MHD Pigeon Loft

01/03/2022

31/05/2021

ஓய்வாகவோ களைப்பாகவோ இருக்கும் நேரங்களில் புறாக்கூட்டுக்கு முன்னே அவற்றின் நடவடிக்கைகளைக் கவனித்துக்கொண்டிருப்பேன். அது மனதிற்கு ஆறுதலைத் தருகின்றது. புறாக்களின் உடல் அழகு பார்ப்போரின்
மனதை வசீகரிக்கின்றது. சாதாரணமாக புறாக்கள் 20-25 செ.மீ. வரை வளரும். உடலானது தலை, கழுத்து, நடுவுடல், இறகுகள், வால் மற்றும் கால்கள் என்ற பகுதிகளைக் கொண்டிருக்கும். உருண்டை வடிவத் தலைப்பகுதியின் முன்புறத்தில் கூர்மையான அலகு இருக்கின்றது.
அலகின் மேற்புறத்தில் தடித்த ராம்போதீக்கா (Rhamphotheca) எனும் உறை உள்ளது. மேல் அலகின் அடிப்புறத்தில் நாசித்துவாரங்கள் உள்ளன. அவற்றைச் சுற்றிலும் அலகுப்பூ (cere) எனும் பருத்த தோல் பகுதி உள்ளது. இரண்டு பக்கமும் சற்றுப் பெரிதாக இரண்டு கண்கள் இருக்கின்றன. கண்களின் பின்புறமாக இரண்டு செவித்துவாரங்கள் உள்ளன. இவையனைத்தும் புறாக்களின் முகத்திற்கு அழகைக் கொடுக்கின்றன.நீண்ட கழுத்து. இலை வடிவிலான உடல் பக்கமாகவுள்ள இரண்டு இறக்கைகள் அவற்றை விரித்தால் தென்படும் அழகிய சிறகுகள், அதனைத் தொடர்ந்து நீண்டுள்ள வால்பகுதி, சிவப்பு நிறத்திலான இரு கால்கள், அதிலுள்ள நகங்கள் இவை யாவும் புறாக்களின் உடலுக்கு வணப்பையும் மிடுக்குடன் கூடிய தோற்றத்தையும் கொடுக்கின்றன. இவற்றின் வால் பகுதியில் உள்ள கோதுச் சுரப்பி (uropygial gland) எனும் எண்ணெய்ச் சுரப்பிகள் மூலம் இறகுகளை அலகினால் நீவிவிட்டு தமது உடலை கவர்ச்சியாகவும் பளபளப்பாகவும் வைத்துக்கொள்கின்றன. உண்மையில் புறாக்களை நன்கு அவதானித்தால் அவற்றின் உடல் அழகே மனதிற்குப் பெரிதும் ஆறுதலையும் உட்சாகத்தையும் வரவழைக்கின்றன. அந்த மன ஆறுதலுக்காகவோ என்னவோ உலகமே இன்று புறாவை சமாதனப் பறவையாக ஏற்றிருக்கின்றது.

28/05/2021

கி.மு.4500ம் ஆண்டிலிருந்தே வீட்டுப் பறவையாக புறா வளர்க்கப்பட்டுள்ளதாகவும் மனிதனால் பிடித்து வளர்க்கப்பட்ட முதல் பறவை புறாதான் என்பதாகவும் ஒரு வரலாற்றுக் குறிப்பு
இருக்கின்றது. அந்தக் காலம் முதல் அவை மனிதர்களோடு ஒன்றித்து வாழ்ந்து வாழ்ந்து வந்துள்ளன. புறாக்கள் ஆரம்பங்களில்
இறைச்சிக்காக வளர்க்கப்பட்டுள்ளன. ஆனால் அவற்றின் புத்திக் கூர்மை அறியப்பட்டதன் பின்னர் கணினி, கைபேசிகள், தபால் தந்தி
நிலையங்கள் இல்லாத மன்னராட்சிக் காலத்தில் இவை தகவல் பரிமாருவதற்கான சிறந்த ஊடகமாகப் பயன்படுத்தப்பட்டுள்ளன.
முதலாவது, இரண்டாவது உலக போர்களில் தூது
அனுப்புவதற்காக ஜேர்மன் நாடு புறாக்களை அதிகளவில் பயன்படுத்தியது. புறாக்களின் கால்களில் காகிதச் சுருள்களைக்
கட்டிச் செய்திகள் பரிமாறிக்கொள்ளும் முறை அப்போது பரவலாகப் புலக்கத்தில் இருந்தது. தாங்கள் தெரிவிக்க வேண்டிய செய்தியை ஒரு கடிதத்தில் எழுதி அதை நன்கு
பயிற்றுவிக்கப்பட்டதொரு புறாவின் காலில் கட்டிவிடுவார்கள். அது பறந்து சென்று கடிதத்தை உரியவரிடம் சேர்த்துவிடும். தபால் முறையும் நவீன தொலைத் தொடர்பு சாதனங்களும்
அறிமுகமாகியதன் பின்னர் புறாக்களின் தேவை குறைவடைந்தது. தற்போது அதிகமானவர்கள் புறாக்களை வியாபார நோக்கிலும்
பொழுதுபோக்கிற்காகவும்தான் வளர்க்கின்றனர். உண்மையில் புறா வளர்பில் உள்ள இன்பத்தை அவற்றை வளர்க்க ஆரம்பித்ததும்தான் நான் கண்டுகொண்டேன்.

23/05/2021

புறா பறவையினத்தைச் சேர்ந்த உயிரின வகைப்பாட்டில் இது கொலம்பிடே (Columbidae)
குடும்பத்தைச் சேர்ந்தது. புறாக்களை இரு பெரும் பிரிவுகளாகப் பிரிக்கலாம். ஒன்று மணிப்புறா (Dove), மற்றையது மாடப்புறா(Pigeon). உருவத்தில் சிறிதாக இருப்பது மணிப்புறா. காட்டுப் புறா
என்றும் சொல்லலாம். இவற்றை அடைத்து வளர்ப்பது சிறமம். பழக்கப்படுத்திக்கொள்வதும் கடினம். உருவத்தில் பெரிதாக இருப்பது மாடப்புறா. இதனை வீட்டுப் புறா என்று சொல்லலாம் இவ்வகைப் புறாக்களை வீட்டில் வளர்ப்பதும் பழக்கப்படுத்திக்கொள்வதும் மிக மிக சுலபம். இவ்விரண்டும் அல்லாமல் புறாக்களின் குடும்பத்தில் அழகழகான, வித்தியாசமான வடிவங்களில் சுமார் 310 வகை இனங்கள் உள்ளன. அனைத்துப்
புறாக்களும் உலகின் பனி, பாலைவனப் பிரதேசங்கள் தவிர்ந்த மற்ற எல்லா இடங்களிலும் வாழ்கின்றன.

22/05/2021

எனது வீட்டில் ஒரு அறை அமைத்து அதில் புறாக்களை ஆசையாக வளர்த்துவருகின்றேன். புறா வளர்ப்பின்போது அவற்றில் பல்வேறு
அற்புதங்களைக் கண்டு நான் மெய்சிலிர்த்த சந்தர்ப்பங்கள் பல உண்டு. அவற்றை இனி வரும் நாட்களில் இந்த பக்கத்தில் உங்களுடன் பரிமாறிக்கொள்ள நினைக்கின்றேன்.