18/04/2024
වරකඹය
අතීතයේ අපේ ගොවි ගෙදරක අනිවාර්යෙන්ම තිබුණු උපකරණයක්.අතීතයේ මිනිසුන් කුළු හරකුන් ඇල්ලීම සඳහා මෙන්න මේ වරකඹය භාවිතා කළා. ගමේ ගෙදර හරක් පට්ටියේ ඉඳලා,හිමිකරුට සොයාගත නොහැකිව කැලෑවෙ අතරමං වූ,වසර ගණනාවක් මිනිසුන්ගේ ග්‍රහණයෙන් මිදී,ආහාර වලින් ඉතා පුෂ්ටිමත් ව හැදුනු ශරීරයකින් යුත් ඉතා ශක්තිමත් එමෙන්ම මිනිසුන්ට ඉතා කුළු ගවයින් ,කුළු හරකුන් යැයි කියනවා.
මෙන්න මේ වගේ කුළු හරකුන් අතීතයේ කැලෑවල,ඉතා විශාල රංචු වශයෙන් සිටි බව කියවෙනවා.ඉතින් මේ විශාල ශක්තියකින් යුත් හරකුන්,අල්ලා ගැනීමට අල්ලාගෙන මිනිසුන්ට හීලෑ කර ගැනීමට මෙන්න මේ වර කඹය උදව් වෙනවා.බැලූ බැල්මට කඹයක් යයි පෙනෙන මේ වර කඹය, ගෝනුන් තිහකගේ සහ මීමින්නන් සියයකගේ හම යොදාගෙන තමයි වියලා තියෙන්නේ.කුළු හරකෙකු මෙල්ල කිරීමට මෙච්චර ශක්තියක් අවශ්‍ය කුමටදැයි දැන් ඔබට වැටහෙනවා ඇති.
මෙම වර කඹයේ එක් කෙරවලක දෙබලක් ආකාරයෙන් ඇති ගෝන අඟක් සහ,අනෙක් කෙළවරේ මන්ඳක් සහිත වෙනවා.ගමේ ගෙදර හරක් පට්ටියේ සිටින,මිනිසුන්ට ඉතා හීලෑ ගව ළඳක් තමයි මේ සඳහා යොදා ගන්නේ.කුළු හරකුන් ඉන්නා ඉසව්වට මෙම හීලෑ මීදෙන සමග, වර කඹයත් රැගෙන මිනිසුන් යනවා.තනිවුනු කුළු හරකෙක් ඉන්නා ඉසව්වට මෙම එළදෙන රැගෙන යාම මෙම එළදෙනගේ භාරකරුගේ දක්ෂතාවය මත තීරණය වෙනවා.
නාඹර වයසේ මීදෙනක් එනවිට කුළු හරකා කිසිම ලෙසකින් කුලප්පු වන්නේ නැහැ.එළදෙනට මුවාවී වර කඹයත් රැගෙන යන මිනිසා හීලෑ එලදෙන සමඟ මුවාවී කුළු හරකාට ඉතා සමීපයටම මේ මීදෙන මෙහෙයවනවා.කුළු හරකාට ඉතා සමීප වූ පසු මිනිසා වරකඹයේ ඇති මද්ද කුළු හරකාගේ කකුලට ඉතා පරිස්සමෙන් දමා හිර කරනු ලබනවා(මෙම හිර කිරීමේදී මන්තරයක් සමග හිර කරන බව පැරැන්නන්ගේ මතයක් සහ පැරැන්නන්ගේ කතාවක් තිබෙනවා)කකුලට මන්ද හිර වූ ගමන් කුළු හරකා ඉතා කලබල වී ඉතා වේගයෙන් දුවන්නට පටන් ගන්නවා.
මිනිසා විසින් තමාගේ දෑතේ තිබු වර කඹය මුදාහරිනු ලබනවා.කැලෑවේ බොහෝදුර කකුලට හිර වූ මද්දත් සමග පිටුපසින් ඇදෙන දෙබලක් වැනි ගෝන අගත් සමග කුළු හරකා දිව යනවා.කුඩා ගසේ සිට විශාල ගස දක්වා තමා පිටුපසින් ඇදෙන මෙම ගෝන අග පොඩි පොඩි ගස් උදුරාගෙන කුළු හරකාගේ ශක්තිය හීනවී යන තුරු ඇදී යනවා.කකුලට හිර වූ මන්දද එන්න එන්නම හිරවෙනවා.පිටුපසින් ඇදෙන දෙබල කුළු හරකාගේ ශක්තිය හීන වූ පසු කොහේ හෝ ගසක පැටලී කුළු හරකා මෙල්ල වෙනවා.හීලෑ මීදෙනත් සමග කුළු හරකාගේ මාර්ගය පිටුපස, ඇදුනු ගෝන අගේ උදව්වෙන් මිනිසා විසින් සොයා ගන්නවා.
සමහර විට මෙයට දින දෙකක වගේ කාලයක් ගත වනවා වන්නට පුළුවන. ඉතා දුබල වී සිටින කුළු හරකා හීලෑ මීදෙන ගේ කරේ බැද මිනිසා විසින් තමාගේ ගැමි ගෙදරට අරගෙන එනවා. ඔන්න ඔය දේ තමයි මෙන්න මේ වරකඹයෙන් සිදුවන්නේ...මෙයටම *පය මන්ද* කියා ද කියනවා... වචන වල වැරදි තියෙන්න පුළුවන් එසේ වීනම් සමාවෙන්න .. මෙයින් දෙයක් ඉගෙන ගත්තා නම් එය මට සතුටක්🙏🙏මේ මගේම නිවසේ මගේ පියා විසින් ඉතා පරිස්සමෙන් සංරක්ෂණය කරන ලද වරකඹයයි...
මෙම සටහන සහ පින්තූරය අන්තර්ජාලයෙන් උපුටාගත් අතර එහි සම්පූර්ණ අයිතිය සහ එහි වටිනාකම් ඒවායේ මුල් අයිතිකරුවන් වෙත හිමිවියයුතු වේ.
