What are the opening hours?

Monday 08:00 - 16:00 Tuesday 08:00 - 16:00 Wednesday 08:00 - 16:00 Thursday 08:00 - 16:00 Friday 08:00 - 16:00 Saturday 08:00 - 16:00 Sunday 08:00 - 16:00

Yadanarbon Zoo, 12st , bt 70st x 73st , Aung Myay Thar San Township, Mandalay (2025)

Q: What is the address?

12st , Bt 70st X 73st , Aung Myay Thar San Township

14/12/2023

အပြည်ပြည်ဆိုင်ရာ မျောက်များနေ့
(International Monkey Day) ၊🐒🐒🐒

ဒီဇင်ဘာလ(၁၄)ရက်နေ့၊ မျောက်များနေ့(Monkey Day)မှာ တိရစ္ဆာန်ဥယျာဉ်ထဲက မျောက်လေးတွေအကြောင်းကို ဗဟုသုတအနည်းငယ်မျှဝေချင်ပါတယ်။

မျောက်တွေကို အမြီးပါမျောက်နှင့် အမြီးမပါမျောက်ဟူ၍ နှစ်မျိုးခွဲခြားထားပါတယ်။ ဒါ့အပြင် အမြီးပါ မျောက်တွေကိုလည်း(၂)မျိုးပြန်ပြီး ထပ်မံခွဲခြားထားပါတယ်။

ဒီနေ့ကျရောက်တဲ့ မျောက်များနေ့(Monkey Day) မှာ အမြီးပါမျောက်ကလေးတွေအကြောင်းကို ဗဟုသုတအနည်းငယ် မျှဝေပါရစေ…

ပထမဦးဆုံးအနေနဲ့…အမြီးပါမျောက်တွေကို…အင်္ဂလိပ်လို(Monkeys) လို့ခေါ်ပြီး၊ အမြီးမပါတဲ့ မျောက်တွေကိုတော့ (Ape) လို့ခေါ်ပါတယ်။

အမြီးပါမျောက်နှင့် အမြီးမပါ မျောက်တွေကို သတ္တဗေဒဘာသာရပ်အခေါ်ဝေါ်အနေနဲ့ မျိုးစဉ်(Order) လိုခေါ်တဲ့ ၊ ပရိုင်းမိတ် (Primates) အတွင်းမှာ ပါရှိတဲ့အတွက် ကျွနှ်ပ်တို့လူသားတွေနဲ့ မျိုးစဉ်တစ်ခုတည်းမှာ အတူတည်ရှိနေတာကြောင့် မျောက်တွေဟာ လူတွေနဲ့ပိုမိုနီးစပ်ပြီး အခြားသောတိရစ္ဆာန်များထက် အသိဉာဏ်ကိုမိုမြင့်မားကြပါတယ်။

အမြီးပါတဲ့မျောက်တွေကို ထပ်မံပြီးခွဲခြားပြရရင် ကမ္ဘာဟောင်းမျောက်(Old World Monkeys) နှင့် ကမ္ဘာသစ်မျောက်(New World Monkeys) ဆိုပြီး (၂)မျိုးထပ်မံခွဲခြားကြပြန်ပါတယ်။

ကမ္ဘာသစ်မျောက်တွေဟာ တောင်အမေရိကတိုက်ထဲမှာနေထိုင်ပြီး ကမ္ဘာဟောင်းမျောက်တွေကတော့ အာရှတိုက်နှင့် အာဖရိကတိုက်တွေမှာ နေထိုင်ကြပါတယ်။

ကမ္ဘာသစ်မျောက်နဲ့ ကမ္ဘာဟောင်းမျောက်တွေကို ယခုလို ခွဲခြားလေ့လာနိုင်ပါတယ်။

ကမ္ဘာဟောင်းမျောက် :

▫️အစာသိုလှောင်နိုင်သည့် ပါးစောင်အိတ်ပါရှိသည်။
▫️အမြီးပါရှိသော်လည်း ထိုအမြီးဖြင့် သစ်ပင်/သစ်ကိုင်းများကို မတွယ်ချိတ်နိုင်ပါ။
▫️နှာခေါင်းပေါက်တစ်ခုနှင့် တစ်ခုနီးကပ်သည်။
▫️တင်ပါးချပ်ပါရှိသည်။
▫️မြေပင်နှင့် သစ်ပင်များပေါ်တွင် နေထိုင်သည်။
▫️အရောင်မျိုးစုံကို မြင်နိုင်စွမ်းရှိသည်။
▫️ကမ္ဘာသစ်မျောက်ထက် များစွာအရွယ်အစား ကြီးမားပါသည်။

ကမ္ဘာသစ်မျောက် :

▫️အစာသိုလှောင်နိုင်သည့် ပါးစောင်အိတ်မပါရှိပါ။
▫️သစ်ပင်ကိုချိတ်လို့ရသည့်အမြီးပါရှိသည်။
▫️နှာခေါင်းပေါက်တစ်ခုနှင့်တစ်ခု ကွာဝေးသည်။
▫️တင်ပါးချပ်မပါရှိပါ။
▫️သစ်ပင်များပေါ်တွင် အနေများပါသည်။
▫️အရောင်မျိုးစုံကို မြင်နိုင်စွမ်းမရှိပါ။
▫️ကမ္ဘာဟောင်းမျောက်များထက် အရွယ် အစားသေးငယ်ပါသည်။

ဒီလိုကွဲပြားခြားနားချက်တွေကို သိပြီးပြီးဆိုရင်တော့ တိရစ္ဆာန်ဥယျာဉ် (ရတနာပုံ) ကို အလည်ရောက်ခဲ့ရင် ကမ္ဘာဟောင်းမျောက်တွေနဲ့ အမြီးမပါတဲ့(Ape) လို့ခေါ်တဲ့ မျောက်မျိုးစိတ်တွေအကြောင်း ခွဲခြားလေ့လာမှတ်သားကြည့်ကြဖို့ မမေ့နဲ့ဦးနော် 🤗🤗🤗

07/12/2023

🇲🇲 အမျိုးသားနေ့ ဒို့မမေ့ 🇲🇲
🎉 𝐇𝐚𝐩𝐩𝐲 𝐌𝐲𝐚𝐧𝐦𝐚𝐫 𝐍𝐚𝐭𝐢𝐨𝐧𝐚𝐥 𝐃𝐚𝐲 🎉
၂၀၂၃ခုနှစ်၊ ဒီဇင်ဘာလ ၇ရက်၊ ကြာသပတေးနေ့တွင် ကျရောက်သော
(၁၀၃)ကြိမ်မြောက် အမျိုးသားအောင်ပွဲနေ့အား ဂုဏ်ပြုကြိုဆိုရင်း
မြန်မာပြည်သူပြည်သားများအားလုံး ကိုယ်စိတ်နှစ်ပါး ရွှင်လန်းချမ်းမြေ့ကြည်သာကြစေကြောင်း တိရစ္ဆာန်ဥယျာဉ် (ရတနာပုံ) မိသားစုမှ တောင်းဆုမေတ္တာပို့သအပ်ပါသည်။

27/11/2023

တန်ဆောင်မုန်းလပြည့်နေ့ (သာမညဖလအခါတော်နေ့)

သာမညဖလသုတ်ခေါ် (ရဟန်းပြုခြင်း၏ အကျိုးတရားကို) မြတ်စွာဘုရားသည် အဇာတသတ်မင်းအား တန်ဆောင်မုန်းလပြည့်နေ့တွင် ဟောပြောတော်မူသည်ကို အကြောင်းပြု၍ တန်ဆောင်မုန်းလပြည့်နေ့ကို သံဃာတော်များနေ့ (သာမညဖလအခါတော်နေ့) ဟု သတ်မှတ်ကျင်းပကြခြင်း ဖြစ်ပါတယ်။
မြန်မာသက္ကရာဇ် ၁၃၈၅ခုနှစ်၊ တန်ဆောင်မုန်းလပြည့်(သမညဖလအခါတော်)နေ့မှာ မြန်မာပြည်သူပြည်သားများအားလုံး ကိုယ်စိတ်နှစ်ပါး ရွှင်လန်းချမ်းမြေ့ကြည်သာပြီး မိမိတို့လိုရာဆန္ဒများပြည့်ဝကြစေကြောင်း တိရစ္ဆာန်ဥယျာဉ် (ရတနာပုံ) မိသားစုမှ တောင်းဆုမေတ္တာပို့သအပ်ပါသည်။

22/11/2023

ဖျံမွေးချော / ဖျံဘဲလက်(Smooth Coated Otter)

မြန်မာအမည်-ဖျံမွေးချော / ဖျံဘဲလက်
အင်္ဂလိပ်အမည်-Smooth Coated Otter
သိပ္ပံအမည်-Lutrogale perspicillata

🌎 ကမ္ဘာကြီးဟာ 🌳 သစ်တောများ ၊ ⛰️ တောင်တန်းများ ၊ 🏞️ မြေပြန့်လွင်ပြင် ၊ 🏜️ကန္တာရ နှင့် ကမ်းရိုးတန်းဒေသ တို့အပြင် ကျယ်ပြောလှသော ပင်လယ်သမုဒ္ဒရာတို့နှင့်အတူ 🌻 လှပစွာဖွဲ့စည်းထားပြီး လူသားများအပြင် အခြားသောသက်ရှိ ဇီဝမျိုးစုံမျိုးကွဲများ ရှင်သန်ပေါက်ဖွားကျက်စားနေထိုင်ရာနေရာလည်း ဖြစ်ပါတယ်၊

🦦 သဘာဝဂေဟစနစ်ကြီးတွင် အလွန်အရေးကြီးသော အခန်းကဏ္ဍမှပါဝင်နေသည့် မျိုးစိတ်တစ်မျိုးမှာ ဖျံမျိုးစိတ်များ ဖြစ်ကြပါတယ်၊

🦦 ဖျံမျိုးစိတ်များဟာ ရေအရည်အသွေးနှင့် အခြားသောဇီဝမျိုးစုံမျိုးကွဲတို့ ပေါများခြင်း/ ရှားပါးခြင်း တို့၏ အမှတ်သင်္ကေတ လက္ခဏာကိုပြသပေးသည့်အတွက် တောရိုင်းတိရစ္ဆာန်ထိန်းသိမ်းရေး လုပ်ငန်းများလုပ်ဆောင်သည့်အခါ အညွှန်းကိန်းပြ သင်္ကေတမျိုးစိတ် (Indicator species) အဖြစ် သတ်မှတ်ကြပါတယ်။

🦦 ဖျံများဟာ သွက်လက်သော ပင်ကိုယ်သဘာဝနှင့်အသိဉာဏ်မြင့်မားသော မျိုးစိတ်တစ်မျိုး ဖြစ်ပြီး မြစ်ချောင်းများတွင် နေထိုင်သော မြစ်ဖျံ (River Otter) နှင့် ပင်လယ်ထဲတွင် နေထိုင်သော ပင်လယ်ဖျံ (Sea Otter) ဟူ၍ (၂)မျိုးရှိပါတယ်၊

🦦 ဖျံများဟာ ၎င်းတို့၏ သွယ်လျရှည်လျားသော ခန္ဓာကိုယ် ဖွဲ့စည်းတည်ဆောက်ပုံကြောင့် ရေထဲတွင် လျင်မြန်စွာ သားကောင်ရှာဖွေနိုင်ကြပါတယ်၊

🦦 ဖျံများဟာ ရေထဲတွင် အမဲလိုက်ရာ၌ မျိုးစိတ်အပေါ်မူတည်၍ ၄င်းတို့၏ နှာခေါင်းနှင့် နားတို့ကို ပိတ်ထားနိုင်ပြီး ရေအောက်တွင် ၅မိနစ်မှ ၈မိနစ်ထိ အသက်မရှုဘဲ နေထိုင်နိုင်ပါတယ်၊

🦦 ဖျံမျိုးစိတ် (၁၃) မျိုးထဲမှ ( ၄ ) မျိုးတို့ဟာ Endangered (မျိုးသုဉ်းရန် အန္တရာယ်ရှိသော မျိုးစိတ်) အဖြစ်သတ်မှတ်ခြင်းခံရပြီးဖြစ်ပါတယ်၊

🦦 လူသားများနေထိုင်ရာ ကမ္ဘာကြီး၏ ဂေဟစနစ်ကို ထိန်းသိမ်းရာတွင် အရေးပါသော ဖျံမျိုးစိတ်များအား အချိန်မီ ထိန်းသိမ်းကာကွယ်စောင့်ရှောက်ရန် အထူးလိုအပ်လျက်ရှိပါတယ်၊

🦦 လူသားများအနေဖြင့် ထိရောက်စွာ ကာကွယ်ထိန်းသိမ်းစောင့်ရှောက်မည်ဆိုပါက မျိုးသုဉ်းပျောက်ကွယ်မည့်အန္တရာယ်နဲ့ ရင်ဆိုင်နေရသော မျိုးစိတ်များ၏ အရေအတွက်ကို လျှော့ချနိုင်မည်ဖြစ်ပြီး မျိုးသုဉ်းမည့်အန္တရာယ်မှ ကင်းဝေးနိုင်မှာလည်းဖြစ်ပါတယ်၊

တိရစ္ဆာန်ဥယျာဉ် (ရတနာပုံ)မှာ
နို့တိုက်သတ္တဝါ၊ တွားသွားသတ္တဝါ၊ ရေနေသတ္တဝါများနှင့် ကျေးငှက်မျိုးစိတ်များကို ထိန်းသိမ်းစောင့်ရှောက်လျက်ရှိတာမို့ မိသားစု၊ သူငယ်ချင်းများနဲ့အတူတူ အပန်းဖြေလည်ပတ်ဖို့ လှိုက်လှဲစွာဖိတ်ခေါ်လိုက်ပါတယ်။ 🤗🤗🤗

18/11/2023

ဆတ်ကျွဲငယ် (Common Wildebeest)

မြန်မာအမည်-ဆတ်ကျွဲငယ်
အင်္ဂလိပ်အမည်-Common Wildebeest or Blue Wildebeest
သိပ္ပံအမည်-Connochaetes taurinus

ဆတ်ကျွဲငယ်များသည် ကျွဲ၊ နွားအုပ်စုဝင် တိရစ္ဆာန်များ ဖြစ်ကြပြီး ကျယ်ပြန့်သော လက်ပြင်၊ ဦးချို(ဂျို)နှင့် ကြီးမားကျယ်ပြန့်သည့် နှုတ်သီးများ ပါရှိပါတယ်။ ဦးချို(ဂျို)များသည် အကာအကွယ်မရှိ ကွင်းခတ်ထားသောပုံစံရှိပြီး အထီးများသည် အမများ၏ဦးချို(ဂျို)ထက် ပိုမိုတုတ်ခိုင်ထူထဲပါတယ်။ ဆတ်ကျွဲများတွင် တုပ၍မရသော အနက်ရောင် ဒေါင်လိုက်အစင်းကြောင်းများသည် လက်ပြင်တစ်လျှောက်မှ ဝမ်းဗိုက်နောက်ပိုင်းအထိ ပါရှိပါတယ်။ ယေဘူယျအားဖြင့် ဆတ်ကျွဲများတွင် အဖြူမှ အညိုရင့်ရောင် လည်ဆံမွေးနှင့် မုတ်ဆိတ်မွေးများပါရှိပါတယ်။ ခန္ဓာကိုယ်ပေါ်တွင် ပြာလဲ့လဲ့အရောင်များပြေးနေသည့်အတွက် အပြာရောင်ဆတ်ကျွဲ (Blue Wildebeest) ဟု လည်း ခေါ်ဆိုကြပါတယ်။
ဆတ်ကျွဲများသည် မြက်ကိုသာ အဓိကစားသုံးကြပြီး အသီးအရွက်စား သတ္တဝါဖြစ်ပါတယ်။ အစာရေစာရှားပါးလာသည့်အခါ အစာရရှိနိုင်သည့် နေရာများဆီသို့ ကီလိုမီတာရာနှင့်ချီ သွား‌၍ ရှာဖွေစားသောက်တတ်ပါတယ်။ တစ်နှစ်လျှင်တစ်ကြိမ်သားပေါက်ပြီး တစ်ကောင်သာမွေးပါတယ်။ သက်တမ်းအားဖြင့် နှစ်ပေါင်း(၂၀)ခန့်ထိ နေထိုင်နိုင်ပါတယ်။
တိရစ္ဆာန်ဥယျာဉ် (ရတနာပုံ)မှာ
နို့တိုက်သတ္တဝါ၊ တွားသွားသတ္တဝါ၊ ရေနေသတ္တဝါများနှင့် ကျေးငှက်မျိုးစိတ်များကို ထိန်းသိမ်းစောင့်ရှောက် ပြသထားရှိပါတယ်။ သူငယ်ချင်း၊ မိသားစုများနှင့်အတူ အနားယူအပန်းဖြေလည်ပတ်နိုင်ဖို့ တိရစ္ဆာန်ဥယျာဉ် (ရတနာပုံ) ကို လာရောက်လည်ပတ်ဖို့ လှိုက်လှဲစွာဖိတ်ခေါ်လိုက်ပါတယ်။🤗🤗🤗

16/11/2023

မလေးရှားနိုင်ငံ၊ Penang၊ Taiping၊ Grand Baron Hotel တွင် (၅−၁၁−၂၀၂၃)ရက်နေ့မှ (၈−၁၁−၂၀၂၃)ရက်နေ့အထိ ကျင်းပပြုလုပ်သည့် အာရှနှင့် အာဆီယံဒေသတွင်း တိရစ္ဆာန်ဥယျာဉ်များနှင့် ငါးပြတိုက်များအစည်းအရုံး (Southeast Asia Zoos and Aquariums Association-SEAZA) ၏ အကြိမ် (၃၁) ကြိမ်မြောက်ညီလာခံကို အစည်းအရုံးအဖွဲ့ဝင်နိုင်ငံဖြစ်သည့် မြန်မာနိုင်ငံမှ နိုင်ငံကိုယ်စားပြု Htoo Zoos and Gardens Business Unit မှ အမှုဆောင်အရာရှိချုပ် (CEO) နှင့် ဝန်ထမ်းများ၊ မွေးမြူရေးဆိုင်ရာဆေးတက္ကသိုလ်မှ ပါမောက္ခ (ဌာနမှူး)နှင့် သစ်တောဦးစီးဌာန (ရန်ကုန်တိုင်း)မှ ဒုတိယညွန်ကြားရေးမှူး၊ စုစုပေါင်း (၁၅) ဦး တက်ရောက်ခဲ့ကြပါတယ်။ အဆိုပါညီလာခံတွင် နိုင်ငံပေါင်း (၂၅) နိုင်ငံမှ တက်ရောက်သူ (၂၅၉) ဦးရှိခဲ့ပြီး သုတေသနစာတမ်းပေါင်း (၅၉) စောင် ဖတ်ကြားခဲ့ပါတယ်။ မြန်မာနိုင်ငံကိုယ်စားပြု Htoo Zoos and Gardens Business Unit မှ သုတေသနစာတမ်း (၄) စောင် ဖတ်ကြားတင်သွင်းခဲ့ပါတယ်။

10/11/2023

“မီးရထားကြီး ပျော်ပျော်စီး”

တိရစ္ဆာန်ဥယျာဉ် (ရတနာပုံ) ကို လာရောက်သောဧည့်သည်တော်များ အဆင်ပြေစွာ အပန်းဖြေလည်ပတ်နိုင်ဖို့ရာ ဥယျာဉ်ပတ်ကား(Buggy) အပြင် ဥယျာဉ်ပတ်မီးရထားလည်း ပြေးဆွဲ‌ပေးလျက်ရှိပါတယ်။🚃🚃🚃

တိရစ္ဆာန်ဥယျာဉ် (ရတနာပုံ)မှာ
နို့တိုက်သတ္တဝါ၊ တွားသွားသတ္တဝါ၊ ရေနေသတ္တဝါများနှင့် ကျေးငှက်မျိုးစိတ်များကို ထိန်းသိမ်းစောင့်ရှောက် ပြသထားရှိပါတယ်။ မီးရထားကြီးပျော်ပျော်စီးပြီး ဥယျာဉ်တစ်ပတ် ‌လျှောက်ကြည့်ရင်း အပန်းဖြေလည်ပတ်နိုင်လို့ တိရစ္ဆာန်ဥယျာဉ် (ရတနာပုံ) ကို လာရောက်လည်ပတ်ဖို့ လှိုက်လှဲစွာဖိတ်ခေါ်လိုက်ပါတယ်။🤗🤗🤗

03/11/2023

အစိမ်းရောင်အီဂွါးနား (Common Green Iguana)

မြန်မာအမည်− အီဂွါးနာ
အများသုံးအမည်− Common Green Iguana (Green Iguana)
သိပ္ပံအမည်− Iguana iguana

အစိမ်းရောင်အီဂွါးနာ (Iguana Iguana) သည် American Iguana သို့မဟုတ် Common Green Iguana ဟုခေါ်ဆိုသော အမျိုးအစားဖြစ်ပြီး အရွယ်အစားကြီးမားသည့် အပင်နေမျိုးစိတ်ဖြစ်ပါတယ်။ အများအားဖြင့်တော့ ရိုးရိုးအီဂွါးနား လို့ခေါ်ပါတယ်။ အီဂွါးနားတို့၏ဇာတိမှာ ကြီးမားသော ပထဝီဝင်အနေအထားဖြစ်သည့် အမေရိကတိုက်အလယ်ပိုင်း၊ တောင်အမေရိကတိုက် အရှေ့မြောက်ပိုင်းမှ ပါရာဂွေးနိုင်ငံနှင့် ဘရာဇီးနိုင်ငံအရှေ့တောင်ပိုင်းအထိ ကျယ်ပြန့်ပါတယ်။ ၎င်းတို့ကို "ဝါးကြက်" သို့မဟုတ် "အပင်ကြက်" ("bamboo chicken" or "chicken of the tree") ဟုလည်း လူသိများပါတယ်။
ခန္ဓာကိုယ်အလျားမှာ ဦးခေါင်းမှအမြီးအထိ ၁.၅ မီတာ (၄.၉ ပေ) အရှည်အထိ ရှည်လျားသော်လည်း အချို့သော အီဂွားနာများမှာ ကိုယ်အလေးချိန် ၂၀ ပေါင် (၉.၁ ကီလိုဂရမ်အထက်) အလျား ၂ မီတာ (၆.၆ ပေ) ခန့်ရှိတတ်ပါတယ်။
အစားအစာမှာ အဓိကအားဖြင့် အသီးအရွက်ကိုသာ စားသော်လည်း အစုံစားသတ္တဝါဖြစ်ပါတယ်။
သက်တမ်းမှာ သဘာဝတွင် (၈) နှစ်ခန့်နေထိုင်နိုင်ပြီး၊ ထိန်းသိမ်းမွေးမြူထားသည့်နေရာတွင် အမြင့်ဆုံးသက်တမ်း နှစ် (၂၀) ခန့်ထိ နေထိုင်နိုင်ပါတယ်။
၎င်းတို့၏ အေးဆေးတည်ငြိမ်သော စိတ်နေသဘောထားနှင့် တောက်ပသော အရောင်များကြောင့် လူတို့က အိမ်မွေးတိရစ္ဆာန်အဖြစ် မွေးမြူကြပါတယ်။
တိရစ္ဆာန်ဥယျာဉ် (ရတနာပုံ) တွင် နို့တိုက်သတ္တဝါ၊ တွားသွားသတ္တဝါ၊ ရေနေသတ္တဝါများနှင့် ကျေးငှက်မျိုးစိတ်များစွာ ထိန်းသိမ်းစောင့်ရှောက် ပြသထားတာမို့ ဗဟုသုတရချင်လို့ပဲဖြစ်ဖြစ်၊ မိသားစု သူငယ်ချင်းအပေါင်းအသင်းများနဲ့ အတူ အပန်းဖြေချင်လို့ပဲဖြစ်ဖြစ် လာရောက်လေ့လာလည်ပတ်ဖို့ လှိုက်လှဲပျူငှာစွာ ဖိတ်ခေါ်လိုက်ပါတယ်။

29/10/2023

“ဝါလကင်းလွတ် သီတင်းကျွတ်”

မြန်မာသက္ကရာဇ် (၁၃၈၅) ခုနှစ်၊ တနင်္ဂနွေနေ့တွင်ကျရောက်‌သော သီတင်းကျွတ်လပြည့် (အဘိဓမ္မာအခါတော်နေ့) နေ့ထူးရက်မြတ်အခါသမယ တွင် မြန်မာပြည်သူပြည်သားအားလုံး စိတ်ချမ်းသာ ကိုယ်ကျန်းမာစေကြောင်း တိရစ္ဆာန်ဥယျာဉ် (ရတနာပုံ) မိသားစုမှ ဆုတောင်းမေတ္တာပို့သအပ်ပါသည်။ 🙏🙏🙏

24/10/2023

အပြည်ပြည်ဆိုင်ရာမျောက်လွှဲကျော်များထိန်းသိမ်းရေးနေ့ (International Gibbon Day)

တောတွင်းသီချင်းဆိုသူများ (Forest Singer) ဖြစ်ကြသော မျောက်လွှဲကျော်တို့နှင့် ပတ်သက်သည့် အကြောင်းအရာများအား ပညာပေးဆောင်ရွက်ရန်အတွက် အောက်တိုဘာလ (၂၄) ရက်နေ့ကို အပြည်ပြည်ဆိုင်ရာမျောက်လွှဲကျော်များထိန်းသိမ်းရေးနေ့အဖြစ် နှစ်စဉ် ကျင်းပလေ့ရှိပါတယ်။

ကမ္ဘာပေါ်တွင် Apes အုပ်စုဝင်များဖြစ်သည့် မျောက်လွှဲကျော် မျိုးစိတ်ပေါင်း (၂၀) ရှိပြီး ၎င်းတို့သည် နေရင်းဒေသများ ဆုံးရှုံးခြင်းကြောင့် မျိုးသုဉ်းရန် အန္တရာယ်ရှိ‌သော အခြေအနေမျိုးနှင့် ရင်ဆိုင်နေရပါတယ်။ မျောက်လွှဲကျော်များသည် Seed Disperser (သစ်စေ့ဖြန့်သူ) လည်းဖြစ်ပြီး အပင်မျိုးစိတ်များဖြန့်ပွားခြင်းအတွက် အရေးပါသော အခန်းကဏ္ဍမှ ပါဝင်၍ အမြဲစိမ်း သစ်တောများထိန်းသိမ်းခြင်းနှင့် ပြုစုပေးသော ဥယျာဉ်မှူးများဟုလည်း တင်စားခေါ်ဆိုနိုင်ပါတယ်။

မြန်မာနိုင်ငံတွင် မျောက်လွှဲကျော် မျိုးစိတ် (၄) မျိုးအား တွေ့ရှိရပါသည်။ အနောက်ပိုင်းမျက်ခုံးဖြူမျောက်လွှဲကျော်၊ အရှေ့ပိုင်းမျက်ခုံးဖြူမျောက်လွှဲကျော်၊ Skywalker မျောက်လွှဲကျော်၊ မျောက်လွှဲကျော်လက်ဖြူတို့ဖြစ်ပါတယ်။ ၎င်းနေထိုင်ရာ သစ်တောများလျော့နည်းလာခြင်း (habitat loss) နှင့် သစ်တောများအစိတ်စိတ်ကွဲပြားလာခြင်း (habitat fragmentation) တို့သည် ၎င်းတို့ အဓိက ကြုံတွေ့နေရသည့် ပြဿနာများဖြစ်ပါတယ်။ မျောက်လွှဲကျော်များ ထိန်းသိမ်းခြင်းသည် သဘာဝသစ်တောများနှင့် ဂေဟစနစ်အား ထိန်းသိမ်းခြင်းလည်းဖြစ်သဖြင့် မျောက်လွှဲကျော်များအား ထိန်းသိမ်းကာကွယ်ပေးရန် လိုအပ်ပါတယ်။

မျောက်လွှဲကျော်များကဲ့သို့ မျိုးသုဉ်းရန် အန္တရာယ်ကြုံတွေ့နေရသော ရှားပါးမျိုးစိတ်တိရစ္ဆာန်များသာမက ဆန်းပြားလှပတဲ့ ငှက်မျိုးစိတ်များကိုပါ ထိန်းသိမ်းပြသထားတာမို့ တိရစ္ဆာန်ဥယျာဉ် (ရတနာပုံ) သို့ လာရောက်လည်ပတ်ဖို့ ဖိတ်ခေါ်လိုက်ပါတယ်။ 🤗🤗🤗

21/10/2023

“တွားသွားသတ္တဝါ ထိန်းသိမ်းရေးအသိပညာမြှင့်တင်သည့်နေ့”

(Reptile Awareness Day)

နှစ်စဉ် အောက်တိုဘာလ (၂၁) ရက်ကို တွားသွားသတ္တဝါများထိန်းသိမ်းစောင့်ရှောက်ခြင်းနှင့် တန်ဖိုးထားလေးစားမှုမြှင့်တင်သည့်နေ့ဖြစ်ပြီး တွားသွားသတ္တဝါများ၏အကြောင်းကို အသိပညာပေးသည့်နေ့ ဖြစ်ပါတယ်။ ပညာပေးဟောပြောရေး ကြိုးပမ်းမှုများမှတစ်ဆင့် ဤစိတ်ဝင်စားဖွယ်ကောင်းသော တွားသွားသတ္တဝါများအကြောင်း၊ အမှန်တရားနှင့် နားလည်မှုကို ပြန့်ပွားစေနိုင်ပါတယ်။

တွားသွားသတ္တဝါများ “Reptiles” ဟူသောဝေါဟာရသည် လက်တင်ဘာသာစကား “Repton”မှ ဆင်းသက်လာပြီး အဓိပ္ပါယ်မှာ “Creep” တွားသွားခြင်းဟူသော ရွေ့လျားမှုပုံသဏ္ဍာန်ကိုကြည့်၍ အမည်ပေးထားခြင်းဖြစ်ပါတယ်။ ထို့ကြောင့် မျိုးပေါင်း (Class-Reptilia) တွင်ပါဝင်သော သတ္တဝါများကို တွားသွားသတ္တဝါများ “Reptiles” ဟုခေါ်ပါတယ်။ တွားသွားသတ္တဝါများသည် ကမ္ဘာ့ကုန်းမြေပေါ်တွင် လုံးလုံးလျားလျား အောင်မြင်စွာ နေထိုင်ကျက်စားနိုင်သော ပထမဦးဆုံး ကျောရိုးရှိသတ္တဝါများ ဖြစ်ကြပါတယ်။

တွားသွားသတ္တဝါမျိုးပေါင်းတွင် မိကျောင်း (Crocodile and Alligator) ၊ လိပ် (Turtle and Tortoise)၊ ပုတ်သင်မျိုးနွယ်များနှင့် မြွေ (Lizard and Snake) ၊ ပုတ်သင်နှင့်တူသောတွားသွားသတ္တဝါ (Tuatara) ဟူ၍ မျိုးစဉ် (၄) မျိုးရှိပါတယ်။

တွားသွားသတ္တဝါများကို ဒဏ္ဍာရီ၊ ပုံဝတ္တုများနှင့် ရုပ်ရှင်ဇာတ်လမ်းများတွင် ကြောက်စရာကောင်းစေရန်နှင့် သဘာဝလွန်စွမ်းအင်များကို ပိုင်ဆိုင်ထားကြသည်ဟု ပုံဖော်ရေးသား ရိုက်ကူးကြသဖြင့် လူအများသည် တွားသွားသတ္တဝါများကို ရွံ့ရှာမုန်းတီးကြောက်ရွံ့နေကြပါတယ်။

တွားသွားသတ္တဝါများသည် သဘာဝဂေဟဗေဒစနစ်တွင် ကျရာအခန်းကဏ္ဍမှ လူသားတို့အသက်ရှင်နေထိုင်နိုင်ရေးအတွက် အထောက်အကူပြုနေကြသူများ (Life Support System) ဖြစ်သဖြင့် တွားသွားသတ္တဝါ ထိန်းသိမ်းရေးအသိပညာမြှင့်တင်ရေးနေ့တွင် ထိန်းသိမ်းရေးအသိအမြင်များ တိုးပွားစေရန် ရည်ရွယ်၍ တိုက်တွန်းရေးသားနှိုးဆော်လိုက်ပါတယ်။

13/10/2023

“ဆောင်းခိုငှက် သို့မဟုတ် ရွှေ့ပြောင်းငှက် ဆိုသည်မှာ.....”

🇲🇲မြန်မာနိုင်ငံတွင် အမြဲကျက်စားနေထိုင်ခြင်းမရှိဘဲ အခြားနိုင်ငံများမှ ဆောင်းတွင်းအခါမှသာ မြန်မာနိုင်ငံသို့ လာရောက်ရွှေ့ပြောင်းကျက်စားသော ငှက်မျိုးစိတ်များဖြစ်ပါတယ်။🦆
❄️ဆောင်းခိုခြင်း (သို့မဟုတ်) ရာသီအလိုက်ပြောင်းရွှေ့ကျက်စားရခြင်း အကြောင်းအရင်းမှာ ကမ္ဘာ့မြောက်ခြမ်းဒေသများတွင် ပေါက်ဖွား ကျက်စားသောငှက်များသည် ဆောင်းရာသီရောက်သောအခါ အ‌အေးဓာတ်လွန်ကဲခြင်းနှင့် အစာရေစာရှားပါးခြင်းကြောင့် ပိုမိုပူနွေးပြီး အစာရေစာပေါများသော ကမ္ဘာ့တောင်ခြမ်းဒေသများသို့ ၎င်းတို့၏ ပျံသန်းရာ လမ်းကြောင်းအတိုင်း နှစ်စဉ်ပုံမှန် ပျံသန်းကျက်စားကြပါတယ်။🦅
🦩ဆောင်းခိုငှက်များကို လေ့လာချင်ပါက တိရစ္ဆာန်ဥယျာဉ် (ရတနာပုံ) သို့ လာရောက်ကြည့်ရှုနိုင်ပြီး အခြားဆန်းပြားလှပတဲ့ ငှက်မျိုးစိတ်များသာမက ရှားပါးထူးဆန်းတဲ့ တောရိုင်းတိရစ္ဆာန်များကိုလည်း ပြသထားတာကြောင့် လာရောက်လေ့လာ အပန်းဖြေလည်ပတ်ဖို့ ဖိတ်ခေါ်လိုက်ပါတယ်။🤗

04/10/2023

အပြည်ပြည်ဆိုင်ရာတိရစ္ဆာန်ထိန်းများနေ့ (International Zookeeper Day )

🦁 တိရစ္ဆာန်များ၏ ကောင်းကျိုးချမ်းသာကို ဖော်ဆောင်ပေးနေသူများကို တိရစ္ဆာန်ထိန်းများ ဟုခေါ်ဆိုပါတယ်။

🐻 တိရစ္ဆာန်ထိန်းသိမ်းစောင့်ရှောက်သူများသည် တိရစ္ဆာန်များကို အဓိကတာဝန်ယူစောင့်ရှောက်ပေးနေသူများဖြစ်ပြီး တိရစ္ဆာန်များ၏ ရုပ်ပိုင်းဆိုင်ရာ၊ စိတ်ပိုင်းဆိုင်ရာ ကျန်းမာစေရန်အတွက်သာမက တိရစ္ဆာန်ဥယျာဉ်များ၏ ရည်ရွယ်ချက်များဖြစ်သည့် တောရိုင်းတိရစ္ဆာန်ထိန်းသိမ်းရေးလုပ်ငန်း၊ ပညာပေးလုပ်ငန်းများနှင့် သုတေသနလုပ်ငန်းများ အကောင်အထည်ဖော်ဆောင်ရွက်နိုင်စေရန် အဓိက အထောက်အကူပြုပေးနေသူများလည်း ဖြစ်ကြပါတယ်

🐯 တိရစ္ဆာန်ထိန်းများ၏ ဝါသနာ၊ အနစ်နာ၊ လုပ်ငန်းကျွမ်းကျင်မှုတို့ဟာတိရစ္ဆာန်ဥယျာဉ်များ၏ရည်ရွယ်ချက်များကို အကောင်အထည်ဖော်ရေးနှင့် ဇီဝမျိုးစုံ မျိုးကွဲ ထိန်းသိမ်းရေး လုပ်ငန်းများ ဆောင်ရွက်‌ရေးတွင် ရှေ့တန်းမှ တာဝန်ယူဆောင်ရွက်ပေးနေရသောသူများ ဖြစ်ကြပါတယ်၊

🐘ကမ္ဘာပေါ်ရှိ တိရစ္ဆာန်ဥယျာဉ်များတွင် တိရစ္ဆာန်များ၏ ကောင်းကျိုးချမ်းသာကို အကောင်အထည်ဖော် ဆောင်ရွက်ပေးနေသော တိရစ္ဆာန်ထိန်း (Zoo Keepers) များကို ဂုဏ်ပြုသောအားဖြင့် နှစ်စဉ် အောက်တိုဘာလ (၄) ရက်နေ့ကို အပြည်ပြည်ဆိုင်ရာတိရစ္ဆာန်ထိန်းများ နေ့အဖြစ် သတ်မှတ်ထားပြီး တိရစ္ဆာန်ထိန်းများ၏ ကြိုးစားအားထုတ်မှုအားလုံးကို အသိအမှတ်ပြုတဲ့ နေ့တစ်နေ့လည်း ဖြစ်ပါတယ်။

26/09/2023

🪶 ကမ္ဘာ့ကက်ဆိုဝါရီငှက်များနေ့ (World Cassowary Day) 🪶

🪶 ကက်ဆိုဝါရီ (Cassowary) ဆိုတာအရွယ်အစားကြီးမားပြီး အရောင်အသွေးတောက်ပကာ ဒိုင်နိုဆောခြေထောက်ကဲ့သို့ သန်မာလှသည့် ခြေထောက်များရှိပြီး မပျံသန်းနိုင်တဲ့ ငှက်ကြီးမျိုးဖြစ်ပါတယ်၊

🪶 ခန္ဓာကိုယ်မှာ တောက်ပသော အနက်ရောင်အမွေးများရှိပြီး ဦးခေါင်းတွင် ကြီးမားသည့် အမောက်ပါရှိပါတယ်၊ လည်ပင်းသည် ခရမ်းရောင် (သို့) အပြာရောင်ရှိပြီး ရှည်လျား၍ တွဲလောင်းကျနေသော အနီရောင်အရေပြားချပ် (Red wattles) ပါရှိပါတယ်၊ ခြေထောက်တွင် ခြေချောင်း (၃) ချောင်းသာပါရှိပြီး ခြေချောင်းများတွင် ရှည်လျားသော ခြေသည်းချွန်များပါရှိပါတယ်၊

🪶 အမများက ဥ ဥ၊ အထီးတွေကဥဝပ်ပြီး ၊ ဥဝပ်ချိန်မှစ၍ သားပေါက်များအရွယ်ရောက်ပြီး အစာရှာဖွေနိုင်သည်အထိ အထီးများကသာ ကျွေးမွေးပြုစုစောင့်ရှောက်လေ့ ရှိကြပါတယ်၊

🪶 ကက်ဆိုဝါရီငှက်များဟာ အကြောင်းအရင်းမရှိဘဲ အန္တရာယ်ပြုတိုက်ခိုက်လေ့မရှိသော်လည်း ယင်းတို့၏ ကလေးငယ်များနှင့် အစာစားနေချိန်တွင် တစ်စုံတစ်ယောက်မှ အန္တရာယ်ပြုနိုင်သည်ဟု ထင်မြင် ယူဆလျှင် ကလေးများကို ကာကွယ်ရန် ယင်းတို့၏ သန်မာသည့်ခြေထောက်ကို အသုံးပြု၍ လူကို သေစေနိုင်သည့်အထိ တိုက်ခိုက်တတ်ပါတယ်၊

🪶 ကက်ဆိုဝါရီငှက်များဟာ မိုးသစ်တောများတွင် ပေါက်ရောက်သည့် အပင်မျိုးစိတ်ပေါင်း (၂၄၀) ကျော်အား စားသုံးပြီး‌ ဝေးလံသည့် နေရာများတွင် အစေ့များ စွန့်ထုတ်ခြင်းဖြင့် အပင်သစ်များကို ပေါက်ရောက်စေသဖြင့် ကက်ဆိုဝါရီငှက်များသည် မိုးသစ်တောများအတွက် သဘာဝဥယျာဉ်မှူးအဖြစ် အရေးကြီးသော အခန်းကဏ္ဍမှ ပါဝင်ပါသည်။

🪶 ကက်ဆိုဝါရီငှက်များကို ကမ္ဘာ့ပတ်ဝန်းကျင်ထိန်းသိမ်းရေးအဖွဲ့ IUCN Red List တွင် VU-Vulnerable “မျိုးသုဉ်းရန် အန္တရာယ်ကျရောက်နိုင်သောမျိုးစိတ်” အဖြစ် သတ်မှတ်ထားပါတယ်။

22/09/2023

🦁ဗဟုသုတလည်းရ အပန်းလည်းပြေဖို့ တိရစ္ဆာန်ဥယျာဉ် (ရတနာပုံ)ကိုလည်ပတ်စို့ 🌳

👪မိသားစုများနှင့်အတူတူ ပျော်ပျော်ပါးပါး အနားယူအပန်းဖြေနိုင်မယ်၊

🧑‍🤝‍🧑သူငယ်ချင်းများနဲ့လည်း လွတ်လွတ်လပ်လပ် ပျော်ရွှင်စရာ အမှတ်တရတွေကို အတူတူဖန်တီးနိုင်မယ်၊

👯သားသားမီးမီးတို့အတွက် လေ့လာစရာတွေအများကြီးရှိတဲ့

🦁 ဗဟုသုတလည်းရ 🌳အပန်းလည်းပြေနိုင်တဲ့ 🛕မန္တလေးမြို့ရဲ့ ကျက်သရေဆောင် 🐯🦊🦓တိရစ္ဆာန်ဥယျာဉ် (ရတနာပုံ) ကနေ ဖိတ်ခေါ်လိုက်ပါတယ်၊🤗

🗓️ ရုံးပိတ်ရက်၊ အလုပ်ပိတ်ရက်တွေနဲ့ 🌕လပြည့် 🌑လကွယ်နေ့ပါ မကျန် ဖွင့်လှစ်ထားပြီး မျိုးသုဉ်းနိုင်ချေရှိသော ရှားပါးထူးဆန်းတဲ့ 🐪🦏🐘တိရစ္ဆာန်များသာမက ထူးဆန်းလှပတဲ့ 🦚🦩🦜🦅ကျေးငှက်များလည်းရှိဝာာမို့ 🐒🐻🐮တိရစ္ဆာန်ဥယျာဉ် (ရတနာပုံ) ကို လာရောက်လည်ပတ်ဖို့ ဖိတ်ခေါ်လိုက်ပါတယ်။❤️🤗

16/09/2023

🦛 ရေမြင်းများအကြောင်း သိကောင်းစရာ (၁၀)ချက် 🦛

(၁)ရေမြင်းများဟာ ကမ္ဘာပေါ်ရှိ ကုန်းနေနို့တိုက်သတ္တဝါများထဲမှာ တတိယအကြီးဆုံးဖြစ်ကြပါတယ်၊

(၂)ရေမြင်းများဟာ 🥬 အရွက်များကိုသာ စားသုံးတဲ့ အရွက်စားသတ္တဝါများ ဖြစ်ကြပါတယ်၊

(၃)ရေမြင်းများဟာ ရေထဲတွင် ရေမကူးပဲ လမ်းလျှောက်ခြင်းကိုသာ ပြုလုပ်ကြပါတယ်၊

(၄)ရေမြင်းတွေဟာကုန်းတစ်ပိုင်းရေတစ်ပိုင်းနေထိုင်တဲ့သတ္တဝါတွေဖြစ်ကြပါတယ်၊

(၅)ရေမြင်းများဟာ ညဖက်တွင် ပိုမိုရှင်သန်ကျက်စားလေ့ရှိကြပါတယ်၊

(၆)ရေမြင်းတွေရဲ့ခန္ဓာကိုယ်မှာအမွှေးအမျှင်တွေမပါရှိပဲ ချောမွတ်တဲ့အရေပြားနဲ့ဖုံးအုပ်ထားပါတယ်

(၇)ရေမြင်းများဟာ မိတ်လိုက်ခြင်း ၊ မျိုးပွားခြင်းနှင့် အညစ်အကြေးစွန့်ခြင်းတို့ကို ရေထဲမှာပြုလုပ်ကြပါတယ်၊

(၈)ရေမြင်းများဟာ အုပ်စုဖွဲ့နေထိုင်ကြပြီး အုပ်စုတစ်စုတွင် အကောင်ရေ (၅)ကောင်မှ (၃၀)ထိ ပါဝင်ကြပါတယ်၊

(၉)ရေမြင်းများဟာ ခန္ဓာကိုယ်အရွယ်အစား ကြီးမားကြသော်လည်း ကုန်းပေါ်ရော ရေထဲတွင်ပါ လျင်မြန်စွာလှုပ်ရှားနိုင်ကြပြီး ကုန်းပေါ်တွင် တစ်နာရီ မိုင်(၃၀) နှုန်းဖြင့် ပြေးနိုင်ကြပါတယ်၊

(၁၀)ရေမြင်းများဟာ သဘာဝထဲတွင် ပျမ်းမျှ နှစ်၄၀ခန့် နေထိုင်နိုင်ပြီး ထိန်းသိမ်းစောင့်ရှောက်ထားသည့် တိရစ္ဆာန်ဥယျာဉ်များထဲတွင် ၅၅နှစ်ခန့်နေထိုင်နိုင်ကြပါတယ်။

08/09/2023

🐵 မျောက်လွှဲကျော်ကျွန်း 🐵 (Gibbon Island) 🏝️🏝️🏝️

🐵 တိရစ္ဆာန်ဥယျာဉ်(ရတနာပုံ)ကိုရောက်ရင် ရေပတ်လည်ဝိုင်းနေတဲ့ မျောက်လွှဲကျော်ကျွန်းကို တွေ့ရမှာပါ၊🙉

🐵 မျောက်လွှဲကျော်လေးတွေဟာ ချွန်ထက်သန်မာတဲ့ အစွယ်များပါရှိပြီး ခြေတံနှင့် လက်တံရှည်တဲ့ မျောက်မျိုးဖြစ်ကာ ရေမကူးတတ်ပဲရေကြောက်သည့် သတ္တဝါလေးတွေဖြစ်ကြပါတယ်၊

🐵 တိရစ္ဆာန်ဥယျာဉ်(ရတနာပုံ)မှာမျောက်လွှဲကျော်‌လေးတွေကို အစာကျွေးခဲ့တဲ့ အမှတ်တရလေးတွေရှိခဲ့ရင်လည်း မျှဝေပေးခဲ့ပါဦး😘

02/09/2023

🪶 အပြည်ပြည်ဆိုင်ရာ လင်းတထိန်းသိမ်းရေး အသိပညာမြှင့်တင်ရေးနေ့ 🪶
(International Vulture Awareness Day)

🪶 ကမ္ဘာပေါ်တွင် ကမ္ဘာဟောင်းလင်းတနှင့် ကမ္ဘာသစ်လင်းတဟူ၍ နှစ်မျိုးခွဲခြားထားပြီး စုစုပေါင်း လင်းတမျိုးစိတ် (၂၃) မျိုးရှင်သန်ပေါက်ဖွားနေထိုင်ပါတယ်၊မြန်မာနိုင်ငံမှာတွေ့ရသော လင်းတ(၆)မျိုးမှာ လင်းတနှုတ်သီးရှည်၊ လင်းတကျောဖြူ၊ လင်းတခေါင်းနီ၊ ဟိမဝန္တာလင်းတ၊ လင်းတဖြူနှင့် လင်းတမဲတို့ဖြစ်ပါတယ်၊

🪶 မြန်မာနိုင်ငံမှာ လင်းတများကို ကချင်ပြည်နယ်၊ စစ်ကိုင်းတိုင်း၊ မကွေးတိုင်း၊ ချင်းပြည်နယ်၊ ရှမ်း ပြည်နယ်တို့တွင် တွေ့ရှိရသော်လည်း အကောင်ရေ တဖြည်းဖြည်းလျော့နည်းကျဆင်းလာပြီး ၊ယခုအခါ ကချင်ပြည်နယ်၊ ရှမ်းပြည်နယ်နှင့် စစ်ကိုင်းတိုင်းတို့တွင်သာ တွေ့ရှိရပါတော့တယ်၊

🪶 လင်းတများဟာ ပတ်ဝန်းကျင်ရှိ အသေကောင်များနှင့် အခြားသော အော်ဂဲနစ်စွန့်ပစ်ပစ္စည်းများကို ရှင်းလင်းခြင်းဖြင့် အရေးကြီးသော ဂေဟစနစ်ဝန်ဆောင်မှုများကို ပေးနေသည့် ငှက်များလည်းဖြစ်ကြပါတယ်၊ သဘာဝတရားကြီးကိုလည်း အခမဲ့သန့်ရှင်းရေးပြုလုပ်ပေးနေသူများ 'Nature's Clean-Up Crew' ဟု တင်စားခေါ်ဝေါ်လေ့ရှိကြပါတယ်၊

🪶 လူသားတို့အတွက် ရောဂါဖြစ်လာနိုင်သော အသေကောင်ပုပ်များကို စားသုံးပေးခြင်းဖြင့် ခွေးရူးရောဂါနှင့် တီဘီရောဂါကဲ့သို့သောရောဂါများပျံ့ပွားမှုကို ကာကွယ်ထိန်းချုပ်နိုင်ရန်အတွက် လူသားများကို များစွာကူညီပေးနေသောငှက်များ ဖြစ်ကြပါတယ်၊

🪶 လင်းတများဟာ နေထိုင်ရာနေရင်းဒေသ သဘာဝပတ်ဝန်းကျင်ပြောင်းလဲလာခြင်း၊ လူအများ အခြေချနေထိုင်လာခြင်းနှင့် နေရင်း ဒေသများ ပျက်စီးဆုံးရှုံးလာခြင်း၊ ဓာတုဆေးဝါးများအသုံးပြုသည့်အတွက် အဆိပ်သင့်သေဆုံး နေသော အသေကောင်များကို စားသုံးမိခြင်း၊ အစားအစာရရှိရန် ခက်ခဲလာခြင်းတို့ကြောင့် လင်းတမျိုးစိတ် (၂၃) မျိုးအနက် ထက်ဝက်ကျော်သည် ခြိမ်းခြောက်မှုအမျိုးမျိုးနှင့် ရင်ဆိုင်နေကြရပြီး အချို့သောမျိုးစိတ်များမှာ မျိုးသုဉ်းလုနီးပါးအန္တရာယ်နှင့် ရင်ဆိုင်ကြုံတွေ့နေရသော အခြေအနေသို့ ရောက်ရှိနေပါတယ်၊

🪶 သဘာဝဂေဟစနစ် ထိန်းသိမ်းရေးတွင် အရေးပါသောအခန်းကဏ္ဍမှပါဝင်ပြီး သဘာဝပတ်ဝန်းကျင်ကို အခမဲ့သန့်ရှင်းရေးပြုလုပ်ပေးနေသည့်အပြင် ကူးစက်ရောဂါများကို မပြန့်ပွားစေရန် ထိန်းချုပ်ပေးနေသည့် လင်းတငှက်များ မျိုးသုဉ်းပျောက်ကွယ်မသွားစေရေး ဝိုင်းဝန်းထိန်းသိမ်းစောင့်ရှောက်ရန်လိုအပ်ပါတယ်။

25/08/2023

🐻 ဟိမဝန္တာဝက်ဝံ 🐻 (Asiatic Black Bear)

🐻 ဟိမဝန္တာဝက်ဝံများ၏ ဦးခေါင်းမှာ ကြီးမားဝိုင်းနေပြီး မျက်လုံးများမှာ သေးငယ်ပါတယ်၊ ခြေလက်များဟာ တုတ်ခိုင်သန်မာ၍ ကြီးမားကျယ်ပြန့်သော လက်ဖဝါး၊ ခြေဖဝါးများပါရှိပြီး ရှည်လျားပြီး ထူထဲသော အမွေးများအောက်တွင် မထင်မရှား အမြီးတိုလေးရှိပါတယ်၊

🐻 ရင်ဘတ်ပေါ်ရှိ အနက်ရောင်အမွေးများပေါ်တွင် အဖြူရောင် (သို့မဟုတ်) အဝါနုရောင် အင်္ဂလိပ် အက္ခရာ "ဗီ" ပုံသဏ္ဌာန် (V) အမှတ်အသားပါရှိပါတယ်။ မိတ်လိုက်ချိန်မှအပတစ်ကောင်တည်းနေထိုင်တတ်ပြီးအဓိကအားဖြင့် ညဘက်တွင်ကျက်စား အစာရှာထွက်လေ့ရှိပါတယ်၊

🐻 ဟိမဝန္တာဝက်ဝံများဟာ အစုံစားသတ္တဝါဖြစ်ပြီး သူတို့၏ပုံမှန်အစားအစာတွင် သစ်သီးများ၊ အမြစ်များ၊ သစ်ခေါက်များ၊ ဥများ၊ သေးငယ်သောကျောရိုးမဲ့သတ္တဝါများ၊ ကျောရိုးရှိသတ္တဝါများနှင့် အသေကောင်အသားများကို ရှာဖွေစားသောက်တတ်ပါတယ်။

🐵 ထူးခြားပြီးရှားပါးတဲ့ 🦜🐦 ကျေးဌက်များ🐯🦓🐻 တိရစ္ဆာန်များကို အများပြည်သူများကြည့်ရှုလေ့လာနိုင်စေရန် ပြသထားရှိတာမို့ တိရစ္ဆာန်ဥယျာဉ် (ရတနာပုံ) ကို လာရောက်လေ့လာ အပန်းဖြေအနားယူ လည်ပတ်ကြဖို့အတွက် ဖိတ်ခေါ်လိုက်ပါတယ်။ 🤗

17/08/2023

🐊 Chinese Alligator 🐊

🐊 ရေချိုမြစ်ဝှမ်းများတွင် ရှင်သန်ကျက်စားကြသော Chinese Alligator မိကျောင်းများသည် မီးခိုးဝါရောင် ကိုယ်ခန္ဓာရှိပြီး ၎င်းတို့၏ အောက်မေးရိုးတွင် အမည်းရောင် အစက်အပြောက်များ ပါရှိပါတယ်၊

🐊Chinese Alligator မိကျောင်းများ၏ ခန္ဓာကိုယ် တစ်ခုလုံးတွင် သံချပ်ကာကဲ့သို့သော အကြေးခွံများသည် အခြားမိကျောင်းများနှင့် မတူပဲ ဝမ်းဗိုက်အထိပါ ဖုံးလွှမ်းထားပါတယ်၊

🐊အရွယ်မရောက်သေးသော မိကျောင်းများတွင် အဝါရောင်သန်းနေသော အစင်းကျားများ ပါရှိနေခြင်းမှ လွဲ၍အခြားခန္ဓာကိုယ် အစိတ်အပိုင်းများဟာ အရွယ်ရောက်ပြီးမိကျောင်းများနှင့် ဆင်တူပါတယ်၊

🐊Chinese Alligator မိကျောင်းများ၏ အထီးနှင့်အမ လိင်ကွဲပြားခြင်းဟာ မျိုးရိုးဗီဇကြောင့်မဟုတ်ပဲ အပူချိန်အပေါ်မူတည်ပြီး အထီးအမ ကွဲပြားသွားပါတယ်၊ ဥဝပ်နေစဉ်ကာလအတွင်း အပူချိန်မြင့်မားပါကအထီးများ ပိုမိုပေါက်ဖွားတတ်ပြီး အပူချိန်လျော့နည်းပါက အမများပိုမိုပေါက်ဖွားတတ်ပါတယ်၊

🐊Chinese Alligator မိကျောင်းများဟာ ညဘက်တွင် အဓိက ရှင်သန်ကျက်စားကြသည့် အသားစား သွေးအေးသတ္တဝါများဖြစ်ကြပြီး အဓိကအားဖြင့် ငါး ၊ ခရု ၊ ကမာ နှင့် သွေးနွေးသတ္တဝါများကိုလည်း စားသုံးကြပါတယ်၊

12/08/2023

🐘ကမ္ဘာ့ဆင်များနေ့ 🐘
(World Elephant Day, 12 August)

🐘 ဆင်များဟာ ကမ္ဘာပေါ်တွင် အကြီးဆုံးကုန်းနေနို့တိုက်သတ္တဝါဖြစ်ပြီး ကြီးမားလှသည့် ခန္ဓာကိုယ်၊ ကြီးမားကျယ်ပြန့်သည့် နားရွက်များနှင့် ရှည်လျားသွယ်တန်းသော နှာမောင်းရှိကာ သူမတူကွဲပြားနေသည့် သတ္တဝါများဖြစ်ကြပါတယ်၊

🐘 ကြီးမားလှသည့် နှာမောင်းများဟာ အစာများကို ဆွဲယူစားသောက်နိုင်ခြင်း၊ ရေကိုစုပ်ယူ၍သောက်နိုင်ခြင်းနှင့် ပက်ဖြန်းနိုင်ခြင်းတို့တွင် အသုံးပြုပြီး ၊အစွယ်များသည် အပေါ်ရှေ့အံသွားများမှ ရှည်ထွက်လာခြင်းဖြစ်ကာ အရာဝတ္ထုများကို ရွှေ့ရန်နှင့် တူးဆွရန်အတွက် အသုံးပြုလေ့ရှိကြပါတယ်၊

🐘 ဆင်များနှင့် လူသားများဟာ လူ့ယဉ်ကျေးမှုသမိုင်းတစ်လျောက်မှာ ရှည်လျားစွာ အတူတကွ ဒွန်တွဲနေထိုင်လာခဲ့ပြီး မျက်မှောက်ခေတ်တွင်လည်း ဆက်လက်၍ အတူတကွ အကျိုးပြုနေထိုင်လျက်ရှိပါတယ်၊

🐘 ဆင်များဟာ ဥာဏ်ရည်မြင့်မားပြီး အသိဉာဏ်ရှိကာအမိန့်နာခံတတ်သည့် သတ္တဝါလည်း ဖြစ်ကြပါတယ်၊

🐘 အသီးအရွက်စားသတ္တဝါများဖြစ်ကြပြီး တစ်နေ့လျှင် (၁၈) နာရီကြာ အစာစားခြင်းဖြင့် အချိန်ကုန်လေ့ရှိကြကာ ၊မြက်များ၊ အမြစ်၊ အသီး၊ အရွက်၊ အခေါက်များကိုသာ အဓိကစားသုံးလေ့ရှိကြပါတယ်၊

🐘 လူသားများဟာ ဆင်စွယ်များကိုရယူလိုတဲ့အတွက် တရားမဝင် အလွန်အကျွံအမဲလိုက် သတ်ဖြတ်ခံနေရခြင်း၊ ဆင်များကျက်စားရာ နေရာများအား လူတို့မှ ကျူးကျော်အခြေချနေထိုင်လာခြင်းနှင့် စိုက်ပျိုးမြေများ ချဲ့ထွင်လာခြင်းတို့ကြောင့် နေရင်းဒေသများဆုံးရှုံးလာရသည့် အခြေအနေများကို ရင်ဆိုင် ကြုံတွေ့နေရပါတယ်၊

🐘 သဘာဝပတ်ဝန်းကျင်၊ ဂေဟစနစ်နှင့် လူသားတို့အတွက် အရေးပါလှသည့် ဆင်များအား ထိန်းသိမ်းကာကွယ်စောင့်ကြရန်၊

🐘 ဆင်များ၏ နေရင်းဒေသများအား ထိန်းသိမ်းရန်၊ အလွန်အကျွံအမဲလိုက်သတ်ဖြတ်ဖမ်းဆီးနေခြင်း၊ တရားမဝင် အရိုး၊ အသား၊ အရေခွံတို့နှင့် ဆင်စွယ်တို့အားရောင်းဝယ်ခြင်းမပြုကြစေရန်ရည်ရွယ်၍ နှစ်စဉ် ဩဂုတ်လ (၁၂) ရက်နေ့ကို ကမ္ဘာ့ဆင်များနေ့အဖြစ် သတ်မှတ်ကာ

🐘 "ဆင်များကိုကူညီရန် ကမ္ဘာကြီးကိုပေါင်းစည်းပါ" “Bringing the world together to help elephants” ဟူသည့် ဆောင်ပုဒ်ဖြင့် ကမ္ဘာနှင့်အဝှမ်း ကျင်းပပြုလုပ်ကြခြင်းဖြစ်ပါသည်။

10/08/2023

🦁 ကမ္ဘာ့ခြင်္သေ့များနေ့ 🦁
(World Lion Day ) August 10🗓️

🦁 ခြင်္သေ့များဟာ ကမ္ဘာပေါ်မှာ ထူးခြားပြီးအထင်ရှားဆုံးသော မျိုးစိတ်ဖြစ်ကာ ကမ္ဘာ့တိုက်ကြီးများနှင့် ယဉ်ကျေးမှု ထောင်ပေါင်းများစွာတို့တွင် ခြင်္သေ့များကို ကြီးကျယ်ခမ်းနားလှသော ရဲစွမ်းသတ္တိနှင့်ပြည့်စုံသည့် အမဲလိုက်သားရဲတိရိစ္ဆာန်များအနေဖြင့် လူသားတို့အား စွဲဆောင်မှုပြုနေသည်ကို တွေ့ရှိနိုင်ပါတယ်၊

🦁 ခြင်္သေ့များနေထိုင်ရာ သဘာဝနေရင်းဒေသများဖြစ်တဲ့ အာဖရိကနှင့် အိန္ဒိယနိုင်ငံတို့မှာ တိတ်တဆိတ် မျိုးသုဉ်းမည့်အန္တရာယ်ကို တဖြည်းဖြည်းကျရောက်လို့လာနေပြီး အဓိကရင်ဆိုင်ကြုံတွေ့နေရသည့် ပြဿနာမှာ နေရင်းဒေသများ ဆုံးရှုံးလာခြင်းနှင့် အလွန်အကျွံ အမဲလိုက်ခံရခြင်းတို့ကြောင့် လွန်ခဲ့သော နှစ်ပေါင်း (၅၀) အတွင်း ကမ္ဘာ့ခြင်္သေ့ဦးရေ၏ (၉၅) ရာခိုင်နှုန်းခန့် ဆုံးရှုံးပျောက်ကွယ်ခဲ့ရပြီဖြစ်ပါတယ်၊

🦁 ခြင်္သေ့များဟာ အသားစားအမဲလိုက်မုဆိုးများ ဖြစ်တဲ့အတွက် အသီးအရွက်နှင့်မြက်ကိုစားသော သတ္တဝါများ၏ အကောင်အရေအတွက်ကို ထိန်းညှိပေးနိုင်သည့်အပြင် ၊ အားနည်းသော သားကောင်များကို ပစ်မှတ်ထားအမဲလိုက်တဲ့အတွက် သားကောင်များ၏ ဦးရေထိန်းညှိမှုနှင့် ရောဂါပျံ့ ပွားရေးထိန်းချုပ်မှုကိုလည်း သွယ်ဝိုက်သောနည်းအားဖြင့် ကူညီပေးရာရောက်ပါတယ်၊

🦁 သဘာဝတောတွင်း ခြင်္သေ့များ ခံစားရင်ဆိုင်ကြုံတွေ့ နေရသည့် အခက်အခဲများကိုသိရှိစေရန်၊ အမျိုးသားဥယျာဉ်များ တည်ထောင်ခြင်းနှင့် လူများအခြေချနေထိုင်သည့် ဧရိယာများကို ကန့်သတ်၍ ခြင်္သေ့များ၏ သဘာဝနေရင်းဒေသကို ထိန်းသိမ်းရေး အစီအမံများကို အကောင်အထည်ဖော်ဆောင်ရန်နှင့် ၊
🦁 ခြင်္သေ့များ၏ နေရင်းဒေသအနီး အခြေချနေထိုင်သူများအား ခြင်္သေ့များနှင့် အတူတကွယှဥ်တွဲနေထိုင်နိုင်စေရန်အတွက် ပညာပေးရန် နှစ်စဉ် ဩဂုတ်လ ၁၀ ရက်နေ့ကို ကမ္ဘာ့ခြင်္သေ့များနေ့ အဖြစ် နိုင်ငံတကာမှာ သတ်မှတ်ကျင်းပကြခြင်းဖြစ်ပါတယ်။

တိရစ္ဆာန်ဥယျာဉ်(ရတနာပုံ) မှာလည်းထူးခြားပြီးရှားပါးတဲ့ 🦜🐦 ကျေးဌက် များ🐯🦓🐻 တိရစ္ဆာန်များကို အများပြည်သူများကြည့်ရှုလေ့လာနိုင်စေရန်အတွက် ပြသထားရှိတာမို့ လာရောက်လေ့လာ အပန်းဖြေအနားယူ လည်ပတ်ကြဖို့အတွက် ဖိတ်ခေါ်လိုက်ပါတယ်။ 🤗

01/08/2023

🙏 ဝါဆိုလပြည့် (ဓမ္မစကြာ အခါတော်နေ့)

🙏 'သန္ဓေတောထွက် ဓမ္မစက် ဟောမြွက်သံချိုလဝါဆို'

🙏 ဒီနေ့ဟာဗုဒ္ဓဘာသာ မြန်မာလူမျိုးတို့ အထွတ်အမြတ်ထားရာ 🌕 ဝါဆိုလပြည့် ဓမ္မစကြာအခါတော်နေ့ပဲဖြစ်ပါတယ်၊

🌕 ဝါဆိုလပြည့်ဓမ္မစကြာအခါတော်နေ့ မှာ မိတ်ဆွေ သူငယ်ချင်း အားလုံး 🥰ကိုယ်စိတ် နှစ်ဖြာအေးချမ်းသာယာပြီး❤️ ဆန္ဒ နဲ့ဘဝ ထပ်တူကျပါစေလို့ဆုတောင်း မေတ္တာ ပို့သလိုက်ပါတယ်၊ 🙏🙏🙏

🦁🐯🐻 တိရစ္ဆာန်ဥယျာဉ် (ရတနာပုံ)ကိုလည်း အခါကြီး ရက်ကြီးများနှင့်🌕 လပြည့်လကွယ် နေ့များမှာပါ 🗓️ ပိတ်ရက်မရှိဖွင့်လှစ်ပေးထားတာမို့ လာရောက် လေ့လာ အနားယူ အပန်းဖြေ လည်ပတ်ဖို့ဖိတ်‌ခေါ်လိုက်ပါတယ်။ 🤗

29/07/2023

🐯အပြည်ပြည်ဆိုင်ရာကျားထိန်းသိမ်းရေးနေ့ 🐅 International Tiger Day -29 July

🐯 ကျားတွေဟာကမ္ဘာလုံးဆိုင်ရာ မြင်ရ တွေ့ရခဲသော တော်ဝင်မျိုးစိတ်တစ်မျိုးဖြစ်သည့်အပြင် အစာကွင်းဆက်၏ ထိပ်ဆုံးတွင်ရှိသော အလွန်အရေးပါသည့် အသားစားနို့တိုက်သတ္တဝါ ကြောင်ကြီးမျိုးရင်းဝင်ဖြစ်ပါတယ်၊

🐯 ဂေဟစနစ်တွင်လည်း ကျားများကို ထိန်းသိမ်းခြင်းအားဖြင့် အခြားသောမျိုးစိတ် အများအပြားကိုပါ ထိန်းသိမ်းပြီးဖြစ်တဲ့အတွက် ထီးနှင့်တူသောမျိုးစိတ် (Umbrella Species) ဟု ဂုဏ်ပြုခြင်းခံရသည့် ကိုယ်စားလှယ် မျိုးစိတ်တစ်မျိုးလည်းဖြစ်ပါတယ်၊

‌‌🐯 ဂေဟစနစ်ကို ပိုမိုကောင်းမွန်စေသည့်အပြင် လူသားတို့အသက်ရှင်ရပ်တည်ရေး သက်ရှိထောက်ပံ့စနစ် (Life Support System) အတွက် အလွန်အရေးကြီးသော မျိုးစိတ်လည်းဖြစ်ပါတယ်၊

🐯 လွန်ခဲ့သည့် ရာစုနှစ်အတွင်းမှာ သဘာဝတောထဲတွင်ကျားကောင်ရေ(၉၇)ရာခိုင်နှုန်း ခန့်ပျောက်ကွယ်သွားတာကို သုတေသနပညာရှင်များမှ လေ့လာတွေ့ရှိပြီးနောက်မှာတော့ (၂၀၁၀) ခုနှစ်မှစတင်ပြီး အပြည်ပြည်ဆိုင်ရာကျားထိန်းသိမ်းရေးနေ့ကို စတင်ကျင်းပလာခဲ့ခြင်းဖြစ်ပါတယ်၊

🐯 ကျားကောင်ရေဆက်လက်မကျဆင်းစေရေး၊ ကျားထိန်းသိမ်းရေး အသိအမြင်များတိုးပွားလာစေရေးနှင့် ကျားကောင်ရေတိုးပွားလာစေရေး တို့ကိုရည်ရွယ်ပြီး၊ နှစ်စဉ် ဇူလိုင်လ(၂၉) ရက်နေ့ကို ကမ္ဘာ့နိုင်ငံအသီးသီးမှာအပြည်ပြည်ဆိုင်ရာ ကျားထိန်းသိမ်းရေးနေ့အဖြစ် ကျင်းပပြုလုပ်ကြပါတယ်၊

19/07/2023

" အာဇာနည်နေ့ တို့မမေ့ "

ကျဆုံးလေပြီးသော ဗိုလ်ချုပ်အောင်ဆန်းနှင့်တကွ အာဇာနည်ခေါင်းဆောင်ကြီးများအား လေးစားစွာဦးညွှတ်ဂါရ၀ပြုအပ်ပါသည်။

18/07/2023

🎉လူမှုအကျိုးပြုပွဲလေးတစ်ခုကို ၂၀၂၃ခုနှစ် ၊ ဇူလိုင်လ ၁၇ ရက်နေ့တွင် 🦁🐯🐻တိရစ္ဆာန်ဥယျာဉ် (ရတနာပုံ) မှာ ပြုလုပ်ခဲ့ပါတယ်
မန္တလေးတောင်ခြေ၊မျိုးချစ်ဘုန်းတော်ကြီးစာသင်ကျောင်း မှ သံဃာတော် (၁၅) ပါးကိုနေ့ဆွမ်းဆက်ကပ်လှူဒါန်းပြီး၊ကျောင်းရှိဆရာမနှင့် ကလေးငယ်အယောက် (၁၀၀)အားနေ့လည်စာ ထမင်း အအေးနှင့်ရေသန့်တို့ကျွေးမွေးခဲ့ပါတယ်၊
ကျောင်းသား/သူလေးများကို တိရစ္ဆာန်ဥယျာဥ် (ရတနာပုံ) အနှံ့လည်းလှည့်လည်ပြသ‌ခဲ့ပါတယ်။

16/07/2023

🐍 ကမ္ဘာ့မြွေများနေ့ (World Snake Day - July 16)🐍

🐍 မြွေ‌များဟာ ကျောက်ဖြစ်ရုပ်ကြွင်း မှတ်တမ်းများအရ ရှေးလွန်ခဲ့သော နှစ်သန်းပေါင်း (၁၅၀) ခန့် ခရစ်တေးရှပ်(Cretaceous Period) ကာလကတည်းက ယနေ့ထက်တိုင် နှစ်ပေါင်း ရှည်ကြာစွာ ရှင်သန်ပေါက်ပွား နေထိုင်လာခဲ့ကြသည့် ကျောရိုးရှိ သွေးအေးသတ္တဝါများ ဖြစ်ကြပါတယ်၊

🐍 မြွေမျိုးစိတ်ပေါင်း (၃၅၀၀)ခန့် ရှိသည့်အထဲတွင် အဆိပ်ရှိမြွေနှင့် အဆိပ်မရှိမြွေ ဟူ၍ (၂)မျိုး ရှိသော်လည်း မျိုးစိတ်ပေါင်း (၆၀၀) ခန့်သာ အဆိပ်ရှိကြပြီး ယင်းတို့ထဲမှ မျိုးစိတ် (၂၀၀) ကျော်ခန့်ဟာ လူတို့၏အသက်ကို သေစေနိုင်သည့် အဆိပ်ကို ထုတ်လွှတ်နိုင်ကြပါတယ်၊

🐍 မြွေများသည် လျှာဖြင့်အနံ့ခံကြပြီး ယင်းတို့ ဦးခေါင်းထက် (၃) ဆခန့်ကြီးမားသည့် သားကောင်ကို မြိုချစားသောက်နိုင်ပါတယ်၊

🐍 မြွေမှန်လျှင် အဆိပ်ရှိသည်ဟု ရှေးရိုးစွဲအယူအဆများလည်း ရှိခဲ့ကြသည့်အတွက် မြွေများနှင့် ပတ်သက်သည့် အဆိုးမြင်စိတ်များကို ပြောင်းလဲနိုင်စေရန် ကမ္ဘာ့မြွေများနေ့ကို နှစ်စဉ် ဇူလိုင်လ (၁၆) ရက်နေ့တွင် ကမ္ဘာတစ်ဝှမ်းလုံးရှိ မြွေမျိုးစိတ်ပေါင်း (၃၅၀၀) ခန့်နှင့်ပတ်သက်၍ ထိန်းသိမ်းရေးအသိပညာ တိုးပွားလာစေရန် ရည်ရွယ်ကျင်းပကြပါတယ်၊