17/05/2022
منقول من شركة ميرا بخصوص الدراى المستورد
بصفتنا شركة في مجال الاستيراد للدراي فود ( وكيل ميرا في مصر والشرق الأوسط), وفي نفس الوقت نصنع منتج محلي في مصنعنا بخبرات مصرية وأجنبية, حبينا نوضح رأينا في اللى بيحصل في مجالنا والرد على أكثر اسئلة شائعة اليومين دول, لأننا شايفين إن دا واجبنا تجاهكم :- 👇
- هل المستورد مش هينزل تاني ؟
طبعاً قصة الإعتمادات تكاد تكون وقفت الاستيراد في مجالنا تماما, لأننا كنا زمان لما بنستورد بناخد موافقة الهيئة العامة للخدمات البيطرية وندفع للمصنع الخارجي ويبعت لنا المنتجات, دلوقتي محتاجين علشان ندفع له نفتح اعتماد, وعلشان نفتح اعتماد بنقدم طلب للبنك والبنك بيبعت للبنك المركزي للموافقةوبندخل طابور, (وطبعا احنا كمستوردين للنوع دا من السلع أكيد بنكون آخر الطابور).
- هل لو نزل تاني ( إن شاء الله) سعره هيزيد ؟
آه طبعا لأن فيه عاملين جدد حصلوا, أولا: زيادة سعر العملة, ثانيا : تكلفة الإعتمادات المستندية
- هل فيه بدائل في السوق المصري؟
فيه اكتر من مصنع بيشتغلوا في التصنيع بيقدموا للسوق أكثر من منتج زي : ( Migma - happy tails - Alpha- showline -SMAX- Canido-Don canino- Bungee - Pioneer- Vita Max - petsiko - Barchen - Orgo - STEPO - Origin - DRAGO -groovy - Harley - fipco - scerting - pawer - PITES - La Reine pet food - pezo - Petadore - allegra - Casita - ROYAL CAT - DOODZY - prime )
- هل المنتجات دي في نفس جودة المستورد ؟
والله المصانع كلها بتحاول تعمل ده, ولكن في النهاية لازم يكون عندنا صراحة ونقول ان فيه فرق خبرة عند المستورد لصالحهم, وبردو نعترف ان التصنيع المحلي وصل لجودة معقولة في الزمن القصير ده, يستحق الشكر عليها ( دي شهادة لكل المصنعين المحليين مش بس احنا ) .
- انا بخاف من (العك) المصري وصراحة مش عايز اجرب المنتج المصري, اعمل إيه ؟
حقك طبعا, ولكن اللي ننصح بيه هات عبوة جرب والنتيجة مش هتطلع بره 3 سيناريوهات 👇
1- عدم قبول ( مخسرتش حاجة غير سعر العبوة الصغيرة) .
2- أليفك جاله إسهال ( وده بالنسبة للحيوانات الحساسة عادي عند تغيير الأكل, ويا إما تنقل للأكل تدريجي, يا إما توقفه )
3- أليفك أكله بالفعل ومفيش مشاكل ( ابتدي لاحظ الاخراج وحالته الصحية وصحته العامة )
في النهاية محدش من المصنعين هيحط سم في الأكل وينزله في عبوة, ومحدش قاصد أليفك انت بالأخص علشان يتعبه, اللى صنع المنتج اجتهد يعمل حاجة (من وجهة نظره هي الأفضل) علشان يعرف يبيعها, ومستحيل يحط فيها حاجة تضر الحيوان.
✨ وفي نهاية الكلام, رجاء خاص من جميع عملائنا اللي بنكن لهم كل الإحترام والتقدير , وجميع المربيين للحيوانات الأليفة :-
- لو بتأكل مستورد ومُصر عليه, اصبر ان شاء الله الدنيا هتفك وهيدخل تاني
- لو ناوي تجرب المصري, جرب وماتخافش, ولو معجبكش جرب نوع تاني, فيه أكتر من نوع في السوق ( وان شاء الله حاجة فيهم هتظبط معاك)
واللى ميعجبكش وعايز تنتقده , انتقده نقد بناء وعرفه غلطه فين, واصبر عليه , لأن دا قريبك او صاحبك او ابن بلدك اللى بيحاول وتعبان على قد ما بيقدر , او سيبه وجرب نوع تاني زي ما بيحصل مع المنتجات المستوردة لما أليفك مابيحبهاش مابتجيبهاش تاني,
بس بعد اذنكم بلااااش الكلام بتاع ( المنتج المصري سيء والتعميم , والمنتج المصري بيضر الأليف) هو فيه حد في الدنيا يا جماعة هيعمل مصنع علشان ينتج منتج علشان يضر أليفك أنت أو يموته ؟!!!!
