تاكسي أكتوبر

30/06/2017

نصيحة للمسافرين الساحل

مهم جداً
copied
تحذيرات بخصوص طريق الساحل الشمالى :

١- ياريت كل اللى طالع يتحرك الصبح بنسبة كبيرة جدا لو اتحركت بليل وانشغلت باى حاجة لمدة ثانية هتحصل كارثة بعد الشر

٢- مفيش اى عمدان نور على الطريق بالكامل فى الاتجاهين والعواكس متركبتش كلها لسه فتقريبا مفيش اى نور غير العربيات

٣- الحارات مش مكملة للاخر بمعنى انك هتكون ماشى فى الحارة وفاجأة هتلاقيها خلصت يعنى فى اخرها هتقابل ان الطريق بيضيق ومفيش حارات وانت بتجرى او فى تحويلة او الخطوط مره واحده هتتمسح فهتكون تايه

٤- كل ال U turn لسه الناس مش عارفه اماكنها فين ومعظمهم مفهومش علامات فهتكون ماشى وتلاقى مرة واحدة الناس بتلف قدامك عادى لانت ولا هم عارفين مين صح ومين غلط

٥- الطريق مرتفع وفى اماكن متقفلتش لسه فلو حصل لقدر الله حاجة حرفيا العربية هتقع من فوق جبل

٦- ناس كتير اوى اوى هتتفاجئ بالطريق ده ومحدش لسه حافظه فتوقع اى غلطة من اى حد

٧- مداخل القرى اماكنها مش معروفة مرة واحد هتلاقى اللى قدامك وقف علشان يلحقها او قرر يرجع بضهره

٨- محدش يطلع على الطريق ده صبح او بليل وهو مش فى كامل وعيه

ربنا يستر طريقكم وطريقنا اجمعين ..

16/01/2017

وفر في إستهلاك البنزين

فاضيين 5 دقايق ؟! طيب بص كدة .. أنت تعرف إنك ممكن توفر في إستهلاكك للبنزين حوالي 37% ولكن للأسف ناس كتير مننا بتتعامل مع العربية بشكل عشوائي رغم إنك ممكن تتعامل معاها بنفس الطريقة المعتادة ولكن ببعض الحاجات اللي تاخد بالك منها ده لو عايز توفر في فلوسك شوية !! وهو ده بقي موضوعنا أنهاردة عن إنك أزاي تقلل من أستهلاك البنزين في عربيتك وإيه هي أفضل الطرق اللي بيها ممكن أستهلك أقل كمية بنزين ؟! تعالوا نعرف مع بعض ..
=======================
أول حاجة وأهم حاجة هو ضغط الهوا في الكاوتشات بتاعة عربيتك والعامل ده هو أول وأهم عامل ممكن يخلي العربية تسحب بنزين بشكل أعلي من معدلها بحوالي 6% وموضوع ضغط الهوا ده يفضل إنك تزود هوا للكاوتشات بشكل أعلي شوية عن العادي يعني ميزيدش عن 5ر0 بار عن القيمة المقررة لكاوتشات عربيتك.
=======================
تاني حاجة يمكن ناس كتير متعرفش عنها حاجة إن عدم صيانتك للعربية أو الصيانة الضعيفة للعربية يخلي الموتور يسحب بنزين بشكل أعلي وبنسبة من 10 لـ 20% تقريباّ عشان الموتور يغطي العيب اللي فيه يعني مثلاّ عندك عيب في حساس الأكسجين وعالجته أنت كدة من غير ما تحس بتوفر في البنزين تقريباّ ما لا يقل عن 40% بدون مبالغة.
=======================
تالت حاجة برضو مهمة جداّ نوع الزيت اللي بتحطه في الموتور بيبقي ليه عامل كبير جداّ في إنه يوفرلك بنزين لان كل ما كان الزيت نضيف ولزوجته كويسة يخلي الأجزاء الداخلية للموتور تشتغل بسهولة ومتسحبش بنزين.
=======================
أنت عارف إنك لما الصبح بتنزل وتفضل مدور العربية علي السلانسيه أنت كدة بتسحب بنزين بمعدل 0 كيلو للتر الواحد يعني كل 0 كيلو الموتور بيسحب لتر بنزين !! تخيل .. الصح بقي إنك لما تنزل الصبح دور عربيتك وهي دقيقة واحدة بس اللي ممكن نقول إنك بتسخن الموتور فيها وتبدأ بعد كدة تتحرك ونصيحة للناس اللي أول ما بتتحرك بالعربية بتقوم قارصة أنت كدة بتخلي الموتور يسحب بنزين ضعفين معدله يعني حوالي 35% أعلي من المعدل الطبيعي.
=======================
- أنت تعرف إن مثبت السرعة وأنت علي طريق السفر بيوفرلك مش أقل من 14% من نسبة أستهلاك العربية للبنزين.
- أنت تعرف إنك لما تزود سرعتك من 100 كم لـ 140 كم إن أستهلاك البنزين بيزيد بنسبة 30%.
- أنت تعرف إنك لما بتقلل سرعتك من 100 كم لـ 90 كم أنت بتقلل أستهلاك البنزين لحوالي 15%.
- أنت تعرف إن الوقت اللي هتوفره لما بتسوق بسرعة 140 كم مقارنةّ بسرعة 110 كم هما دقيقتين بس !!
- أنت تعرف إنك وأنت ماشي علي طريق السفر مثلاّ وفاتح الشبابيك بتاعة العربية في الحالة دي إنت مفيش فرق بينك وبين اللي مشغل التكييف بظبط لأن بدخول الهوا للعربية بيتقلها وبيزود مقاومة الموتور وجسم العربية للهوا فا بالتالي الموتور بيسحب بنزين أعلي من معدله عشان يعوض وتقدر يواجه الهوا !!
- طب أنت تعرف إن كل 45 كجم زيادة في العربية سواءّ بقي شخص أو أي حاجة بتتحط في العربية ده بيزود أستهلاك البنزين بنسبة 3%.
- طب أنت تعرف إن يفضل إنك متسيبش تنك البنزين يقل عن النص عشان متسيبش مساحة كبيرة للبنزين إنه يتبخر بسرعة بحيث إنه بيتفاعل مع الهوا اللي جوة التنك.
- فلاتر العربية سواءّ هوا أو بنزين وتغيير البوجيهات في مواعيدها كل ده بيظبط الأستهلاك.

05/01/2017

أعلنت شركة إي فايناس وهي الشركة المنفذة لكارت البنزين الذكي أنه تم تفعيل خدمة الشركة الخاص بحصول المواطنين على الكارت الذكي من خلال إرسال رسالة SMS تحتوى على رقم الموتور الخاص بالسيارة والشاسية وإدارة المرور التابع لها على رقم 4555.
بعد ذلك يتلقى المواطن على الفور رقم الكارت الذكي الخاص به ومكان تواجد هذا الكارت وكيفية الحصول عليه أو التوصيل ديلفري نظير أجر رمزي يدفعه المواطن

اخبار - سياسة - ترفيه - فن - رياضة - حوادث - تكنولوجيا - اقتصاد - فيديو - صحة - أسرة

13/12/2016

11/12/2016

حبيبى و صديقى سواق التاكسى كلمتين يا ريت تحطهم حلقة فى ودنك بس يا رب تقرا لحد الاخر
كلنا عارفين ان الشغل قل كتيير اوى الفترة الى فاتت و اكيد حاسين بالخطر
المشكلة اننا مبنعملش حاجة و مش عاوزين نتغير ...طيب نعمل ايه؟؟؟!!!!!
ببساطة نشوف ايه الى نجح الشركات فى انها تاخد الزبون مننا و نحاول نعمل كدة و كمان احنا عندنا مزايا كتير اكتر منهم
انت بتأدى خدمة يعنى انت و عربيتك السلعة الى بيدفع الزبون الفلوس فيها طيب ترضى انك تشترى سلعة بايظة و انت قدامك البديل؟؟؟؟ اكيد لأ
يعنى لازم تكون ذوق فى التعامل وكمان مش عصبى
شغل العداد ومتسرقش الزبون واقولك كمان مدققش اوى فى الفكة يعنى لو طلع العداد ٢٢جنيه مثلا مفهاش حاجة لما تقوله خليها عشرين بس و الله حتلاقى الى حيعوضك
العربية نظيفة وريحتها حلوة
طيب نمسك واحدة واحدة
الذوق فى التعامل (يعنى عامل الناس بخلق حسن)
١-اول ميركب الزبون (ابتسامة واهلا وسهلا بحضرتك)
٢-وهو نازل بابتسامة كدة (شرفتنى حضرتك)
٣-وهو راكب معاك و دخلت مكان مش عاجبك(خلاص انت دخلت)مفهاش حاجة لو قلتله (المكان الى يعجب حضرتك)خليها حلوة من عندك
٤-حترفض زبون لاى سبب من الاسباب ارجوك بلاش تلوح بايدك فى وشه والله مفهاش اى حاجة لو اعتذرت وقلت (اسف حضرتك اصلى حسلم العربية )مش حتاخد ثانية
٥-لو ست اوعيلة او اطفال راكبه معاك ارجوك يا ريت مدخنش
طيب لو راجل مفهاش حاجة لو قلت (لو مش حيضايقك بعد اذنك ممكن ادخن)ويا ريت مدخنش برده
٦-ارجوك بلاش التف والنف و الحاجات دى و الزبون قاعد معاك استنى لما ينزل و تف زى مانت عاوز(بس مش عليه يعنى اقصد لما تبقى فاضى)
٧-يا ريت متركبش زبون تانى لو حد معاك ولو اضطريت (والله مفهاش حاجة ابدا لو قلت للزبون (حستأذنك لو مش حيضايقك اخد حد فى سكتى )صدقنى مش حيقول حاجة
٨-الزبون ملهوش دعوة بمغامراتك و لا مشاكلك فيا ريت مش لازم تتكلم معاه فى كدة و لا حتى تتكلم فى الموبيل قدامه فى الكلام دا (خلى الموبيل يكون فى اضيق الحدود وقت ميكون راكب معاك زبون و فى الضرورة بس)
٩-بلاش العصبية الى ملهاش لازمة و الشتيمة يعنى مش كل لما حد يقفل عليك و لا يلمسك حتى محصلش حاجة يعنى عديها انت ماشى على طريق
١٠-ارجوك بلاش الكاسيت الى صوته عالى دا فى اغانى ملهاش معنى صدقنى الناس بتتضايق و دا اكل عيشك برده
١١-مفهاش حاجة لو لقيت واحدة ست بتشاورلك و معاها حاجات تقيلة لو نزلت و حطيتها فى شنطة العربية بنفسك
١٢-بلاش تتنك على الناس (الزبون دا نعمة ربنا بعتهالك علشان تسترزق منها فمتتنكش عليه و لو لقيت زبون سقيل معلش استحمل شوية توصيلة و تعدى و اهو رزق برده)
ارجوك شغل العداد و متسرقش الزبون لو انت طيرت زبون و قلت مش حيركب معايا تانى طيب مهو غيرك حيطير واحد كان ممكن يركب معاك (مش كدة و لا ايه؟؟)يبقى نخاف على اكل عيشنا
يا ريت عربيتك تكون نظيفة و ريحتها حلوة على طول مفهاش حاجة لو مسحتها بايدك قبل متتوكل على الله و نضفتها من جوة مش حتاخد من وقتك ١٠دقايق
يا ريت تقول الكلام دا لكل السواقين الى حواليك و الى ملوش فى النت قوله و حاول تفهمه و لو عاوز تتبعها و توزعها على زمايلك يا ريت علشان تبقى فئة سواقين التاكسى من اكتر الناس المحترمة فى مصر (و الله ممكن و الله ممكن و الله ممكن)
منقول للافاده

23/11/2016

/

البوست ده هيبقي مرجع للمحلات الي عامله عروض في البلاك فرايدي

⚠ لو تعرف اي محل او مكان عامل تخفيضات في اليوم ده قول عليه في الكومنتات .

⬅ ملابس / مكياج / الكترونيات / اثاث الخ الخ الخ

⛔ ( تحديث ) :
(مطاعم) بروستد الافندي / 30% خصم / علي جميع المنيو من 3 الي 5 مساءا
(ملابس) Centrepoint / تخفيضات تصل الي 50% خصم
(الكترونيات) iPlus Egypt / تخفيضات تصل الي 30% خصم علي بعض المنتجات
(احذيه) Hush Puppies / تخفيضات تصل الي 50% خصم
(احذيه) CAT / تخفيضات تصل الي 50% خصم
(ملابس) Adidas kids / تخفيضات تصل الي 20% خصم
(مراتب) Spring Air / تخفيضات تصل الي 25% علي بعض المنتجات المختاره
(اثاث) / Divano / تخفيضات تصل الي 35% خصم علي بعض المنتجات
(اثاث) / Asia Furniture / تخفيضات تصل الي 10% علي بعض المنتجات
(السيراميك) / MAZLOUM / تخفيضات تصل الي 80% خصم
(اثاث) / Castello / تخفيضات تصل الي 20% وكوبونات تخفيض اضافيه
(اثاث) / Darac Paints / تخفيضات تصل الي 75% خصم علي بعض المنتجات
(مطابخ) / Dekor Haus / تخفيضات تصل الي 50% علي المطابخ الالماني و الطقعه الاخيره في المعروضات الاخري
(اثاث) / TAGOURY'S HOUSE / تخفيضات تصل الي 50% علي بعض المنتجات
(مفروشات) / Comfort Home Collection / تخفيضات تصل الي 40% علي نوع معين
(اثاث) / Zahran Furniture / تخفيضات تصل الي 20%
vero moda
only
mazaya
H&M
Yves
بريشكا
بي تك عامل تقسيط لمدة سنه بدون فوايد والحجز من الصفحة والاستلام يوم الجمعه
Flomar
The body shop
Calube
Crocs. Peak
Dream2000mobile

⬅ منقول ( موقع تجربة )

12/11/2016

جميع حيل سرقة السيارات فى مصر وطرق التعامل معها
هانتكلم على الحيل والوسائل المبتكرة , وبعد كدة ندخل في الطرق اللي أصبحت للأسف تقليدية

1- أول ماتدور العربية وتيجي تتحرك بيها تسمع صوت حاجة معدنية مكسورة
الحقيقة ان بيكون الحرامي رابط حديدة أو ماسورة في العربية من ورا ... بحيث تفاجأ بيها وتنزل تشوف فيه إيه ...يدخل هو مكانك في غمضة عين ويسرق العربية وهي دايرة

الحل: أولاً ماتنزلش من العربية تحت أي ظرف من الظروف وانت سايب المفتاح جواها , لا تقوللي هاجيب حاجة من الكشك والعربية قدامي اهي ولا تقوللي المسافة قريبة وهاقدر الحق أي حاجة ... الحرامي بيسرق الكحل من العين ...وماتنساش ان دي مهنته وهو محترف فيها

ثانياً , الأصل في فن قيادة السيارات انك تلف لفة كاملة حوالين العربية قبل ماتركبها ... مش هاتاخد منك 10 ثواني , خلالها هاتكتشف لو حد حكهالك أو أخدت خبطة وهي واقفة ... أو لو فيه كاوتش نايم , أو لو حد عامللك فيها فخ علشان يسرقك أول ماتتحرك , كمان علشان تتأكد ان مافيش شخص غلبان نايم وراها , أو قطة كانت داخلة عند الكاوتش تتدفى في البرد (معظم القطط المصرية بقت عارفة شغلها أول ماتسمع باب العربية بيتفتح ..وتسيبهالك من سكات)

ثالثاً: لو حسيت بالخطر في حالة نزولك من العربية استمر في السير بيها لأقرب مكان آمن ممكن تنزل تشوف إيه اللي بيحصل (في حالة لو ماعملتش أولاً وثانياً ونسيت , عادي كلنا بننسى)

حيلة الورقة اللي على الزجاج الخلفي
أول ماتيجي تركب العربية , وتتحرك بيها تلاقي ورقة على الزجاج الخلفي مانعة للرؤية ... تيجي تنزل من العربية تشيلها تلاقي الحرامي عمل معاك نفس اللي حصل في الحيلة السابقة

الحل: نفس الحلول في الحيلة السابقة

3- حيلة البيض

وانت ماشي بالعربية تفاجأ ببيضة نيئة اترمت على الزجاج الأمامي أو الخلفي ... غالباً بتكون معدي تحت
كوبري أو فيه منطقة عالية في الطريق

بالطبع انت هنا مش قدام طفل بيلعب بالحاجات اللي جوة تلاجة أهله ... وبالتأكيد مافيش فرخة هاتطير على ارتفاعات عالية وكمان تبيض ..وبيضتها تقع فوق الزجاج الأمامي لعربيتك !!!

اللي بيحصل هو ان الحرامي بيكون عامل عصابة .. عيل يرمي بيضة من مكان مرتفع على الزجاج الأمامي ... تقوم انت تتخض قدام عنصر المفاجأة ... وبيكون الحل هو انك تركن على جنب علشان تمسح آثارها (حل سيئ) وده عز الطلب للحرامي اللي هايفاجئك علشان يسرق العربية ... أو انك تشغل مياه المساحات علشان تمسحها وانت ماشي (حل أسوأ ) ... لأن ساعتها الزجاج كله هايتحول إلى بياض بيض ني والرؤية هاتنعدم

الحل: استمر في القيادة لحد أقرب مكان آمن , وشيل آثار البيضة باستخدام فوطة جافة الأول بعد كدة صابون على طول ... بس الأهم من كدة انك تكون بعيد عن المكان ده تماماً وبعيد عن أي عربية بدأت تتبعك من مكان "قصف العربية بالبيضة" !!!

4- حيلة "التانك بيخر يا كابتن"

وانت ماشي في أمان الله تلاقي واد راكب عجلة أو موتوسيكل يقوللك "الحق التانك بيخر يا كابتن" , طبعاً انت تتفزع وتحس ان فيه مصيبة حصلت ... تقوم نازل جري تشوف فيه إيه ... وده عز الطلب بالنسبة للحرامي

الحل: سيبك من الواد العبيط ده (مع أخذك في الاعتبار ان 20% ممكن يكون كلامه صح) ... استمر في القيادة ...حتى لو التانك بيخر هاينزل قد إيه ؟؟ وهل فعلاً ظهرلك على مؤشر البنزين انه بينقص بسرعة ؟؟ ... في كلتا الحالتين استمر في القيادة من غير أي نزول من السيارة تماماً ... وابقى ادخل محطة بنزين شوف الحكاية , ده لو كان بيخر فعلاً

5- حيلة الطفل الرضيع اللي على جنب

ماشي في حالك تلاقي عربية طفل ... أو طفل رضيع ... أو عيل صغير بيعيط جوة سبت أو كاريكوت أو أي حاجة ممكن يتشال فيها عيل ... تركن على جنب (خصوصاً قلب البنات بيبقى حنين) يكون ده عز الطلب بالنسبة للحرامي

الحل: سيب أهل المنطقة هما اللي يتصرفوا ... الحالات دي لو كانت صحيحة بتكون حالات إنسانية ولها مساءلة قانونية وأفضل شئ يكون تحت ولاية أمر حد في نفس المنطقة اللي هو مفقود فيها , ده لو كان فعلاً طفل مفقود أو لقيط , أما في معظم الحالات بتكون مجرد فخ علشان الإيقاع بالضحايا

وانت ماشي عادي بتلاقي واحد اترمى على الأرض وعمال يصرخ , انت ياعم خبطتني , مش تفتح , انتوا ماعندكوش قلب ولا رحمة , هو اكمني غلبان يعني ماليش ضهر ولا تمن في البلد دي .... إلخ إلخ
انت طبعاً بتكون سرحان , لأنه بينقي ضحاياه من الناس السرحانة سواء في موبايل بيتكلم فيه أو في البنت اللطيفة اللي قاعدة جنبه أو أشياء أخرى كتير ... بس انت كذلك متأكد انك ماخبطتهوش (ساعات هو بيروح يخبط نفسه في العربية علشان تسمع صوت خبطة وتتخض) ... طالما انت قدام ربنا واثق من نفسك انك ماخبطتش حد , (ماتعيشيليش بقى جو انا ماخبطتهوش وهو غرقان في دمه متكوم على الأرض وإزاز عربيتك مكسور , احنا بنتكلم على واحد بيتلكك علشان يفتعل معاك خناقة وينزلك من العربية) , خد بعضك وامشي من سكات من غير قلق , وخليك بارد بشكل مستفز على غير العادة علشان مايحاولش يغضبك وينزلك من عربيتك تضربه ... ولو حصل بقى ونزلت من عربيتك (نسيت وكلنا بننسى) ...قول له تعال على القسم اعمللي محضر ... ساعتها هايفلفص منك وابو رجل مسلوخة ده اللي كان مرمي على الأرض دلوقتي هاتشوفه طلع يجري ولا زعيم السنافر !!

7- الشحات الرزل

واقف في إشارة , جالك شحات , وانت ماديتهوش حاجة , أو اديتله مثلاً نص جنيه ... هايقعد يبرطم ويقول كلام هرتلة , وبعدين يتف عليك أو على العربية (بيتعمد انها تكون على وشك , آسف لو كلامي ده قرف بعض الناس لكن ده بيحصل)

الحل: تعال على نفسك ونضف نفسك واحذر كل الحذر انك تنزل وراه تعمل أي حاجة ...إوع ينزلك من عربيتك خصوصاً انك هاتكون في قمة الغضب وهاتسيب مفاتيح عربيتك في الكونتاكت ... (ماينفعش هنا ننسى بالنسبة للناس اللي نسيت في الكام حيلة اللي فاتوا) , وحافظ على زجاج عربيتك مغلق قدر الإمكان

8- الموتوسيكل اللي بيخبط في الشنطة

ماشي لا ليك ولا عليك ... وفجأة تسمع طاخ بوم تش ... موتوسيكل خبط عربيتك من ورا , هاتلاقي الواد اللي راكب الموتوسيكل زي ماهو مش هايقع ولا هايتعور , وكمان هاتلاقي ان وراه حد عمال يزعق ويتخانق , إوع تنزل وتسيب عربيتك وكمان مفاتيحك , نصيحتي ليك ماتنزلش خالص

ليه ؟ أول حاجة خبطة الموتوسيكل من ورا بتكون مؤثرة في الإكصدام وده أمره سهل .. تاني حاجة المضرور بجد هو اللي كان راكب موتوسيكل ... تالت حاجة انت لو نزلت من عربيتك بيكون الموضوع عبارة عن عصابة والمرة دي مش بيتسحبوا ...المرة دي بيكون بالإكراه وعربية تانية قدامك بينزل منها ناس يتصرفوا معاك...رابع حاجة ماحدش هايخبطك من ورا ويكون هو الصح , القاعدة المرورية بتقول بغض النظر عن طريقة التوقف المفاجئ وأسبابه , القادم من الخلف هو المخطئ في حالة التصادم , يعني مايقعدش يبرطم يقوللك انت اللي وقفت مرة واحدة يا كابتشن والكلام الاهبل ده ...

الحل: خد بعضك وامشي من غير كلام كتير , عيش الجو المصري بتاع الحمدلله جات سليمة واللي ييجي في الريش بقشيش وحمدالله على سلامتك وتتعوض ان شاء الله , إكصدام العربية حتى لو راح بالكامل "وده احتمال مستبعد" أرخص بكتير من تمن العربية بحالها أو الفدية بتاعتها لو هما خاطفينها مؤقتاً

ملحوظة : الحيلة دي ممكن تتنفذ بعربية قديمة , خصوصاً لادا القديمة أو فيات 1300 أو بيجو 504 ... حاجة كدة ماتتأثرش بالخبطات وتصليحها كلها على بعضها بتلاتة جنيه ... هاتكون في مكان مش محتمل السرعة علشان تتخبط من ورا ...خلي المنطق يشتغل

9- البنوتة اللي مستنية الأوتوبيس في حتة مقطوعة

تيجي كدة ماشي في طريق فاضي وفجأة , في حتة مافيهاش مساكن ولا بيوت ولا شركات وتلاقي اللي واقفة كدة لحالها , قال يعني مستنية تاكسي أو مواصلة في المكان القاحل ده ... طبعاً قلبك الحنين وشهامتك يبدأوا ينقحوا عليك (قال يعني) .. وتركن على جنب و "تترجاها" انك توصلها
الباقي معروف ... هاتترجاها انها تاخد العربية بس وتسيبك سليم !!

الحل: ماتركبش حد ماتعرفهوش , وخصوصاً في أوقات الليل أو الأماكن الغير مسكونة , أو في مكان مش منطقي تواجد حد قدامه يقف يستنى مواصلة
وماتقولليش ماهو شكله نضيف وابن ناس (كل الناس ولاد ناس, التعبير ده مش صح أصلاً من الأول) ... أو (هي بنت والوقفة كدة خطر عليها) , لأنها هاتكون خطر عليك انت نفسك بعد كدة !!

ملحوظة: الحيلة دي مش لسرقة السيارات فقط , دي مستعملة لتهريب المخدرات من الكمائن عن طريق شنطة البنوتة اللطيفة اللي راكبة عربيتك دي !

10- الحقوني شاب اتحرش بيا

تلاقي واحدة راكبة عربية نص كم , وهي أصلاً ست أو بنت نص كم ... وفجأة تلاقيها عمالة تسبل عيونها , وتديك كلاكسات , وتلاغيك ... وطبعاً جينات الخيانة تبدأ تشتغل جواك وتلعب الخمر برأسك الأغبر ... أول ماتيجي تتجاوب معاها هاتنزلك من عربيتك , وغيرك هايركبها تحت تهديد السلاح !!
وساعات يكون رد فعلها لما تبدأ تتجاوب معاها انها تستغيث بالـ "مارة" اللي مش بيكونوا فعلاً مارة , بيكونوا جزء من العصابة في المكان الموعود , يتلموا عليك يرنوك علقة علشان عاكست سيدة بريئة ماشية في حالها , آه ياخلبوص !! ...وتفوق من العلقة دي على عربيتك ومحفظتك وموبايلك رايحين ... بصراحة في الموقف ده انت تستاهل , علشان كدة مش هاحط حل للحيلة دي !!

ندخل بقى في الطرق التقليدية للسرقة أثناء تحرك العربية

الطريقة الرئيسية بتكون في مكان شبه هادي , فيه مطب والطريق مش عريض قوي...عربية تظهرلك في المراية , بتقرب منك بسرعة عند مكان المطب وانت بتهدي , تقفل عليك من قدام على الشمال (لازم يكون على الشمال) ... ينزل منها اربع جتت طول بعرض معاهم أسلحة آلية (بتكون بالفعل متعمرة مش لعب أطفال) ... واحد منهم يفتح باب العربية ينزلك , أو يشاور عليك بالسلاح ويهددك لو كنت قافل السنترلوك علشان تفتحه , معظمنا شاف الفيديو الحزين بتاع سرقة عربية على طريق كورنيش شبرا , وفوجئ بسلبية الناس اللي كانوا معديين

الحل: في الطرق اللي انت ماشي عليها خلي عينك على الـ 3 مرايات , احفظ الناس اللي ماشية حواليك وماتسيبش عربية مشبوهة تجيلك من الشمال خصوصاً لو قربت على مطب , تجاوزها وتجاوز المطب بسرعة وتخلص منهم... لو حصل وقفلوا عليك ماتتوقفش وادخل في وش عربيتهم (غالباً بتكون كيا سيراتو ...ادخل ولا يهمك دي عربية ورق) وانطلق بعيداً بأقصى سرعة , ماتنزلش من عربيتك مهما كان التمن طول مانت قادر تتحرك بيها , أما لو فعلاً حصل ووقفوك وماكانش فيه مخرج بالعربية , قدامك حل من اتنين : يا تدافع عن مالك أو أهلك لو راكبين معاك العربية حتى لو هايقتلوك , وزي ما النبي عليه الصلاة والسلام قال من قتل دون ماله فهو شهيد . ومن قتل دون دينه فهو شهيد . ومن قتل دون دمه فهو شهيد ، ومن قتل دون أهله فهو شهيد
الراوي: سعيد بن زيد المحدث:الترمذي - المصدر: سنن الترمذي - الصفحة أو الرقم: 1421
خلاصة حكم المحدث: حسن

, أو الحل التاني انك تنصرف من سكات وتديهم العربية ... ساعتها هاينفعك جداً جهاز التحكم عن بعد وتتبع السيارة (لو كنت مركبه) ...ونصيحتي تستعمله بعد ربع ساعة , مايكونوش قريبين منك علشان ينتقموا منك لو وقفت العربية عن بعد وانت لسة في متناول أيديهم

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ودلوقتي بقى دورك انك تنشر قدر استطاعتك عشان الناس تستفيد
يمكن تكون سبب في ان واحد ينقذ عربيته من السرقة بسببك

07/11/2016

مطعم نور للفول والطعمية بـ٦ أكتوبر

كل التقدير والاحترام والدعاء بالرزق الوفير


#اكتوبر #شير

تصوير Tahiya Elsherif

30/10/2016

كل اللى بيستخدم كوبرى اكتوبر ياخد باله انه بدا من اليوم تطبيق حد السرعه القصوى لكل اجزاء كوبرى اكتوبر كالاتى:
من قبل رمسيس السرعة المقررة 60
من عند غمرة السرعة المقررة 40
من بعد نزلة صلاح سالم السرعة المقررة 60
- وللعلم ايضا كل الكاميرات اللى تم تركيبها فى الاشارات وعلى الدائرى وغيره لتصوير المخالفات ولحد السرعه بدات فى العمل بالكامل من امس - خدوا بالكم علشان موش ناقصه غرامات وربنا يوصل كل واحد لبيته سالم
تم تزويد الدائري برادارات جديدة في الأماكن التالية
1- أمام اكاديمية الشرطة
٢- أمام اشارة كريدي اجريكول
3- بين طريق ٩٠ و اكاديمية الشرطة
٤ - قبل معرض مرسيدس
5- بعد معرض مرسيدس
6- أمام برج سما (المقطم )
7- أمام المدرسة البريطانية في اتجاه التجمع
8- أمام كارفور (المقطم )
9- أمام كادبوري واحد في كل اتجاه (المقطم)
والردار مزود و موجهة بتقنيات الأشعة تحت الحمراء "infraread" لقراءة اللوحات الذكية وتصوير السيارات بدون لوحات او مزيفة ويوجد بالرادار كاميرتين و سينسور حركة أجسام وسوف يتم تحصيل المخالفات فى أقرب كمين او عند تجديد الرخصة.
ومخالفة الرادار تكلفك 300جنيه والسرعة المقررة هي 90 كيلو/ الساعة
خلوا بالكم ..
متنساش تعمل شير علشان غيرك ياخد باله