الدين المتخصصين. ❤️
قولولنا في الكومنتات امتى بلغ القط أو القطة بتاعتكم 😍؟
وإيه الأعراض اللي ظهرت عليهم
-حيث إن ليس من الضروري ظهور كل العلامات- ؟؟؟ 😍
13/05/2022
🪒 الحلاقة 🪒
ناس كتير سألتنا عن الحلاقة عشان عايزين يحلقوا لقططهم وكلابهم.
نحب نجاوبكم ونطمنكم إن الحلاقة كويسة جدا وبالعكس أفيد لحيواناتنا الأليفة في شهور الصيف عشان بتخفف من عليهم الحمل الحراري شوية
لأن درجة حرارة جسمهم طبيعي أعلى مننا فتخيلوا شعورهم بالحر بقا 🥵
فالأحسن نحلق شعرهم في الصيف ونسيبه في الشتاء يدفيهم 👌😊
طيب مش هيكتئبوا أو يزعلوا يا دكتور؟
لأ خالص
هم بيزعلوا منكم شوية عشان مش بيحبوا زيارة العيادة في المجمل لكن مش بسبب الحلاقة 😄
بس كدا 😊
دمتم وحيواناتكم الأليفة بخير وصحة 😊
Animalist
08/04/2022
كل عام وأنتم جميعا بخير🥰
رمضان كريم
وحبينا نفكركم بالمرة 😄
بما إن البلح بيبقى موجود عندنا دايما في رمضان
فالبلح ممنوع للقطط والكلاب وغلط أكلهم
وحذار يستعطفوكم بنظراتهم 😄 وتأكلوهم من البلح أو الخشاف أو الحاجات دي عشان ممنوعة عليهم
لأن الزبيب ممنوع عنهم برضو لو تفتكروا بوست الأكل الممنوع 👌
والحلويات كذلك ممنوعة ❌
فالكنافة والقطايف وكل الحلويات منسمحش لحيواناتنا الأليفة بأكلها 😌👌
دمتم بخير وحيواناتكم الأليفة بخير 🥰
Animalist
29/03/2022
💉 تطعيمات القطط 💉
عشان نكون ماشيين بالترتيب وواحدة واحدة
اتكلمنا عن كيفية التعامل مع القطة الحامل ( أول كومنت )
واتكلمنا عن كيفية العناية بالقطط حديثة الولادة (تاني كومنت)
تعالو نقول ايه التطعيمات اللازمة ليهم بقا 👇
أولا التطعيمات الفيروسية:
وهم الثلاثي أو الرباعي
والفرق ما بينهم:
🔺الثلاثي بيحمي ضد ٣ أمراض فيروسية: (البانليكوبينيا - الكاليسي - الهربس)
واتكلمنا عن البانليكوبينيا والكاليسي قبل كدا هنحط روابطهم في الكومنتات برضو
🔺الرباعي بيحمي ضد ٤ أمراض:
التلاتة الفيروسات اللي فوق + بكتيريا اسمها كلاميديا
الاتنين في نفس الأهمية يعني لو ملقتش الرباعي متوفر طعمه الثلاثي عادي، لأن البكتيريا دي لو _لا قدر الله_ أصابت قطتك بمضاد حيوي هتتعالج إن شاء الله،
لكن أهم حاجة يتطعم ضد الڤيروسات لأن الڤيروسات ملهاش علاج جذري _بنعالج الأعراض بس supportive treatment_ والشفاء بيبقى على حسب مناعة القطة، بلاش نغامر فيها.
والتطعيمات الڤيروسية للقطط بنطعمها عند سن شهرين ونص : ٣ شهور
وهم جرعتين بينهم ٢١ يوم.
وبعد كدا جرعة واحدة تنشيطية كل سنة.
🔺آخر تطعيم ڤيروسي وهو تطعيم السعار
وده بيتاخد عند سن ٦ شهور
وبيبقى جرعة واحدة وبيتكرر سنويا برضو.
أهميته: إنه بيحمي القط من الإصابة بالسعار لو اتعض من كلب أو قطة تانية وبيحميني برضو لو اتعضيت من قطتي ابقى متأكد ومتطمن ١٠٠٪ إنها معندهاش السعار.
ثانيا: تطعيمات الديدان
هنحط الرابط في الكومنتات برضو لأن اتكلمنا عنه قبل كدا
وبيتاخد من سن ٤٥ يوم ويتكرر جرعة وقائية كل شهرين.
⚠️ ملاحظات مهمة: بخصوص التطعيمات الفيروسية:
١- القط ميستحماش نهااااائي خلال فترة التطعيم ولا قبلها ولا بين الجرعتين.
نقدر نحميه بأمان من غير خوف من أي مرض أو نقص المناعة بعد الجرعة التانية من التطعيم الثلاثي أو الرباعي بأسبوع.
وهنعملكم بوست مخصوص إن شاء الله فيه كل التعليمات الخاصة بالاستحمام لحيوانتكم الأليفة😉👍
٢- لازم ياخد الجرعتين، لو اخد جرعة واحدة وأهملنا التانية ولا كأننا عملنا حاجة، جرعة واحدة غير كافية لتكوين أجسام مضادة/ مناعة ضد الأمراض الڤيروسية.
وقولولنا في الكومنتات طعمت قطتك إيه؟ 🥰
وقولولنا ايه المواضيع اللي تحبوا نتكلم عنها؟
ولو أول مرة تعرف تفاصيل تطعيمات القطط شير البوست وشاركه مع غيرك عشان تعم الفائدة😊
Animalist
15/03/2022
💥 سؤال بنتسأله كتير جدا جدا جدا جدا 👀
س/ أنا معايا قطط صغيرة بترضع وأمهم ماتت/ مشيت وسابتهم/ تعبانة ومش بترضعهم/ لاقيتها في الشارع لوحدهم
اعمل معاهم إيه؟
سؤال متكرر جدا ومش بيعدي يومين تلاتة إلا ويتكرر تاني، وعشان يعتبر تكملة البوست السابق فخلونا نجاوبكم😍👇
ج/ لازم نفهم إن القطط الصغيرة المولودة حديثا بتكون معتمدة على الأم في كل حاجة، كل حاجة حرفيا
حتى ضبط درجة حرارة جسمهم وعملية الإخراج لأن جسمهم بيكون لسه ماتطورش حتى الل*س والتنظيف اللي بتقوم بيه القطة الأم بيحفز النمو للkittens/ القطط الصغيرة بتوعها
⬅️فهنقول تعمل معاهم ايه بالظبط ولازم تعمله كله بحذافيره👌:
١-ترضع لبن خالي اللاكتوز بتاع الأطفال،
اللبن البقري أو الجاموسي العادي أو أي لبن تاني من اللي بنشربه هيتعبهم.
٢-تعمل إزازة مية دافية وتلفها بفوطة وتلزقها فيها عشان تدفيهم وتظبط درجة حرارتهم.
تبرد تغيرها وهكذا.
وتبقى مجهز لهم مكان مفروش بهدوم قديمة أو أي حاجة المهم يبقوا متدفيين مش قاعدين على بلاط أو مكان ساقع.
٣- تعمل مساچ على البطن عشان تساعدها على الإخراج.
وكذلك مساچ بقطنة مبلولة مية دافية عند فتحة الشرج
٤- لا تحميهم ولا تبلهم ولا تجيب عليهم مية خاااااالص❌
لو عايز تنظف مكان الشرج لو مبهدل من الحمام يبقى بمناديل مبللة أو فوطة مبلولة مية دافية ومعصورة برضو كويس
🔺لو حميتهم هيموتوا، ادينا حذرنا 🔺
٥-طبعا مش محتاجين نقول متحاوليش تديهم أي أدوية قبل الرجوع للطبيب عشان السن الصغير ده حرج جدا وأي غلطة فيه بروحه، لأن اصلا بيموتوا من غير سبب فمش هيستحملوا نغلط/ نفتي/ نألف فيهم
أخيرا
عايزين نقول لكل الناس اللي بتنقذ القطط الصغيرة الفاقدة لأمهاتهم من الشارع وتراعيها إن ربنا يجزيكم كل خير 😊
أكيد ثوابكم عند ربنا كبير 🥰
وهل يا ترى أنقذت قطة صغيرة قبل كدا وعاشت وكملت حياتها؟ 😍
Animalist
25/02/2022
عن أبي هريرة رضي الله عنه أنَّ رَسولَ اللَّهِ صَلَّى اللهُ عليه وسلَّمَ قالَ: بَيْنما رَجُلٌ يَمْشِي، فاشْتَدَّ عليه العَطَشُ، فَنَزَلَ بئْرًا، فَشَرِبَ مِنْها، ثُمَّ خَرَجَ فإذا هو بكَلْبٍ يَلْهَثُ يَأْكُلُ الثَّرَى مِنَ العَطَشِ، فقالَ: لقَدْ بَلَغَ هذا مِثْلُ الذي بَلَغَ بي، فَمَلَأَ خُفَّهُ، ثُمَّ أمْسَكَهُ بفِيهِ، ثُمَّ رَقِيَ، فَسَقَى الكَلْبَ، فَشَكَرَ اللَّهُ له، فَغَفَرَ له، قالوا: يا رَسولَ اللَّهِ، وإنَّ لنا في البَهائِمِ أجْرًا؟
*قالَ: في كُلِّ كَبِدٍ رَطْبَةٍ أجْرٌ.* ❤️
المحدث : البخاري | المصدر : صحيح البخاري
الصفحة أو الرقم: 2363
Animalist
19/02/2022
🚷بوست في السريع المرة دي 🚷
وهو رد على سؤال متكرر بيجي لنا كتير
س: يا دكتور قططي حامل وخلاص على وش ولادة المفروض اعملها إيه أو اتصرف إزاي؟
ج: ولا أي حاجة
أيوة
الحيوانات طبيعي بتولد لوحدها بدون مساعدة أو تدخل من الإنسان.
كل بس اللي ممكن تعمله انك تجهز لها مكان كويس ومريح للولادة وللرضاعة
وهتلاقي القطة ف الأغلب بتعمل كدا في أيام الحمل الأخيرة، بتدخل في الدولاب، بتنزل تحت السرير، بتدور عامة على مكان هادئ
فممكن تجهز لها كرتونة وتفرشها بملابس قديمة من عندك مش هتحتاجها تولد وتقعد ترضع الkittens فيها 😍 لو عندها القطة بالفعل مكان بتنام فيه زي السرير الصغير المخصص للحيوانات الأليفة مش هتحتاج تجهز الكرتونة والكلام ده
س: يعني هي يا دكتور هتولد لوحدها عادي؟ طب لو حصلت مشكلة ولازم أتدخل اعرف إزاي؟
ج: أيوووووة بنكرر هتولد لوحدها عادي ولو حصلت مشكلة محتاجة مساعدتكم هنقولك علاماتها👇👇
⚠️ إنذارات الخطر وقت الولادة⚠️
١- قطعت أكل فترة طويلة، طبيعي القطط ممكن متاكلش يوم الولادة أو تاكل مرة الصبح وبعدين متاكلش تاني لحد بعد الولادة بس لو لاقيتها قاطعة أكل أكتر من يوم ومافيش ولادة حصلت يبقى كدا خطر
٢-بعد ما تولد بقا لو فضلت قاطعة أكل برضو تبقى دي علامة خطر
لأن المفروض تقوم تاكل بعد الولادة وماتبقاش قاطعة أكل أو مهمدة.
٣-لو لاقيت نص الجنين ظهر وفضل متعلق منزلتوش كله بسرعة دي علامة خطر
ولازم تحاول تشده برفق جدا وتطلعه عشان لو فضل متعلق كدا هيتخنق ويموت ولو فضل موجود هيسد مجرى الولادة على القطط الباقية اللي المفروض تنزل وراه وكدا بيزيد احتمال إنهم كمان ينزلوا ميتين.
٤- لو فيه وقت كبير مبالغ (بالساعات) بين كل نزول جنين والتاني يفضل نكون على تواصل مع طبيب عشان لو طلعت فعلا حالة عسر ولادة نتدخل بسرعة والأجنة تنزل إن شاء الله حية مش ميتة.
٥- لو خلاص بطنها ظهرت وكبرت وتأكدنا إن فيه حمل وبعد كدا لاقينا بطنها بدأت تنزل وحجمها يقل دي علامة خطر
ولازم نعمل لها سونار فورا عشان نشوف إيه اللي حصل
٦-لو ظهر دم وقت الحمل أو قبل الولادة بوقت كبير وعدم نزول أجنة، لازم برضو نعمل سونار.
بس كدا، لو مافيش أي علامة من دول ف مافيش قلق إن شاء الله وقطتك هتولد بسلام بدون أي تدخل.
قولولنا في الكومنتات إيه تاني اسئلة عايزين نجاوبكم عليها 😉
واحكي لنا تجربتك مع قطتك لما ولدت، مهتمين تشاركونا تجاربكم😊
ولو تعرف حد قطته على وش ولادة شارك معاه البوست 😉👍
دمتم وحيوانتكم الأليفة بخير ❤️
Animalist
07/02/2022
⚠️ التسمُّم ⚠️
اعرف ازاي أن حيواني الأليف اتسمم ؟❗️
🟡 أولًا: الأعراض:-
١- غالبًا بتبدأ أعراض التسمم بإن الحيوان مش عايز ياكل أو يتحرك، قاعد مهمد ومش بيلعب ويتحرك كعادته
٢- ثم يبدأ يلهث (صوت نفسه عالي)
٣- ريالة وإفرازات من الفم
٤- ممكن تظهر دوخة أو عدم اتزان في المشي والحركة
٥- ثم المرحلة الأخيرة بتكون التشنجات العضلية
🟡 ثانيًا: الأسباب:-
هو ممكن أليفنا يتسمم من إيه؟
١- مواد التنظيف والمسح؛ لو ل*س أو شرب منها
٢- المبيدات الحشرية؛ لو رشيت على الأرض وسيبتها من غير ما أمنع الأليف إنه يل*سها، زي إن أحبسه في أوضة، أو أقفل المكان اللي رشيت فيه لحد ما أمسحه وأهويه كويس
٣- سم الفئران؛ ودي للأسف بنشوفها كتير، بتحطوا قطعة جبنه رومي عليها سم فيران، وننسى خالص أن عندنا كلب لو ألقاها هياكلها 😔💔
٤- الاستعمال الخاطئ لأمبولات الحشرات الخاصة بالحيوانات الأليفة (أشهرهم على الإطلاق)
🟡 ثالثًا: الوقاية:-
أتجنب التسمم إزاي يا دكتور؟
١- زي ما قلنا قبل كدا وهنقول تاني وتالت، وجود حيوان أليف في البيت زي بالظبط وجود بيبي صغير في البيت لازم أحرص إني أشيل أي حاجة خطر ممكن يوصلها زي أدوات التنظيف والمسح
٢- لو عندي فار وعايز أحطله سم ممكن أحطه في مكان ميقدرش الأليف يوصله
٣- نرجووووكم لما تجيبوا أمبولات الحشرات اسألوا الطبيب بس تحطه إراى وإيه الاحتياطات .. ياما شوفنا حالات اتسممت عشان أصحابها حطوا لها أمبولات الحشرات ثم حموهم، ولو كنت رحت لدكتور كان هيقولك ممنوع الاستحمام أول ٥ أيام عشان ما يتسممش ..
والدكتور كذلك هيحطه لكم على المكان الصح اللى المفروض يتحط فيه أمبول الحشرات عشان الأليف ما يل*سش نفسه ويتسمم برضو
🟡 رابعًا: الإسعافات الأولية لحالات التسمم:-
لازم تعرف طبعًا أن في حالات التسمم لازم تودي الحيوان لأقرب دكتور عشان يديله الـ antidote المناسب
* معناها إيه الكلمة دي يا دكتور؟
ده الدوا اللي بيبطل مفعول السم .. وده للأسف مش هنقدر نقوله هنا منعا للاستخدام الخاطئ عشان كل مادة مسممة لها antidote مختلف وبتتحسب بالوزن ودرجة التسمم برضو فدي مسؤولية الدكتور كاملة
نرجع نقول تسعف الحيوان إزاى لحد ما تروح لدكتور:
١- نخلي الحيوان يرجع السم ده قبل ما يمتص، إزاى؟
نشرَّبه حاجة واحدة من الحاجات دي:
أ) بيضة نية مع لبن
ب) مية بملح
ج) لو عندنا مية أكسچين شربه ٥سم ومية بعدها
٢- بلَّعه قرص فحم (أقراص الفحم من الصيدلية البشري عادي)، دي هتنضف باقي الجهاز الهضمي
٣- بعد كدا توديه زي ما قلنا فوق لأقرب دكتور👌
ويفضل تاخد معاك عبوة المبيد الحشري اللي رشيت منه أو كيس سم الفيران اللي أكله عشان تسهل على الدكتور مهمته ويدي أليفك الـ antidote المناسب👌
* لو حد مر بالتجربة القاسية دي وأليفه اتسمم يقولنا اتسمم إزاى وحصل إيه
* ولو ما مرتش بيها الحمد لله خلي بالك على طول وعرَّف غيرك المعلومات دي عشان يتجنبه هو كمان
* وللأمانة التسمم مش سهل وحيوانات قليلة اللي بتنجو منه، فخلوا بالكم كويس
* لو لسة عندك أي سؤال شاغل بالك ومالقيتش إجابته في البوست ما تترددش تسأل في التعليقات وهنجاوبك عليه وقت ما تسمح الفرصة😊
* تقدر تقولنا في التعليقات إيه الأمراض/طرق العناية اللي تحب نتكلم عنها في البوستات الجاية
*آخر حاجة متنساش تبص على الروابط في التعليقات فيها تكملة موضوع التسمم.
وربنا يحفظكم وحيواناتكم جميعًا❤️
Animalist
01/02/2022
نظرًا لانشغالنا الشديد هذه الفترة، وإيمانًا منا بأهمية الرد السريع على الاستشارات العاجلة، وحرصًا منا على صحة أليفكم، وجب التنويه بأنه سيكون الرد على رسائل الصفحة -للأسف- غير متاح مؤقتًا حتى يوم السبت ١٢ فبراير
Be the first to know and let us send you an email when Animalist posts news and promotions. Your email address will not be used for any other purpose, and you can unsubscribe at any time.
