28/09/2023
World Rabies Day!
السعار بيعتبر من أخطر الأمراض المسببة للوفاة في العالم للبشر والكلاب لكن بالرغم من ده ممكن الوقاية منه بنسبة 100%.👌
عشان كده مهم إنك تتأكد انك تطعم كلبك أو قطك (حتى لو مبيخرجش من البيت) ضد مرض السعار بصورة منتظمة عشان تحميه وتحمي نفسك من الخطر ده.
معاً لعالم خالي من السعار!🥰
للحجز والاستفسارات كلمنا على أرقام العيادة
01550704353 - 03/5572951
*مرض السعار*
طيب الموضوع ده مهم، فخلينا نوَّضح كل حاجة..
- قطة أو كلب عضوا أو خربشوا حد.. أعمل إيه؟
= أولًا، وقبل أي حاجة حضرتك هتروح فورًا تغسل مكان الجرح ده بمية جارية وصابون لعدة دقايق وبعدين نرجع نسأل ونجاوب ونحكي عشان ديه حاجة مهمة جدًا جدًا (عشان فيروس السعار ده مميت آه بس لو هو لسه بره فهو فيروس ضعيف وشوية مية وصابون هيقضوا عليه!)
- طيب الخطر من عضة الكلاب بس؟
= لأ! ممكن كلب أو قطة، فار، حصان أو حمار! أي حيوان mammal لكن الطيور والزواحف ملهومش في القصة ديه.
الخطر من العضة بيتضمن شقين أول حاجة مرض السعار وتاني حاجة مرض التيتانوس.
- طيب أروح أخد مصل ضد الحاجتين دول؟
= لأ مش شرط وكل حالة وليها حيثياتها.
أولًا، حقنة التيتانوس:
ديه مبتتاخدش في كل الحالات، لازم يكون الجرح غائر وله عمق نسبيًا. طب اشمعنى؟ عشان التيتانوس ده بيسببه بكتيريا لا-هوائية، لازم تلاقي البيئة المناسبة ( جرح عميق، مجازًا ممكن نقول مفيهوش هوا) عشان تنشط وتسبب العدوى.
- طيب مصل السعار؟
= مبدئيًا كده لو الكلب أو القطة دول بتوعنا ومتأكدين -وحط تحت متأكدين مليون خط- أنهم أخدوا تطعيم السعار المستورد في خلال آخر سنة (مش واخده من بنت عمتي وهي طعمته، وأصل كان عند صاحبي ومطعمه من 6 سنين ومش عارف ودفتر التطعيمات ضاع)
في الحالة ديه اللي احنا متأكدين فيها.. الحيوان بيكون عنده أجسام مناعية ضد مرض السعار بحيث لو حتى لو هو اتعرض للعدوى بطريقة ما، فهو مش هيصاب ومش هينقلك حاجة وأنت في السليم.
- طيب، لو حيوان من الشارع أو في البيت بس مش متطعم أو مش بياخد الجرعات التنشيطية أو .. أو
= حضرتك هتتوجه فورًا لأقرب مستشفى حكومي بيوفر المصل وتاخده – ومعاك 24 ساعة من وقت الإصابة أقصى حاجة-.
المصل بيكون عبارة عن 5 حقن بيتاخدوا بتوقيت وintervals معينة، المستشفى هتوضحهولك وهتديك كارت فيه التواريخ.
- المكان فين في اسكندرية؟
= مستشفى شرق المدينة، مستشفى رأس التين ، ومستشفى أبوقير العام.
- طيب أصل القطة بتاعتي وفي البيت ومش بتخرج ومولودة عندي وكويسة ومش واخدة التطعيم.. أنا كده تمام صح؟
= لأ! حضرتك هتروح تاخد المصل وتروح برضه تطعم القطة تطعيم السعار المستورد عند دكتور بيطري.
- ليه؟
= عشان انت متضمنش 100% انها عمرها ما اتعرضت للعدوى من فار في البلكونة، أو على السلم. عمرها ما جريت بره لما فتحت باب الشقة؟ مفيش مرة القط كان عايز يتجوز ونط من البلكونة عند الجيران أو هرب للمنوّر وقعد كام ساعة على ما لقيته؟ مفيش مرة وانت بتمشي الكلب في الشارع قطة خربشته أو نزل تحت عربية بيجري ورا حاجة وانت مش شايفه؟
لو تقدر تجاوب لأ على الأسئلة ديه وانت متأكد ومستعد تخاطر بحياته وحياتك قصاد تمن تطعيم لأليفك مرة في السنة، فتمام.
مرض السعار ده مرض قاتل وملهوش علاج ومفيهوش مجال للمخاطرة ولو حتى بنسبة 0.000001 %
ده مش مجال لإثارة الذعر إطلاقًا، بس حقيقي الوقاية منه أبسط ما تكون يعني، ودلوقتي فيه بلاد كتير Free of Rabies، وحاجة زي ديه المفروض نكون خلصنا كلام فيها من زمان.
- طيب هو لازم يعني التطيعم المستورد؟ وديه مش سبوبة ومفيش فرق؟
= الإجابة اللي أقدر أقولها وضميري مرتاح، إني في كل مرة كنت بأدي التطيعم المستورد، وبعد كده أسحب عينة دم من حيوان وأحلل نسبة الأجسام المضادة اللي اتكونت بتكون النسب كويسة وفعلًا شغالة والحيوان ده عنده مناعة.
- طيب أنا اتعضيت من حيوان مجهول ورحت أخدت الـ 5 حقن، وعشان أنا محظوظ زيادة اتعضيت تاني بعدها. أعمل إيه؟
= الموضوع بسيط لو ده حصل في خلال 5 سنين بعد الحقن ديه، فحضرتك مشكورًا هتروح تاخد جرعة تنشيطية من حقنتين بس، وانت كده هتكون تمام.
مننساش أن تطعيم السعار بالنسبة للأليف بيبدأ من عمر ٣ شهور وبيتكرر مرة سنويًا.
