28/02/2024
DE GRONDSTEEN LEEËN
Mir vermëttelen nawell net wéineg Déieren hei am Déierenasyl zu Gaasperech. 159 Muppen an 290 Kazen sinn d’lescht Joer bei eis adoptéiert ginn. Leider hu mir awer grad bei den Hënn ëmmer rëm de Fall, dass d’Leit de Mupp schon no ganz kuerzer Zäit zeréckbréngen. Meeschtens ass iirgendeppes schief gelaf oder den Hond huet d’Erwaardungen net erfëllt. Zwar sti mir de Leit während den 2 Woche Proufzäit (an doriwwer eraus) permanent fir Froen zur Verfügung, ma et gewënnt een einfach den Androck, dass et oft um Versteesdemech fir d’Problemer vum „Occasiounshond“ feelt.
De gréisste Problem, an dat mat Ofstand, ass d’Zäit, respektiv d’Gedold. En Hond brauch seng Zäit fir sech an enger neier Liewenssituatioun zurecht ze fannen a sech anzeliewen. An der Regel kann ee vun 3-4 Deeg ausgoen, ier den Hond iwwerhaapt mol verstanen huet, dass hien elo an dem neien Doheem bleiwe soll. Déi éischt Deeg sinn oft immens chaotesch, den Hond wees net wouhi mat sech selwer an d’Leit wëssen oft net wouhi mam Hond. Well de Mupp net wees, wat genau hien lo erwaard, spillt hie gäre mol säi ganze Repertoire vu Verhalen of, ob de Mënsch dat fir sënnvoll hält oder net.
Fir de Start an dat neit Liewen sou einfach wéi méiglech ze maache, wollte mir Iech hei e puer Rotschléi mat op de Wee ginn:
- Wa méiglech, leet de Rendez-vous fir den Ufank vun der Proufzäit op en Dag, wou Dir Iech secher kënnt sinn, dass Dir dem Hond an de nächsten Deeg voll Opmierksamkeet schenke kéint. Idealerweis huelt Dir Iech e puer Deeg Congé dofir.
- Uschléissend un den éischte Punkt muss awer direkt gesot ginn, dass et net sënnvoll ass, dem Hond an den éischten Deeg eng rieseg Party ze bidden. Fir dass beim Mupp keng falsch Erwaardungen opkommen, sollt Dir éischter probéieren, den eigentlechen Alldagsrhytmus sou gutt wéi méiglech ze simuléieren. Wen sech e puer Woche Congé hëllt an all Dag mam Hond stonnelaang duerch d’Géigend leeft, an d’Vakanz fiert an och soss sech alles de léiwe laangen Dag ëm den Hond dréint, dee brauch sech net ze wonneren, wann den Hond den éischten Dag nom Congé aus lauter Frust eraus d’Bud auserneen hëllt.
- Vermeid et, fir an den éischten Deeg onnéideg Besuch ze kréien. Den Hond soll säin enke Krees, seng nei Famill a Bezugspersoune kenne léieren, genau wéi déi normal Dynamiken an Ofleef am Haushalt. De Monni drëtte Grades kann och e puer Woche méi spéit laanschtkomme, fir de neie Familljemember ze begréissen.
- Setzt Iech virun der Proufzäit als Haushalt zesummen a leet Regelen a Strukture fest. Hënn brauchen e stabile Kader, an dem se agéiere sollen. Beschléisst zesummen, um wéivill Auer den Hond rausgeet, ween wéieng Aufgaben iwwerhëllt, ob den Hond dann elo op de Canapé dierf oder net, a sou weider. Schreiwt et op, da kann herno kee behaapten, en hätt et net gewosst.
- Dréint den Hond net onnéideg op. Déi ganz Ëmstellung ass fir den Hond ustrengend a spannend genug. Do brauch et keng Ballspiller, Agility-Stonnen oder Gruppespadséiergäng fir den neie Kolleg auszelaaschten. Déi éischt Deeg sollten am Zeeche vun der Rou stoen. Rou doheem halen, gemitterlech e puermol den Dag kuerz raus, kloer Strukturen am Dagesoflaf an etabléiere vun den Hausreegelen. Bei Hënn mat wierklech groussem Besoin fir ausgelaascht ze ginn, si Schnoffelspiller déi bescht Alternativ. Fir de Rescht heescht et Netflix un an op de Canapé, an den Hond entweder rop invitéieren oder ëmmer rem rofgeheien, je nodeem, wat Dir am Virfeld decidéiert hudd.
- Wann de Mupp eis bekannte Naupen huet, da weise mir Iech natierlech dorop hin a ginn och Tipps dozou, wéi een dogéint schaffe kann. Déi éischt Deeg sinn e gudden Zäitpunkt, fir sech lues a lues mol un déi Saache runzetrauen an éischt Trainingsschrëtt ze ënnerhuelen, wann de Mupp da schon dozou bereed ass. Hei ass et awer wichteg ze soen, dass een absolut net erwaarde sollt, de Problem innerhalb vun 2-3 Deeg aus der Welt geschaf ze hunn. Dat ass irrealistesch a setzt falsch Erwaardungen un de Mupp, déi dëse ganz secher net erfëlle kann.
- Wann et aus iirgendwelche Grënn absolut net klappt, kann et heiansdo hëllefen, fir einfach mol eng Nuecht iwwer de Problem ze schlofen. Zäit heelt Wonnen an och Hënn kënne mol e schlechten Dag hunn.
Fir ze resuméieren, kann een amfong soen, dass een als neie Besëtzer alles mat der Rou soll ugoe loossen. Hënn liewe 15 Joer, et besteet kee Besoin, fir sech an den éischte Wochen Zäitdrock ze maachen. Et kann een dat amfong gudd mat enger neier Léift vergläichen. Hei ass et jo och net de But, fir no 2 Woche bestued ze sinn an all Sträit scho gestridden ze hunn. Bezéihunge brauchen Zäit, ob ënner Mënschen oder mat Hënn. A wann een net méi weider wees, dann huet een am beschten eng Kéier déif Loft ze huelen an einfach no Hëllef ze froen, mir si fir Iech an de Mupp do.
----------------
Foto: Pixabay
