29/04/2024
✨️ზოომაღაზიათა ქსელის - "ზოოარეას" დამფუძნებლების ინტერვიუ, ერთ-ერთ პოპულარულს გამოცემაში 'ბიზნეს სახელები Faces&Names' ✨️🧡 გაეცანით, ჩვენი ბრენდის შექმნის საინტერესო ისტორიას🫶
„ზოოარეა“ - სტანდარტი, რომელიც მიღწეულია
ყველაფერი ერთი პატარა ზოომაღაზიით დაიწყო: 2021 წელს, ჩარგლის ქუჩაზე, როგორც დღეს იხსენებენ, „სასაცილოდ პატარა ფართში“. ცოტა ხანში აღმოაჩინეს, რომ საქმე, რომელიც ერთი შეხედვით მარტივ ბიზნესს ჰგავდა, სინამდვილეში მულტიკომპლექსური გამოდგა და პროფესიით იურისტ ლევან მიქელაძეს, ბრენდის სპეციფიკასთან ერთად, გზადაგზა ცხოველთა ანატომიის, ქცევის, ზოგადად ბიოლოგიის და ნუტრიციოლოგიის შესწავლა მოუხდა. პროფესიით აგროტექნოლოგ გიორგი ქარელს დისტრიბუციაში ჰქონდა გამოცდილება.
არსებული, ნასწავლი და საქმეში გზადაგზა მიღებული გამოცდილების შედეგია დღეს „ზოოარეას“ 17 მაღაზია, 30-მდე დასაქმებული თანამშრომელი, ცენტრალური და დამატებითი სასაწყობე ფართები, შიდა დისტრიბუციასთან ერთად. ქსელს, რომელიც ა, ბ და ც კატეგორიის ობიექტებს აერთიანებს, აქვს თავისი ინდივიდუალური სტილი. ამ სტილის ნაწილია დაგროვებითი ბარათი, თითოეული ოთხფეხა მომხმარებლის შესახებ საინფორმაციო ბაზა და ა.შ.
კომპანიის ნოუ-ჰაუა სასუსნავები, ე.წ. „სნექები“, რომლებსაც თვითონვე აწარმოებენ საინტერესო კონცეფციით: თითოეული დასახელება საქართველოს სხვადასხვა კუთხისთვის დამახასიათებელ გემოს (ინგრედიენტს) შეიცავს.
კვების პროდუქტების წარმოების მიმართაც პოლიტიკა თავიდანვე ცალსახად განისაზღვრა: კომპანია სამომავლოდ თვითონ გამხდარიყო კვების პროდუქტების ექსპორტიორი. შეიძლება დაუჯერებლად ჟღერდეს, მაგრამ ახლო მომავალში არა მარტო საქართველოში, შესაძლოა, უცხოეთის ქვეყნებში, მაგალითად, დიდი სავაჭრო მოლებში ნახოთ სპეციალური აპარატები, „ზოოარეას“ მიერ წარმოებული და ექსპორტირებული ცხოველთა საკვებით.
„ყოველთვის ვეძებდი სფეროს, რომ რაღაც სიამოვნებით მეკეთებინა და არა მხოლოდ ფინანსური მოგებისთვის,“ — ასე იწყებს „ბიზნეს-სახე(ლ)ებთან“ საუბარს „ზოოარეას“ დამფუძნებელი ლევან მიქელაძე, რომელმაც გარისკა და ახალი ბიზნესი საკმაოდ მცირე თანხით წამოიწყო (თანაც — პანდემიის პერიოდში). იგივეს ურჩევს სხვებსაც: იფიქრონ, რა სფეროში ყოფნა მიანიჭებთ სიამოვნებას და გაბედონ საქმის წამოწყება.
ლევან მიქელაძე: ალბათ, პირველი ნაბიჯის გადადგმას ბიზნესში ართულებს ისიც, რომ საზოგადოება არ პატიობს შეცდომას ადამიანებს. ცხადია, ნებისმიერ ბიზნესს აქვს რისკი: ან გამოგივა, ან არა, მაგრამ მთავარია, დანაკარგი არ იყოს დიდი. თუ პირველივე ნაბიჯს დგამ იმ გათვლით, რომ არ უნდა შეგეშალოს, ასე ვერ გახვალ ფონს. უნდა შეგეშალოს, რომ მერე უფრო დიდ საქმეებში არ შეგეშალოს. ბიზნესისთვის აუცილებელია თვითდისციპლინა. საკუთარ „მე“-ს უნდა გადაახტე, რომ საქმე ააწყო.
- სამი წელი ამ ბიზნესში ცოტა არ არის. საინტერესოა, როგორია თქვენი თვალით დანახული მომხმარებელი: ვინ დგას თქვენი ოთხფეხა მომხმარებლების უკან, ვითარდება თუ არა მომხმარებელიც სფეროს კვალდაკვალ?
- დავიწყებ შედარებით ნეგატიური დასკვნით: ჩვენთან შემოსულ მომხმარებელს ხვდება კვალიფიციური კადრი და იღებს კონსულტაციას, რაშიც კლინიკაში ფულს იხდის, მაგრამ ზოგჯერ მაინც არ ითვალისწინებს ჩვენს აზრს: უნდა ის, რაც თავად უნდა! ჯიუტია, ან სხვასთან მიღებულ ცუდ გამოცდილებას ავტომატურად ავრცელებს ჩვენზეც. ეს ზოგადი პრობლემაა: დღეს ბაზარზე თავდაცვის ინსტიქტი უფრო აქვს კლიენტს და შესაბამისად, მიმღებლობა აქვს დაბალი. რაც შეეხება პოზიტიურ დაკვირვებებს: მომხმარებელი ძალიან გაიზარდა, ჩვენ ძირითადად უბნის მაღაზიები გვაქვს და ყოველდღიურად გვიწევს მათთან კომუნიკაცია. ბევრ კითხვას სვამს, გათვითცნობიერებულია. ჩვენ გვენდობა ჩვენი მომხმარებელი და ეს უკვე დიდი მიღწევაა. სოცმედიაში ხშირად გვწერენ: „გახსენით მაღაზია ჩვენს უბანშიც“, რაც ძალიან გვახარებს.
- მოდით, თქვენს სფეროში კადრებზეც ვისაუბროთ (რის გამოც, შესაძლოა, მომხმარებელს ხშირად ჰქონდეს ცუდი გამოცდილება). ჩემი გამოცდილებაც ასეთია: ხშირად აღმო- მიჩენია ზოომაღაზიაში შესულს, რომ გამყიდველი სრულიად არაკომპეტენტურია და ძალიან შორს მყოფი — ცხოველთა სამყაროსგან. თქვენ როგორ მოაგვარეთ ეს საკითხი?
- მუდმივი ტრენინგებით. საამისოდ გვყავს კონსულტანტი, სხვადასხვა ვეტერინარულ კლინიკებში მუშაობის დიდხნიანი სტაჟით, პროფესიით ნუტრიციოლოგი და ის ატრენინგებს ჩვენს თანამშრომლებს. ნომერ პირველი ამოცანაა, ჩვენი მომხმარებლები და მათი ოთხფეხა მეგობრები იყვნენ კმაყოფილები. ამ სამი წლის მანძილზე ბევრი სასიამოვნო აღმოჩენა გვქონდა კადრების მხრივ. თუნდაც ის, რომ მოსულა ადამიანი სამუშაოდ, რომელსაც მანამდე არ ჰქონია ცხოველთან შეხება და აქ მუშაობის პროცესში აუყვანია შინაური ცხოველი, ძალიან შეუყვარებია. ამის ყურება ძალიან სასიამოვნოა.
- რა გხდით ამ ბაზარზე უპირატესს? რა არის თქვენი უპირატესობა?
- კარგი სამუშაო გარემოს შექმნა თანამშრომლებისთვის, ნორმალური ხელფასი, ექსკლუზიური ფასი ერთ სივრცეში თავმოყრილ მრავალფეროვან, ქვეყანაში შემომავალ ყველა ბრენდზე. თვითმოტივაცია გვაქვს, რომ შევქმნათ საუკეთესო ბრენდი, შევცვალოთ კლიენტის დამოკიდებულება, ხელმისაწვდომი გავხადოთ მომხმარებლისთვის პროდუქტი და აქ მომუშავე ადამიანები იყვნენ კმაყოფილები. ..
ინტერვიუს პროცესში ლევან მიქელაძე და გიორგი ქარელი ბევრ ისეთ საკითხს შეეხნენ, რაც პრობლემატურია ამ სფეროსთვის, ზოგადად, საზოგადოებისთვის და როგორც პატრონიანი, ასევე - მიუსაფარი ცხოველებისთვის.
„დაახლოებით ისეთივე სიტუაციაა ამ სფეროში, როგორიც - 90-იანებში იყო ზოგადად ქვეყანაში,“ - ამბობენ, თუმცა იმასაც აღნიშნავენ, რომ სახელმწიფოს მხრიდან ბევრი ქმედითი ნაბიჯი იდგმება არსებული პრობლემების მოსაგვარებლად. აღნიშნავენ საზოგადოების როლსაც ამ პროცესში:
გიორგი ქარელი: მაგალითად, სახელმწიფოს მხრიდან აქტიურად მიდის ქუჩის ძაღლების სტერილიზაციის პროცესი, მაგრამ ცხადია, ეს საკმარისი არაა: მშიერი ძაღლი ყოველთვის იქნება აგრესიული. საზოგადოებამ უნდა ისწავლოს ქუჩის ძაღლებთან თანაცხოვრება, მათზე ზრუნვა. უნდა ვიყოთ ბევრად ემპათიურები და რასაკვირველია, უნდა გაჩნდეს ბევრი კერძო თავშესაფარი. აღსანიშნავია, რომ ამ კუთხითაც იგრძნობა ქვეყანაში წინსვლა, დღითი დღე მაღლდება ცხოველების მოვლის კულტურა. ცხოველები აღარ აჰყავთ მხოლოდ გასართობად, საკუთარი ეგოს დასაკმაყოფილებლად, როგორც ეს ადრე ხდებოდა მასობრივად და მერე ასეთი ცხოველი აღმოჩნდებოდა ხოლმე ქუჩაში.
წლის ბოლომდე 30-მდე მაღაზია, იმ სტანდარტის დახვეწა და ამაღლება, რა სტანდარტიც უკვე დანერგეს და საკუთარი და თანამოაზრეების რესურსით და ძალისხმევით სფეროს გამოყვანა 90-იანებიდან - ეს „ზოოარეას“ გეგმაა.
არის კიდევ ერთი საინტერესო გეგმა: დედაქალაქში კატების კაფის - თერაპიული ადგილის გაჩენა კატების მოყვარულთათვის. ოღონდ, როგორც თავის დროზე ამ ბიზნესის დაწყების წინ, ახლაც ეს საკითხი შესწავლის პროცესშია. ზოომაღაზიები, შინაური ცხოველების საკვები ექსპორტზე და კატების კაფე: ეს უკვე ისაა, რაზეც ლევან მიქელაძე საუბრობდა დასაწყისში: საქმე, რომელშიც სიამოვნება და ბიზნესი თანაბრადაა.
ფოტოზე:
ლევან მიქელაძე, შპს „ზოოარეა“-ს დამფუძნებელი;
გიორგი ქარელი, შპს „ზოოარეა“-ს ფინანსური დირექტორი
გოგა ჩანადირის ფოტო
