زوتوبيا - zootopia

31/03/2023

للتبني ..

قط شيرازي زي قمر زي ما انتوا شايفين بيتطعم ديدان باستمرار وبياكل اكل بيت
بندور على متبني في اسوان يتقي ربنا فيه وياخد باله منه كويس

28/03/2023

مساء الخير أو صباح الخير حسب هتشوفوا البوست ده إمتى

للي ميعرفنيش، أنا طه عبد المحسن، دكتور بيطري وانسان بيحب الحيوانات وبيحاول يقدم اكبر قدر من المساعدة ممكن لأي حيوان خلال الكام السنة اللي هيقضيهم على الأرض والصفحة دي هتعتبر منصة تواصل لحالات إنقاذ حيوانات الشوارع على قد ما ربنا يقدرني.

أي حد تيجي قدامه حالة حيوان محتاج مساعدة طبية أو غيرها وشايف اني ممكن اقدر اساعد يكلمني انبوكس
أو على الرقم الموجود هنا ونتشارك في الثواب سوا

دمتم سالمين ودامت حيواناتكم سالمة.

27/03/2023

-رمضان كريم علينا وعليكم وكل سنة وانتم طيبين✨🌙.

-زي ما إحنا مأمورين بالصيام لأسباب روحانية كمان بنستفاد منه صحياً بس هل حد يعرف ان حيوانه الأليف لازم لازم يصوم برضه؟؟؟ 🤔

-طبعا مش زي صيامنا الديني عن الأكل والشرب ولكن الحيوان من حين لآخر لازم يصوم عن الأكل، هقولك ليه.....

-الحيوانات الأليفة قبل ما يتم استأنسها مكانش بتلاقي الأكل أوبن بوفيه في الطبيعة بل بالعكس كان ممكن تقعد باليومين والتلاتة على ما تلاقي فريسة او حاجة تأكلها.
-وده برضه حال حيوانات الشوارع وده اللي نوعا ما بيخليها اصلب شوية من حيوانات البيت، طيب الصيام مفيد في ايه؟
أنا هقولك:
- بيقوي جهاز المناعة

- بيسمح للجسم بالتخلص من السموم والخلايا الميتة بشكل افضل وده بدوره بيساهم بشكل كبير في الوقاية من السرطانات المختلفة خاصة في الحيوانات كبيرة السن.

- بيسمح بتنظيم سكر الدم وبيساعد في الوقاية من السكري، اه الحيوانات بيجيلها السكري بنوعيه (سكر نوع اول والسكر النوع الثاني)
بنسبة توصل ٢% في القطط خاصة بعد عمر ٦ سنين وفي الكلاب بعد ٧ سنين والاناث اكثر عرضة من الذكور.

- الصيام بيحسن من وظائف الجهاز العصبي وبيقي من امراض الشيخوخة زي Parkinsonism( الشلل الرعاش) وبيساعد في إطالة العمر.

طيب الحيوان يصوم إزاي؟
في كذا طريقة بس افضلهم:
- يصوم لمدة ٢٤ ساعة من اي سعرات حرارية ولكن يشرب مياة بس، وده مرة كل اسبوع او مرتين في الشهر.
- تقسم يومه لفترة ياكل فيها ودي حوالي من ٨ ل ١٢ ساعة، وباقي اليوم صيام من غير اكل ميبقاش الأكل قدامه متاح طول الوقت.

ودمتم سالمين ودامت حيواناتكم الاليفة سالمة ❤️
د/ طه عبد المحسن

25/03/2023

زي ما جوع الصيام بيهذبنا وبيعلمنا نحس بغيرنا ونكثر من الصدقة والزكاة، لازم مهم جدا مننساش غيرنا من خلق الله برضه زي الحيوانات الشريدة
ولو قدرنا نطلع حتى بواقي الأكل في مدخل العمارة او في كرتونة في الشارع يبقى فعل ناخد عليه ثواب زي ما حضرة النبي - عليه الصلاة والسلام - قال:
" لكم في كل كبد رطبة أجر "

كل سنة وانتم طيبين
دمتم سالمين ودامت حيواناتكم سالمة
د/ طه عبد المحسن

05/10/2022

رع الذي هو قرص الشمس يعبر النهار حيث يعلو في السماء، ثم يختفي عن الأنظار وقت الغروب ويبدأ رحلة البحر السماوي خلال الليل
وفي العالم السفلي يواجه الأفعى أبوفيس فيأخذ رع شكل ماو ويقتل ابوفيس ليعود من جديد للسماء وتشرق شمس يوم جديد

- من اساطير كتاب الموتى

زي ما في رابط بين القطط والتعابين في الميثولوجيا، تفتكروا ايه الرابط بينهم في الطبيعة؟

اجابة السؤال ده هتلاقوها في البوست الجاي.

15/06/2022

كلب الإعلامية الشهيدة شيرين أبو عاقلة - الله يرحمها - لسه مستنيها ترجع بعد اخر مرة شافها فيها

برغم ان الكلاب عندها ذاكرة قصيرة المدى فعلا قصيرة وبتنسى اللي حصل بعد ٧٠ ثانية إلا ان الذاكرة طويلة المدى بتاعتهم قوية جدا خاصة مع الاونر بتاعها او افراد الاسرة بتوصل لسنين حتى لو مش موجود قدامها

ده غير ان عندهم ذكاء عاطفي وبيفهموا مشاعر الفقد كويس وبيعبروا عنها بشكل واضح بيوصل اوقات لبكاء زي الاطفال بالدموع

فمهما كان تأثيرك في الدنيا خلال حياتك خليك متأكد ان بعد رحيلك حتى لو البشر نسيوك كلبك عمره ما هينساك

الله يرحم شيرين ويصبر حبايبها كلهم على فراقها

دمتم سالمين ودامت حيواناتكم سالمة
د/ طه عبد المحسن

22/02/2022

ازيكم عاملين إيه؟
لسه الكلام مخلصش ولسه في مفاهيم غلط اتعلمناها من الكارتون جايين نصلحها والنهاردة ضيف حلقتنا باجز باني ورجالته

دايما في ارتباط وثيق في اذهاننا بعلاقة الأرانب بالجزر والخس مع إن في الحقيقة الاتنين مضرين للغاية، طيب ليه؟

الجزر نسبة السكريات فيه عالية جدا بالنسبة للأرانب كأنه شوكلاتة، تخيل تاكل شوكلاتة كل يوم طول اليوم، تسوس سنان بقى وزيادة وزن وممكن توصل لمرض السكري، اهو ده بالظبط اللي بيحصل للأرانب.
الافضل بقى ياكلوا اوراق الجزر الخضرا مش الجزر نفسه

طيب والخس ماله؟ الخس فيه مادة اسمها "لاكتوكاريوم" ليها تأثير مهدئ ومخدر على الأرانب، يعني الأرانب لما بتاكل خس كأنها شربت سجارة حشيش

طيب يعني المفروض نأكل الأرانب ايه دلوقتي؟

تاكل اكل متوازن بيتكون من عناصر مختلفة زي الدريس والبرسيم والتبن والقش والحبوب الكاملة زي القمح والشعير والفول والعدس وبعض انواع الخضار زي الكوسة واللفت والقلقاس وبعض الفواكه زي التفاح او قشور التفاح وتابعوا معانا في بوست جاي هنتكلم أكتر عن رعاية وتغذية الأرانب كحيوانات اليفة

دمتم سالمين ودامت حيواناتكم سالمة
د/ طه عبد المحسن

19/01/2022

مفهوم كمان من المفاهيم الغلط اللي اتعلمناها في الكارتون هي علاقة الكلاب بالعضم

الكلاب بتحب العضم جدا وده لأسباب سلوكية لأن فعل العض أو المضغ عند الكلاب من الحاجات اللي بتساعد على افراز الاندروفين وبتحسس الكلب بالسعادة فعشان كده هتلاقيه بيعض في الانتريه والهدوم وأي حاجة وطبعا لو لقى عضمة هيبقى كنز بالنسباله ورحلة ممتعة وكمان لذيذة

طيب ايه المشكلة؟
مشكلة العضم خاصة لو مستوي مش ني انه بيسبب مشاكل كتير جدا زي:

- سرعة تآكل الاسنان
- جروح في الفم
- الاختناق
- انسداد اجزاء من الجهاز الهضمي زي الامعاء
- براز مدمم واسهال
- وفي حالات معقدة اكتر زي التهاب الغشاء البريتوني نتيجة لاختراق العضم للمعدة او الامعاء وحدوث عدوى بكتيرية وللأسف ممكن توصل للوفاة

طيب نتغلب ع المشاكل دي إزاي؟

- تحاول تجيب العاب بلاستيكية للعض عشان تحفيز حالة الكلب النفسية
- طبعا بما إن الكلب بيستفاد من الكالسيوم والفوسفور في العضم حاول تعوضهم بوسائل اخرى في أكله او بالمكملات

ولو ضروري ضروري تدي الكلب عضم لازم تاخد بالك من شوية حاجات:

- متديلوش عضم صغير سهل البلع زي عضم الطيور أو قطعيات من الدبيحة زي الضلوع عشان سهل البلع وممكن يسبب اختناق وسهل الكسر وممكن يسبب جروح

- متديلوش غير العضم الني عشان سهل في المضغ وفرص انه ينكسر ويسبب شظايا اقلل من العضم اللي اتعرض لحرارة

- اديله العضم بعد الوجبات عشان تضمن انه اكل وشبعان فهو هيعض فيها بس مش هياكلها وياريت تبقى عضمة كبيرة زي الفخد

- في حالة عدم الاستخدام خلى العضم في التلاجة عشان لو في انسجة لحم متعفنش وتسبب مشاكل معوية او تسمم للكلب

دمتم سالمين ودامت حيواناتكم سالمة
د/ طه عبد المحسن

16/01/2022

مكملين في تصحيح مفاهيم خاطئة عن الحيوانات اكتسبناها من الكارتون ومن المواضيع الشهيرة هي علاقة القطط باللبن

اغلب القطط lactose intolerant يعني جسمها مبيقدرش يهضم سكر اللاكتوز في اللبن وده بيسببلها مشاكل زي القئ والاسهال والمغص
فلو ظهر عليها مشاكل في خلال من ٨ ل ١٢ ساعات تبقى القطة lactose intolerant ومينفعش تشرب لبن

مشكلة كمان في اللبن البقري وهي المحتوي العالي من الدهون وده السبب الرئيسي ان القطط اساسا بتحبه بس كمية الدهون فيه بالنسبة للقطط شبيهة بأنك تاكل ١٢ بيتزا مرة واحدة

طيب اعمل إيه واشرب القطة إيه؟

المية طبعا هي الأساس لأي كائن حي عشان تمنع الجفاف ولكن لو بتدور على قيمة غذائية فممكن تستبدل اللبن البقري العادي بأنواع خالية من اللاكتوز ومنزوعة الدسم ولو معندكش البديل ده متوفر حاول ع الأقل تخفف اللبن بمية بنسبة ١:١ ومتخليش ده اساس التغذية بالنسبة لقططك

دمتم سالمين ودامت حيواناتكم سالمة
د/ طه عبد المحسن

14/01/2022

طفولتنا اللي قضيناها قدام الكارتون زرعت في دماغنا مفاهيم كتير عن الحيوانات فيها حاجات صح وحاجات اكتر غلط، تعالوا معانا نعرف المفاهيم الغلط دي وإيه الصح بتاعها

بما إن الجمعة يعتبر اليوم الأسبوعي لغدوة السمك في اغلب البيوت فلازم نتكلم عن السمك وطالما قولنا سمك على طول بيجي في دماغنا القطط

أي كارتون فيه شخصية قطط كان زرع في اللاوعي بتاعنا من واحنا اطفال ان القطط بتحب السمك، والقطط فعلا بتحب السمك بس في الغالب بتبقى "القتيل بأي من أحببته"

طيب إيه مشكلة السمك مع القطط؟

- حاجة زي التونة مثلا مش مضرة بس مينفعش تبقى أساس تغذية القطط أولا: عشان هتسبب سوء تغذية لأن مفيهاش كل القيم الغذائية المطلوبة
ثانيا: وده الاهم سمك التونة في العموم سبب رئيسي في التسمم بالزئبق للثدييات فاستهلاكه بكثرة بيزود من خطر التسمم

- السمك الني فيه انزيمات بتكسر الثيامين اللي هو فيتامين ب١ وطبعا نقصه بيؤدي لمشاكل عصبية زي التشنجات وممكن توصل لغيبوبة

- اكل القطط السوفت الجاهز بيحتوي على السمك في الاساس وبيبقى مطحون بما فيه عضم السمك أو الشوك اللي بيبقى مخزن رئيسي للمعادن زي المغنسيوم والفوسفور واللي اه ليهم فايدة بس زيادتهم على المدي الطويل بتسبب مشاكل في الجهاز البولي زي الحصوات والاملاح وعدوى مجرى البول وممكن توصل لفشل في الكلى.

طيب يعني امنع السمك من القطة؟

لا عادي تاكله بس ميبقاش اساس الغذاء بتاعها وانوع على قد ما اقدر بين نشويات وبروتين وخضار كمان وفي البوستات القديمة هتلاقوني اتكلمت عن تغذية القطط وايه الممنوعات

تابعونا في الكام بوست الجايين في شوية كلام حلو عن الحيوانات في الكارتون

دمتم سالمين ودامت حيواناتكم سالمة
د/ طه عبد المحسن

09/01/2022

لما ترمي أكل لقطة أو كلب وتلاقيهم لسه بينادولك عشان تأكلهم متقولش أنهم اغبيا أو بيتجاهلوه، السر كله في النقطة العمياء أو ال blind spot

القطط والكلاب مبيعرفوش يشوفوا تحتهم على طول فبالتالي هما مشافوش أساسا إن في أكل اتحطلهم

والصورة اللي تحت بتوضح مجال الرؤية المركزي والطرفي والنقطة العمياء عشان تبقي عارف بعد كده هما مش شايفين فعلا ولا شايفين وبيطنشوا

دمتم سالمين ودامت حيواناتكم سالمة
د/ طه عبد المحسن

28/11/2021

14/11/2021

ازيكم عاملين ايه؟
غايبين عليكم لينا فترة بس لما بغيب مبغيبش اونطة وبنرجع دايما بحالة اجمد من اللي قبلها

زي ما انتوا شايفين في الصور الحالة صعبة حبتين اسمها feline sporotrichosis والسبب فيها فطر رخم شوية اسمه Sporothrix schenckii

الفطر ده موجود في الطبيعة عادي وبيتركز غالبا في الارجنتين والبرازيل لكن موجود في المناطق الحارة عموما وحب يجي يشرفنا هنا شوية بس هيمشي بسرعة

في العادي بيصيب كل انواع الحيوانات بس في القطط بيبقى اكتر شراسة بس هنا الحمدلله صاحب الحالة اهتم بيها وهي لسه في اولها وهتبدأ في العلاج بإذن الله على طول

طيب بيحصل ليه وايه اعراضه؟

غالبا بيحصل بسبب تلوث الجروح بتاعة خناقات القطط بالفطر ده وتبدأ الاعراض بتكوين قشرة خشنة زي اي جرح بس بسرعة بتتحول لقرحة زي ما شايفين ومصحوب بأعراض تاني:
عطس وصعوبة في التنفس بسبب تأثر الجهاز التنفسي
فقدان شهية
ارتفاع في الحرارة
خمول وارهاق
بعض الحالات مع الاهمال بيبدأ يمتد ويصيب اجزاء تاني في الجسم وممكن يوصل للغدد الليمفاوية ويسبب افرازات صديدية

لازم ناخد بالنا ان المرض معدي وكمان بيصيب البشر فلازم لازم الحذر في التعامل

طيب امنعه ازاي؟

في الاول لازم فصل الحيوان المصاب عن باقي الحيوانات وياكل ويشرب ويقعد في مكان لوحده
التطهير المستمر لأي حاجة لمسها والتعامل معاه وانت لابس جوانتي طبي
وفي اي مرة الحيوان يتعور فيها لازم نطهر الجرح كويس من الأول قبل ما تحصل اي عدوى بس لو حصل وشوفنا اي عرض جلدي على الحيوان لازم ناخد الاحتياطات العامة ونتجه لاقرب عيادة بيطرية او تكلمونا واحنا نزوركم عشان نحدد التشخيص وناخد الاجراء اللازم

دمتم سالمين ودامت حيواناتكم سالمة
د/ طه عبد المحسن

29/09/2021

امبارح كان اليوم العالمي للسعار

بنحب نفكركم دايما إن مش عشان كلب هاجم حد يبقى مسعور ولكن مع ذلك لازم ناخد احتياطاتنا لو كلب هاجمنا لا قدر الله وننضف الجرح بمية وصابون كويس ونتوجه لأقرب مستشفى اقدر اخد فيها المصل

دمتم سالمين ودامت حيواناتكم سالمة
د/ طه عبد المحسن

19/09/2021

تعرفوا إن الكلاب ليها في السياسة؟

القصة كلها بتبدأ في ٢٠٠٨ مع المظاهرات اللي حصلت في أثينا اعتراض على السياسات التقشفية اللي اتبعتها الدولة
بطل قصتنا " لوكانيكوس " كان كلب شارع صادف ان منطقته هي اللي بتدور فيها المظاهرات ولما احتدت المظاهرات وبدأت الاشتباكات بين رجال الأمن والمتظاهرين اخد "لوكانيكوس" صف المتظاهرين وبقى ينبح على قوات الأمن ويهاجمهم وكمان كان بياخد عبوات القنابل المسيلة للدموع اللي اطلقوها على المتظاهرين ويحدفها على قوات الشرطة تاني وفضل مكمل رحلة التمرد والنضال لحد ما مات سنة ٢٠١١ متأثر بأستنشاق الغاز المسيل للدموع واصابات التظاهر وجريدة التايمز الأمريكية اختارته شخصية العام وقتها وحطت صورته على الغلاف والمتظاهرين عملوا جرافيتي تخليد لذكراه في المكان اللي كان بيعيش فيه

مهما اتكلمنا عن ذكاء الكلاب وتعاطفهم مع البشر هيفضلوا يبهرونا دايما وهيفضلوا معانا في الحلوة والمرة

دمتم سالمين ودامت حيواناتكم سالمة
د/ طه عبد المحسن

09/09/2021

كلبة عمر سنة وشهرين خليط جيرمان بلدي للتبني في اسوان بشرط سهولة التواصل مع المتبني فيما بعد عشان الأونر تتطمن عليها

27/08/2021

تعرف إن مناخير الكلب ممكن تنقذ حياتك؟؟

مناخير الكلب فيها حوالي ٢٢٠ مليون مستقبل روائح مقارنة بينا كبشر عندنا ٥ مليون بس، شايف حجم الفرق يعني لو حطيت نقطة برفان في حمام سباحة اوليمبي الكلب يقدر يميزها بكل سهولة

طيب ايه علاقة ده بموضوعنا؟
انا هقولك، الكلاب تقدر تميز انواع كتير من الأمراض حتى قبل ظهور اعراضها كنوع من التشخيص المسبق

عدة دراسات اتعملت سنة ٢٠٠٦ بتقول ان الكلاب قدرت تشخص انواع سرطانات مختلفة زي سرطان الثدي بنسبة ٨٨% وسرطان الرئة بنسبة ٩٨% عن طريق عينات دم وعينات النفس

طيب كمان الكلاب بتقدر تشخص مرض باركينسون او شلل الرعاش حتى قبل ما تبدأ الأعراض تظهر على المريض وده بيساعد في العلاج المبكر قبل ما المرض يوصل لحالة اللا عودة

طيب تعرف ان في دراسة اتعملت سنة ٢٠١٣ ومنشورة في ncbi واللينك في اخر البوست عن ان الكلاب بتتنبأ بنوبات الصرع وحالات الإغماء قبل حودثها بحوالي ٥ دقايق وبتنبه اللي حواليها وده يقدر يلحق المريض من كوارث ممكن تحصل لو النوبة جاتله في وقت ومكان مش مناسبين وده عن طريق ريحة العرق ووصلت النتيجة لعدد ١١ حالة من اصل ١٢

طيب خد الكبيرة بقى..

في دراسة في جامعة هلسنكي في فنلندا بتقول إن الكلاب بتقدر تشخص فيروس كورونا المستجد بدقة تقارب دقة تحليل ال PCR وده عن طريق عينات البول
ومش بس بتشخص المرضى، لا ده كمان حاملين المرض اللي مش بيظهر عليهم اعراض وكمان الاشخاص المتطعمين ضد الفيروس الكلاب بتقدر تشخصهم

يعني المفروض المستشفيات والمعامل يتصرفلهم دراي فود بعد كده بدل اللاب كيتس عشان مستقبل الطب هيعتمد على الكلاب

اه بالمناسبة، دي المصادر:
١- https://www.ncbi.nlm.nih.gov/pubmed/23835278
٢-
https://www.helsinki.fi/en/news/healthier-world/finnish-covid-dogs-nose-knows

دمتم سالمين ودامت حيواناتكم سالمة
د/ طه عبد المحسن

23/08/2021

زوتوبيا بتفكركم ان القطط أمان طالما صحتها تمام وبتاخد تطعيماتها مفيش خوف منها ابدا

دمتم سالمين ودامت حيواناتكم سالمة
د/ طه عبد المحسن

08/08/2021

زوتوبيا بتهنيكم باليوم العالمي للقطط

ومع ان المفروض كان يبقى ٧ يوليو عشان القطط بسبع ارواح او ٩ سبتمبر عشان القطط بتسع ارواح زي ما اساطير تاني بتقول، طيب ايه مرجعية الاساطير دي؟
اولها واهمها كان عند قدماء المصريين وده لارتباط القطط بالإله رع اللي كان بيتجسد بشكل قطة في عالم البشر ولأن رع انجب ٨ اولاد ودمج ارواحهم بروحه فبقى بقطة بتسع ارواح
لكن عند حضارات تاني القطط بسبع ارواح نسبة لأن رقم سبعة هو رقم الحظ اللي مرتبط بنجاة القطط من حوادث كتير وطبعا الحظ مش السبب لكن سرعة وليونة القطط هما السبب

أيا كان سبعة او تسعة او تمانية، كل سنة والقطط كلها شيرازي وسيامي وبلدي طيبة وفي أمان

دمتم سالمين ودامت حيواناتكم سالمة
د/ طه عبد المحسن

18/07/2021

السلام عليكم عاملين إيه..
أينعم الصفحة مختصة بالحيوانات الأليفة بس يعني في الأول والآخر كل ما يخص الحيوان يخصنا وهنتكلم في موضوع مهم بما إننا في موسم عيد وهنتكلم عن الاضحية والذبح.
أولا عشان مندخلش في جدالات اخلاقية كتير الدبح بالطريقة الاسلامية اكتر طريقة رحمة بالحيوان، طيب إزاي؟

الدبح بيتم عن طريق قطع الحلقوم والمرئ والودجين اللي هما ال carotid arteries بسكينه حادة مرة واحدة
الشريانين دول هما اللي بيوصلوا الدم للمخ واول ما بيتقطعوا في الدبح في الحال المخ بيفقد الاكسجين والدبيحة بتفقد الوعي والاحساس في الحال أما بالنسبة للترفيص اللي بيرفصوا الحيوان ده بيكون استجابة من الجسم بأنقباض العضلات لأنه بيقول الحق المخ مش واصله دم ابعتله كل الدم الموجود اللي بالتالي بيخرج من موضع الذبح وده برضه بيساعد ان الذبيحة تتخلص بأكتر من ٩٠% من الدم الموجود وده بيزود من جودة اللحمة ومدة حفظها وتخزينها أو زي ما بنقول shelf life

طيب في شوية شروط ناخد بالنا منها اخلاقيا وعقائديا لأنها سنة برضه:

- الحيوان ميشوفش النصل اللي هيتدبح بيه
- النصل لازم يكون حاد تماما عشان من مرة واحدة الدبح يتم كامل من الشريان للشريان ومضطرش ادبح الحيوان تاني واعذبه
- لو عندي اكتر من دبيحة لازم ميشوفوش بعض وهما بيتدبحوا ولا يشوفوا منظر الدم
- احاول اريح الدبيحة واهديها على قد ما اقدر عشان برضه اقلل من مستويات الادرينالين في الدم عشان يحصل نزف بشكل كامل وارفع من جودة وسلامة اللحمة
- على عكس الشائع المفروض مأكلش الحيوان قبل الذبح ب١٢ ساعة ومسقيهوش ع الاقل ب٦ ساعات عشان اقلل من محتويات الامعاء والكرش عشان عملية السلخ وتفريغ الاحشاء تبقى نضيفة قدر الإمكان واقلل من ميكروبات الجهاز الهضمي

كل سنة وانتم طيبين ويعود عليكم الأيام بخير وسعادة وربنا يحفظ علينا امننا

دمتم سالمين ودامت حيواناتكم سالمة
د/ طه عبد المحسن

06/07/2021

Graphic content**

دي حالة معانا قطة بتشتكي من a**l gland abscess

حوالين فتحة الشرج بيبقى في غدد هي اللي بتفرز الفيرمونات المسؤولة عن تحديد المستعمرة أو المنطقة الخاصة بالمجموعة او القطيع في حالة القطط والكلاب واغلب الحيوانات البرية

لبعض الاسباب بيحصل التهاب في الغدة دي ومع الوقت بيقلب لخراج وبيفتح وينتج عنه افرازات صديدية ريحتها سيئة وقوية

طبعا في القطط الشيرازي بسبب كثافة الفرو بيبقى صعب تلاحظ التهاب الغدة في بدايته واعراضه من ورم واحمرار وسخونة وبتتفاجئ مرة واحدة بصديد مدمم خارج من القطة

الحالة مستمرين معاها في العلاج ان شاء الله جراحي ودوائي وبإذن الله ربنا يتم شفاها على خير

دمتم سالمين ودامت حيواناتكم سالمة
د/ طه عبد المحسن

05/07/2021

إزيكم عاملين ايه؟

بنفكركم في الحر ده توفروا مية باردة لحيواناتكم الاليفة باستمرار ولو سايبينهم في البلكونة او السطوح او المدخل تدخلوهم في البيت أو ع الاقل توفرولهم ضل ورطوبة وتهوية كويسة عشان الحيوانات مش بتعرق زينا وده بيعمل اختزان حراري بسرعة ممكن توصل للوفاة

وحاجة صغيرة كمان، لو تقدر تحط طبق مية باردة نضيفة في البلكونة للعصافير او قدام البيت لقطط وكلاب الشارع متكسلش وقوم دلوقتي ومتنساش إن " لكم في كل كبد رطبة اجر "

دمتم سالمين ودامت حيواناتكم سالمة
د/ طه عبد المحسن

12/06/2021

في العادي لما حيوان بيموت في محمية طبيعية بيتساب للنسور والضباع يتغذوا عليه عشان ده المسار الطبيعي للنظام البيئي بس هنا الوضع اختلف وحراس المحمية دفنوا سكار عشان محدش يتغذى على جثته وده بيبين مدى مكانته ومدى حبهم واحترامهم ليه

من كام ساعه مات اشهر اسد في التاريخ لحد النهارده ...اشهرهم عالميا مش بس محليا

سكار الاسطوره او the legendary Scar زي ما الجمعيه العالميه لحمايه الحيوانات كتبت ...
هو الحاكم الفعلي لمنطقه كينيا و اوغندا ، اكثر بقاع الارض شهرهً بالاسود ، حكمها لمده ١٢ سنه !! اطول فتره حكم ذكر بالغ لزمره اسود في التاريخ ، في العادي الاسد القوي الي شايف نفسه ممكن يسود الزمره للتلات او خمس سنين بالكتير ، اما مع سكار الوضع مختلف ...
سكار اول اسد يجند اخواته معاه في نفس الزمره ،سيكيو و موراني بنفس الحق و نفس السلطه تقريبا ،
سمحلهم يعيشوا و يتجوزوا و يخلفوا في وجوده و ده ضد علم السلوك الحيواني عامه في الاسود ، فلما كان بيهجم ع المجموعه اي حيوان كان الي بيحارب ٣ ذكور مش ذكر واحد ، و دي حاجه لا حصلت ولا هتحصل تاني .
سكار دافع عن ارضه قصاد ١٣٠ اسد تقريبا !! اخرج مجموعه تماسيح كامله من منطقته علشان افترسوا شبل ، ملك يا جماعه ..بنتكلم عن ملك مش حيوان !!..عمره ما افترس انسان رغم دخولهم المستمر منطقته !! قتل في حياته حوالي ٤٠٠ ضبع لوحده بانيابه و سنانه من غير اخواته، الاسد الوحيد المعروف المنتصر علي ذكر فرس نهر بالغ في معركه راجل لراجل !! ،
و هو صاحب الفيديو الشهير اللي كان ضد قطيع ضباع بالليل علي طريق سريع و اخواته انقذوه في اخر لحظه ، و دي كانت اخر مره يكسر قواعده الخاصه و يهاجم بشكل مفرد زي باقي الحيوانات ....
سكار خسر عينه في ٢٠١٦ في معركه اسمها Pride of the pride او كرامه الزمره ، حارب فيها مع اخواته ٦ اسود قتل منهم لوحده اسدين و الباقي كلوهم اخواته ..
في ٢٠١١ اشتبك مع اسد اصغر منه ب ٣ سنين و قده مره و نص في الوزن اسمه جرابي ، كل كينيا كانت متوقعه ان جرابي هياخد العشيره و حتي اخوات سكار مش هيسدوا، سكار خسر حته من رجله لكن مخسرش المعركه ...و احتفظ برأس جرابي اسبوعين قبل ما يرميها ، زي الملوك كده لما كان بيعلقوا اعداءهم علي سور المدينه بمسج واضحه صريحه : الي هيتهور يتعور ..
المهتمين بالحيوانات في العالم كله اتكلموا عنه انهارده ، شهرته وصلت لاستراليا و امريكا لأنه ملك الغابه فعلا ، بعض القبائل كانت تجله لدرجه العباده مش بس التبجيل ، الناس اكتشفت موته بسبب زئير حزين مفاجئ الساعه ١١ و نص بليل في منطقته !!ستاته بيصوتوا عليه كأنه بني ادم بالظبط !!...وانا عارف انكً ممكن تشوف الموضوع اوفر بس كل السلوكيات دي عمرها ما بتحصل عالم الحيوان ...ولا يمكن تحصل تاني
في ناس بيقولوا هيتحنط في ناس بيقولوا هيتعملوا تمثال لسه محدش عارف ايه الاكيد ..لكن الاكيد انه اشهر اسد افريقي في التاريخ ...بلا منازع

المصادر في التعليقات

29/05/2021

مساء الخير عاملين ايه؟

دي حالة طوارئ من شوية كلب بلدي صغير خبطته عربية وكسرت رجله وصاحب الكلاب اللي متبنيهم كلمني وعملنا اللازم وإن شاء الله ربنا يتم شفاه على خير

الكلاب عموما هيكلها العظمي قوي لكن برضه ده ميمنعش الحذر ونحاول منطلعهمش الشارع بدون رقابة عشان نتجنب الحوادث

دمتم سالمين ودامت حيواناتكم سالمة
د/ طه عبد المحسن

27/04/2021

اتكلمنا في البوست اللي فات عن علاقة لغة الجسد بمشاعر الحيوانات وإزاي بتعبر عن حالتها المزاجية، النهاردة هنتكلم عن حاجة مهمة جدا متعلقة بالحالة المزاجية للكلاب وهي الخوف او العدوانية وازاي نتعامل معاها

الكلاب لما بتحس بتهديد بتتعامل بحل من اتنين، يا إما هيخاف ويستخبى ويهرب أو لو اتزنق ومعرفش يهرب هيترجم خوفه ده لعدوانية.

طيب هشوف ايه على الكلب في الحالات دي؟
لو الكلب خايف هيحط ديله بين رجليه ويوطي جسمه لتحت ويرجع ودانه لورا ويبدأ يرجع بخطوات حذرة بضهره وعينه متركزة على التهديد، طيب لو عدواني هتلاقيه بدأ يزمجر ويكشر عن انيابه ويبدأ في النباح ويمكن يهاجم كمان

طيب إيه اكتر مسببات لحالة الهياج والعدوانية؟
زي ما قولنا التهديد، يعني لو حد واقف ماسكله عصاية او حاجة يضربه بيها
او لو الكلب لسه خارج من خناقة مع كلب تاني
أو لو ام والدة وخايفة على الجراوي الصغيرين
أو لو كلب متعرض لأزمة ثقة بسبب سوء تعامل
طبعا دي مش كل الحالات بس تعتبر العناوين الكبيرة والاشهر

طيب لو اتعامل مع الكلب في الحالة دي إزاي؟
- ازالة التهديد أولا لو موجود سواء كان شخص او حيوان تاني
- هقرب للكلب بخطوات بطيئة وهادية مع ترك مساحة امان كافية تحسبا لو هاجم أقدر ابعد او اتفاداه
- اتجنب ال eye contact على قد ما اقدر لان الكلاب بتترجم ده كنوع من التحدي والتهديد وابص للكلب بجنب وشي وادي وشي يمين وشمال عشان الكلب يشوفني كويس ويبدأ يترجم تعبيراتي
- مبينش للكلب إني أقوى منه، مقفش بكامل طولي لأن الكلب هيفتكرني تهديد ليه لأني غالبا ضعف حجمه واكتر واحاول اوطي وابقي في مستوى نظره شوية
- مستعملش العنف اطلاقا ومخليش ايدي ماسكة حاجة وافتحهم عشان ابين انهم فاضيين، الكلب هيفتكر إني ماسك حجر او عصاية او حاجة
- اتكلم مع الكلب بنبرة هادية وواضحة ومزعقش
- لو الكلب مبدأش يهدا واستمر في النباح والزمجرة اسيبه وامشي لحد ما يهدا لوحده بس مديلوش ضهري وارجع لورا عشان مديلوش فرصة لو حاول يهجم عليا
- وطبعا الحذر ثم الحذر ثم الحذر

دمتم سالمين ودامت حيواناتكم سالمة
د/ طه عبد المحسن

25/04/2021

البوست اللي فات كان بيورينا لغة الجسد بتاعة القطط وإزاي بتعبر عن حالتها المزاجية، البوست ده بيتكلم عن لغة جسد الكلاب ولو هنلاحظ هنا هنلاقي ان الكلاب بتستخدم كمان تعبيرات وشها في التعبير عن مشاعر اكتر شوية من القطط ، البوست الجاي هنتكلم عن حاجة مهمة جدا متعلقة بالكلاب وإزاي نتعامل معاها، تابعونا

د/ طه عبد المحسن

24/04/2021

صباح الخير، لو لسه جديد في تربية الحيوانات الأليفة وبالاخص القطط الانفوجراف ده هيساعدك تفهم مشاعر اليفك وحالته المزاجية من لغة الجسد بتاعته، إنجوي

د/ طه عبد المحسن

14/04/2021

من المعلومات المثيرة عن الفرق بين القطط والكلاب إن القطط بترتبط بالأماكن أكتر من الأشخاص يعني لو خمسين اونر اتغيروا في نفس الشقة مش هتحس بفرق لكن لو راحت مكان جديد هتتوتر وتاخد وقت على ما تتعود
أما الكلاب بترتبط بالأشخاص أكتر من الأماكن، يعني لو طالما مع الاونر بتاعه حتى لو عايش في الشارع هيفضل مبسوط وهيفضل فاكره ومخلص ليه حتى لو بعد سنين

لو تعرفوا معلومات شيقة تاني عن القطط والطلاب شاركونا في الكومنتات

دمتم سالمين ودامت حيواناتكم سالمة
د/ طه عبد المحسن

12/04/2021

لو وقفتك في الشارع مرة واحدة وسألتك تربي كلب ولا قطة بدون تفكير هترد بإيه؟

اجابتك هنا بشكل كبير بتحدد جزء من شخصيتك، في بعض الدراسات اللي اتعملت كانت بتقول إن ميول بعض الافراد لتربية القطط او الكلاب بيبقى انعكاس لشخصيتهم المشابهة لشخصية وسلوك الحيوان اللي بيربوه طيب الكلام ده ازاي؟

في دراسة اتعملت سنة ٢٠١٠ في جامعة تكساس بتقول إن مربيي الكلاب بيميلوا انهم يبقوا اجتماعيين وبيحبوا الخروج أما مربيي القطط بيميلوا انهم يبقوا حساسين اكتر وميالين للاعمال الابداعية والفلسفية

وفي دراسة تاني سنة ٢٠١٤ في جامعة كارول بويسكونسون بتأكد نفس الكلام وبتقول ان محبي الكلاب طاقتهم اعلى واجتماعيين وبيميلوا لاتباع الاوامر أما محبي القطط introvert وحساسين واغلبهم ميالين لكونهم ثورجية حبتين وبيكسروا الاوامر

وطبعا في النوعية المفضلة ليا شخصيا اللي هتلاقي عنده قطتين وكلب وعصافير وسمك وممكن تلاقي حصان صغير لو المكان يسمح واي حاجة بتمشى على اربعة بيحبها 😄

انت بقى كات بيرسون ولا دوج بيرسون؟؟

د/ طه عبد المحسن

10/04/2021

دي مانجا، مانجا كانت قطة انقاذ عندها حوالي ١٠ ايام لقتها مرة الساعة ١٢ بليل قدام الجيم ودورت ملقتش امها فاخدتها.
كانت بتتعامل معاملة القطة اليتيمة وطبعا الحالات اللي زي دي بتحتاج رعاية خاصة شوية، طيب ايه الحاجات اللي لازم ناخد بالنا منها في رعاية القطط اليتيمة

اولا: التدفئة
بنحط القط في كرتونة ونحط معاه قربة مياة سخنة او ازازة او حتى كيس فيهم مياة دافية بدرجة حرارة ٣٧ - ٣٧.٥ وطبعا نلفها بقماشة او اي نسيج ناعم فيه فرو مثلا عشان يبقى شبيه بملمس الام

ثانيا: التغذية

القطط كائنات lactose intolerant يعني مبتقدرش تهضم سكر اللاكتوز عشان كده لبن البقر العادي مينفعش معاها، طيب نعمل إيه؟
عندنا بدايل نقدر نستخدمها مع مراعاة الترتيب طبعا يعني لو مفيش الاول يبقى التاني وهكذا، طيب ايه هما؟
١- حليب قطط صناعي زي رويال كانين او ميرا وده هتلاقيه في بعض متاجر مستلزمات الحيوانات الاليفة الكبيرة أو اونلاين وده هيبقى غالي حبتين
٢- حليب أطفال خالي من اللاكتوز زي هيرو بيبي او بيبيلاك
٣- حليب بقري خالي اللاكتوز ويفضل خالي الدسم زي جهينة مثلا وهتلاقيه في الهايبر بس لازم يتخفف بنسبة ١:١ وعليه معلقة زيت زيتون لكل كباية( ٢٤٠ ملل )

طيب ياكلوا إزاي وامتى؟
في البداية هياكلوا كل ٤ ساعات وجبة لا تتعدى ٥ - ١٠ ملل بقطارة او سرنجة بدون ابرة او في بزازات مخصصة للقطط ممكن تلاقيها وكل ما بيكبروا في العمر كل ما بتزيد
وعلى الاسبوع الخامس تبدأ تدخل اكل نصف صلب بجانب اللبن زي سيريلاك او بطاطس وجزر وفراخ مسلوقين ومضروبين بالخلاط وتدريجي تزود لحد ما يتفطموا تماما على عمر ٨ اسابيع

ثالثا: الاخراج

في العادي لحد عمر ٣ اسابيع الام بعد كل وجبة بتلحس بطن الكيتنز عشان تحفز الجهاز الهضمي على الاخراج فبما إن الام مش موجودة يبقى بعد كل وجبة بربع ساعة تمسح على بطنهم بقطنة مبلولة مياة دافية لحد ما يعملوا حمام وتنضفهم بعدها

وطبعا المتابعة الطبية مع اقرب طبيب بيطرية او تكلمونا واحنا نتابع معاكم

دمتم سالمين ودامت حيواناتكم سالمة
د/ طه عبد المحسن