Kelabi

20/08/2022

22/01/2022

عايز تعرف ازاي تساعد كلاب الشارع بطريقة فيها استمرارية وماتخليهمش يعتمدوا عليك بشكل كامل؟
١. عالج الكلاب من مكانهم او في عيادة  بس يرجعوا مكانهم
٢. حمالات تعقيم وتطعيم
٣. اجتهد تلاقي بيت مناسب وياريت لو حد عنده خبرة يساعدك في اختيار بيت كويس

19/01/2022

ليه كلاب الشارع اسعد لو احنا سبناها في حالها؟
الفيديو ده بيتكلم عن ٣ حاجات بنعملها واحنا فاكرين انها بتساعد كلاب الشارع بس في الحقيقة بنبقى بنإذيهم عن غير قصد

16/01/2022

تخيل ان الشارع احلى حاجة لكلاب الشارع
Leave street dogs be...

10/01/2022

شوف لما عقدة من طفولتك تسّمع مع كلبك...الله...
احلى عقدة ولا ايه؟

04/01/2022

دي مش من اسهل حالات التعارف بس أساسيات التعارف كلها ساعدت في ان الموضوع يظبط
١. تعارف في مكان محايد
٢. تعارف في مكان آمن
٣. رخي الليش او شيل الليش
٤. شمشمة حتى الموت
٥. قلل التدخلات

حط في كل ده
# مساعدة من كلاب بتعرف تتعامل مع كلاب جديدة
# عدم ضغط عشان تعرف كلاب على بعض
#وقت و صبر و صبر ووقت
#تمشية كمجموعة
# انت تبقى chill ومروق كده

02/01/2022

٥ نصائح عشان تعرف كلبك على كلب تاني
ده اول فيديو يوتيوب ستايل قررت اعمله عشان اولا خلقي ضيق على اني اقعد اعمل ديزاين وثانيا عشان الرغي لازم يطلع وكده اسهل.
وعشان انا لسة محدثة هاكتب تحت الوقت اللي بتكلم فيه عن كل موضوع عشان لو انت كمان خلقك ضيق تقدر تفوت
00:01 مقدمة رغي
00:52
١. مكان التعارف يكون محايد  يعني مايكونش في بيت كلب من الكلاب اللي بتعرف على بعض
02:42
٢. المكان يكون آمن ومتسور
03:33
٣. رخي الليش او فكه وقت التعارف
04:52
٤. خلي الكلاب تشم بعضها (في الحتت المقرفة)
06:38
٥. ماتدخلش كتير بعد التعارف

04/12/2021

احنا في الجزء الثاني عن التواصل اتكلمنا عن مثال حي بيوضح كل الأخطاء اللي بنقع فيها مع كلابنا وبتخلينا نفشل اننا نفهمهم ويفهمونا
في الجزء الثالث والأخير من سلسلة مبادئ التواصل مع الكلاب،،حبيت اتكلم عن اللي مطلوب مننا عشان نفهم كلابنا اكتر ونتواصل معاهم احسن

06/11/2021

ازاي تعلم كلبك يسيب حاجة مش عايزه يمسكها في دقيقة...
اثبات حي محتار مبقالوش اسبوع معانا وفي أمل بدون زعيق ولا كلام ولا اي حاجة سلبية.
جربوا وقولولي

04/11/2021

فيديو توضيحي عن ازاي توجه كلبك انه مايتنططش عليك وهو بيرحب بيك..
الصوت اول ٢٠ ثانية مش حلو عشان تايهة كلبتنا بتهوهو عشان زنانة... بس بعد كده حايظبط..

اللي عنده سؤال عن الموضوع ده يبعتلنا

04/11/2021

ا

31/10/2021

احنا في الجزء الاول عن التواصل اتكلمنا عن عواقب عدم فهمنا لكلابنا واننا عكاكين شويتين في الموضوع ده..
اول خطوة تقربنا من التواصل الصح هو اننا نشوف الحاجة من منظور الكلب.. ونفهم تفاصيل العك اللي بنعمله.

فقررت اوضح ده بااتفاصيل من خلال مثل حي بنعيشه كل يوم مع كلابنا
خدوني واحدة واحدة بس كده ومش حايكون فيه اسهل من التواصل مع كلابنا

27/09/2021

مفهوم التواصل عند اصحاب الكلاب وعواقبه..
الجزء الاول
ده جزء من ٣ اجزاء عن التواصل مع الكلاب لان الموضوع اعقد من انه يتعمل عنه بوستات بس على الأقل دي حتكون بداية حوار نقدر نفتحه مع بعض ونبتدي نفكر شوية من منظور الكائنات اللي معكوكة معانا 🐶🐶

15/09/2021

اكتشفت اهمية لعب الذكاء لما مانجة انضمت للعائلة السنة اللي فاتت بس.
قبلها كانو كلابي بيكتفو بالتمشبة واللعب مع بعض وبلعب عادية يعضعضوا فيها شوية وخلصنا وكنت بحس اني مدياهم كل احتياجاتهم.
انما مانجة مابتهمدش ماهما حصل وطبعا شغالة على جزمنا والغسيل واي حاجة تيجي قدامها اكننا عندنا جرو عنده شهرين..ومن هنا اكتشفت ان طاقتها الغير محدودة دي لازم تطلعها في حاجة تشبع احتياجها..
ايه اهمية لعب الذكاء enrichment؟
اهمية لعب الذكاء هي انها بتشتغل على اشباع غريزة الكلب اللي احنا كتمناها لما جبناه البيت وبقينا نقول no على كل حاجة يمسكها.. لو بصيتوا على كلاب الشارع حتلاقوهم عايشين حياتهم بيقطعوا في الزبالة ويدعبسوا وده في حد ذاته اشباع للغريزة
هل اللعب دي للكلاب الهايبر بس او الجراوي؟
لا طبعا.. حتى كلابي البرتاط بعملهم لعب كل يوم هم ومانجة وبجد بقوا اسعد كتير.. الموضوع ممكن يكون فيه لحوسة وعك بس عادي يتنظف يعني مش ازمة.. بس fun للكلب وليك كمان لما تلاقي بعد كده كلبك متمزج و مرتاح نفسيا بعدها
**البوست في افكار لعب وانواع بحب اشتربها
***اللي عايز يعرف ايه احتياجات الكلاب عامة يرجع لبوست june 7

15/09/2021

.
علم كلبك sit بس من منطلق إيجابي..

.
الناس بتحب اوي موضوع ندي امر للكلب فيعمله..ده بيحسسنا ان احنا جامدين اوي وكلابنا مش بتكسرلنا كلمة.
بس في الحقيقة الموضوع ممكن يبقى له فوائد ابعد من موود مدرب السيرك اللي الواحد بيعوز يعيشه

١. ممكن تبقى طريقة لذيذة للعب مع كلبك ونشاط من انشطة اليوم اللي تملى بيها وقت كلبك
٢. لما الكلب بيتعلم القعاد ده ساعات بيساعد في علاج سلوك تانية احنا مش بنحبها زي التنطيط
٣. إن انت تعلم كلبك حركات حاجة لذيذة بتنمي ارتباطه بيك

👈اللي قصدي اقوله ان تعليم sit له فوائد كتيرة ومش شرط خالص يبقى نابع من منطلق ان انا القائد وان لازم الكلب يتذل قبل مانديله التريت عشان يعرف اني انا الريس بتاعه..

👈بالعكس ان كلبك يتعلم امر او حركة (مش بحب كلمة امر دي) ممكن تبقى جاية من منطلق لعب و حاجة إيجابية وده بيخلي الكلب يسمع كلامك اكتر

👈الفيديو ده بيوريك ان مش لازم اقول كلمة sit اصلا ولا اعمل نفسي دكر ولا قائد على الكلب عشان يسمع كلامي هي الحكاية كلها تواصل إيجابي

15/09/2021

ايه طبيعة علاقتنا مع كلابنا الجزء التالت..
ده بالنسبة لي اهم لقطة في الموضوع ده كله لان لازم لازم نبتدي نغير منظورنا عن كلابنا
اه بنحبهم اكنهم عيالنا بس لازم نتقبل ان مخهم على قدهم و لو حابب تبصلهم كعيال يبقى تأكد أن العلم اثبت ان مخهم وعواطفهم ممكن تتقارن بطفل عنده سنتين ونص بالكتير..
فأرجوكو ماتعقدوش الدنيا مع كلابكم، لو عملوا حاجة من منظورك انت غلط، اعرف ان هو لا بغيظك ولابيعند، لو زعقتله وحبسته عشان بتعاقبه لانه اكل جزمتك، ولاقيت كلبك وطى راسه ولا اخد جمب والله والله هو مش بيبقى حاسس بالذنب... لأاا بالعكس بيبقى قلقان وعايز يتفاداك وانت متعصب.. لكن مش رابط اللي عمله بالعقاب
هاتكلم عن العقاب ومشاكله اكتر بعدين بس الأهم الأول كلنا نتفق ان الكلاب فكرهم وعواطفهم بسيطة زيها زي الطفل اللي بيتعلم المشي..

15/09/2021

طب احنا اتكلمنا على سلوك الكلب و تقليده لعلاقتنا مع عيالنا..وازاي ده واضح اوي لما تبتدي تعرف اكتر عن علم نفس الطفل.
تخيل بقى انه بيولوجيا وكيميائيا الكلب برمج نفسه على مدار السنين انه يتكييف معانا؟ هاقولك ازاي
١. بيولوجيا
-الكلب ساستم نفسه علينا لدرجة انه لقط لغة عين الطفل مع اهله...
-الكلب هو الحيوان الوحيد اللي مش من الرئيسيات primates ( القرود وكده) اللي دايما بيبصوا للانسان في عينه..
- في دراسات كتيرة اكتشفت ان مع تطور الكلب بعد آلاف السنين، الكلب نمى عضلة عند حواجبه مش موجودة في سلالة جدوده (الذئاب) العضلة دي هي اللي بتدي ال puppy eyes effect واللذيذ ان الكلاب بتستخدم العضلة دي اكتر لما بتتواصل مع الناس مش كلاب تانية. وطبعا النظرات دي نجحت ان تخلينا ندوب في دباديبهم ونحس انهم كيوت وكده
https://bit.ly/2VMdO8p

٢. تغيير كيميائي
طب الاغرب بقى ان لما الكلاب بتبصلنا بيحصل تغيير كيميائي في جسمهم...التغيير ده بيبقى في شكل هرمون الاوكسيتوسين وده الهرمون اللي بالبلدي كده بيتقال عليه هرمون الحب وده هرمون مرتبط بالتجارب الايجابية موجود في ثدييات يعني موجود في الإنسان كمان.
عادة الام بتفرزه وهي بتبص لطفلها او بشكل عام لما يبقى في ارتباط عاطفي او حتى لو خارج مع صحابك وفي حالة الناس اللي زي حالاتنا مرتبطة بكلبها احنا كمان بنفزه لما لنبص لكلابنا او نعمل eye contact او بنطبطب عليهم.
والكلاب نفس الشئ بيفرزوه وهم بيبصولنا ويتواصلو معانا.
https://bit.ly/3m7DarV

👈👈👈الملخص كده كلابنا بتحاكي او بتقلد او تطبعت بعلاقة البشر بأولادهم ( اجتماعيا وبيولوجيا وكيميائيا)...واحنا كاصحاب كلاب لعبنا اللعبة دي واحنا فاهمين ان بنلعبها مع حيوان مش طفل...ولا ايه؟

الكلام اللي جاي مبني على الجزء ده واللي فات بس انا شايفة انه اهم لقطة في كل الرغي ده .. ايه المنظور السليم لعلاقة البشر بالكلب؟ حانتكلم اكتر في البوست الجاي

15/09/2021

كنت عاملة استفتاء على الانستاجرام قبل ماعمل البوست ده.. كل اللي جاوبو تقريبا متفقين ان كلابنا اصحابنا (٩٩% من اللي جاوبوا) وجزء من عيليتنا (١٠٠%)، و٩٧% مننا شايفهم اكنهم اولادنا، و ٥٠% شايفنهم حماية وحراسة لينا واخيرا ٥٩% من اللي جاوبوا شايفنهم كائن لذيذ لتسلية الاولاد وأهل البيت..

كلنا من الاخر بنحب الكلاب بس مش كلنا بنبصلهم نفس البصة..يمكن بعد البوستات اللي جاية الناس تغيير رأيها في انه مجرد كائن للتسلية يمكن بردو انت تغيير رأيك انه ماينفعش نبصله زي ابننا او بنتنا.

علاقة البشر بالكلاب بتتطور مع السنين، من ١٠٠ سنة واللي العلم كان عارفه عن سيكولوجية الكلاب وذكاءه الاجتماعي كان محدود. فعادة كان دور الكلب مقتصر على الشغل في الصيد والحراسة ورعاية الغنم وكان طبعا في نفس الوقت رفيق الإنسان ملازمه في كل حتة ولما العلاقة اتطورت اكتر بقوا الناس تجيب كلاب في بيتهم بس تعييشهم برة في جنينة او في المزرعة او مكان مخصص ليه كحيوان. وبعدين اخر ١٠٠ سنة الكلب اتسرسب لحد مادخل بيتنا وكمان بينام على سريرنا احيانا وتلاقي الناس بتلبس كلابها وتتكلم معاهم وتعملهم أعياد ميلاد اكنهم عيالهم.

الناس اتجننت ولا ايه؟ الحقيقة انه لا..هو الكلب هو اللي عرف يتعايش مع البشر وتطور بالتوازي معانا لدرجة انه بقى يتشبه بالاطفال في ارتباطهم بأهلها..فأكيد حنتأثر

لو بصيت على نظرية التعلق attachment theory بتاعة Bowlby في علم نفس الاطفال حتلاقيه بيتكلم على ٤ أشكال لتعلق الاطفال بأهلها:
١. االطفل بيحب يفضل لازق لأمه proximity maintenance
٢. بيدور على الحماية معاك لما حاجة تخوفه او توتره safe haven
٣. يتشجع اكتر في اكتشاف البيئة اللي حواليه Secure base
٤. يتوتر لما تمشي وتسيبه separation distress

طب مش السلوك ده موجود عادي مع كل الحيوانات؟ اه صح حتى الطيور برده...
بس اللي عجيب هنا ان الكلب الناضج مش بس ال puppy بيظهر السلوك ده مع جنس تاني خالص اللي هو احنا

حط بقى العلم على جمب وفكر في كل المواقف اللي بتعيشها مع كلبك اللي بتحسسك انك في علاقة اب/ام و طفل..

15/09/2021

الحل السريع انك تتعامل مع كلب مش بيحب يتمسك اويتفلى:
مافيش حل سريع...بس فيه انك تأهل كلبك وحدة وحدة انه يتقبل انك تمسكه وده مش حايحصل لو اجبرنا الكلب على حاجة.
بالعكس، إجبار الكلب على حاجة مش بيحبها حايضعف العلاقة بينك وبين كلبك ويقلل الثقة و يكهرب الجو وفي النهاية لو كلبك مش بيحب حاجة زي التفلية او انه يتسرح (الحاجات بتاعة كل يوم دي) ده معناه ان كل مرة حتفلي كلبك فيها الكلب حيكون مقهور ومن الآخر لو كلبك بيعض وارد انه يحس انه في حالة الدفاع عن النفس،فيعضك. وبعدين نيجي نقول الكلب ده اجريسيف او عنيد او اي مسمى تاني...هل دي العلاقة اللي احنا عايزنها مع كلابنا؟ اعتقد لا
طب ايه الحل؟ الحل انك تشتغل مع كلبك في انك توجهه من خلال تريتس او لعب او اي طرق fun للحاجة اللي انت طالبها منه..الهدف ان الكلب يقتنع انه لما يعمل السلوك الفلاني(يسيبك تفليه) حياخد تريت او حايلعب ده اللي حايخلي الكلب يكرر السلوك ده وده اللي حايحافظ على النتيجة لفترة طويلة.

بس مش معنى ان لو الكلب استجاب مرة يبقى كده خلاص مشاكلنا اتحلت للأبد...التوجيه او التواصل مع كلبك work in progress يعني حاجة لازم تشتغل عليها مدى الحياه..فا اه لازم يكون التوجيه بالتريتس واللعب جزء من حياتك مع كلبك مدى الحياة ودي حلاوة انك تبني علاقة قوية مع كلبك..
وتجربتي الشخصية مع زيزي بتثبت ده فازيزي العضاضة من اقرب الكلاب لي لاني اشتغلت معاها كتييير اوي..انا وهي بنموت في بعض.

15/09/2021

Podcast interview in English
بحب اوي فكرة الرغي بدون مقاطعات من اعلانات وكده ودي حلاوة فكرة البودكاست.

نيهال اتبنت كلبة تعتبر بلدي بس من اسبانيا نوعهم اسمه podengo و حياتها اتشقلبت عشان كانت كلبة شارع ماعشتش في بيت قبل كده.
نيهال كانت لازم تحاول تفهم الكلبة عشان تتاقلم وحياتهم هم الاتنين تبقى حلوة. وفعلا قدرت توصل لمدرب كويس و الكلبة اتبدلت و اللذيذ ان نيهال قررت تعمل مبادرة ظريفة اوي من خلال البودكاست هدفها تنشر معلومات عن طرق التعامل مع كلب إنقاذ لما تتبناه وتاخده البيت.
لما نيهال استضافيتني قولتلها اني اكتر حاجة بحب اتكلم عنها هي التواصل مع الكلاب بشكل إيجابي وازاي مهم في نظري ان مش كل حاجة عايزين نفهمها لكلبنا تبقى من خلال تدريب طاعة وان موضوع انك تذنب كلب او تستخدم معاه اساليب عنيفة ده اصلا (باثباتات علمية) و ان الموضوع اكبر من كده لانهم كائنات لهم لغتهم وكيانهم اللي لازم نحترمه.
الرغي بالانجليزي بس اللي حابب يسمعه وبعتلي اي استفسارات قولولي...
تابعوا صفحة .co

👈🎤اللينك https://www.rescuetails.co/podcast/episode/25ff719f/how-to-communicate-with-your-rescue-dog-and-earn-its-trust

15/09/2021

طبعا كلنا عارفين ان كلابنا بتحبنا او مرتبطة بينا بشكل او بآخر ومعظمنا متأكدين ان العلاقة دي مش مشروطة بالأكل وبس..عرفنا الكلام ده ازاي ومنين ؟ من الحياة اليومية مش لان كلبك قلك بحبك او وحشتني..
ياما بيبقى فرد في البيت هو اللي بيأكل بس تلاقي الكلب بيرحب وبيلعب ومرتبط بكل اهل البيت بغض النظر. ياما بنبقى رايحين نأكل كلاب الشارع ونلاقي كلاب منهم اهتمامها الأساسي هو انهم يلعبو معاك وانك تديهم اهتمام او دلع...
يعني من اللي الواحد بيشوفه والتجارب الشخصية نقدر نقول ان في أسباب قوية تورينا ان الكلاب أولوياتها في علاقتنا معانا مش الاكل وبس..يعني العلاقة أعقد من كده..
اللذيذ بقى ان فعلا العلم اثبت ان الكلاب عندها مشاعر حب مش مقتصرة على مصلحة الاكل...تخيل العلم دخل مخ الكلب...اتفاجإت؟
هاحكيلكو عن اكتر تجريتين ابهروني وفعلا الدراسات اللي اتعملت كتير اويييي...
١. تجربة حاسة الشم
الراجل الكبارة جريجوري بيرنز (عالم ومتخصص مخ واعصاب يالهوي) ده عمل دراسات فظيعة بعد مادرب الكلاب تقعد بمزاجهم وبدون استخدام اي قوة جوة المكنة المرعبة بتاعة الرنين المغناطيسي mri والكلاب اتدربت بأحلى تريتس ازاي تفضل ثابتة جوة والأهم انها كان لهم كامل الحرية انهم يمشوا اي وقت..
المهم الرنين كان بيتتبع النشاط في مخ الكلب في كل مرة يشم فيها ريحة شخص غريب، ريحة شخص مألوف، ريحة كلب غريب، ريحة كلب مألوف، ريحة الكلب نفسه...تخيل ان كل الروائح دي نشطت المنطقة اللي في المخ المسؤولة عن الروائح ماعادا لما الكلب شم ريحة صاحبه ساعتها الجزء اللي اتنشط في المخ هو الجزء المسؤول عن الترقب او انتظار حاجات إيجابية الي بيسموه جهاز المكافأة reward center
طب عادي...يعني الكلب لما شم ريحة صاحبه وارد يكون توقع انه حايكل وجبة حلوة ولكن تصدق ان مش كل أصحاب الكلاب في التجربة دي هم اللي كانو بيأكلوه عادة في البيت...
٢. التجربة ثانية اكل vs. جود بوي
عامة عمك بيرنز ماسكتش واخد التجربة دي لخطوة ابعد فقرر انه يدرس نشاط جهاز المكافأة لما الكلب بيتقدمله اكل ويقارن النتيجة بنشاط جهاز المكافأة لما يسمع تشجيع من صاحبه زي جود بوي
وهنا النتيجة طلعت بتأكد فعلا ان جهاز المكافأة اتحفز في الحالتين...اه في كلاب كانت متحمسة اكتر للأكل و في كلاب كانت متحمسة اكتر لأصحابها بس النتيجة الفاصلة ان في المجمل معظم الكلاب بينوا نشاط في جزء المكافأة لما سمعو صاحبهم بنفس قوة النشاط لما توقعوا اكل
تخيل؟ يعني احنا وجودنا في حد ذاته يكفي ان يخلي كلبنا متحمس ومتوقع حاجة حلوة او بالبلدي كده مبسوط وبيحبنا..

20/08/2021

طب عشان البوست اللي فات كسر الدنيا (بلا فخر طبعا عشان انا متواضعة) لازم نعمل بوست تاني نتكلم على حاجة تانية علطول بتفوتنا..
لما الكلب يهز ذيله مش بالضرورة خالص انه مرحب بالشخص او بالكلب اللي بيقابله
في اوقات كتير هز الذيل بيبقى تعبير عن حالة توتر او تنشنة...
زي ماقلنا قبل كده لازم اقرا تعبيرات الجسم كلها قبل ماروح اسلم على كلب او اعرف كلبي عليه.
موضوع الذيل ده مهم لان مر علي ناس كتير بيحكولي ازاي كلابهم اتعضت بالرغم ان الكلب التاني كان بيهز ذيله...هز الذيل من الاخر مش مقياس للترحاب..
لو عاجباكو مواضيع عن لغة جسم الكلاب قولولي عشان نكمل نتكلم عليها..

20/08/2021

مش كل ماكلب كشر عن انيابه ولا هوهو يبقى كلب شرس وعايز يهجم او مسعور زي مالناس بتفضل تقول. ساعات دي بتبقى حركة لا ارادية بيعملوها وهم متحمسين.
مهم اوي نبص على كل التعبيرات الجسدية اللي الكلب بيعملها قبل مانحكم عليه..
اتفرجوا عل فيديو وقولولي رأيكوا..

20/08/2021

ليه الكلاب كائنات عظيمة..الجزء الاول:بيفهموها وهي طايرة
الناس اللي مرتبطة بكلبها دايما تقولك "كلبي بيفهمها وهي طايرة"، "ده بس لما ببصله بيبقى عارف اني نازلة دانا بس اشاورله" ، "ده بيفهم لما ابقى مبسوطة او متعصبة"..هل اللي عندهم كلاب زي حالاتي كده مجانين؟ يعني ايه حيوان يفهمنا؟ ولا احنا بس عندنا نقص حنان فمطلعينه في تهيؤات على الكلب؟ ولا احنا مأفورين؟
تخيل ان كل ده طلع حقيقة علمية؟ اه الكلاب في معظم الوقت فاهمانا، عارفة ومتوقعة صاحبها حايعمل ايه بظبط دلوقتي، بتعرف تمييز لما احساسنا بيكون إيجابي او سلبي (بلغة البشر مبسوط ولا زعلان او راضي ولا غضبان)، كلابنا بتفهم لما نشاورلها ولو حتى بنظرة تروح فين. عايزة احكيلكوا سريعا على دراستين بيثبتو ده.
اول واحدة جابو كلاب وحطوا قدامهم صورة شخص مبتسم ونفس الشخص غاضب وشغلوا اصوات توحي بالغضب ومرة توحي بالسعادة. الكلاب نجحت توفق صوت وصورة وبقوا يبصوا على الصورة المبتسمة فترة أطول كل ما الاصوات السعيدة تشتغل والعكس مع الصورة الغاضبة. ده كلام يبان بسيط بس لحد مالدراسة دي اتعملت ماكنش في حيوان ناجح في ده غير الشيمبانزي اللي هو بيشاركنا ٩٩% من ال DNA.
طب تخيل ان كلبك ابو ودان هبلة ده اللي مايشبهناش في الشكل بالمرة تفوق كمان على الشيمبانزي في cooperative communication skills اللي هي من الاخر المهارات اللي فيها اتصال تعاوني بين البشر وبعضها زي المشاورة، هزة الرأس في اتجاه معين، البصة في اتجاه معين. الدراسة اللي اثبتت ده جابت كلاب و أطفال عندهم سنتين و شيمبازيهات(هو ايه جمع شيمبانزي؟) وبقوا الباحثين يخبوا لعبة او اكل تحت حاجة ويشاوروا للكلب او الطفل اوالقرد على المكان، تصدق ان نتايج الاطفال والكلاب متقاربة اوي والاتنين تفوقوا على الشيمبانزي في انهم يلاقوا الحاجة.
يا جماعة والله دي نتيجة مش عبيطة ده حيوان ياجماعة وبيتصرف اجتماعيا زي الإنسان في حاجات كتير. واصلا الدراسات دي نقطة في بحر من كم الدراسات العلمية اللي بتثبت قد ايه الكلب ده كائن عظيم واقرب حيوان لينا.
لأ احنا مش مجانين لما بنقول كلبي فاهمني...
اللي مهتم يقرأ اكتر عن الدراستين دول هاحط اللينكس في الهايلايتس.

05/08/2021

كلاب الشارع عايزة مننا ايه!!!؟؟
لو حد غريب دخل عليك البيت حاتعمل فيه ايه؟ حاتنط في كرشه صح؟ هي دي نفس الفكرة لما نيجي نعدي من مكان معسكر فيه كلاب الشارع، احنا كده نعتبر اقتحمنا بيتهم. متوقع يعملو ايه؟ طبعا حايهوهوا ويقربوا علينا..بهدف ايه؟ انك تمشي من المكان ده.
هم لا عايزين يعضوك ولا يعضوا كلبك هم عايزين يكملو نوم ويروقوا في منطقتهم.
طب انت تعمل ايه؟
احترم حرمة بيتهم ماحبكتش تدخل بيتهم، لف من مكان تاني..مافيهاش اي حاجة
لو الشارع ضيق ولازم تعدي منه كده كده يبقى انت محتاج :
١. إن كلبك يكون مية مية تركيزه معاك وماينفعلش خالص لما الكلاب تهوهو عليه.لان لو هو تحداهم اه ممكن الموضوع يتصعد (اشتغل على مشية كلبك وزي ماقلنا قبل كده ابدأ من البيت)
٢. انت كمان محتاج تكون هادي...تأكد انهم مش عايزين اي حاجة غير انك تمشي..فامشي وبص قدامك وركز انك تلهي كلبك وتلعبه وتريتس واكن مافيش اي حاجة حواليك
٣. لو عددهم كبير وحاسس انك مزنوق خد معاك اكل...وياريت لو حاجة تحفة انشالله رجول فراخ وارميهالهم بعيد قبل مايقربولك..انت كده بتبرمجهم ان لو استنو حايكلو حاجة تحفة...
ايه اللي ماتعملوش؟
بلاش ازايز مياه، بلاش عصاية بلاش اي حاجة تخوفهم او تستفزهم وبلاش زعيق، بلاش ترمي طوب او حتى تعمل نفسك بترمي طوب عشان حتكون بتستفزهم اكتر وده خطر عليك وعلى كلبك.
هل الموضوع سهل؟
لا طبعا وحاتبقى محتاس وماسك كلبك وتريتس وبالك مشغول بالكلاب والشارع والعربيات ومليون الف حاجة.
الموضوع حياخد وقت وحتى لو عرفت تصاحب الكلاب مش شرط يتقبلو كلبك...بس ده عادي وطبيعي..اهم حاجة الاستمرارية في تعاملك وماتنساش اهم حاجة في نجاح الموضوع ده هو نجاحك في ان كلبك يمشي معاك ويركز معاك انت..

05/08/2021

فاكرين أهدافنا التلاتة؟ ١) بلاش توصيف، ٢) لازم نبقى موجودين خلال الماشية ٣) نطول نفسنا. وهنا هاتكلم على الخطوات لتحقيق الهدف التاني..طولوا بالكو معايا:
١. انسى اللي فات...والا ماكنش زمانك بتشتكي
انسى لما يشد تشد، انسى تكلمه وتقوله no و sit ، انسى الزعيق، ارمي اي خناقات عندك و انسى حوار alpha وانا لازم اثبت ان انا المسيطر على كلبي.
٢. ابدأ من الصفر
لو عايز كلبك يسمعك ومش قصدي يسمع كلامك قصدي يتجاوب معاك وواعي بوجودك بيتواصل معاك ويستجيب ليك في الشارع في وسط كل الصعوبات و الdistractions, لازم الأول كلبك يكون بيتواصل معاك لما مايكونش في حاجات تلهيه. في الاغلب الوقت ده بيكون في البيت.
٣.وري لكلبك ان التمشية معاك على الليش تحفة
في الاغلب حايمشي حلو اوي في البيت. وهنا لازم نستغل عدم وجود حاجات تلهيه بأنك توريله انك fun وكمان مصدر للتريتس. ابتكر طرق تلعبه بيها وانتو بتتمشوا جوة البيت(بص على اخر reel فيه افكار للعب) و خلي معاك تريت جميل قيمته تبقى أعلى شوية من الدراي بس برده مش واو زي الفراخ. وكل مايتجاوب معاك ويبصلك و يمشي على نفس سرعتك اديله تريت.
٤. ابتدي صعبها سنة سنة
يعني كل اللي اتعمل في البيت يبتدي يتعمل قدام مدخل العمارة او في جنينة البيت المهم هدفك ان لسة الدنيا تكون مافيهاش حاجات كتير تجذب انتباهه بس تكون في نفس الوقت خرجته عن الايطار المتوقع السهل بتاع البيت. استجاب معاك في مدخل العمارة، خده الشارع بس في وقت يكون هادي مافيهوش triggers كتير بمعنى لو هو كلب بيترعب من الاصوات مش لازم نمشيه في عز الزحمة.
٥. قيمة التريتس بتزيد مع زيادة الصعوبة
يعني التريت اللي حايخدها في البيت مش زي اللي في جنينة البيت، مش زي اللي في شارع مافيهوش distractions واكيد أعلى قيمة في الشارع او التمشية اللي كلها صعوبات (كلاب، اصوات، أطفال على حسب كلبك بيتحمس او بيخاف من ايه )
٦. عادي ان كلبك يترجاع بعد مايكون سلوكه اتحسن. الرك على استمرارك يعني متزعلش او تقول مافيش فايدة اما كلبك يرجع يشد تاني، ده عادي و متوقع و عادي كمان ان التريتس والمجهود اللي بتعمله عشان تجذب انتباه كلبك يفضل جزء من حياتك.
تنبيه ⚠️
كل دي نصائح عامة و الموضوع أعقد شوية من كده و مش كل أصحاب الكلاب بيلقطو الbody language بتاع كلابهم ومعظم الوقت بنكافئ الكلب في توقيت غلط وكل كلب مشكلته واستجابته مختلفة بس ومش كل الكلاب بتسجيل للتريتس في كلاب بتحب اللعب اكتر بس كل كلب له مدخل وهي دي نقطة البداية في التواصل مع كلبك. جربوا كده وقولولي ايه اللي حصل.

05/08/2021

كلبي مش بيحبني
ايوة انا كلبي ديزل يعتبر مش بيحبني لو قارنا علاقته بجوزي، اكيد محمود يكسب.
دي كانت حاجة مضايقاني اوي لمدة سنين بس انا بكل صراحة كنت مستسلمة وبقول لنفسي خلاص مش مشكلة اني انا اللي بأكل وبودي دكتور ومش مشكلة اني انا اللي اتفخشت اني اعالجه وقت ماودانه جالها بكتيريا بنت لاذين.
الحقيقة ده تفكير عقيم:
اولا لاني متأكدة ان كلبي بيحبني
ثانيا، لأن ضيعت سنين في اني اندب ومعاملتش حاجة عشان لا أفهم ليه علاقته مختلفة مع محمود ولا كمان عملت مجهود اني أوطد العلاقة. ماعملتش حاجة غير من شهر بس..وديزل بقاله ٤ سنين معانا..متخييلين غبائي؟
سألت محمود انت بتعمل ايه مع ديزل؟ حاولت اشوف ايه اللي بيعمله الي انا مش بعمله؟ والأهم سألت ديزل وبقيت اقدي وقت معاه اكتر، اروحله لو قاعد على سريره بدل ماندهله، انكش فيه من غير سبب، اسرحه اكتر، كل اللي عملته كان أفعال مش اكل ولا تريتس ولا الحاجات اللي ساعات بنفكر ان هي دي الطريق لقلب الكلب.
الكلاب كائنات أعقد من اني اضحك عليها بأكل، عشان تكسب حب كلب لازم الأول تنزل من على العرش وتتقبل ان انت اللي مش كفاية لكلبك ، في نفس الوقت لازم يكون عندك اليقين ان الكلاب مش زي البانيأدمين، الكلاب حب و بس، بجد، هو ده الموتور بتاعهم، هو ده كيانهم، فمافيش كلب مش بيحب صاحبه.
انت بس اللي لازم تبذل شوية مجهود وتعرف اللي بيبسطه وتعمله وتعمله وانت مصدق ان هو ده اللي حايقربك لكلبك
ديزل من قريب بس بقى يجيلي من نفسه، بقى يطلع السرير جمبي (ده مستحيل وبس بيحصل لمحمود وامي واختي) ، اداني بوسة من قريب و ده بس لمحمود، بقينا connected و ده أهم انجاز بس الإنجاز الأكبر هو اني اقدر احافظ على حب الدبدوب حبيبي ديزل...بالمناسبة ديزل كلب هرش و طبطبة..(الاثبات في الفيديو)

05/08/2021

دول ٣ حركات سريعة تساعد تجذب انتباه كلبك وانتو بتتمشوا. السر مش في الحركات، السر في اللي بييجي مع الحركات الترييييييييت المكافأة...لما تحول الماشية للعب و مكافأة كل ماكلبك يبقى منتبهلك، الماشية حتكون مسلية ليكو انتو الاتنين وأسهل بكتير.
لو حابب تشوف فيديوهات سريعة تانية تابعونا على tiktok
https://vm.tiktok.com/ZMdPKA3Ff/

23/07/2021

المشي على الليش ساعات ممكن يكون احلى مزاج وساعات ممكن تبقى لعنة وشر لابد منه لان اكيد لازم امشي كلبي كل يوم
معظم الاحيان بيبقى فيه ٣ انواع معاناه (مع الاختلاف بين كلب وكلب) وتعالى نسميهم كده:
١. جرجرة وهايبرة: وهنا الكلب بيسحلك عشان عايز يشم كل حاجة و متحمس لكل حاجة وفي هطل معين وبشكل عام هايبر وعادة الكلاب دي بتبقى ابو لمس يعني لو شاف قطة من بعيد او أطفال بتجري بيبقى عايز يشارك ويجري معاهم او وراهم.
٢. الجميل والشرس: والماشية دي بتخض ناس كتير لان كلبك بيتحول من كائن جميل وفرندلي لوحش كاسر لما يشوف كلاب او قطط او بانيأدمين معديين جمبه وبيبقى عايز يهجم وبيهوهو وبيزوم وكل الحاجات اللي عمر ماكلبك بيعملها في البيت أو وهو مش على الليش
٣. فيلم رعب: وساعتها الواحد بيحس انه بيعذب كلبه وان كلبه فيه حاجة غلط عكس كل الكلاب اللي بيعشقوا التمشية. بتلاقي الكلب مش ماشي بانتظام، اي صوت عربية معدية او كلاب بتربكه، مخشب، ذيله بين رجله، وساعات ممكن توصل ان الكلب يبرك على الأرض وتضطر تشيله.
ومن هنا عندي ٣ رسايل قبل مانبدأ في الحلول
١. بلاش توصيف او labels
حتلاقيني هنا بوصف الماشية مش الكلب. تعالوا نبعد شوية عن توصيف كلابنا لان اولا ده بيدينا شعور بالاستسلام وانه كلبي اجريسيف اوهايبر او او فبالتالي خلاص مافيش حاجة تتعمل، ثانيا هو في أغلب الوقت كلبك مش الوصف ده، ولكن مش متوجه انه يتعامل مع الاحساس اللي بيدفعه انه يتصرف كده.
٢. اوعى تفتكر ان كلبك دريان بوجودك اصلا
بالرغم من اختلاف كل مشكلة الا ان في حاجة مشتركة بين التلات حالات دي...الا وهي، انت مش موجود، انت بس حاجة ماسكة في طرف الليش، انت حاجة عمالة تتكلم وتعمل صوت سواء عمال تكرر اسمه او تشده وتزعق ومكهرب الجو اكتر من الاخر وجودك البدني في الماشية لا يكفي لازم كلبك يقتنع ان وجودك ده مهم وان تركيزه عليك يساوي حاجات حلوة كتير.
٣. مافيش حل سحري فخلي نفسك طويل
لو مشيتك مع كلبك صعبة بقالها سنة مافيش حاجة حاتحل المشكلة في يوم وليلة ومش شرط برده في خلال شهر او اتنين ممكن تفضل تعافر سنة كمان قصاد السنة اللي فاتت. وممكن برده كلبك يلقط اسرع من كلب تاني و ممكن انت نفسك عقبال ماتفهم كلبك وتتواصل معاه ياخد وقت. كل ده عادي، ومش بيعيبك ولا بيعيب كلبك

لو مقتنع بالتلت حاجات دي كده هدفك واضح ونقدر نتكلم على حلول عملية عشان نتمشى مع كلابنا في سلام.
الأهداف هي،١) انا مش هاوصف او هاليبل كلبي،٢) انا محتاج ابقى موجود عشان كلبي يسمعني واقدر اتواصل معاه ٣) وهاطول نفسي شوية.
اشوفكو في الجزء 2

01/07/2021

زيزي تقريبا بقالها سنة معانا و بجد اعتقد ان دي اكتر كلبة اشتغلت معاها عشان سلوكها يتحسن وتكون مبسوطة اكتر. كانت بتهوهو non stop
، عالطول متوترة وطريقة تعبيرها عن لعبها واعترضها كان كله بالعضعضة الجامدة وساعات في حالة الاعتراض كانت بتقلب عض.
بس احلى حاجة فيها انها فهمت ان في طرق تانية للتواصل، في لعب، في تنطيط، وفي eye contact, وفي حاجات تانية كتير باقت تعبر بيها مع الوقت ومع تمرينات كتيرة عملناها مع بعض.
زيزي عندها تقريبا ٧ سنين دلوقتي فهي كان بقالها ٦ سنين قبل ماتجيلنا بتتواصل بطريقة معينة فأكيد مش متوقعة ان في خلال سنة واحدة بس يحصل تحول سحري. بس السنة فعلا فرقت. الهوهوة الهيستيرية قلت (مخلصتش)، تقبلت حاجات كتير مني زي الطبطبة على الbutt , ودي حاجة كانت مستحيلة، تقبلت امسك ايديها ودي حاجة اتعضيت فيها قبل كده، بقيت تسمحلي اخد اللعبة من بقها.
بس ده مش معناه انها مش بتحاول تعضني خالص لا عادي في مواقف كتير بتزعقلي او بتزغرلي او حتى بتعض خفيف، و انا من ناحيتي بحترم على قد ماقدر اللي هي عايزاه بالذات لما بتبقى حاجة مش جاية على مصلحتها.
يعني مش لازم اجبرها انها تتمسك او اطبطب عليها من بطنها. هل ده حايفرق مع صحتها او سعادتها في حاجة؟ مش لازم لما احميها افشخ ظهرها وذيلها مثلا عشان يبقى فلة. بس كنت محتاجة اعودها اني اطبطب عليها براحتي، عشان هي اصلا كانت حابة ده بس مش فاهماه، كنت لازم اوريها ان عادي لما اخد من بقها اللعبة عشان ارميهالها تاني لان هي بتعشق الfetch.
من الاخر مش كل الكلاب زي بعض ومش لازم كلبنا يقبل مننا كل حاجة احنا عايزين نعملها فيه، زي ماحنا في حاجات مش بنحبها هم كمان كده. صحيح ممكن الموضوع يكون من عقدة او trauma حصلت من حياتهم زمان او ممكن يكون طبع اتولدوا بيه ، مش فارقة...المهم نبقى واعيين ان في أحيان كتير اللي حايقربك من كلبك اكتر هو انك تفهمه وتحترم رغباته طالما ده مش بيئذيه نفسيا و صحيا.
انا حطيت فيديو عشان اواريكوا ازاي لسة قدامنا شغل بس ان كمان احساس حلو تشوف كلبك بيتغير وبيقربلك اكتر وان الموضوع فعلا يستاهل التعب والوقت.