25/12/2024
صباح الخير
معلومة حابب أوضحهالكم كتير منكم بيغلط فيها
لو شعر قططتك بيقع كتير أو ريحة بقها وحشة
الموضوع ملوش علاقة بالديدان
لو كانت الديدان السبب فهتكون بنسبة مش هتتخطى 5%
لكن مش كل ما واحد يقول قططتي شعرها بيقع تجهزي رد منتدى فتكات على لسانك وتقوليلها طعميها ديدان 😂
كذلك ريحة الفم الكريهة ملهاش علاقة بالديدان غير بنسبة قليلة جدا لا تذكر.
أمال أيه الأسباب؟!
أسباب تساقط الشعر:
ـ تغذية سيئة.
ـ هرمونات زي هرمونات التزاوج وهرمونات تانية بتحتاج تحاليل لتأكيدها.
ـ إسهال وترجيع بيسببوا دا نتيجة لنقص العناصر الغذائية اللي بيسببوها.
ـ اختلاف الفصول.
ـ أمراض جلدية زي الفطريات والحشرات.
ـ نقص فيتامينات ومعادن الجسم المسئولة عن الشعر زي فيتامين ه وسيلينيوم.
ـ الخوف والاسترس الناتج عن الخوف أو المرض أو الغيرة ......
أسباب رائحة الفم الكريهة:
ـ مشكلة في الفم مرضية زي الكاليسي فيرس.
ـ مشكلة في اللثة أو الأسنان زي التسوس.
ـ طبيعة الأكل اللي بيحتوي على توابل أو بيعمل تخمر زي اللانسون والبيض ...
ـ مشكلة في الأنف زي التهاب الجيوب الأنفية.
ـ مشكلة في المعدة أو الجهاز الهضمي ناتجة عن حالة مرضية زي الإسهال أو قرحة .....
