10/04/2018
المصحة
تكتب....
عارف
يعني ايه طب بيطري👹
كليه صعبة مش في دراستها بس..... تعالي اقولك
عارف يعني ايه تدرس طب وصيدلة وزراعه واحصاء تبع تجارة وكيمياء تبع علوم
عارف يعني ايه طول الوقت بتقارن بين كل الحيوانات تشريح وجراحة وباثولوجي وفسيولوجي
عارف يعني ايه لازم تقارن بين كل دول وبين الانسان كمان في اجزاء كتير من الدراسة
طب تعرف ان فيه ٢٠٠ مرض او يزيد اسمهم امراض مشتركة بتتنقل من الحيوان والطيور للانسان او العكس .يعني الدكتور البيطري بردو بيساعد في انه يعالج الانسان بطريق مش مباشر
طب عارف ان الطب البيطري زي طب الاطفال في وصفي
انا .انك تتعامل مع حالة لا عارفة تتوجع ولا عارفة تقولك مالها ولازم تكشف وتعالج صح
عارف انك تكون مسؤول ان اللحوم في المجازر توصل للمستهلك صح بدون امراض خطيرة زي السل مثلا
انك تكون مسؤول عن سلامة الفرخة في مزرعتها لحد ما توصل للمستهلك سليمة بدون حقن او هرمونات او غش تجاري
عارف يعني ايه تساعد فلاح بسيط رأس ماله كله في الحيوان اللي بيملكه ...ولو مات منه ممكن يضيع فعلا
عارف يعني ايه تنزل الاسواق تفتش عن اي منتجات فاسدة من لحوم او دواجن او اسماك او منتجاتهم عشان تحافظ علي كل انسان وممكن جدا تتعرض للاساءة من ناس ما بتفهمش
عارف يعني ايه تهتم ب مكافحة الكلاب والقطط الضالة واللي ممكن تكون سبب في وفاة اي شخص لو مصابه بالسعار مثلا
عارف يعني ايه تكون مسؤول انك تفحص كل حيوان في كل قرية لمرضي السل والبروسيلا .اللي هما موت مؤكد لاي شخص لو اصيب بيهم
تعرف ان الدكتور البيطري بيشرف علي اللحوم والدواجن بالمستشفيات لضمان سلامة وصول الغذاء للمرضي
تعرف ان الدكتور البيطري رغم تريقة ناس جهلة كتير جدا بانه دكتور بهايم ...انه في دول العالم الخارجي له مكانه اكبر من مكانه الاطباء هنا في مصر
طب عارف يعني ايه تكون مسؤول عن سلامة الغذاء عامة بانك تشرف علي منتجات الالبان في المصانع وشركات الالبان لضمان سلامة المنتج لصاحبه
تعرف ان الدكتور البيطري بيشارك في بعثات الحج والعمرة للكشف علي اللحوم المستهلكة لكل الحجاج
تعرف انهم بيهتموا جدا بعمل ارشاد متميز في كل مكان لتوصيل معلومة مهمة لكل انسان
طب تعرف ان الدكتور البيطري مستعد يروح الغيطان ويمشي في الطين عشان يولد حالة مش قادر تروح لحد الوحدة او ينقذ حيوان بيموت وما يهمهوش ساعتها الا المساعدة بغض النظر عن موضوع البريستيج ده
الدكتور البيطري مش حاجة بسيطة ولا قليلة ولا شوية
دا بيشارك في حمايتك وحماية بيتك وحماية ولادك وثروتك بشكل مباشر وغير مباشر
الدكتور البيطري اللي بيكون جوة المجزر في العيد الكبير وسط الدم والدبايح عشان يطمن الناس علي اللحوم وانت بتعيد ولابس جديد وبتزور اهلك
الدكتور البيطري اللي ناس كتير اتريقت هو بيكتب في الروشته اسم الحيوان ولا صاحبه.لا يا سيدي بيكتب ال٢ عشان اللي ما تعرفوش ان كل حيوان له بطاقة تأمين فيها نوعه وسنه وله رقم عارف ليه عشان لو مات او اتسم او اتسرق يقدر صاحبه بالبيانات دي ياخد تعويض ..فهمت يعني مش نكته
الدكتور البيطري مش دكتور بهايم ..اسمه دكتور بيعالج كل فصايل الحيوانات والطيور ..
الدكتور البيطري بيدرس الكلينكال باثولوجي باستفاضة وممكن يفتح معمل تحاليل .ويخدم عادي
الدكتور البيطري اللي في الجيش بيشرف علي مزارع ولحم القوات المسلحة اللي ناس كتير بتقول دا لحم مش تمام
الدكتور البيطري بيتعين في المحاجر والمواني والجمارك عشان يقولولك صفقة لحوم او دواجن صالحة ولا لا ..وتدخل البلد ولا لأ
يعني يستاهل جدا ترفعله القبعه
Samah nouh
8/4/2018
