مخالب النسر - عصام بركات05/11/2023
انت محاااااااامي 😀😀💪💜💜💛
- علي فكرة المحامين فلوسهم كلها حرام
= انت متاكد انه فلوسهم كلها
- ايوة متاااكد طبعا
= طيب انا هسالك سؤال ؟
لو حد طلب مني اعمله اعلام وراثه اتعابي هنا حرام ولا حلال
- لا حلال طبعا
= طيب لو عملت لحد صحه توقيع او تعاقد اتعابي حرام ولا حلال
- لا حلال طبعا
= طيب لو رفعت لزوجه قضية نفقه او حضانه اتعابي حرام ولا حلال
- لا حلال طبعا
= طيب لو رجل اعمال طلب مني اعمله اجراءات تسجيل شركه اتعابي حرام ولا حلال
- لا حلال طبعا
= طيب لو احد الموظفين وقع عليه جزاء ظلم
وطلب مني ارفع دعوي في مجلس الدوله اتعابي حرام ولا حلال
- لا طبعا حلال
= شوفت كام مره انت قولت حلال ازاي بقي بتقول إن كل فلوس المحامين حرام
وممكن نقول امثلة كثيرة جداا
- لا انا مكنتش اقصد الفلوس كلها انما اقصد مثلا نوع معين
=لا انت قولت فلوسهم كلها وعامه نوع ايه اللي انت تقصده طيب
- اقصد فلوس قضايا الجنايات زي القتل او او الضرب او السلاح او المخدرات
= انت متاكد انك تقصد النوع ده ؟
- ايوة متاكد جدااا انه فلوسهم حرام
= اولا لازم تبقي عارف إن المحامي مش وظيفته إن يطلع الناس براءة
انما هو مجرد ضمانه قضائية لمراقبة مدي تطبيق القانون والموازنة بين ادلة الاتهام او البراءة
وتوضيح الواقعه زي القاضي ايضا هدفه انه يحكم ويطبق القانون فالمحامي ملزم ببذل عناية وليس تحقيق غاية
= بالنسبة للقتل لازم تبقي عارف انه ايضا انواع وكل نوع ليه شروط واحكام
- لا انا اقصد إن لو جالك حد وقالك انا قتلت
= مش معني ان الشخص ده قتل فعلا او معترف يبقي كده مدافعش عنه
مثال : طيب لو حد قتل شخص بعربيته وانا دافعت عنه حرام حلال
- لا طبعا حلال
طيب لو حد قتل شخص دفاع عن النفس او واحده كانت بتتعرض للاغتصاب فقتلت المغتصب حرام ولا حلال
- لا حلال طبعا
= طيب لو عندكم ثأر مثلا واتقتل حد وانت اتهمت فيه ظلم
لانك من الاشخاص الكويسه في عيلتك وعلي الورق انت متهم لكن الحقيقة انت برئ
وانا دافعت عنك وقدرت اثبت الحقيقة هل هنا اتعابي حرام
- لا طبعا حلال
= شوفت بقي انك قولت انه حلال مع ان الجريمة قتل فلازم تفهم الاول
= حاجه كمان في السلاح مثلا
طيب لو انت ماشي في الشارع وشديت في الكلام مع ضابط مثلا
فلبسك قضية حيازة سلاح ودافعت انا عنك وطلعتك براءة هل اتعابي هنا حرام
- لا طبعا حلال ده انت انقذت واحد برئ من الظلم
= طيب لو انت مثلا حصل وانك غلطت واتمسكت مثلا بسيجارة مخدر
بس الضابط عملها ليك اتجار وممكن علشان سيجارة تاخد مؤبد
فانا دفعت عنك واثبت انه غرضها كان التعاطي فقط فخففت الحكم هل كده اتعابي حرام
- لا طبعا حلال لان مش معقول علشان سيجارة تاخد مؤبد بس انا اقصد لو كان تاجر مخدرات
= وانت عرفت منين انه تاجر مش لازم يبقي فيه ادلة وقرائن
ماهو مينفعش نحكم علشان التحريات بتقول كده اللي ماهي اللي اقوال مرسله
او علشان شهادة الضابط اللي ممكن تكون كيدية او غير صحيحه وفي حاجات كتير ممكن تتقال بس يطول شرحها
= طيب لو انت مثلا عملت خناقه وانت والشخص ده ضربتوا بعض بعصا
وجاء بقي الشخص ده فبرك تقرير طبي بانك شرحت بطنه وضربته بمطوة وكسرت دراعه
فانا دافعت عنك واثبت التناقض بتاع التقرير وكيدية الاتهامات هل اتعابي هنا حرام اني أثبت الحقيقة
- لا طبعا مش حرام
= اؤمال ازاي انت بتقول انه اتعابنا حرام ؟؟؟!!!
- لا يا عم مش حرام انا اللي كنت فاهم غلط
وده موضوع يطول شرحه ولكن ده رد باختصار
