13/12/2024
هنتكلم النهاردة عن موضوع مهم وناس كتير متلخبطه فيه وهو ال hip dysplasia (تشوه عضمة الفخد😮
- لا استنى كده وفهمنى الموضوع بدأ ازاى يلا بينا... يلا بينا
سنة ١٩٣٥ تم اكتشاف الhip dysplasia وده كان أول مرض عظام يظهر فى الكلاب... و فى سنة ١٩٦٥ وبعد ٣٠سنة من إكتشاف المرض كانت أعراضه ظهرت فى ٥٥ فصيلة اغلبيتهم من الفصائل المتوسطه وكبيرة الحجم.
ايه هو ال !hip dysplasia باين من اسمه تشوه عظمة الفخد بيأدى ان مفصل الفخد ميبقاش فى مكانه الصحيح فى الحوض لدرجة حدوث خلع جزئى او كلى حسب درجة التشوه، ودى بتتعرف عن طريق الأشعة وهنتطرق ليها تحديدا البوست الجاى.
طيب ايه اسباب الhip dysplasia دى🤔
الأبحاث اخر ٥٠ سنة اثبتت انه مرض مركب يعنى ليه
اسباب وراثية وأسباب بيئية، وان ١٥-٤٠٪بس من الكلاب اللى بتصاب بالمرض ده بتكون بسبب وراثى والباقى بسبب التنشئة الخاطئة والظروف البيئية الغير سليمة لتنشئة جرو تنشئة سليمة .
- طيب ما تقولنا كده ايه الأخطاء علشان نتفاداها
= بس كده يا سيدى عنيا
خلينا متفقين اولا ان فى دراسة عملتها الدكتورة Carol Beuchat ، الدراسة دى بتثبت ان كل الجراء بتتولد بفخد سليم ، لو الجرو عنده مشكلة وراثيه بتبان فى البداية غالبا .
أخطر مرحلة فى عمر الجراء هى اول ٨اسابيع
الجراء اللى بتتحرك على سيراميك او ارض مبلوله او اى سطح املس عرضه للإصابة اكتر من الجراوى اللى بتتربى على نجيله او ارض خشنة
كذلك الجراء اللى بتتولد فى الصيف اقل عرضه للاصابه من الجراء المولودة فى الشتا... لأنها بتطلع تتحرك وتجرى وتشوف الشمس وده مهم جدا .
ممنوع الجرو يطلع او ينزل سلم قبل عمر ٣شهور ويفضل تستمر اكتر من كده... ليه؟
ببساطة لأن المفصل فى السن ده بيبقى عبارة عن غضروف فاى حركة غلط تعمل مشكلة وبيبدأ الغضروف ده يتحول لعضم لحد ما يوصل ٦شهور بيبقى أتكون وبقى عضم فممكن تخلى كلبك ينزل السلم او يطلع لان خطورة الاصابه قلت كذلك لو عايز تجريه .
وفى دراسة اتعملت على ٥٠٠ كلب نيو فوند لاند ولابرادور
وجدوا ان الكلاب اللى بتطلع السلم قبل ٣شهور اكثر عرضه للاصابه من غيرها .
- طيب بمناسبة الجرى الرياضه صح ولا غلط؟
حسب نوع الرياضه يعنى الجرى الحر للجراء مفيد جدا لانه بيقوى العضلات و الاربطه
الرياضه غير المستحبه انك تجرى الكلب ورا التج او الكورة كتير .
من أهم أسباب الاصابه الوزن التقيل وعدم التغذية السليمة .
لذلك متفرحش ان كلبك وزنه زايد الوزن ده هياذيه وبإذن الله هننزل بوست عن التغذية السليمة للجراوى
وللموضوع بقية.... سلام عليكم
