MARiO Perroquets.DZ

29/06/2024

#بسم اللّه #فتح #طلبية #جديدة
لي حاب نخدملو مرحبا يبعتلي طلبية واش نكتبلو فلخاتم
فلواتساب أو فايبر 0549332065

#خواتم #للتعريف #مغلقة

#ديامتر 13مم و 13.5مم 16.5مم
ماتيار #إينوكس inox للببغوات الڨابوني والأمازوني والمكاو ولكوكاتو لخاتم يتركب على رجلو وهو كبير ولا يعني أنه زايد فلكاجا يبقى ببغاء تع غابة🌳

#بالمعلومات #الشخصية يعني فلخاتم لي تديه نكتبلك اسمك او اسم بنتك او وليدك او اسم الببغاء تاعك ورقم الهاتف تاعك غدوة ملغدوة يهربلك طيح في انسان يخاف الله يتصل بيك يرجعهولك وصرات الحمد للّه بفضل الله كنا سبب باش عدة ببغوات عادوا لماليهم.

#فيديو #طريقة #تركيب #لخاتم
راهي في أول تعليق (كومونتار) أدخل شوفها وأتعلم كيفاش تركبو على الببغاء تاعك👇👇👇👇👇

https://youtu.be/8LrIDkuXcXE?si=NEPdU4sF9CHFvi50

28/06/2024

#تذكير بمعلومة نشرتها يوم 22 مارس عام 2021
قديمة على بعض أصحاب القلوب المريضة 🖤

🌹سلام عليكم خاوتي لعزاز اللّٰهم وفّقنا لنشر العلم والفائدة وإجعلها في ميزان حسناتنا ياربّ واللّهم زدنا علما على علم ياربّ😍☝✅.

#يكون الفرق بين ذكر وأنثى ببغوات الكاكاتواس بدون تحليل ADN
يعني بلا مدير تحليل تقدر تعرف الذكر من الأنثى وهو عن طريق قزحية العين👀(iris d'oeil)بالإنڨليزية (iris eye)وهي لون العين عند الذكر تكون كامل سوداء⚫ مثل ما رانا نشوفو في الصور ولون القزحية عند الأنثى تكون لون وردي أحمر فاتح🔴✅

#وليكن في علم الجميع تمّ تأكيد المعلومة بتحليل ADN والمعلومة عالمية.

#وهاذا #رابط #المعلومة لي نشرتو عام 2021👇👇

https://www.facebook.com/share/p/BAYoPttnxnkrXVU9/?mibextid=oFDknk

24/11/2023

✅تصحيح لأسموات الببغوات🦜 ينطقها البعض في بلادنا بالغلط❌إسمه أمازون نيكدور يلوناب✅
Amazone Nuque d'or👈بالفرنسية
بالإنڨليزية 👈 Yellow nape✅مشي ليكدور أو ميكدور ❌
إسم الببغاء لازم يتنطق كما ينبغي أنا راني نصحح ونعلم الناس لي تحب تتعلم فقط🦜🇩🇿

23/11/2023

#موضوع #للتذكير خاص بفصل الشتاء🌀🌧️

21/11/2023

✅تصحيح لأسموات الببغوات🦜 يقولها البعض في بلادنا❌
مكاو الأحمر كلوروبتار✅ chloroptére✅
مشي كلوروكتار أو كليوباتر❌ وراني نصحح مانيش نستهزأ مشي عيب لي مايعرفش بصح إسم الببغاء لازم يتنطق كما ينبغي ضرك تبقاوا تقولوه غالط أو صحيح نتوما أحرار أنا راني نصحح ونعلم الناس لي تحب تتعلم فقط بدون أيّ قصد أوتجريح واللّه على ما أقول شهيد☝️🦜🇩🇿

21/11/2023

#متوفر 5 علب فقط تع 35غرام سعر العلبة 380 ألف.

#ممكن نبعث للولايات

#أقوى #منتوج عالميا يعود من جديد وغني عن التعريف خاص بمدة تغيير الريش السقاط عند الطيور بصفة عامة وعند الببغوات بصفة خاصة.
35g
#طريقة #تقديم:

👈1غرام في 250ملل ماء معدني 3 مرات في الأسبوع حتى نهاية موسم تغيير الريش السقاط بالنسبة للناس لي عندها أكثر من ببغاء يعني من 2 ببغوات وطلع.

👈 أو تقدر تمد 0.5غرام يعني نص غرام في 150 ملل ماء معدني. بالنسبة للببغاء الواحد يعني ناس لي عندها بيروكي واحد برك 3 مرات في سمانة حتى يخلاص سقاط الريش.

🔴 #ملاحظة: الببغوات بكامل أنواع تسقط يعني تدخل في سقاط حتى 2 خطرات أحيانا 3 خطرات والله اعلم فلعام مشي كما المقنين والكناري يسقط 1مرة وحدة برك فالعلم وفيما يخص المنتوج هادا مشي علاج نهائي لمرض ستراس لكن يعاون بزاااف جسم الطائر بش يخرج ريش شباب ومشي مكسر.

19/11/2023

18/11/2023

✅تصحيح معلومات خاطئة متداولة في عالم الببغوات🦜❌
المعلومة المتداولة رقم 10 يقولك بيروكي لازم يريح برا مشي داخل القفص القفص دخلوا فيه غير فليل يا اخي هاد المعلومة ماتقدرش طبقها على كامل الببغوات هادي وحدة ثانيا الطريقة هادي بزاااف ناس خدامين نهار كامل يدخل عشية ماتخرجش عليه ثالثا كاين الكثير من الببغوات مايحكمش بلاسة كي تحطو برا الكاجا تلقاه يهبط يمشي يطلع فوق كورسي يعض لحطب يعض لخيوط لي يصيبهم في طريقو خاصة لاكانوا خيوط تع تريسيتي جي تلقاه فحمة بعيد الشر وتقدر تلقا شومبرا تاعك محروقة على جال بيروكي كي عض لخيوط صح الببغاء لازم يخرج من القفص يسرح جناحتيه باش مايستريسيش باش مايكرهش بصح مشي تخليه نهار كامل ونتا غير موجود في المنزل انا واحد فليوم بيروكي يخرج ساعة برك ونرجعوا داخل القفص أما باش نخليه ونروح ونبقى نخمم فيه وشاد قلبي لالا ماندريهاش وجامي درتها أن شاء الله المعلومة لحقت كما ينبغي ورب يوفقنا لما يحبه ويرضاه🤲

15/11/2023

✅تصحيح معلومات خاطئة❌
الموضوع رقم 9
يقولك تحليل أديان لي راني نديرو انا والكثير من الإخوة في هاذا المجال ولي هو باش تعرف الببغاء تاعك ادا ذكر او انثى يقولك المخبر لي راكم تبعتولو ريش باش يعطيكم النتيجة في اسبانيا أو فرنسا يقدر يقولكم الببغاء تاعكم واش من عام زاد وهاد المعلومة غالطة السن تع الببغاء نتا تمدهولهم للمخبر نهار يبعتولك الورقة لي تلسق فيها ريش وتعمر فيها كامل المعلومات تع الطير تاعك وكاين واحد الخانة مكتوب فيها Age يطلبوا منك نتا تعمرها يعني الببغاء تاعك تقدر تعرف شحال في عمرو على حساب عينيه فقط👁️
هادي ادا كان مشي مباڨي يعني زايد فلقفص أما ادا كان مباڨي وزايد فلقفص ولاباڨ تاعو 10 أو 11ملمتر عند الڨابوني والأمازونيات وكذالك 13 14مم أو 15 مم عند ببغوات المكاو أو ببغوات الكوكاتو وانواعه هنا تقدر تعرف لأن لاباڨ مكتوب فيها لعام لي زاد فيه الببغاء أن شاء الله المعلومة الصحيحة لحقت كما ينبغي ورب يوفقنا لنشر العلم في هادا المجال على الطريقة الصحيحة✅🤲🦜🇩🇿

14/11/2023

لي #مهتم #يتصل 0549332065
المكان #العاصمة #بئر #مراد #رايس

12/11/2023

✅تصحيح معلومات غالطة متداولة في عالم الببغوات🦜في 🇩🇿
#الموضوع 8: بزاااف ناس في مجال الببغوات دايرين في بالهم بلي ببغوات الأمازوني بكامل أنواعها nuque d'or....l'oratrix...le front bleu...le front jaune...etc.
باش تعرف السن ديالهم كما لڨابوني وهاد الشيء غلط وغير صحيح ببغاء الأمازوني مهما كان نوعه عينيه يكونوا كحولة من نهار يخرج ملبيضة حتى 3 اشهر فقط ممبعد فوق 3 اشهر يبداو يصفاروا كي يلحق عام للفوق يزيدوا يولو صفورا أكثر وكل ما يزيدوا يكبروا فوق العام يصفاروا حتى يولوا تشينين عينيهم لداخل لون برتقالي والقزحية كحلة مشي كما ببغاء الرمادي لڨابوني عينيه يبقاو كحولة حتى 6 اشهر 7 وحتى يلحق 5سنين ومافوق باش عينيه يصفاروا مليح فاللهم زدنا علما ووفقنا لنشره🤲
#يتبع الموضوع 9....⏳

10/11/2023

#خواطر : الأيادي الخفية

#هم أولائك الأشخاص الذين سخرهم الله لنا ونحن لم ندرك قيمتهم في حياتنا #دفعوا إلينا بكراسي منعتنا من السقوط و لم نعلم بوجودهم وواصلنا ارتشاف قهوتنا دون أن ندرك حجم السقوط الذي كان ينتظرنا لولا الله ثم وجودهم بالقرب منا
فياترى ما مدى خطورة الامر لو كان هؤلاء أبعد عن المسافة التي وضعهم الله فيها ليدفعو لنا بالكرسي الذي منعنا من السقوط.
#كم من شخص هو من كان سببا في ظهور ثمار شجرة نجاح غيره وهو لا يشعر به لأن وجوده كان زمن الحرث وتقليب الأرض و زرع البذر ولكن للأسف زمن الحصد وقطف الثمار غاب عن الأنظار وطمست آثار أقدامه #وما #أكثر الناجحين الذي كانو على وشك السّقوط في وحل الإحباط والإنهيار والفشل لولا وجود أمثال هؤلاء في حياتهم .

#فأسعى وكن أنت ممن يشارك في البناء لا الهدم و صناعة النجاح لا الفشل وكن أنت الشمعة التي تضيء ولا تكن الشمعة التي تحرق وكن العصا التي يتوكؤ عليها كل منكسر و شربة الماء التي يرتويها العطشان كن المظلة التي تحمي غيرها من حرقة الشمس في الصيف وقطرات الأمطار في الشتاء وكن الجسر الذي يعبر منه من حيرتهم سبل الوصول إلى الطرف الثاني من الطريق وكن ذكرى جميلة في صفحات من حولك تذكرها الأيام وكن أنت من يستصلح تربة اليأس بالأمل و يغرس الورود في طريق الشوك والفشل و ينشر داخل المجتمع ثقافة الطمانينة والفأل جعلني الله وإياكم من عباده المصلحين وجعلني اللّه وإياكم من الذين رحلوا وتركوا بصمات الخير وتركوا حسنات جارية يلقوناها يوم لا ظل إلاّ ظله🤲

09/11/2023

✅تصحيح معلومات غالطة متداولة في عالم الببغوات🦜في 🇩🇿
#الموضوع 7: يقولك بيروكي كي جيبو في عمرو فوق عام عامين 3سنين مايهدرش يأخي نعاودهالك اولا الهدرة بيد الله مشي بيد البشر ثانيا ممكن هاداك البيروكي لي نتا شريتو مباڨي في عمرو عام ولا عامين ماطاحش في انسان لي يهدروا ويجتهد معاه وكاين حالات تصرا بزاااف ببغاء عند سيد ساكت ومولاه يهدر معاه ليل ونهار مانطقش عندو غير يكره منو يبيعو لوخدوخر يهدر عند هاداك لي شراه وزيد ممكن هاداك الببغاء كي زاد فلقفص وكلوه والديه حتى ولا يأكل وحدو مشي طالع بتشكة لي طالع بتشكة تلقاه 6 اشهر 7 يبدأ يهدر ويخلط وكاين بزاااف ناس جابوا ببغوات صغيرة رباوهم فروخة وطالعين بتشكة والله ماهدروا راهم ضرك في عام عامين 3 سنين كلمة مزال ماقالوها خرجو ببغوات يصفروا برك الهدرة والوا وكاين لي طالعين بتشكة يهدروا بصح الهدرة والكاركتار ديالهم عيان يهدر كلمة في 20يوم علاش دايمن نقولها ونعاودها الكاركتار فلببغاء يلعب دور كبير نعرف ببغوات والله وتا الله وبالله 8 أشعر حافظين سورة الإخلاص كاركتار ماشاء الله تم تم يحفظ ومن جهة أخرى انا طاحو في يدي ببغوات عام عامين في عمرهم مشي طالعين بتشكة ومباڨين انتاج أوروبي اجتهدت معاهم لقمتهم لهدرة خرجوا يهدروا ماشاء الله صح يطولو شويا بصح عادي وكاين لي ممكن مايهدروش بصح ماتقدرش تقول كاااااامل الببغوات مايهدروش كي يكونوا في هاد السنّ على حساب كاركتار تع الببغاء ادا يحفظ تم تم او العكس ثقيل فلحفاظة وادا ماهدرش ونتا جبتو في عمرو عام أو عامين يأخي زهرك ماطحتش في ببغاء كاركتار لايعني أن السيد خدعك انا واحد كي نجيب ببغوات مباڨيين والسن ديالهم فوق العام ومايهدروش اولا نشريهم على أساس مايهدروش وباينة نبيعهم على أساس مايهدروش مانزيد مانقص كما شريتهم نبيعهم المهم صحة جيدة بصح نقولك كي تديه عليا اجتهد معاه لقمو حفظوا خليلو تسجيلات ولباقي على الله أنا مانقدرش نعلم الغيب ادا يولي يهدر ولا لا مع مرور الوقت ونعاودهالكم الهدرة تبقى بيد الله وثانيا بالإجتهاد تاعك نتا اخي المربي أن شاء الله الفكرة والمعلومة لحقت كما ينبغي وبارك الله فيكم جميعا🤲
#يتبع الموضوع 8....⏳

08/11/2023

🔴تنبيه
لكل شخص يتصل بيا يسقسيني على سعر ببغاء حطيتو شحال سومتو اخي الكريم المحترم كي تعيطلي فلهاتف وتسقسيني ونجاوبك شحال سومتو لاقت بيك السومة الله يبارك مرحبا بك على رأس والعين مالاقتش بيك سومة قال خويا ماريو رب يجيب سوڨ...مانقدرلوش...دراهمي مالحقوش...انا عواد سوڨ ريڨليني مكاش مشكل لي نقدر عليها نديرها ورب ادرى واعلم مافي القلوب سواء كان معريفة قديمة أو اول خطرة يشري عليا نتهلا فيه واش نقدر مشي فوق طاقتي برك بصح باش تعيطلي تقرعج يبعتوك صحاب جاك المرسول وتقولي شحال وكي نجاوبك ماتعجبكش سومة تقولي عند فلان أو علان لقيتو قال او باعوا قل منك يا اخي اولا نقولك روح اشري عليه علاش جاي لعندي تحوس تشري عليا بسومة لي هو يبيع بها أو باع بها وثانيا أنا راني نخدم لنفسي لإرضاء الله فقط وثالثا في المجال هادا تع الببغوات أو غيره كل واحد وطريقو وكل واحد كيفاش راه يشري وكل واحد مصدر دراهمو منين رآه يجيب فيهم كاين لي رآه فلمجال هادا شبعة برك وكاين لي رآه يوكل به عائلتو كما أنا وبزااف ناس كما أنا مشي حرام ومشي عيب وكاين لي داخل في هاد المجال بش يكسر ناس ويشوهلهم سمعتهم باش غير هو زعمة ناس تشري عليه وتقصدوا وتشكروا وهاد شيء موحال والأرزاق بيد الله رب كي يرزقك والله وتكون راقد في بيتك يعيطولك على طير اصلا نتا مشي حاطو فلفايسبوك وادا رب ماكتبلش رزق هادا لي كليت روحك عليه وضربت راجل براجل باش تشريه وشوهت صورة خوك والله ماتديه وتبقى غير نتا فوق الأرض رابعا في هاد المجال كاين لي يشري رخيس ويبيع سومة مناسبة خاصة لاطاح في لافار وبش يكون في علم الجميع لافار مشي كل يوم تبان احيانا انا نشري ببغوات بسومة رخيسة بزاااف نبيعهم بسومة هايلة ندورهم بحاجة قليلة والله على ما أقول شهيد ولي شراوا عليا وربحوا على جرتي شاهدين وأغلبية الببغوات نشريهم شويا غاليين خاصة كي يكونوا مشي متوفرين بكثرة لازم عليا نزيد فسومة ومن حقي ندي فائدة شحال نحب وواحد مايجوزلو يحسبلي شحال ديت معاه فائدة أو يحاسبني شحال شريت أو على شكون شريت أو لمن بعت لأن كاين ناس مايحشموش يسقسوا هاد الأسئلة لوكان ماتقولوش شحال شريتو يزعف ولا لوكان ماتبيعلوش كما حاب هو يزعف وكاين لي كي يسمع بيك شريت بسومة مليحة يحسدك ويحذر الناس منك ويعيبلك الطير بش زعمة ناس ماتشريهش عليك بسك هو قالهم مريض أو فيه مشكل وهو طير مسكين مافيه حتى مشكل ومافيه حتى عيب ويقدر وهاد الحسود يقدر يشري بسومة مليح يبيع بلخسارة أو براس المال باش غير يكسرك ونتا ماتبيعش طير تاعك دار كامل هاد النميمة خاطرش قلبو مريض بك مالحقش دير واش دير نتا أو يجيب واش جيب نتا أو ماقدرش يشريه عليك أو سمع بيك جبت سلعة هو ماعرفش منين جبتها وشكون لي باحالك بصح الحمد لله رب ادرى واعلم وين يكون لباطل يجي لحق فوقو والله يعلم الخبيث منا والطيب ويعلم شكون الحساد والنمام وشكون رآه يحفر بش يكسر خوه رب فوقنا رآه يشوف وشاهد وعلابالو شكون لي قلبو مريض بلوخر نسأل الله العافية والسلامة حسبنا الله ونعم الوكيل أن شاء الله الرسالة لحقت وقريتوها مليح ولي يعيطلي يسقسيني على ببغاء ويجيه غالي من فضلك وبدون إحراج وبلاما تجبدلي الأسموات تع لي راهم فلمجال ماتعجبكش سومة قال خويا ماريو رب يجيب سوڨ مانقدرلوش عادي نتا تروح فرحان وانا فرحان ورب الرزاق والله ويكون كاين ببغاء ب 5 ٱلاف في جيهة أخرى وعندي انا ماريو ب 20 الف بايعو بايعو لأن الرزق نعاودهالك بيد الله واحد مايقدر يحبسوا أو يمشيه غير هو سبحانه وتعالى وفي الأخير نقولكم بارك الله فيكم جميعا للناس لي تخاف الله وتحشم ومثقفة ومربية رب يرزقكم أضعافا مضاعفة ماتتمنوه لي🤲🦜🇩🇿

07/11/2023

#خواتم #للڨابوني في لون الأحمر🔴ديامتر 13مم

D'identification fermées pour
13mm

👈مكتوب فيهم إسم الصفحة تاعيM.P👇
MARiO Perroquets.DZ

👈مكتوب فيهم إسم الجمعية لي راني منخرط فيها: UOA.RO
Rassemblement ornithologique التجمع الارنطولوجي

👈ومكتوب فيهم رقم تسلسلي من 001....150.

👈ومكتوب فيهم رقمي الخاص تاعي لي مكتوب فلكارطا (051).

👈مكتوب فيهم 24 يعني لعام 2024 لي تخدمو فيه لخواتم وماكنتش حاب لعام يتكتب لكن قدر الله وماشاء فعل صرات غلطة والله على ما أقول شهيد☝️

🔴ملاحظة:
أيّ ببغاء يحمل هادا الخاتم لا يعني أنه زايد في 2024
ولا يعني أنه ببغاء تع الإنتاج يبقى ببغاء تع غابة ولا يعني أنه زايد عندي فأنا بريئ أمام الله وحسبي الله ونعم الوكيل في كل شخص يشري عليا هادا لخاتم أو ببغاء فيه هاد لخاتم ويقول بلي زاد عند ماريو أو ماريو باحولي على أساس ببغاء تع إنتاج أو يبيعو هو على أساس ببغاء زايد فلقفص وشكرا لتفهمكم🌹

06/11/2023

✅تصحيح معلومات غالطة 🦜🇩🇿
الموضوع 6: الببغاء لي عندي يأكل معانا في طابلة يعني يأكل كلش وماصرالو والو هاد الأمر يعتبر إجرام في حق الببغاء والله على ما أقول شهيد الببغاء مشي كما الكلب والقط مايأكلش كما يأكلوا هوما ومايقدرش يأكل مأكولات لأن المعدة تاعو والجسم ديالو مايحللهاش وتقدر تسببلو عسر في الهضم هو تشوفو ياكل ويبلعها عادي لكن داخل الجسم واش رآه يعاني بها رب شاهد بزاااف ناس يرتكبون هاد الغلطة ياخي الببغاء يأكل بعض الخضر وبعض الفواكه وبعض والمكسرات لي مشي مالحة وبعض الحبوب كالماايس والزريعة والشعير والجلبانة....الخ.
❌مشي ماكلة تع دار طعام وبركوكس وزفيطي وبطاطا مقلية....وقهوة كحلة ودخان وتبخرلو في وجهو ڨارو زطلة نسأل الله العافية وعلابالي واش راني نهدر...الخ
صح في هاداك النهار أو الشهر مايصرالوا بصح دير في بالك بلي يجي نهار وين يمرض ضربة وحدة رايحين يبانوا فيه أعراض نتا تحير خاصة مرض الكبد الدهني نهار الكبدة تع الببغاء تتشحم بسبب هاد المأكولات تفهم نسأل الله السلامة لطيورنا فالله يجازيكم ناس لي راهي تمد برك الأكل للببغوات ديالها إتقوا الله في أرواح لايعلم بألمها إلاّ الله 😭☝️ يتبع الموضوع 7...🦜🇩🇿

05/11/2023

#أجمل ما قيل عن الشخص الحسود:
#اصْبر على حقد وكَيدِ الحَسُود #فإنَّ صبرُكَ قاتلُه
#كالنَّارِ تأكلُ بعضَها #إن لم تجد ما تأكلُهْ🔥

03/11/2023

✅تصحيح معلومات غالطة 🦜🇩🇿
الموضوع 5:
كلمة super jombo في عالم الببغوات لاتعني أن الببغاء يتكلم مليح أو مدريسي أو عاقل كلمة سوبر جومبو هي كلمة تشير بأن الببغاء ذو حجم كبير وضخم فقط يعني لاطاي تاعو كبيرة وخشينة هادا مكان الأوفياء واحد مايجرب يخدعكم بها زعمة بش يبيع طير تاعو لاماكانش يهدر مليح أو مسوفي مليح ماراهيش رايحة تنفع الكلمة هادي أن شاء الله المعلومة لحقت كما ينبغي ورب يزدنا علما ويوفقنا لنشره على الطريقة الصحيحة🤲
يتبع الموضوع 6.....🦜🇩🇿

02/11/2023

راك حاب تنتج لڨابوني عندك فالدار وماعرفتش واش لازم دير🧐 أدخل شوف لفيديو وقل رب زدني علما🦜🇩🇿🤲

02/11/2023

#العاصمة بئر مراد رايس المهتم يتصل 📞0549332065📞

#مفاجأة أخرى الحمد للّه وبفضله تتم الصالحات جبتلكم خواتم 11مم للببغوات لڨابوني والأمازوني لي راهم يزيدوا في بلادنا يعني انتاج بلادي🦜🇩🇿 وماليهم مالقاوش لي باڨ هاد الخطرة راني تفكرتكم لخاتم يتركب على رجلو وهو صغير يعني كي يزيد موراها ب سمانة أو 10 أيام ركبلو لخاتم هنا الببغاء يعني أنه زايد فلكاجا مشي تع غابة❌

✅لخاتم هادا مكتوب عليه إسم الصفحة تاعي ورقمي الشخصي
MARiO Perroquets.DZ051👈
والعام 2024 ورقم خاص لكل مربي شرا عليا لخاتم هادا وركبو على الببغاء تاعو ولاقدر الله الببغاء يهرب لخاتم هو الدليل بلي تاعك ومام نهار تحب دير تحليل ADN للطير تاعك باش تعرف ادا مال أو فومال لخاتم راح يسهلك بزااااف العملية الكمية محدودة كاين 10 خواتم في لون الأحمر و10خواتم في لون الأزرق نجربوهم وادا مشاوا نزيد نوفركم بإذن الله فاللهم وفقنا لما تحبه و ترضاه🤲

02/11/2023

#العاصمة بئر مراد رايس المهتم يتصل 📞0549332065📞

✅الحمد للّه وبفضله تتم الصالحات كما واعدتكم راني درت مجهود وجبتلكم خواتم 9مم لببغاء يويو سينيڨالي لخاتم يتركب على رجلو وهو كبير ولا يعني أنه زايد فلكاجا وحسبي الله ونعم الوكيل في كل شخص يشري عليا لخاتم ويقول بلي الببغاء تاعو يويو سينيڨالي زايد فلكاجا او زايد عند ماريو أو ماريو باحولي على أساس زايد عندو❌

✅لخاتم هادا مكتوب عليه إسم الصفحة تاعي ورقمي الشخصي
MARiO Perroquets.DZ 051👈
ورقم خاص لكل مربي شرا عليا لخاتم هادا وركبو على الببغاء تاعو ولاقدر الله الببغاء يهرب لخاتم هو الدليل بلي تاعك ومام نهار تحب دير تحليل ADN لليويو تاعك باش تعرف ادا مال أو فومال
لخاتم راح يسهلك بزااااف العملية للتفريق بين المال ولفومال.

🔴الكمية محدودة كاين 10 خواتم في لون الرمادي Gris نجربوهم وادا مشاوا نزيد نوفركم بإذن الله فاللهم وفقنا
لما تحبه وترضاه🤲

31/10/2023

✅تصحيح المعلومات الغالطة المتداولة في عالم الببغوات في الجزائر 🦜🇩🇿
الخرافة 4: يقولك كي يكون عندك ببغاء واحد في المنزل لازم جيبلو وخدوخر يونسو يعني لازم زوج فدار بش يتوالفوا بعضاهم يأخي هاد المعلومة غالطة الببغاء يقدر يعيش وحدو مع الإنسان ويحفظ الكلام من عنده وكاين وين ببغاء يحب الانسان يلحق درجة تع ثقة وحب الإنسان نهار جيبلو ببغاء يضربوا ويعضوا ويقدر يستريسي منو يحب يعيش غير مع الإنسان سبحان الله كاين حالة وحدة برك لي تقدر جيب فيها زوج ببغوات أو أكثر وهي كي تكون نتا حاب تكوبلي يعني حاب دير الإنتاج تع الببغاء في دارك في هاد الحالة كاين شروط ومعلومات لازم طبقها ورب يوفق الجميع ويرزق الجميع من فضله🤲
يتبع 5....⏳🦜🇩🇿

29/10/2023

#طريقة #قص #أجنحة إحترافية وعالمية لببغوات الأمازون والرمادي الإفريقي الحمد لله جامي كان عندي مشكل مع اي ببغاء قصيتلو بهاد القصة أو بالطريقة الثانية لي نخدم بها كذالك وهي أنّي أترك 3 ريشات الأولى لكبار وأقص 8 ريشات في الوسط والله على ما أقول شهيد واي ببغاء خرج من عندي مقصوص بهاتين الطريقتين عاود ناضلهم الريش سالم مشي معوج ومشي مشوه والحمد للّه وفيما يخص الإنتقادات مرحبا بها فهي تزيد من عزمي وإصراري💪

28/10/2023

✅تصحيح المعلومات الغالطة المتداولة في عالم الببغوات في الجزائر 🦜🇩🇿
الخرافة 3: يقولك أنثى الببغاء تهدر افضل من الذكر يعني لفومالة تهدر خير من المال وهاد المعلومة غالطة ولا تنطبق على كامل الببغوات صح انا واحد جازوا عليا ببغوات الأنثى تهدر خير من الذكر لكن جازوا عليا تاني ذكورة يهدروا افضل من الإيناث والله شهيد على ما أقول وأكتب وبزاااف ناس حبابي نعرفهم جازوا عليهم لي مال يهدروا مليح خير من الأنثى والعكس صحيح لهذا الكلام عند الببغوات حسب الكاركتار وليس حسب الذكر والأنثى بمعنى الببغوات لي عندها كاركتار شباب فالهدرة تهدر فلوجه تم تم يحفظ الكلام في مدة قصيرة تقدر تكون عند الذكور والإناث أن شاء الله المعلومة لحقت كما ينبغي ورب يوفقنا لما يحبه ويرضاه🤲
يتبع الخرافة 4....⏳🦜🇩🇿

26/10/2023

#للتوضيح #فقط

25/10/2023

✅تصحيح المعلومات الغالطة المتداولة في عالم الببغوات في بلادنا 🦜🇩🇿
الخرافة رقم 2
وهو يقولك الببغاء تع لغابة مايتدريساش وهاد المعلومة غالطة وعن تجربة انا واحد دريسيت ببغاء تع غابة رجعتو نعجة ونعرف بزااف حبابي في نفس المجال جابوا ببغوات يعضوا ماتقدرش تتصور ودريساوهم صح ممكن يكون ببغاء شارف صعيب يشد اليد شويا كاركتار تاعو صعيب راسو يابس طول معاه في دريساج لكن يتدريسا عادي بحول الله بصح بشرط لازم نتا المربي اخي تكون ماتخافش وبطبيعة الحال يكونوا عندك معلومات خاصة بترويض الببغوات مشي تزدم برك وتخلع البيروكي تحوس تدريسيه تزيد تخلعوا يولي يكرهك بزااف عيباد نعرفهم والو فهامة يزدموا برك على البيروكي أمبعد كي يحصل ويشوف روحو ماقدرش يتصل بيك يقولك كيفاش ندير ومع الأسف الببغاء خلاص يكون تخلع وكره الشخص هاداك وفي هاد الحالة الببغاء لازم يبيعو ولا يبدلوا خاطرش رايح يبقى يكرهوا حتى نهار يموت ويقدر يستريسي يريش روحوا وبزاااف حالات مما هادوا شفتهم وحكاولي عليهم مع الأسف أن شاء الله المعلومة دخلت مليح في الرأس وقل رب زدني علما🤲
يتبع الخرافة 3....⏳🇩🇿🦜

23/10/2023

#اللّهم إكفنا شر الحاسدين وإجعلنا من المتقين🤲
راضيين بعطائك ومؤمنين بقضاءك وقدرك🤲
إرزقنا كما رزقت غيرنا وإرزق غيرنا كما رزقتنا يارب العالمين🤲

22/10/2023

سلام عليكم أوفياء الصفحة المواضيع القادمة رايحة تكون على شكل statut برك يعني كتيبة كما هادا لي راكم تقراوا فيه المواضيع سوف تكون تصحيح بعض الخرافات والمعلومات الخاطئة المتداولة في عالم الببغوات في بلادنا🇩🇿
بزاااف مربيين ومبتدئين حاسبينها معلومات صحيحة وفي الصح غالطة بسم الله نبدا نصحح 1 اول معلومة وهي يقولو ببغاء باش يهدر لازم تعطيه فلفل حار وهادا خطئ كبير هدرت عليها في موضوع سابق الفلفل الحار محفز للتزاوج ومضاد حيوي طبيعي للمعدة وتدفئة الجسم في فصل الشتاء تعطيه الببغاء تاعك مرة في الشهر أما قضية الكلام تبقى بيد الله اولا وثانيا اجتهاد شخصي يعني تعلموا وتجتهد معاه تلقى نتيجة ماتعلموش الكلام مكاش نتيجة أن شاء الله المعلومة هادي فهمتوها ودخلت مليح في راسكم ومشي عيب لي مايعرفش العيب هاداك لي ماشي فلغلطة وكي جي تصححلو يحكمو الكبر وعزة النفس دمتم سالمين الأوفياء نتلاقاو في موضوع ٱخر قريبا ان شاء الله🤲⏳🦜🇩🇿

21/10/2023

الحمد لله وبفضله اليوم 21/10/2023
قمنا بإرسال ريش الببغوات إلى مخبر التحاليل بإسبانيا
في انتظار وصول الريش إلى المخبر بعدها ننتظر خروج النتيجة الله اعلم وقتاش غير تخرج نخبركم ماتحرجوناش برك جزاكم الله وشكرا لي تفهمكم🌹🦜🇩🇿

19/10/2023