Guinea Pig Owners Club Egypt

24/04/2024

إسعافات ضربة الشمس ضروري كل مربي يكون عارفها وجاهز هيتصرف إزاي لو حصلت والأهم نعرف إزاي نتجنبها.

ضربة الشمس خطورتها مستمرة حتى بعد إسعاف المصاب لأنها بتتلف المخ وبتسبب مشاكل بتستمر طول عمر الغينيا بيج

اضغطوا على الصورة لقراءة الموضوع ..

ضربة الشمس من الأهمية بمكان إننا نتكلم عنها في مقال مستقل، وهي أخطر وأشد فتكا بالحيوانات من الأمراض ﻷنها بتموت خلال 3 ساعات لو ماحصلش الإسعاف السليم والتعامل بشكل ح....

24/04/2024

نخلي بالنا من علامات ضربة الشمس في الغينيا بيج لإنها بتحصل كتير في الصيف وبتموت بسرعة

21/03/2024

مش عايز ده دلوقتي!
عندكم ايه جديد على الفطار النهاردة؟؟

17/03/2024

نظراً لأن جروبنا القديم وقف مع البيدج السابقة، بدأنا جروب جديد لكل المهتمين بالغينيا بيج في مصر وهحاول إن شاء الله أعيد كتابة أهم البوستات الي كانت عليه.
الجروب مساحة لمشاركة المعلومات الي تهم المربيين واللحظات المميزة وتبادل الخبرات بين الأعضاء والإجابة على استفساراتهم وحل مشاكلهم.

تقدروا تنضموا للجروب وتضيفوا المهتمين من أصدقائكم
Guinea Pigs in Egypt

16/03/2024

أنا مش أرنب 😑
ولا هامستر 😢
ولا فأر 😕

أنا واسمي العربي #وبر
وفي مني حوالي 15 نوع مختلف

وأنا مش شبه حد من الحيوانات اللي بتشبهوني بيهم وماينفعش أعيش معاهم

15/03/2024

14/03/2024

مهتمين بتربية حيوانات تانية
غير الغينيا بيج؟

25/02/2024

تربية الغينيا بيج من أمتع الهوايات الي مش واخدة حقها
كنت بفكر إزاي ممكن نثبت لحظاتنا المميزة مع الغينيا بيج ❤️

فقررت أعملهم ستيكرز مميزة لأكتر اللحظات المبهجة الي بنعيشها معاهم

فكانت دي أول مجموعة من الستيكرات الي جهزت
هيتطبعوا إن شاء الله وأجرب الكوالتي وأفرجكم النتيجة

20/02/2024

كل المعلومات الي ضروري تعرفوها عن استحمام الغينيا بيج 👇🏻

الغينيا بيج في حياتهم الطبيعية مش بيستحموا، ومش بيحبوا الميه تيجي عليهم، وبيخافوا منها. هعرفكم على مجموعة إرشادات لازم تعرفوها قبل ما تقرروا تحموا أي غينيا بيج…

14/02/2024

بيحبوا يأكلوا وهما نايمين
بس مش كلهم بيعرفوا يناموا كده

09/02/2024

يستاهلوا الاهتمام ولايق لهم الدلع
من أجمل لحظات التربية المميزة جدا لحظة ما يكونوا نايمين ومبسوطين على سرايرهم، يخلصوا أكل ولعب ويدخلوا يلفوا في السرير عشان يوصلوا لأفضل وضعية مريحة .. لحظات مايعرفش معناها غير المربي الي بيربي بحب 💙

09/02/2024

وزن الغينيا بيج من مؤشرات الصحة المهمة جداً 👌🏻
ودي أسباب تخليك لازم يكون عندك ميزان ديجيتال للغينيا بيج:

- متابعة وزن الغينيا بيج أسبوعياً لأن الوزن بيكون مؤشر لأمراض كتير مش هتلاحظ لها أعراض واضحة غير انخفاض الوزن.

- تحديد جرعات الأدوية المناسبة لأليفك لو بتتابع العلاج مع متخصص عن بعد.

- متابعة وزن الغينيا بيج المريض يومياً في حالات المرض الشديدة الي بتحتاج وقت عشان ترصد التحسن .. من أول مؤشرات التعافي الي بتعرفنا إن نظام العلاج صح هو زيادة الوزن بمعدل ثابت يومياً.

- متابعة وزن الأمهات الحوامل أسبوعياً عشان تتأكد إن صحتهم كويسة ووزنهم بيزيد بمعدل ثابت، وتقدر مع الوقت تكتسب خبرة وتخمن عدد الأجنة من معدل زيادة الوزن.

- متابعة وزن صغار الغينيا بيج من يوم الولادة، عشان تتأكد إن نموهم طبيعي، مع العلم إن الشهر في عمر الصغار يعادل تقريباً 100 جم زيادة في الوزن.

- وزن بعض الأدوية والتركيبات بالجرامات

الميزان الديجيتال أساسي في تربية الغينيا بيج .. لما تجيب ميزان اختار ميزان ديجيتال حساس بالجرامات بسطح مستوي (زي الصورة) عشان تقدر تستخدم طبق وتوزع الوزن صح على الميزان عشان تأخد قراءات وزن صحيحة.

05/02/2024

أنا على لحم بطني بقالي ساعة
معاك أكل؟؟

02/02/2024

وقت تنظيف القفص من أفضل وأهم الأوقات اللي ممكن نستغلها لتقوية علاقتنا بالغينيا بيج وعشان نكسب ثقتهم الغالية أوي .. دي أهم النصائح اللي ممكن تساعدنا في تقوية العلاقة بينا وبينهم

● وقت تنظيف القفص بننقل الغينيا بيج لمكان غير قفصهم والطبيعي انهم هيكونوا خايفين وقلقانين من المكان الجديد .. فبنستغل الوقت ده ونتواصل معاهم بصوت هادي وممكن نكلمهم ونخلي انتباههم دايما معانا وده تدريب مهم عشان يتعودوا يسمعولنا وفي نفس الوقت نطمنهم انهم بخير

● المسح على الرأس بيهديهم ويطمنهم جدا ده غير انهم بيتبسطوا منه وبيخليهم يسترخوا أكتر

● وزي القطط هما بيحبوا حد يهرش لهم دقنهم وده بيريحهم ويهديهم

● كمان بنبدأ نعودهم يقفوا عشان نشيلهم فبنحط الايد اليمين قدامهم عشان يقفوا عليها بايدهم والايد الشمال بترفعهم من ورا .. الخطوات دي لما بتتعمل بهدوء الغينيا بيج بيطمن لصاحبه جدا وبيبقى واثق انه بيشيله صح ومش هيتأذي معاه ومن نفسه هيقف كل مرة عشان يتشال ويدخل مكانه

● ممكن كمان نبدأ بعدها نعلم الطاعة .. فبنحطهم وقت التنظيف في طبق غسيل قصير يقدروا يهربوا منه وأول ما يجوا يهربوا نبدأ نعودهم على معنى كلمة "لأ" أو صوت "تؤتؤ" وممكن في البداية نضطر نرجعهم جوة الطبق بنفسنا بس لازم نرجعهم واحنا بنعمل نفس الصوت عشان يتعلموا معناه

دي كانت أهم النقط اللي عندي
لو عندكم أفكار تانية ياريت تشاركونا بيها في التعليقات

29/01/2024

الغينيا بيج عندي بكام؟
- "حقيقي ده آخر سؤال يهمني اتسئل فيه أو أجاوبه"
البيدج مش هدفي فيها الربح وأنا مش بكسب من التربية أي فلوس نهائي وده مايقللش من أي حد بيكسب بس أنا بتكلم عن البيدج وهدفي الأساسي منها

يهمني الي يطلب يسألني بتربيهم إزاي .. معوداهم يأكلوا ايه .. أحافظ على صحتهم كويسة إزاي .. المجموعة الي أنا اختارتها تناسبني وتناسب الأطفال ولا لأ .. يسألني عن طبيعة شخصية كل غينيا فيهم ايه الي بيحبه وايه الي بيكرهه ولأي درجة هو اجتماعي وأليف مع الناس

يهمني الي بيبعت يطلب أو هيطلب من حد تاني ألاقيه مصور لي الأقفاص وبيسألني أني واحد أنسب ليهم كمساحة ويسهل عليا التربية ويعيش معاهم .. وايه الفرش المناسب لكل نوع عشان أحافظ على صحتهم ونظافة البيت

آخر حاجة تهمني هو سؤال "بكام"
لو بتسألني في الأسئلة الي فوق وماشي معايا ومتابع بدون استعجال .. مايغلاش عليك مجموعتي كلها وهيكونوا عندك كأنهم عندي بالظبط

الغينيا بيج الي بيطلع من عندي مصروف عليهم الألاف بدون مبالغة ..
بيأكلوا أنظف أكل وكل الي بيحتاجوه في نظامهم الغذائي (عشب أخضر - خضار - فاكهة) .. بوفر لهم رعاية صحية وفحص أسبوعي .. بسهر بالتعبان فيهم بالأيام حتى لو الدكاترة بيقولوا فرصته ضعيفة .. تدريب وتحسين سلوك .. بزرع لهم الhay (عشب الأخضر) كل ما وقتي بيسمح .. دائما في بوكس إسعافات للحالات الطارئة فيه أدوات وأدوية لعلاج معظم الأمراض والإصابات الشائعة ..

الي عايزة أقوله .. مفيش حاجة ممكن تكسبني فيهم غير إن الي ياخدهم يحافظ على أرواحهم ومايبخلش عليهم بنظافة أو أكل أو علاج ويعاملهم بحب مش للتسلية وبس
الي يرضيني فيهم مش رقم هيتدفع لي مقابلهم .. الي يرضيني يكونوا مع الي بيحبوهم ويحافظوا عليهم وفي الحالة دي هما هدية مني للي هيربي صح والي كان هيتدفع فيهم يتجاب بيه مستلزماتهم واكسسوارات التربية

هدفي من البيدج نربي صح كل واحد حسب استطاعته وامكانياته .. ونوفر الرعاية الصحية باستمرار .. ونحافظ على أرواحهم الي هنتسئل عنها .. وآخر سؤال ممكن تسأله على البيدج هنا لما تنوي تربي وتطلب من عندي هو "بكام الغينيا بيج"
_________________________

ده بوست كتبته في 2021 على البيدج القديمة، وبعدها بفترة اضطريت أصفي مجموعتي، ووقفت عن التربية لأسباب صحية منعتني من الاستمرار .. بس بكرر نشره عشان أفكر كل شخص بيربي أو عايز يربي إنه مش بيجيب حاجة تسليه ويتفرج عليها لما يكون زهقان أو مكتئب، دول مخلوقات بأرواح زينا بنتونس بيهم وبيتونسوا بينا، بيوتنا بتبقى عالمهم الآمن ومصدر راحتهم، بيجروا علينا في وقت الشدة والمرض يستغيثوا عشان نساعدهم من شدة ثقتهم فينا، بيحاولوا يكلمونا وبيفهوا كلامنا أحيانا أفضل من فهمنا ليهم، هما أمانة عندنا ونعمة عظيمة بنشوف بيها عظمة ربنا ولطفه ورحمته ❤️

حيواناتنا جزء من روحنا والتخلي عنهم صعب!
فهما مش للبيع حتى لو بناخد فيهم مقابل رمزي
هما للي يستحقوهم .. فحافظوا عليهم
وحبوهم بقدر الدفى الي بيملوا به حياتكم

26/01/2024

الكائن اللي عنده انتماء لعالمه المريح والآمن ❤
عايز يرجع القفص

24/01/2024

في أصوات الغينيا بيج بيعتبروها بتكلم بطنهم 🌱
يقدروا يسمعوها على بعد ميل .. أصوات لا تقاوم
صوت الثلاجة ..
وصوت الشنط البلاستيك
وصوت السكينة على لوح التقطيع
وصوت ميه الحنفية

21/01/2024

أسنان الغينيا بيج مؤشر هام جدا على صحته ونظامه الغذائي السليم. الغينيا بيج أسنانه مفتوحة الجذور ودائمة النمو، وطبيعي إنه يقضي معظم اليوم بياكل أو بيعض حاجات ناشفة عشان يحافظ على أسنانه في الطول المناسب الي تقدر من خلاله تقوم بوظيفتها بشكل سليم.

أسنان الغينيا بيج العناية والفحص والأمراض والسلوك
موضوع مهم لكل مربي 👇

أسنان الغينيا بيج مؤشر هام جدا على صحته ونظامه الغذائي السليم. الغينيا بيج أسنانه مفتوحة الجذور ودائمة النمو، وطبيعي إنه يقضي معظم اليوم بياكل أو بيعض حاجات ناشفة ع....

21/01/2024

لما حد يقولك ايه ده وتقوله غينيا بيج
بيكون السؤال التقليدي .. يعني ايه؟!

غينيا بيج يعني تقريبا كل الحيوانات في حيوان واحد أليف
ازاي برده ...

● يعني حيوان كل واحد فيه ليه شخصية مختلفة تمامااا عن التانية .. تلاقي واحد بيحب اكلة معينة الباقيين أول ما يشوفوها يجروا بعيد عنها .. وتلاقي واحد فضولي وأنت مش موجود يقعد يتصنت على جيرانه .. وتلاقي واحد زنان ما يسكتش غير لما تجيله وتشوف عايز منك ايه .. وتلاقي واحد غلبان عمره ما ينادي عليك ويفضل واقف في صمت لغاية ما تأخد بالك منه .. وتلاقي واحد متضايق عشان انت النهاردة ما عبرتهوش وما لعبتش معاه او مسحت على شعره

● يعني عندك عصافير مش بتطير .. هيصوصوا ويصفروا ويعملوا فيبريش موبايل وينطوا وهما بيجروا ويعملوا اصوات ظريفة ويجروا زي المجانين من فرحتهم بمكانهم

● يعني عندك حيوان مخلص جدا لبيته لدرجة انك ممكن تتطلعه يلعب تلاقيه بيتشعبط على قفصه من برة وعايز يدخل مكانه اللي هو مطمن ومستريح فيه

● يعني لما بيلعب في مكان واسع وانت قاعد جنبه هتتفاجئ إنك مربي معزة جبلية وفجأة تلاقيه بقى على كتفك

● يعني هتلاقيه وهو بيلعب بيعمل صوت يشبه الزغطة أو الحمار الوحشي ويرمي نفسه في الهواء ويتقلب على الأرض وهو مبسوط أوي

● يعني كأن عندك قطة ولازم كل اسبوعين تقصر ضوافره عشان ما تتعورش بالغلط
وعلى ذكر القطط هما هيصحوك من النوم من كتر الصفير ومش هيسكتوا غير لما تشبعهم 🍏

● يعني حيوان يوم ما يمرض عايزك تفضل جنبه وتاخده على حجرك ويفضل معاك على سريرك .. المهم تبقى جنبه حتى لو بيموت هيهرب ليك

● وعليهم ندالة لطيفة جدا .. يعني اول ما تدخل عليهم تحسهم عايزين يحضنوك من الفرحة والظأططة اللي هما فيها ومجرد ما تحط لهم الأكلة اللي مستنينها ولا كأنهم يعرفوك ولا يردوا عليك ويروحوا بعدها في 7 نومة

● يعني حيوان بيشيل مسئولية نفسه من لحظة الولادة وجميل في كل حالاته .. خفة دم ونزاهة وتعاون

● يعني يوم ما تديله وسائل الراحة تلاقيه عمل لنفسه سرير ومخدة أو كهف صغير وينام على جنبه .. آخر انبساط وسعادة

● يعني يوم ما يحب صاحبه أوي يفضل يلحس فيه زي القطط والكلاب ويوم ما يخاف يجري يستخبى وراه

لسة في حد مش عارف يعني ايه
Guinea Pig Owners Club Egypt

12/01/2024

الغينيا بيج ممكن يتحمل البرودة البسيطة في بداية الشتاء، لكن مايقدرش يتحمل درجات الحرارة المنخفضة. معطفه الوبري الكثيف مش بيغطي أطرافه ومش كفاية لحمايته من شدة البرد. عشان كده لازم تعرف إزاي تحمي الغينيا بيج من انخفاض درجة الحرارة وإزاي تتعامل مع الأمراض المحتملة في الشتاء.

الموضوع كامل على الموقع

الغينيا بيج ممكن يتحمل البرودة البسيطة في بداية الشتاء، لكنه مايقدرش يتحمل درجات الحرارة المنخفضة. معطفه الوبري الكثيف مش بيغطي أطرافه ومش كفاية لحمايته من شدة الب....

10/01/2024

الجو بقى برد على الغينيا يج 🥶
دي نصائح سريعة نأخد بالنا منها خلال الشتاء:

- الغينيا بيج ما يفضلش لوحده في الشتاء لازم شريك معاه
- الغينيا بيج الصغيرين تحت سن 5 شهور ضروري تجهز لهم فرش صوف أو أكياس صوف للنوم
- الغينيا بيج ما يخرجش من البيت في الشتاء ومايتعرضش لتيار هواء مباشر
- يفضل نجيب الغينيا بيج قبل الشتاء أو بعده ونتجنب الشتاء
- الغينيا بيج لو نزلت الحرارة عن 15 درجة لازم نغطي الأقفاص ببطانية صوف أو مشمع تقيل ونسيب وجه واحد من القفص مكشوف عشان تغيير الهواء
- الفرش في الشتاء ماينفعش يكون مبلول ولا رطب
- الميه يفضل ماتكونش في أطباق عشان ماتدلقش ويجيلهم برد

ماتخليش النصائح تقف عندك وابعتهم لغيرك

08/01/2024

الميه جزء أساسي من النظام الغذائي، ولازم نغيرها وننظف الإزازة باستمرار عشان مايكونش فيها بكتيريا، وماينفعش يتضاف عليها فيتامينات أو أدوية.

الغينيا بيج من غير الميه معرضين لأمراض الجهاز البولي والجفاف وصحتهم بتتأثر حتى لو شكلهم طبيعي.

الميه لا غنى عنها للـ

06/11/2023

برجاء العلم أني فقدت الدخول على الصفحة الرئيسية منذ 12/2022 بعد تعرض حسابي الشخصي للتهكير وتم إغلاق حسابي الشخصي لحماية البيانات لكن لم اتمكن من استرداده من إدارة فيسبوك، لذلك تم إنشاء صفحة جديدة استجابة لطلب بعض المتابعين حتى استمر في توفير المعلومات التي يحتاجها المربيين وتقديم المساعدة البيطرية في علاج أمراض الغينيا بيج.

الصفحة السابقة لا زالت مفتوحة لكن لا تصلني أي إشعارات أو رسائل منها، ولا يزال بإمكانكم الاستفادة من محتواها
https://m.facebook.com/guineapig.eg

الآن استقبل رسائلكم واستفساراتكم من خلال الصفحة الجديدة وتعليقات الموقع فقط، وأحاول الرد عليها كلها في أقرب وقت ممكن لكن يمنعني ضيق الوقت.

مستمرين في دعم هواية تربية الغينيا بيج
المصدر العربي الأول والوحيد الذي يوفر معلومات علمية وخبرة عملية
ويصحح المعلومات الخاطئة المنتشرة عن تربية الغينيا بيج

شكراً لدعمكم 🌹

هدفنا ننشر ثقافة تربية الغينيا بيج على أسس علمية سليمة