06/06/2025
𝐌𝐀𝐘𝐎𝐑-𝐄𝐋𝐄𝐂𝐓 𝐌𝐀𝐊𝐈𝐆𝐊𝐈𝐓𝐀 𝐒𝐀 𝐌𝐆𝐀 𝐓𝐈𝐆𝐏𝐀𝐍𝐀𝐋𝐈𝐏𝐎𝐃 𝐒𝐀 𝐊𝐀𝐋𝐈𝐊𝐎𝐏𝐀𝐍
Usa ka workshop ang gustong mahitabo ni Mayor-elect Nestor Archival kauban ang mga environmental advocates, isip usa sa iyang mga unang lakang isip mayor dinhi sa dakbayan sa Sugbo.
Gusto niya nga magkaabot ang tanang mga tigpanalipod sa kalikopan ug magkatakdo ang ilang tagsatagsa ka mga lihok.
Gisulti niya kini atol sa pagsaulog sa “World Environment Day 2025”, nga gipahigayon sa Plaza Independencia, dakbayan sa Sugbo karong adlawa, Hunyo 5, nga gitambongan sab ni Balamban, Cebu Mayor-elect Amos Cabahug.
Namulong sa ingon si Mayor-elect Nestor Archival human iyang nahibaw-an nga aduna diay daghang mga inisyatiba nga gipangbuhat ang lainlaing mga grupo alang sa kaayohan sa atong palibot.
Naila si Mayor-elect Archival sa iyang adbokasiya alang sa kalikopan. Gani, ilado ang iyang “eco house” sa Sitio Ylaya, Talamban, nga sumbanan sa unsa ang usa ka pinuy-anan nga nagpakita sa paghigugma sa kalikopan.
“This is my tribe. Kauban ta nga tribu. I’m very amazed. There are so many initiatives — from soil to food, then to climate change and everything…. We are…in the same direction — protection of the environment, and of course, protection of life. Because the environment is all about life. Without the environment, we would not be here,” sulti niya.
“We will have probably a one-day or half-day workshop, so that…we can already determine what steps we are going to do. And we also put timelines…for us to realize that we are actually proceeding toward what we want,” sulti niya.
Gipahigayon atol sa kalihokan ang usa ka exhibit nga gisalmotan sa kapin 30 ka mga exhibitors, nga nagpakita sa mga eco-friendly ug organic nga mga produkto, gi-recycle nga mga produkto, vegan nga mga pagkaon, lainlaing mga tanom, ug uban pa.
Human niya masuroy ang nagkadaiyang mga booth, gipadayag ni Mayor-elect Archival nga laraw niya nga magbutang og mga stall sa pampublikong mga merkado nga mag-display og makahimsog nga mga pagkaon nga apil sa exhibit. (PIO/NJY)
