05/04/2022
გამარჯობა მეგობრებო ❣️
დღეს მინდა ცოტა უფრო ვრცლად ვისაუბრო ჩვენს საქმიანობასა და მიზნებზე. თუმცა სანამ ყველაზე მნიშვნელოვან საკითზე, ფელინოლოგიაზე და ჩვენს კლუბში დანერგილ წესრიგზე ვისაუბრებთ, ვფიქრობ აუცილებელია ორიოდ სიტყვით ჩვენი კლუბის მიზანსა და შიდა კულტურაზე მოგიყვეთ:
კლუბ "ფელისის" უპირველესი მიზანი საერთო ინტერესების მქონე ადამიანების გაერთიანება გახლავთ, რომლებიც შეძლებენ ძალიან მეგობრული განწყობით ერთმანეთისთვის გამოცდილებისა და რჩევების გაზიარებას, ერთმანეთის შრომის დაფასებას და იმ ზოგადი პოზიტიური ამინდის შექმნასა და შენარჩუნებას, რაც იყო მთავარი მოტივატორი ჩვენი კლუბის დაარსებისა. ჩვენ გულწრფელად გვჯერა, რომ გახსნილი და თბილი გარემო სწორედ ის კომფორტის ზონაა, სადაც ყველა ჩვენგანი თავს კარგად იგრძნობს და უკეთ შეძლებს თავისი საყვარელი საქმიანობის გაგრძელებას. ახლა კი გადავიდეთ უშუალოდ ფელინოლოგიაზე:
კლუბი განკუთვნილია ბრიტანული და შოტლანდიური კატებისთვის - ჩვენი დიდი სურვილია გავიზარდოთ და სხვა ჯიშის წარმომადგენლებიც მივიღოთ ჩვენს ოჯახში, თუმცა ამ ეტაპზე ამ ორი ჯიშით შემოვიფარგლებით, რადგან საკმარისი ცოდნა, გაანთლება და გამოცდილება მხოლოდ ამ ორ ჯიშზე გვაქვს მიღებული და შეგვიძლია მათზე პასუხისმგებლობის აღება.
რეკომენდაცია - კლუბი მიიჩნევს თავს ვალდებულად მოგცეთ რჩევები და რეკომენდაციები შეჯვარებაზე, შეფერილობებზე, ფენოტიპსა და გენოტიპზე. ასევე გვყავს საერთაშორისოდ სერტიფიცირებული მომშენებელ-ფელინოლოგი და მზად ვართ გაგცეთ ნებისმიერ თემატურ საკითხზე ამომწურავი პასუხი და დავდგეთ თქვენს გვერდით 💕
ნულოვანი საგვარეულო ნუსხები - ჩვენი კლუბი არ გასცემს ნულოვან საგვარეულო ნუსხებს, რადგან ჩვენს ქვეყანაში არარსებული გენეტიკური ტესტების გარეშე ძალიან რთულია ცხოველის ზუსტი ჯიშის დადგენა, თუმცა ამასთან ერთად პატივს ვცემთ სხვა კლუბის მიერ გაცემულ მსგავს ნუსხებს და გარკვეული კანონზომიერებითა და შერჩევით ასეთ წევრებსაც მივესალმებით ჩვენს ოჯახში
საბუთები- იმისათვის, რომ ორი თვის ასაკიდან აუღოთ კლუბის წევრ კნუტებს დაბადების მოწმობა, საჭიროა კნუტების დედა იყოს ჩვენი კლუბის წევრი და ასევე მოგვაწოდოთ ინფორმაცია შეჯვარებასა(წყვილი, რომელიც შეჯვარდა და როდის) და კნუტების დაბადებაზე .აღნიშნული მოწმობის საგვარეულო ნუსხაზე გადაცვლას შეძლებთ კნუტის 6 თვის ასაკში.
შეჯვარების რეკომენდაცია - მიუხედავად იმისა რომ ბევრ კნუტს თავიდანვე ეტყობა კლასი(𝐬𝐡𝐨𝐰, 𝐛𝐫𝐞𝐞𝐝, 𝐩𝐞𝐭) მომშენებლებსაც და პატრონებსაც უნდა გვესმოდეს რომ ცოცხალ არსებებთან გვაქვს საქმე და ზრდის პროცესში შეიძლება ყველაფერი ისე არ წავიდეს როგორც ვგეგმავდით, შესაბამისად კლუბი იტოვებს უფლებას საგვარეულო ნუსხის გაცემისას გადაწყვიტოს რომელი კლასის წარმომადგენელია კონკრეტული კატა და ჯანმრთელობის პრობლემისა ან არაგასამრავლებელი კლასის(𝐩𝐞𝐭) შემთხვევაში "𝐍𝐨𝐭 𝐅𝐨𝐫 𝐁𝐫𝐞𝐞𝐝𝐢𝐧𝐠" ნუსხაშივე მიეთითოს.
შინშილისა და არაშინშილის შეჯვარება- ეს საკითხი საერთაშორისო სისტემებისთვისაც კი საკმაოდ სადაო თემაა, საბოლოოდ კლუბის პრეროგატივაა მიიღოს გადაწყვეტილება მსგავს შეჯვარებაზე. იქიდან გამომდინარე რომ დიდი ხანია შინშილა დამოუკიდებელ "ქვე-ჯიშად" ითვლება, მსგავსი შეჯვარებით ვერ მოხდება ფერის გაუმჯობესება, ამასთანავე უკვე გვყავს ორივე ჯგუფის(შინშილისა და არაშინშილის) საკმაოდ კარგი წარმომადგენლები, შესაბამისად ვთვლით, რომ აღარ არსებობს აუცილებლობა მათი შერევის.
ორი განსხვავებული ჯიშის შეჯვარება - შოტლანდიური და ბრიტანული ორი განსხვავებული ჯიშია. ვინაიდან და რადგანაც შოტლანდიური ფოლდისთვის უკვე არსებობს მისი ერთადერთი პარტნიორი, ესაა შოტლანდიური სტრაიტი, შესაბამისად კლუბი ვერ გასცემს საბუთს ბრიტანულისა და შოტლანდიურის კნუტზე, რომელიც შეგვიძლია არასუფთა სისხლისად ჩავთვალოთ.
ინფორმაცია- კლუბის მიზანია იზრუნოს თავისი წევრების და საქმიანობის განვითარებაზე, შესაბამისად მაქსიმალურად ვეცდებით გაგაცნოთ ფელინოლოგიაში არსებული საინტერესო სიახლეები 😊
დახმარება - კლუბი მაქსიმალურად ეცდება ხელი შეგიწყოთ თქვენ საყვარელი მეგობრების დაბინავებაში და კლუბის პატარა წევრების ფოტოები გაუზიაროს ჩვენი ოფიციალური გვერდის გამომწერებს
კლუბის წევრების ინტერესების დაცვა - კლუბის დამფუძნებლები მივიჩნევთ, რომ წარმატების გასაღები არის კმაყოფილი და პოზიტიურად განწყობილი მომხმარებელი, შესაბამისად პერიოდულად ვგეგმავთ კითხვარის გაკეთებას სადაც შეძლებთ თქვენი აზრის, პოზიციისა და რეკომენდაციების დაფიქსირებას. კითხვარის ანონიმურობა იქნება სრულად დაცული!
დიდი მადლობა ყურადღებისთვის!
სხვა დეტალების გასარკვევად მოგვწერეთ პირად შეტყობინებაში.
𝐖𝐞𝐥𝐜𝐨𝐦𝐞 𝐭𝐨 𝐨𝐮𝐫 𝐂𝐨𝐦𝐦𝐮𝐧𝐢𝐭𝐲 ❤
