30/08/2024
شرح بسيط لتطعيمات القطط 🤗
- التطعيمات اساسية ومهمة جدا لكل القطط سواء بتخرج من البيت أو مبتشوفش الشارع 😃 ، وحنقلكم ليه و إيه الأنواع الأساسية والأنواع اللي ممكن نستغنى عنها ، وامتى تتاخد ؟
أولا : إيه هو التطعيم :
التطعيم أو اللي بعض الناس بيسموه "تحصين "، عبارة عن تحفيز للجهاز المناعى للحيوان ضد الأمراض الخطيرة و المعدية و بالتالى الوقاية منها*
التطعيمات نوعين :
- تطعيمات اساسية ، ودي بتكون مهمة جدا لكل القطط سواء في البيت أو بيخرجوا ، وده لانها بتكون ضد أمراض صعبة علاجها جدا ، أو مميتة ، أو بتيجي بسهولة ومنتشرة جدا ، أو بتعرض الإنسان لخطورة وممكن تتنقله .
- تطعيمات غير اساسية ، ودي اللي بنرشحها للقطط اللي اسلوب حياتهم بيعرضهم للأمراض الكتير ، زي إنهم يكونوا بيخرجوا من البيت ، أو بيتعرضوا لحيوانات تانية كتير ، أو جسمهم معرض للإصابة بالأمراض دي .
التطعيمات الأساسية منها :
* تطعيم الرباعي ، وده بيكون ضد اربع أمراض اللي هم :
-ال feline panleukopenia: وده بيكون ضد فيروس البارفو ( للقطط )، و هو فيروس مميت .
- ال feline calicivirus و rhinotracheitis: ودول بيكونوا مسئولين على عدوى في الجهاز التنفسي ، واللي بتيجي للقطط في مرحلة اي من عمرها .
-ال Chlamydophila: ودي عدوى بكتيرية بتعمل مشاكل في العين .
* تطعيم السعار ، وده طبعا ضد مرض السعار، وهو مرض مميت ، ومش بيتنقل بس لحيوانات تانية ، ده كمان بسهولة ممكن يتنقل للإنسان عن طريق العض .
* امتى تطعم قطتك :
- تطعيم الرباعي: ممكن تديه للكتن من أول سن 8 أسابيع ، وبيتاخد بعد كده جرعتين كمان ، جرعة كل 21 يوم ( 3 اسابيع ) ، بعد كده التطعيم بيتاخد تاني بشكل سنوي .
- تطعيم السعار : حسب النوع اللي الطبيب البيطري بيستخدمه ، ممكن يتاخد عند سن شهرين أو 3 شهور ، وبعد كده بيتعاد سنويا .
ملحوظة :
-لو قطتك مع الجرعة التالتة للرباعي حيبقى عمرها حوالي ال ٣ او ال ٤ شهور ادي مع ااتطعيمة التالتة دي السعار عشان تريح بالك و ما تنساش و توفر اكتر و تديهم كل سنة مع بعض في جلسة واحدة.
- تطعيم السعار ممكن يعمل مناعة لمدة 3 سنين لكن الافضل إنه يتاخد سنويا .
بالنسبة للقطط الكبيرة اللي ماخدتش تطعيم خالص ، الطبيب البيطري هو اللي بيحدد عدد الجرعات و مواعيدها حسب حالة القط .
ملحوظة : البعض بيطلق على علاج الديدان أو الحشرات ، تطعيمات ، في الحقيقة دي مش تطعيمات ، دي مجرد ادوية بتتاخد بشكل شهري للوقاية من الديدان والحشرات أو لعلاجها .
* إيه اللي هيحصل لو متعمطش قطتك ؟
- بكل بساطة هتعرضها لأمراض صعبة العلاج جدا وممكن تؤدي للوفاه ، وهتعرض نفسك لخطورة العدوى منها .
* إزاي المرض ممكن يجي لقطتك لو مابتخرجش من البيت ؟؟
- عن طريقك ..!!
ممكن جدا لما حضرتك تخرج من البيت ، تدوس على فضلات قطه مصابة بالمرض ، وترجع بيها البيت ، في الحالة دي إنت وصلت المرض لقطتك في البيت وسهل جدا إنه يجيلها .
لوحابب تكشف على قطتك أو لو حابب تطعمها ، تقدر تشرفنا ف العياده.............🌹...............🌹...............🌹.............
▪️petsy care
446 اول شارع الهرم. بجوار مسجد نصر الدين
فوق نفق الهرم. امام محطه مترو الجيزة
📱:01022094326
